‘Den Dios Lo Mi Tuma Refugio’

DEN e ‘tempu crítico aki, duru pa trata cuné,’ tentacionnan i presionnan ta aumentando mas i mas. Nos onestidad, por ehempel, por ser poné na prueba na nos trabou. Nos coleganan di scol por tenta nos pa cai. I e mundu moralmente corupto hopi biaha ta pone nos integridad na prueba.—2 Timoteo 3: 1-5.

E escritor bíblico Asaf tambe a biba den un tempu ora maldad a florecé. Algun di su contemporáneonan asta tabata broma tocante nan conducta malbado. “Orguyo a sirbi como un cadena di garganta pa nan,” Asaf a skirbi. “Violencia ta tapa nan manera un paña. Nan ta haci mofa i ta papia di loke ta malu; en cuanto cometé fraude nan ta papia den un estilo halsá.” (Salmo 73:6, 8) E actitud aki ta zona conocí?

Pa esnan cu ta deseá di haci loke ta corecto, un conducta asina ta causa hopi angustia, asta desanimacion. “Mi a yega di ta plagá henter dia,” Asaf a lamentá. “E tabata un cos trabahoso den mi bista.” (Salmo 73:14, 16) Tal bes bo ta sinti mescos, pero no desesperá! Asaf tabata capas pa enfrentá e maldad di su tempu, i bo tambe por di igual manera. Pero con?

Asaf a bin realisá cu berdadero husticia ta casi imposibel pa haña bou dje mando imperfecto di hende. (Salmo 146:3, 4; Proverbionan 17:23) Pues en bes di malgastá su tempo, energia i recursonan precioso tratando na eliminá tur e maldad rond di dje, el a concentrá riba su relacion cu Dios. Asaf a declará: “En cuanto ami, halando cerca Dios ta bon pa mi. Den e Señor Soberano Jehova mi a pone mi refugio.”—Salmo 73:28.

Awe, esnan cu ta enbolbé nan den prácticanan corupto di negoshi hopi biaha ta disfrutá di bentahanan material. Hopi asta por broma di nan falta di respet pa Dios su Ieynan moral. Pero nan lo no prevalecé pa tempu indefiní. “Siguramente riba suela cu ta slep ta caminda bo ta pone nan,” Asaf a remarcá. “Bo a laga nan cai den ruina.”—Salmo 73:18.

Sí, n’e debido tempu di Dios, engaño, violencia i corupcion, i tambe tur e otro prácticanan malbado cu cristiananan berdadero tin di evitá, lo ser eliminá. Bijbel ta primintí: “Malechornan mes lo ser cortá, pero esnan cu to spera den Jehova ta esnan cu lo poseé e tera.” (Salmo 37:29) Miéntras tantu, laga nos resoná e palabranan dje salmista cu a bisa: “Jehova ta mi baranca i mi fortalesa i e Percurador di escape pa mi. Mi Dios ta mi baranca. Lo mi tuma refugio den dje.“—Salmo 18:2.