Mi Rabia of Mi Salú?

KEN no ta rabia? E ta sosodé cu nos tur. Tin bes un midí di rabia por ta hustificá. Pero, onestamente, no ta berdad cu hopi bes no tin hustificacion pa nos rabia (of su intensidad)?

Bijbel ta bisa nos: “Laga rabia para i bandoná furia; no mustra bo mes excitá solamente pa haci malu.” (Salmo 37:8) Con sabí tal conseho ta? E por afectá bo salú riba término largu?

Den su rúbrica di “Salú”, The New York Times a skirbi:

“Hende cu hopi biaha ta explotá den furia hostil of cu ta sinta consumí riba cada supuesto ofensa kisas ta bayendo mas aleu cu haci nan mes hende desagradabel. Nan por ta matando nan mes.

“Investigadornan a colectá un abundancia di dato últimamente mustrando cu rabia crónico ta asina dañoso p’e curpa cu, como factor di rísico poderoso pa morto prematuro, e ta cai den categoria cu, of asta ta superá humamentu di cigaria, gordura i un dieta di hopi vet.

“‘Nos studionan ta indicá cu rabia hostil i sospechoso ta igual cu cualkier otro peliger pa salú cu nos sa di dje,’ segun Dr. Redford Williams, un investigador den medicina di comportacion n’e Centro Médico di Universidad di Duke.”

Studionan ta indicá cu esnan cu ta haci tur pieu bira baca ta producí mas hormon di tension. Nan explosionnan frecuente por causa un desekilibrio entre e formanan di colesterol protectivo i dañoso, exponiendo nan na rísico di malesa di curason i di ader.

Algun por contestá, ‘Pero t’asina mi ta’ of, ‘T’asina m’a lanta.’ Sin embargo, esei no kier men cu bo no por cambia, dor di purba sinceramente di aplicá e conseho di Dios. Chek den bo mes Bijbel su conseho tocante rabia i furia registrá na Proverbio 14:29, 30; 22:24, 25; Efesio 4:26; Santiago 1:19, 20.

Aplicando e sabiduria divino ei por mehorá bo salú i alargá bo bida. Revista Times a skirbi: “Hopi investigador a bisa cu hende incliná na rabia lo por reducí e rísico di mortalidad prematuro dor di stop di reaccioná automáticamente cu hostilidad.”