Bo Mester Ta un Hende Trankil?

MAYORIA hende lo haya ku ta un kòmplimènt pa hende bisa ku nan ta trankil, un hende despreokupá, di karakter ‘rustig’ i tolerante. Pero ser trankil tin un otro kara tambe. Beibel ta bisa: “E aktitut trankil di hende estúpido lo ta nan destrukshon.” (Proverbionan 1:32, NW) Kiko esei kier men?

Algun tradukshon di Beibel ta tradusí e palabra hebreo original ku ekspreshonnan manera “negligensia” (Beibel Santu) i “indiferensia.” (Beibel na papiamentu koriente) Den e konteksto aki, un aktitut trankil ta ser konektá ku flohera i negligensia, i p’esei tambe ku estupides i bobedat.

Den promé siglo, kristiannan den e kongregashon di Laodisea tabata trankil, sin preokupá ku nan problemanan spiritual. Kontentu ku nan mes, nan a broma ku nan ‘no tabatin mester di nada.’ Hesukristu a korigí nan i a manda nan rebibá nan selo kristian.—Revelashon 3:14-19.

E hendenan den tempu di Noe tambe a bira konosí pa nan aktitut trankil i despreokupá. Nan kabes tabata den asuntunan di bida di tur dia, ‘kome i bebe, kasa i duna pa kasa, i nan no a komprendé te ora ku e diluvio a bin i a bai ku nan tur.’ Anto Hesus a agregá: “Asina e binida di e Yu di hende lo ta.”—Mateo 24:37-39.

Profesianan di Beibel ku a kumpli ta indiká ku nos ta bibando durante “e binida di e Yu di hende,” Hesukristu. Laga nos no bira negligente ni indiferente, esta, trankil, pero na un manera robes.—Lukas 21:29-36.