Un Lampi pa Guiá Bo riba e Caminda di Bida

“MI SA masha bon, O Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso.” (Jeremías 10:23) Cu e palabranan aki profeta Jeremías a mustra cu sin yudansa hende no por hiba nan bida den bon caminda. Unda por haña e yudansa ei? E salmista ta contestá esei den su oracion na Jehova Dios: “Bo palabra ta un lampi pa mi pia, i un lus pa mi caminda.”—Salmo 119:105.

Esnan cu ta cuminsá cu un studio dje Palabra di Dios, e Bijbel Santu, i ta aplicá loke e ta bisa lo ta manera un persona cu ta cuminsá un biahe mainta trempan. Na promé instante, e no por mira mashá pasobra ta scur. Pero segun cu solo cuminsá sali, e ta mira mas i mas cos. Finalmente, solo ta briya regt riba su cabes. E ta mira tur cos cu tur detaye. Un ilustracion asina ta corda nos dje proverbio bíblico: “E caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.”—Proverbionan 4:18.

Kico di esnan cu ta rechasá e guia di Dios? Bijbel ta bisa: “E caminda dje malbadonan ta mescos cu tiniebla; nan no a sa riba kico nan ta sigui trompecá.” (Proverbionan 4:19) Sí, e malbadonan ta mescos cu un hende cu ta trompecá den scuridad. Asta nan aparente éxitonan a lo sumo ta temporal, pasobra “no tin sabiduria, ni ningun dicernimentu, ni ningun conseho na oposicion cu Jehova.”—Proverbionan 21:30.

P’esei, sigui e guia dje Palabra di Dios, e Bijbel. Si bo haci esei, lo bo ripará cu e palabranan di Proverbionan 3:5, 6 ta cierto: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.”