Congreso di Distrito 2002 di Testigonan di Jehova “Proclamadónan Celoso dje Reino”

¹ “Mi a alegrá ora nan tabata bisa mi: ‘Laga nos ban n’e cas di Jehova.’ ” (Sal. 122:⁠1) Examiná e expresion ei dje salmista. Ripará (1) con el a sinti ora nan a invit’é pa ban adorá Jehova, (2) e bon compañeronan cu e tabatin, kendenan tambe tabata masha interesá den adoracion berdadero i (3) e preparacion cu lo mester tabatin pa por a extendé e invitacion, reuní huntu i haci e biahe p’e cas di Dios.

² E palabranan dje salmista no ta reflehá loke nos tambe ta sinti ora nos tende cu rumannan ta haciendo preparacion pa nos siguiente congreso? Nos ta yena cu expectativa ora nos corda riba e goso cu nos a ricibí na congresonan anterior i e prospecto di bini huntu atrobe na un reunion special cu compañeronan cu tambe stima Jehova. E organisacion a haci areglo pa na aña 2002 tene congresonan di distrito di tres dia cu e tema “Proclamadónan Celoso dje Reino” na Aruba i Kòrsou. Awor ta tempu pa nos traha plan pa asistí i ricibí e mayor beneficio dje bankete spiritual cu ta spera nos.

³ “E fiel mayordomo, esun discreto,” a cuminsá prepará e alimento spiritual oportuno cu lo bai sirbi n’e congreso. (Luc. 12:42) Cada congregacion a ser asigná na un congreso specífico pa asina evitá demasiado hende na un sitio di congreso. Ademas, hopi ruman homber a cuminsá organisá e vários departamentonan di congreso, ya “tur cos [ta] tuma lugá decentemente i segun areglo.” (1 Cor. 14:40) Siendo cu tin asina hopi cos caba prepará pa nos beneficio i cumbinencia, kico nos por haci personalmente pa prepará p’e congreso?

⁴ Planea Awor pa Asistí na Tur Tres Dia: Bo tin cu pidi bo doño di trabou liber pa asistí na bo congreso asigná? Jehova ta comprendé cu tin doño di trabou cu ta “difícil pa agradá.” (1 Ped. 2:18) Pero nos congresonan ta masha importante, i nos kier haci un esfuerso diligente pa asistí na henter e programa. Papia cu Jehova den oracion tocante e asuntunan ei, buscando su guia pa bo haña un bon resultado.​—⁠Neh. 2:⁠4.

⁵ Wak Rond den Congregacion: Si nos sa cu un ruman tin un necesidad físico of material cu kisas ta haci difícil p’e asistí na congreso, ta posibel pa nos “hancha” nos amor i duna un man? (2 Cor. 6:​12, 13; Deu. 15:⁠7) E ancianonan i otro rumannan den congregacion cu sa di tal necesidad, amorosamente por yuda haci areglo. Esaki ta e spiritu cu Pablo a animá na 2 Corintionan 8:14. Pakico no invitá e rumannan ei pa bai congreso huntu cu bo? Si nan ta pionero, probablemente nan tin hopi experencia bon cu nan por conta na caminda. Si nan ta miembronan di edad dje congregacion, kisas nan tabatin un bida teocrático maraviyoso cu nunca bo a tende di dje. Asociacion cu e rumannan aki lo no tin un bon influencia riba bo i bo famia? Nan lo apreciá bo spiritu generoso i Jehova lo recompensá bo.​—⁠Pro. 28:27; Mat. 10:⁠42.

⁶ Ofrecé Bo Mes Como Boluntario: Durante congreso, tin decenas di boluntario ta yuda pa e departamentonan por funcioná suavemente. Ushernan den auditorio i riba parkeerplaats ta duna direccion pa lugá di sinta i ta vigilá nos vehículonan durante dia. E Departamento di Limpiesa tin e privilegio di mantené nos reputacion di ta hende limpi na haltu dor di laga nos lugá temporal di adoracion mas limpi cu nos a hañ’é. Nos por yuda e departamentonan aki of cualkier otro departamento cu tin mester di nos apoyo? Lo bo ofrecé bo yudansa pa sirbi “scouder cu scouder” cu bo rumannan?​—⁠Sof. 3:⁠9.

⁷ Realmente Hende Ta Ripará Kico Nos Ta Haci? Aña pasá durante un congreso di distrito, un homber cu a stop di studia cu Testigonan di Jehova mas cu 20 aña pasá tabata traha den un hotel. El a conta algun Testigo cu e ta pensando pa reanudá su studio di Bijbel i cuminsá bai reunion atrobe. Di con? Debí n’e manera amoroso cu el a ser tratá durante e dianan cu e Testigonan a keda n’e hotel.

⁸ Un bendedó di hotel a bisa di nos rumannan: “Boso ta e mihó grupo cu ta hospedá na nos hotelnan. Boso hendenan tin hopi pacenshi i bon manera.” Ora nos Tata celestial ta mira nos ta obedecé Jesus su spiertamentu di “laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu,” esta orguyoso esaki mester ta hacié!​—⁠Mat. 5:⁠16.

⁹ Pues laga nos reflehá e actitud di Rey David, kende yen di goso tabata ansioso pa bai na Jehova su cas di adoracion. Nos congresonan di distrito ta un fuente vital di alimento spiritual i ta un oportunidad sin igual pa asociacion amoroso. P’esei, cu entusiasmo nos ta invitá bo pa cuminsá haci bo areglonan pa asistí na tur sesion di tur e tres dianan dje Congreso di Distrito “Proclamadónan Celoso dje Reino” dje aña aki!

[Box on page 3]

Orario dje Programa

Diabierne i Diasabra

9:30 a.m. - 5:00 p.m.

Diadomingo

9:30 a.m. - 4:00 p.m.