Rayonan di Lus Den Tempu Apostolico

“Lus mes a briya pa e hustu, i alegria asta pa e rectonan di curason.”—SALMO 97:11.

1. Con Testigonan di Jehova awe ta parce e cristiannan di promé?

CUANTU nos, como cristiannan berdadero, ta apreciá e palabranan di Salmo 97:11! ‘Lus a briya’ riba nos bes tras bes. En berdad, algun di nos a mira Jehova su iluminacion resplandeciente pa décadanan. Tur esaki ta recordá nos di Proverbionan 4:18, cu ta bisa: “E caminda dje hustunan ta manera e lus briyante cu ta birando mas i mas cla te ora e dia ta firmemente establecí.” Ya cu nos ta balorá e Scritura mas cu tradicion, nos como Testigonan di Jehova ta parce e cristiannan di promé. Nan actitud por ser mirá claramente for dje bukinan histórico dje Scritura Griego Cristian i for di su cartanan, skirbí bou di inspiracion divino.

2. Kico tabata entre e promé rayonan di lus cu Jesus su siguidornan a ricibí?

² Entre e promé rayonan di lus cu Jesucristo su siguidornan di promé a ricibí tabata esnan tocante e Mesías. Andres a bisa su ruman Simon Pedro: “Nos a haña e Mesías.” (Juan 1:41) Algun tempu despues, e Tata den cielu a capacitá apostel Pedro pa duna testimonio di esei ora el a bisa Jesucristo: “Abo ta e Cristo, e Yu di e Dios bibu.”—Mateo 16:16, 17; Juan 6:68, 69.

Lus Relacioná cu Nan Comision di Predicá

3, 4. Despues di Jesus su resureccion, ki iluminacion el a duna su siguidornan relacioná cu nan futuro actividad?

³ Despues di su resureccion, Jesucristo a duna rayonan di lus relacioná cu un obligacion cu ta riba tur su siguidornan. Cu tur probabilidad tabata n’e 500 disipelnan cu a reuní na Galilea cu el a bisa: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso. I, mira! mi ta cu boso tur dia te na e conclusion dje sistema di cosnan.” (Mateo 28:19, 20; 1 Corintionan 15:6) Despues di esei, tur siguidor di Cristo mester tabata predicador, i nan comision di predicá no mester tabata limitá na “e carnénan perdí dje cas di Israel.” (Mateo 10:6) Tampoco nan mester a efectuá e bautismo di Juan como símbolo di repentimentu pa pordon di picá. Mas bien, nan mester a bautisá hende “den e nomber dje Tata i dje Yu i dje spiritu santu.”

⁴ Djis promé cu Jesus a subi na cielu, su 11 fiel apostelnan a puntra: “Señor, bo ta restorá e reino na Israel n’e tempu aki?” En bes di contestá e pregunta ei, Jesus a duna mas instruccion tocante nan comision di predicá, bisando: “Boso lo ricibí poder ora e spiritu santu yega riba boso, i boso lo ta testigo di mi tantu den Jerusalem como den tur Hudea i Samaria i te n’e parti mas lehano dje tera.” Te cu e tempu ei, nan tabata testigo únicamente di Jehova, pero awor nan lo ta testigonan di Cristo tambe.—Echonan 1:6-8.

5, 6. Ki rayonan di lus Jesus su disipelnan a ricibí na Pentecoste?

⁵ Solamente dies dia despues, ki rayonan di lus briyante Jesus su siguidornan a ricibí! Riba e dia di Pentecoste di 33 E.C., pa promé bes, nan a comprendé plenamente e nificacion di Joël 2:28, 29: “Lo mi [Jehova] drama mi spiritu riba tur sorto di carni, i bo yunan homber i bo yunan muher siguramente lo profetisá. En cuanto bo hombernan bieu, soñonan nan lo soña. En cuanto bo hombernan hóben, visionnan nan lo mira. I asta riba e criánan homber i riba e criánan muher den e dianan ei lo mi drama mi spiritu.” Jesus su disipelnan a mira e spiritu santu, den forma di lenga como si fuera di candela, riba cabes di nan tur—rond di 120 homber i muher—reuní den Jerusalem.—Echonan 1:12-15; 2:1-4.

⁶ Tambe riba e dia di Pentecoste, e disipelnan a comprendé pa promé biaha cu e palabranan di Salmo 16:10 a aplicá na Jesucristo resucitá. E salmista a bisa: “Abo [Jehova Dios] lo no laga mi alma den Sheol. Lo bo no permití bo leal mira e buracu.” E disipelnan a realisá cu e palabranan ei no por a aplicá na Rey David, pasobra su graf tabata cu nan te n’e tempu ei. Nada straño cu rond di 3.000 di esnan cu a tende e splicacion dje lus nobo aki tabata asina convencí cu nan a ser bautisá riba e dia ei mes!—Echonan 2:14-41.

7. Ki lus briyante apostel Pedro a ricibí durante su bishita n’e oficial di ehército romano, Cornelio?

⁷ Pa hopi siglo, e israelitanan a apreciá loke Dios a bisa tocante nan: “Boso so mi a conocé for di tur e famianan dje suela.” (Amos 3:2) Pues en berdad tabata un rayo di lus briyante cu apostel Pedro i esnan cu tabata compañand’e p’e cas dje oficial di ehército romano, Cornelio, a ricibí ora e spiritu santu pa promé bes a baha riba creyentenan gentil incircuncidá. Ta notabel cu esaki tabata e único biaha cu e spiritu santu a ser duná promé cu bautismo. Pero e mester a bai asina. Di otro manera, Pedro lo no tabata sa cu e gentilnan incircuncidá aki tabata cualificá pa bautismo. Comprendiendo plenamente e nificacion dje fenómeno aki, Pedro a puntra: “Tin hende cu por nenga awa pa esakinan [gentilnan] no ser bautisá, kendenan a ricibí e spiritu santu mescos cu nos?” Naturalmente, ningun hende presente por tabatin un bon motibu pa oponé, i p’esei e bautismo dje gentilnan aki a tuma lugá.—Echonan 10:44-48; compará cu Echonan 8:14-17.

Ningun Circuncision Mas

8. Pakico algun cristian di promé a haña ta difícil pa bandoná e siñansa di circuncision?

⁸ Un otro lus briyante mas dje berdad a aparecé en coneccion cu e cuestion di circuncision. E custumber di circuncision a cuminsá na 1919 P.E.C. cu Jehova su pacto cu Abraham. Dios a manda Abraham e tempu ei pa e i tur otro miembro masculino di su cas ser circuncidá. (Génesis 17:9-14, 23-27) Pues circuncision a bira un marca di identificacion dje desendientenan di Abraham. I ki orguyoso nan tabata dje custumber aki! Como resultado, “incircuncidá” a bira un expresion di desprecio. (Isaías 52:1; 1 Samuel 17:26, 27) Ta fácil pa mira pakico cierto cristiannan hudiu di promé kier a retené e símbolo aki. Algun di nan tabatin un discusion bastante formal cu Pablo i Barnabas riba e asuntu aki. Pa resolvé esaki, Pablo i otro rumannan a bai Jerusalem pa consultá cu e cuerpo gobernante cristian.—Echonan 15:1, 2.

9. Ki rayonan di lus a ser revelá n’e cuerpo gobernante di promé, segun Echonan capítulo 15?

⁹ E biaha aki, no tabata pa medio di un milager obvio cu e cristiannan di promé ei a ricibí e lus cu circuncision no tabata un rekisito mas pa Jehova su sirbidornan. Mas bien, nan a ricibí tal lus aumentante dor di scudriñá e Scritura, dependiendo riba e spiritu santu pa guia, i tendiendo e experencianan di Pedro i Pablo relacioná cu e combertimentu di gentilnan incircuncidá. (Echonan 15:6-21) E decision a ser emití den un carta cu a bisa en parte: “Spiritu santu i nos mes a haña ta bon pa no pone ningun carga mas riba boso, excepto e cosnan necesario aki, pa sigui abstené di cosnan sacrificá na ídolonan i di sanger i di cosnan sofocá i di fornicacion.” (Echonan 15:28, 29) Asina e cristiannan di promé a ser librá dje mandamentu pa practicá circuncision i dje otro rekisitonan dje Ley di Moises. P’esei, Pablo por a bisa e cristiannan galatio: “Pa tal libertad Cristo a libra nos.”—Galationan 5:1.

Lus den e Evangelionan

10. Cua tabata algun dje rayonan di lus revelá den e Evangelio di Mateo?

¹⁰ No tin ningun duda cu e Evangelio di Mateo, skirbí rond di 41 E.C., ta contené hopi rayo di lus p’e beneficio di su lectornan. Comparativamente poco dje cristiannan di promé siglo personalmente a tende Jesus splica su siñansanan. E Evangelio di Mateo en particular a enfatisá cu e tema di Jesus su predicacion tabata e Reino. I ki fuertemente Jesus a enfatisá e importancia di tin e motivacion corecto! Ki un cantidad di rayonan di lus tabatin den su Sermon riba e Ceru, den su comparacionnan (manera esnan registrá den capítulo 13), i den su gran profecia den capítulo 24 i 25! Tur esakinan a ser trecé na atencion dje cristiannan di promé den e relato dje Evangelio di Mateo, skirbí solamente un ocho aña asina despues di Pentecoste 33 E.C.

11. Kico por ser bisá tocante e contenido dje Evangelionan di Lucas i Marco?

¹¹ Rond di 15 aña despues, Lucas a skirbi su Evangelio. Aunke un gran parti di dje ta similar na Mateo su relato, 59 porciento ta adicional. Lucas a registrá seis milager di Jesus i mas cu dos biaha e cantidad ei di Su ilustracionnan cu e otro escritornan di Evangelio no a mencioná. Aparentemente djis un par di aña despues, Marco a skirbi su Evangelio, poniendo énfasis riba Jesucristo como un homber di accion, un hacidor di milager. Aunke Marco a relatá principalmente sucesonan cubrí anteriormente dor di Mateo i Lucas, el a registrá un comparacion cu nan no tin. Den e ilustracion ei, Jesus a compará e Reino di Dios cu simia cu ta spruit, ta crece bira haltu i ta producí fruta gradualmente.a—Marco 4:26-29.

12. Te na ki grado e Evangelio di Juan a proveé mas iluminacion?

¹² Tambe tabatin e Evangelio di Juan, skirbí mas cu 30 aña despues cu Marco a skirbi su relato. Ki un stral di lus Juan a tira riba Jesus su ministerio, particularmente mediante hopi referencia na Su existencia prehumano! Solamente Juan ta proveé e relato dje resureccion di Lázaro, i e so ta duna nos hopi di Jesus su comentarionan excelente na su fiel apostelnan i tambe su oracion conmovedor e anochi di su traicion, manera nan ta registrá den capítulo 13 te cu 17. Realmente, ta ser bisá cu 92 porciento dje Evangelio di Juan ta único.

Rayonan di Lus den Pablo Su Cartanan

13. Pakico algun persona a considerá Pablo su carta n’e Romanonan como si fuera un Evangelio?

¹³ Apostel Pablo a ser usá specialmente pa trece rayonan dje berdad pa cristiannan cu a biba den tempu apostólico. Por ehempel, tin e carta di Pablo n’e Romanonan, skirbí rond di 56 E.C.—aproximadamente e mésun tempu cu Lucas a skirbi su Evangelio. Den e carta aki Pablo ta resaltá e echo cu hende ta ser declará hustu como resultado di Dios su bondad inmerecí i mediante fe den Jesucristo. Pablo su énfasis riba e aspecto aki dje bon nobo a pone algun hende considerá su carta n’e Romanonan como si fuera un di cincu Evangelio.

14-16. (a) Den su promé carta n’e cristiannan na Corinto, ki lus Pablo a tira riba e necesidad pa unidad? (b) Cua lus mas en cuanto conducta Promé Corintionan ta contené?

¹⁴ Pablo a skirbi tocante cierto asuntunan cu tabata molestiando e cristiannan na Corinto. Su carta n’e corintionan ta incluí hopi conseho inspirá cu a beneficiá cristiannan te den nos tempu. Pa cuminsá, e tabatin cu iluminá e corintionan en cuanto e eror cu nan tabata cometiendo dunando prominencia na cierto individuonan. E apostel a corigí nan actitud mental, bisando nan cu curashi: “Mi ta insta boso, rumannan, den nomber di nos Señor Jesucristo pa boso tur papia di acuerdo, i pa no existí division den boso, sino pa boso keda aptamente uní den e mésun mente i den e mésun forma di pensa.”—1 Corintionan 1:10-15.

¹⁵ Inmoralidad grave tabata ser tolerá den e congregacion cristian na Corinto. Ei un homber a tuma e esposa di su tata, practicando asina ‘un fornicacion manera no a ser hañá ni sikiera den e nacionnan.’ Pablo a skirbi claramente: “Saca e homber malbado for di meimei di boso.” (1 Corintionan 5:1, 11-13) Esei tabata algu nobo p’e congregacion cristian—scomulgacion. Un otro asuntu riba cua e congregacion cristian tabatin mester di iluminacion tabatin di haber cu e echo cu algun di su miembronan tabata hibando nan rumannan spiritual na tribunalnan mundano pa por resolvé ofensanan. Pablo a reprendé nan fuertemente pa hacimentu di esaki.—1 Corintionan 6:5-8.

¹⁶ Un otro asuntu mas cu a plaga e congregacion na Corinto tabatin di haber cu relacionnan sexual. Den 1 Corintionan capítulo 7, Pablo a mustra cu debí n’e prevalencia di inmoralidad sexual, lo ta bon pa tur hende homber tin su propio esposa i tur hende muher tin su propio esposo. Tambe Pablo a mustra cu aunke personanan soltero por sirbi Jehova cu ménos distraicion, no tur tabatin e don di solteria. I si e esposo di un muher a muri, e tabata liber pa casa atrobe pero “solamente den Señor.”—1 Corintionan 7:39.

17. Ki lus Pablo a tira riba e siñansa di resureccion?

¹⁷ Ki rayonan di lus e Señor a usa Pablo pa tira riba resureccion! Cu ki sorto di curpa cristiannan ungí lo ser lantá? “E ta ser sembrá un curpa físico, e ta ser lantá un curpa spiritual,” Pablo a skirbi. Ningun curpa carnal lo ser tumá na cielu, pasobra “carni i sanger no por heredá e reino di Dios.” Pablo a agregá cu no ta tur esnan ungí lo drumi den morto, pero cu durante e presencia di Jesus algun lo ser lantá na bida inmortal instantáneamente ora nan muri.—1 Corintionan 15:43-53.

18. Ki lus relacioná cu e futuro Pablo su promé carta n’e Tesalonicensenan ta contené?

¹⁸ Den su carta n’e cristiannan na Tesalónica, Pablo a ser usá pa tira lus riba e futuro. E dia di Jehova lo bini mescos cu un ladron den anochi. Tambe Pablo a splica: “Ki ora cu nan ta bisando: ‘Pas i siguridad!’ anto destruccion di ripiente lo ser riba nan instantáneamente mescos cu e dolor di angustia riba un muher na estado; i nan lo no scapa di ningun manera.”—1 Tesalonicensenan 5:2, 3.

19, 20. Ki rayonan di lus e cristiannan na Jerusalem i Hudea a ricibí den Pablo su carta n’e Hebreonan?

¹⁹ Skirbiendo su carta n’e hebreonan, Pablo a comunicá rayonan di lus n’e cristiannan di promé na Jerusalem i Hudea. Ki poderosamente el a mustra e superioridad dje sistema cristian di adoracion riba e sistema di adoracion segun Moises! En bes di sigui e Ley comunicá mediante angelnan, cristiannan tin fe den un salbacion papiá promé dor dje Yu di Dios, kende ta muchu mas superior cu mensaheronan angelical. (Hebreonan 2:2-4) Moises tabata un simpel sirbidor den e cas di Dios. Sin embargo, Jesucristo ta presidí riba henter e cas. Cristo ta un sumo sacerdote segun e ordu di Melkísedec, teniendo un posicion muchu mas superior cu e sacerdocio arónico. Pablo a mustra tambe cu e israelitanan no por a drenta den e sosiegu di Dios debí na falta di fe i obedencia, pero cristiannan ta drenta den dje debí na nan fieldad i obedencia.—Hebreonan 3:1–4:11.

²⁰ Anto, tambe, e pacto nobo ta muchu mas superior cu e pacto di Ley. Manera a ser profetisá 600 aña mas promé na Jeremías 31:31-34, esnan den e pacto nobo tin e ley di Dios skirbí den nan curason i ta disfrutá di berdadero pordon di picá. En bes di tin un sumo sacerdote cu mester a ofrecé sacrificio anualmente pa su mes picánan i pa esnan dje pueblo, cristiannan tin Jesucristo como nan Sumo Sacerdote, kende ta sin picá i kende un bes pa semper a ofrecé un sacrificio pa picánan. En bes di drenta un lugá santu trahá cu man pa presentá su ofrenda, el a drenta cielu mes, pa aparecé ei dilanti e persona di Jehova. Ademas, sacrificionan di animal bou dje pacto di Ley di Moises no por a kita picá completamente, sino nan lo no a ser ofrecí tur aña. Pero e sacrificio di Cristo, ofrecí un bes pa semper, sí ta kita picá. Tur esaki ta tira lus riba e gran tempel spiritual, di cua e resto ungí i e “otro carnénan” ta sirbi awe den su pationan.—Juan 10:16; Hebreonan 9:24-28.

21. Kico e consideracion aki a mustra en cuanto e cumplimentu di Salmo 97:11 i Proverbionan 4:18 den tempu apostólico?

²¹ No tin suficiente espacio pa cita mas ehempel, manera e rayonan di lus cu ta ser hañá den e cartanan di apostel Pedro i esnan dje disipelnan Santiago i Hudas. Pero loke a ser considerá aki mester ta suficiente pa mustra cu Salmo 97:11 i Proverbionan 4:18 tabatin cumplimentu remarcabel den tempu apostólico. E berdad a cuminsá avansá for di modelo i sombranan pa cumplimentu i realidadnan.—Galationan 3:23-25; 4:21-26.

22. Kico a sosodé despues di morto dje apostelnan, i kico e siguiente artículo lo mustra?

²² Despues dje morto di Jesus su apostelnan i e comienso dje apostasia profetisá, e lus dje berdad a lusa masha flou. (2 Tesalonicensenan 2:1-11) Sin embargo, segun e promesa di Jesus, despues di hopi siglo e Doño a regresá i a haña “e esclabo fiel i discreto” dunando e “domésticonan” nan alimento n’e debido tempu. Como resultado, Jesucristo a nombra e esclabo ei “riba tur su pertenencianan.” (Mateo 24:45-47) Ki rayonan di lus a sigui? Esaki lo ser considerá den e siguiente artículo.

[Notanan]

Rayonan di Lus—Grandi i Chikitu (Parti Un)

“E caminda dje hustunan ta manera e lus briyante cu ta birando mas i mas cla te ora e dia ta firmemente establecí.”—PROVERBIONAN 4:18.

1. Pakico e berdad a ser revelá gradualmente?

TA PRUEBA di sabiduria divino cu, na armonia cu Proverbionan 4:18, e revelacion di berdadnan spiritual a tuma lugá gradualmente pa medio di rayonan di lus. Den e artículo anterior, nos a mira con e texto aki a ser cumplí den tempu apostólico. Si e gran conhunto di berdad bíblico a ser revelá di golpi, lo el a blendu nos i confundí nos—e mésun efecto di sali for di un cueba scur i topa cu lus di solo briyante. Ademas, berdad revelá gradualmente ta fortalecé e fe di cristiannan den un manera continuo. E ta haci nan speransa cada bes mas briyante i e caminda cu nan mester cana cada bes mas cla.

“E Esclabo Fiel i Discreto”

2. Ken Jesus a indicá cu lo e usa pa trece lus spiritual na su siguidornan, i di ken e agencia ei ta consistí?

² Den tempu apostólico Jesucristo a scoge pa usa medionan sobrenatural pa duna su siguidornan e promé rayonan di lus. Nos tin dos ehempel di esaki: Pentecoste 33 E.C. i e combertimentu di Cornelio na 36 E.C. Mas despues, Cristo a scoge pa usa un agencia humano, net manera el a profetisá: “Ken realmente ta e esclabo fiel i discreto cu su doño a nombra riba su domésticonan, pa duna nan nan alimento n’e debido tempu? Felis e esclabo ei ta si su doño ora e yega ta hañ’é haciendo asina. Di berdad mi ta bisa boso, Lo e nombr’é riba tur su pertenencianan.” (Mateo 24:45-47) E esclabo aki no por tabata djis un solo individuo pasobra e mester a percurá alimento spiritual for di ora cu e congregacion cristian a cuminsá na Pentecoste te ora e Doño, Jesucristo, a bini pa regla cuenta. E echonan ta indicá cu e clase di esclabo fiel i discreto aki ta consistí di tur cristian ungí como un grupo riba tera na cualkier momento dado.

3. Ken tabata incluí entre e promé miembronan dje clase di esclabo?

³ Ken tabata incluí entre e promé miembronan dje clase di esclabo fiel i discreto? Un di nan tabata apostel Pedro, kende a haci caso dje mandamentu di Jesus: “Alimentá mi carné chikitunan.” (Juan 21:17) Otro dje promé miembronan dje clase di esclabo a incluí Mateo, kende a skirbi e Evangelio cu ta carga su nomber, i Pablo, Santiago, i Hudas, kendenan a skirbi cartanan inspirá. Apostel Juan, kende a skirbi e buki di Revelacion, su Evangelio i su cartanan, tambe tabata un miembro dje clase di esclabo fiel i discreto. E hombernan aki a skirbi bukinan di Bijbel na armonia cu e comision di Jesus.

4. Ken ta e “domésticonan”?

⁴ Si tur esnan ungí como grupo, sin importá unda nan ta biba riba tera, ta miembro dje clase di esclabo, ken e “domésticonan” ta? Nan ta e mésun ungínan pero mirá for di un punto di bista diferente—como individuonan. Sí, como individuonan nan lo ta dje “esclabo” of nan lo ta “domésticonan,” dependiendo di si nan ta partiendo alimento spiritual of tumando for di dje. Pa ilustrá: Segun 2 Pedro 3:15, 16, apostel Pedro ta haci referencia n’e cartanan di Pablo. Ora Pedro tabata lesando nan, e tabata manera un dje domésticonan alimentando su mes cu e cuminda spiritual percurá dor di Pablo como un representante dje clase di esclabo.

5. (a) Kico a sosodé cu e esclabo durante e siglonan despues dje apostelnan? (b) Ki desaroyonan a tuma lugá den e último mitar di siglo 19?

⁵ En coneccion cu esaki, e buki El reino de mil años de Dios se ha acercado a declará: “Exactamente con e clase di ‘esclabo fiel i discreto’ a existí i a sirbi atrabes dje siglonan despues di morto dje apostelnan dje Doño Jesucristo, nos no tin un registro histórico claro. Aparentemente un generacion dje clase di ‘esclabo’ a alimentá e siguiente generacion despues di dje. (2 Timoteo 2:2) Pero den e último parti di siglo diesnuebe tabatin personanan temeroso di Dios kendenan a stima e alimento spiritual dje Bijbel Santu i kendenan a deseá di alimentá nan mes cuné . . . Gruponan di studio di Bijbel a ser formá i a progresá den e comprendimentu dje berdadnan fundamental dje Scritura Sagrado. Esnan sincero i inegoista entre e studiantenan di Bijbel aki tabata ansioso pa compartí e porcionnan vital aki di alimento spiritual cu otronan. Nan tabatin e spiritu fiel dje ‘esclabo’ nombrá pa duna e ‘domésticonan’ e ‘alimento spiritual necesario n’e debido tempu.’ Nan tabata ‘discreto’ pa dicerní cu e tempu ei tabata e bon i debido tempu i cua tabata e mihó medionan pa sirbi e alimento. Nan a haci esfuerso pa sirbi’é.”—Página 344-6.a

Promé Rayonan di Lus den Tempu Moderno

6. Ki echo ta destacá prominentemente en coneccion cu e revelacion gradual dje berdad?

⁶ Un echo cu ta destacá prominentemente en coneccion cu esnan cu Jehova a usa pa trece e aumento gradual aki di lus spiritual ta cu nan no a tuma onor pa nan mes. E actitud di C. T. Russell, promé presidente di Watch Tower Society, tabata cu e Señor tabata contentu pa usa nan humilde talentonan. Relacioná cu bijnaam ofensivo cu su enemigunan tabata incliná pa usa, Ruman Russell a duna di conocé masha cla cu e nunca a topa un “russellita” i cu “russellismo” no ta existí. Tur onor a bai pa Dios.

7. Ki evidencia Ruman Russell i su colaboradornan a duna cu nan en berdad tabata asociá cu e esclabo fiel i discreto?

⁷ Husgando a base dje resultadonan, no por tin duda cu Jehova su spiritu santu tabata dirigiendo e esfuersonan di Ruman Russell i esnan asociá cuné. Nan a duna evidencia di tabata asociá cu e esclabo fiel i discreto. Aunke hopi clero dje tempu ei a bisa cu nan ta kere cu e Bijbel tabata e Palabra inspirá di Dios i cu Jesus tabata e Yu di Dios, nan a respaldá doctrinanan babilónico falsu, manera Trinidad, inmortalidad di alma humano i tormento eterno. Na armonia cu e promesa di Jesus, en berdad tabata debí n’e spiritu santu cu e esfuersonan humilde di Ruman Russell i su socionan a haci e berdad briya manera nunca promé. (Juan 16:13) E Studiantenan di Bijbel ungí ei a duna prueba cu nan en berdad tabata parti dje clase di esclabo fiel i discreto, kende su comision ta pa percurá alimento spiritual p’e domésticonan dje Doño. Nan esfuersonan tabata un gran yudansa den e recogementu di esnan ungí.

8. Ki echonan básico relacioná cu Jehova, e Bijbel, Jesucristo i e spiritu santu e Studiantenan di Bijbel a comprendé claramente?

⁸ Ta remarcabel pa mira con maraviyosamente Jehova, pa medio di spiritu santu, a faborecé e promé Studiantenan di Bijbel aki cu rayonan di lus. Pa cuminsá, nan a proba firmemente cu e Creador ta existí i cu e tin e nomber único Jehova. (Salmo 83:18; Romanonan 1:20) Nan a mira cu Jehova tin cuater atributo principal—poder, husticia, sabiduria i amor. (Génesis 17:1; Deuteronomio 32:4; Romanonan 11:33; 1 Juan 4:8) E cristiannan ungí aki a establecé claramente cu Bijbel ta Dios su Palabra inspirá i ta e berdad. (Juan 17:17; 2 Timoteo 3:16, 17) Ademas, nan a kere cu e Yu di Dios, Jesucristo, a ser creá i cu el a duna su bida como rescate pa tur humanidad. (Mateo 20:28; Colosensenan 1:15) Nan a comprendé cu e spiritu santu, leu di ta un di tres persona di un Trinidad, ta e forsa activo di Dios.—Echonan 2:17.

9. (a) Ki berdadnan e Studiantenan di Bijbel a comprendé claramente en cuanto e naturalesa di hende i e destinonan cu Bijbel ta presentá? (b) Ki otro berdadnan Jehova su sirbidornan a mira claramente?

⁹ E Studiantenan di Bijbel a mira claramente cu hende no tin un alma inmortal sino cu e ta un alma mortal. Nan a realisá cu “e salario cu picá ta paga ta morto,” no tormento eterno, ya cu no tin un lugá manera un fiernu di candela. (Romanonan 5:12; 6:23; Génesis 2:7; Ezekiel 18:4) Ademas, nan a mira claramente cu e teoria di evolucion no solamente ta anti-bíblico sino completamente sin berdadero base. (Génesis, capítulo 1 i 2) Tambe nan a dicerní cu Bijbel ta presentá dos destino—unu celestial pa e 144.000 siguidor ungí dje pasonan di Cristo i un tera paradísico pa un “multitud grandi” sin límite di “otro carnénan.” (Revelacion 7:9; 14:1; Juan 10:16) E promé Studiantenan di Bijbel ei a reconocé cu e tera ta keda existí pa semper i cu lo e no ser kimá, manera hopi religion ta siña. (Eclesiástes 1:4; Lucas 23:43) Tambe nan a siña cu Cristo su regreso lo ta invisibel i cu e ora ei lo e ehecutá huicio riba e nacionnan i introducí un paradijs terenal.—Echonan 10:42; Romanonan 8:19-21; 1 Pedro 3:18.

10. Ki berdadnan e Studiantenan di Bijbel a siña relacioná cu bautismo, un distincion entre clero i laico, i e Memorial dje morto di Cristo?

¹⁰ E Studiantenan di Bijbel a siña cu bautismo bíblico no ta un asuntu di sprengu awa riba baby pero cu na armonia cu Jesus su mandamentu na Mateo 28:19, 20, ta e bautismo di hende creyente kendenan a ser siñá. Nan a bin mira cu no tin base bíblico pa un distincion entre clero i laico. (Mateo 23:8-10) Al contrario, tur cristian mester ta predicador dje bon nobo. (Echonan 1:8) E Studiantenan di Bijbel a comprendé cu e Memorial dje morto di Cristo mester ser observá solamente un biaha pa aña, riba 14 di Nisan. Ademas, nan a mira cu Pascu di Resureccion ta un dia di fiesta pagano. Huntu cu esei, e ungínan ei tabata asina sigur cu Dios tabata apoyando nan trabou cu nan nunca a pasa colecta. (Mateo 10:8) For di cuminsamentu, nan a comprendé cu cristiannan mester biba segun principionan bíblico, locual ta incluí cultivá e fruta di Dios su spiritu santu.—Galationan 5:22, 23.

Rayonan di Lus Aumentante

11. Ki lus a briya riba e comision cristian i riba Jesus su comparacion dje carnénan i e cabritunan?

¹¹ Particularmente desde 1919 Jehova su sirbidornan a ser bendicioná cu rayonan di lus aumentante. Ki un rayo skerpi di lus a briya n’e congreso di Cedar Point na 1922 ora J. F. Rutherford, segundo presidente di Watch Tower Society, a enfatisá fuertemente cu e obligacion primario di Jehova su sirbidornan ta pa “anunciá, anunciá, anunciá, e Rey i su reino”! E siguiente aña mes, lus skerpi a briya riba e comparacion dje carnénan i e cabritunan. Nan a mira cu e profecia aki mester a ser cumplí den e dia actual di Señor, no den futuro durante e Milenio manera nan a kere anteriormente. Durante e Milenio, e rumannan di Cristo lo no bira malu ni lo no ser encarcelá. Ademas, na fin dje Milenio, Jehova Dios, i no Jesucristo, lo haci e husgamentu.—Mateo 25:31-46.

12. Ki rayo di lus tabatin relacioná cu Armagedon?

¹² Na 1926 un otro rayo briyante di lus a revelá cu e guera di Armagedon lo no ta un revolucion social, manera Studiantenan di Bijbel a kere un tempu. Mas bien, lo e ta un guera den cua Jehova lo demostrá su poder asina claramente cu tur hende lo keda convencí cu e ta Dios.—Revelacion 16:14-16; 19:17-21.

Pascu di Nacementu —Un Dia di Fiesta Pagano

13. (a) Ki lus a ser dramá riba celebracion di Pascu di Nacementu? (b) Pakico no a celebrá cumpleaño mas? (Incluí nota.)

¹³ Djis despues di esei, un rayo di lus a haci e Studiantenan di Bijbel stop di celebrá Pascu di Nacementu. Promé cu e tempu ei semper e Studiantenan di Bijbel rond mundu a celebrá Pascu, i su celebracion n’e sede di Brooklyn tabata un ocasion masha festivo. Pero despues nan a dicerní cu e celebracion di 25 di december en realidad tabata pagano i cu el a ser scogí dor di cristiandad apóstata pa haci’é mas fácil pa combertí paganonan. Ademas, nan a concluí cu Jesus no por a nace den winter, ya cu n’e tempu di su nacementu, wardadornan tabata lagando nan tounan di bestia come yerba den e camponan—algu cu nan lo no tabata haciendo anochi na fin di december. (Lucas 2:8) Mas bien, e Scritura ta indicá cu Jesus a nace rond di 1 di october. E Studiantenan di Bijbel tambe a realisá cu e asina yamá sabionan cu a bishitá Jesus mas of ménos dos aña despues di su nacementu tabata magonan pagano.b

Un Nomber Nobo

14. Pakico e nomber Studiantenan di Bijbel no tabata adecuá p’e pueblo di Jehova?

¹⁴ Na 1931 un rayo briyante di berdad a revelá n’e Studiantenan di Bijbel ei un nomber bíblico apropiado. E pueblo di Jehova a comprendé cu nan no por a aceptá ningun bijnaam cu otro hende a duna nan, manera russellitanan, madrugadornan di Milenio, i “anti-fiernunan.”c Pero tambe nan a cuminsá comprendé cu e nomber cu nan a scoge pa nan mes—Studiantenan Internacional di Bijbel—no tabata adecuá pa nan. Nan tabata muchu mas cu solamente studiantenan di Bijbel. Ademas, tabatin asina tantu otro hende cu tabata studiantenan di Bijbel pero cu no tabatin nada en comun cu e Studiantenan di Bijbel.

15. Ki nomber e Studiantenan di Bijbel a adoptá na 1931, i pakico e ta apropiado?

¹⁵ Con e Studiantenan di Bijbel a yega na haña un nomber nobo? Pa hopi aña E Toren di Vigilancia tabata haciendo e nomber di Jehova prominente. P’esei, tabata masha apropiado p’e Studiantenan di Bijbel adoptá e nomber hañá na Isaías 43:10: “ ‘Boso ta mi testigonan,’ ta e expresion di Jehova, ‘asta mi sirbidor kende mi a scoge, pa boso por sa i tene fe den mi, i pa boso por comprendé cu ami ta e Mésun. Promé cu mi ningun Dios a ser formá, i despues di mi a sigui sin cu tabatin ningun.’ ”

Vindicacion i e “Multitud Grandi”

16. Pakico e profecianan di restoracion no por a aplicá n’e regreso dje hudiunan natural na Palestina, pero na ken sí nan ta aplicá?

¹⁶ Den e segundo volúmen di Vindication, publicá dor di Watch Tower Society na 1932, un rayo di lus a revelá cu e profecianan di restoracion registrá dor di Isaías, Jeremías, Ezekiel i otro profetanan no a aplicá (manera nan a kere un tempu) n’e hudiunan carnal, kendenan tabata regresando Palestina sin fe i cu motivacionnan político. Mas bien, e profecianan di restoracion aki, cu tabatin un cumplimentu menor ora e hudiunan a regresá for di cautiverio babilónico na 537 P.E.C., tabatin nan cumplimentu mayor den e liberacion i restoracion di Israel spiritual cuminsando na 1919 i den e prosperidad resultante den e paradijs spiritual cu Jehova su berdadero sirbidornan djawe ta disfrutá di dje.

17, 18. (a) Cu tempu, pa medio di un rayo di lus, kico a ser mustrá di ta Jehova su propósito principal? (b) Ki rayo di lus relacioná cu Revelacion 7:9-17 a lusa na 1935?

¹⁷ Cu tempu, rayonan di lus a revelá cu Jehova su propósito principal tabata, no e salbacion di sernan humano, sino e vindicacion di su soberania. E rumannan a mira cu e tema di mas importante di Bijbel tabata, no e rescate, sino e Reino, pasobra e lo vindicá Jehova su soberania. Ki un rayo di lus esei tabata! Cristiannan dedicá no tabata primordialmente preocupá mas cu nan baimentu di cielu.

¹⁸ Na 1935 un rayo briyante di lus a revelá cu e multitud grandi mencioná na Revelacion 7:9-17 no tabata un clase celestial secundario. E rumannan a kere cu esnan mencioná den e versículonan ei tabata algun dje ungínan cu no a keda completamente fiel i pues tabata pará dilanti e trono en bes di sinta riba trononan reinando como rey i sacerdotenan cu Jesucristo. Pero e concepto di ser parcialmente fiel simplemente no ta existí. Un persona ta sea fiel of infiel. Pues e rumannan a mira cu e profecia aki a referí n’e multitud grandi incontabel for di tur nacion cu awor ta ser recogé i kende nan speransa ta terenal. Nan ta “e carnénan” di Mateo 25:31-46 i e “otro carnénan” di Juan 10:16.

E Crus—No un Símbolo Cristian

19, 20. Pakico e crus no por ta un símbolo di berdadero cristianismo?

¹⁹ Pa hopi aña e Studiantenan di Bijbel a duna e crus prominencia como un símbolo di cristianismo. Nan asta tabatin un borstspeld di un “crus-i-corona.” Segun King James Version, Jesus a pidi su siguidornan pa tuma nan “crus,” i hopi hende a bin kere cu el a ser ehecutá riba un crus. (Mateo 16:24; 27:32) Pa décadanan e símbolo aki tambe a aparecé riba e kaft dje revista Toren di Vigilancia.

²⁰ E buki Riquezas, publicá dor dje Sociedad na 1936, a haci claro cu Jesucristo a ser ehecutá, no riba un crus, sino riba un palu, of staca regt. Segun un autoridad, e palabra griego (stau·rosʹ) traducí como “crus” den King James Version “ta denotá, principalmente, un palu of staca regt. [E mester] ser distinguí for dje forma eclesiástico di un crus di dos biga. . . . E último aki tabatin su orígen den Caldea di antigua, i a ser usá como símbolo dje dios Tamuz.” Leu for di ser idolatrá, e instrumento riba cua Jesus a ser clabá mester ser mirá cu asco.

21. Kico lo ser considerá den e siguiente artículo?

²¹ Tin mas ehempel tantu di rayonan grandi di lus como di esnan cu por ser considerá chikitu. Pa un consideracion di esakinan, por fabor mira e siguiente artículo.

[Notanan]