Nos Lo Hala Serka Dios ora Nos Siña Konos’é

Nos Kreador no ta djis poderoso, e tin bunita kualidat tambe. Ademas, e ke pa nos siña tokante dje i bira su amigu. (Huan 17:3; Santiago 4:8) P’esei, el a laga nos sa hopi kos tokante dje.

Nos Kreador Tin un Nòmber

“Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos, i pa motibu di bo boluntat nan ta eksistí i a ser kreá.”—REVELASHON 4:11.

Beibel ta siña ku Yehova ta e úniko Dios berdadero. El a krea universo i tur loke ta biba den dje. Ta e so meresé nos adorashon.

Yehova Ta un Dios Amoroso

Nòmber di Yehova, e Kreador, skirbí na hindi, punjabi, gujarati, telugu, tamil, i papiamentu.

“Dios ta amor.”—1 HUAN 4:8.

Yehova ta usa Beibel i e kosnan ku el a krea pa siña nos ki tipo di persona e ta. Amor ta su kualidat di mas importante. Tur loke e ta hasi ta motivá pa amor. Mas nos siña tokante Yehova, mas nos lo stim’é.

Yehova Ta un Dios Ku Ta Kla pa Pordoná

“Bo ta un Dios di pordon.”—NEHEMÍAS 9:17.

Yehova sa ku nos ta imperfekto, p’esei e ta kla pa pordoná nos. Ora nos pidi Yehova pa pordoná nos i nos ta hasi nos bèst pa stòp di hasi loke ta malu, lo e pordoná nos. E no ta sigui kastigá nos pa e pikánan ku nos a kometé den pasado.—Salmo 103:12, 13.

Yehova Ke pa Nos Hasi Orashon na Dje

“SEÑOR ta serka di tur esnan ku ta sklama na dje . . . E lo tende nan sklamashon.”—SALMO 145:18, 19.

Nos no mester di un seremonia spesial, imágen ni otro opheto pa adorá Yehova. E ta skucha nos orashonnan meskos ku un mayor amoroso ta skucha su yunan.