Adora Jehova cu Man Limpi

Bou di inspiración, e salmista David a canta: “Lo mi laba mi mannan den inocencia mes, i siguramente lo mi marcha rond di bo altar, O Jehova.”—Salmo 26:6.

Ora David a componé e palabranan aki, e por tabata refiriendo n’e custumber di Israel su sacerdotenan levita pa subi n’e subida dje altar i despues pone nan sacrificionan riba e candela. Pero promé cu efectuá e acto di adoracion aki, e sacerdotenan mester a laba nan man i pia. Esaki no tabata un detaye menor. Keda sin dal e paso preliminario aki lo por a costa un sacerdote su bida!—Exodo 30:18-21

Labamentu figurativo ta resultá den limpiesa spiritual i moral. (Isaías 1:16; Efesionan 5:26) Jehova kier pa nos ‘marcha rond di su altar’ awe sirbiend’e. Pero e ta rekerí pa nos hasi esei cu man limpi — manera David a expres’é, mannan cu ta labá “den inocencia mes.” Esaki no ta un rekisito di poco importancia, pasobra esnan cu ta practicá sushedad lo no heredá e Reino di Dios. (Galationan 5:19-21) Un bida haciendo obranan piadoso no ta duna un persona permit pa enbolbé su mes den conducta inmoral. P’esei apostel Pablo a skirbi: “Mi ta dominá mi curpa i ta conducié como esclabo, pa, después cu mi a predicá na otronan, mi mes no bira desaprobá di algun manera.”—1 Corintionan 9:27.

Esnan cu ta busca aprobacion divino i berdadero felicidad mester sirbi Jehova cu man limpi. Mescos cu David, nan ta cana “cu integridad di curason i cu rectitud.”—1 Reynan 9:4.