INFORME DI PROCLAMADOR DI REINO

“E nomber di Jehova ta un toren fuerte”

NOS ta biba den tempo instabil. Nos bida aparentemente stabil por cambia di un dia pa otro. Sin advertencia algun ruman a háyanan den peliger grandi promé cu nan tabata sa. Peliger por bini di revolucion político, di un asaltador violento, di un desaster natural, of di un enfermedad serio. Sea loke sea e caso, unda hende cristian mester acudi ora nan bida ta den peliger?

David, un misionero cu ta biba den un sucursal dje Sociedad Watch Tower, a siña e contesta pe pregunta for di un experencia spantoso. Un ruman asigná pa stuur a sali for di sucursal un maínta temprán pa busca algun ruman trahando den Betel pero cu no ta biba ei. Tabata scur ainda. El a busca Rosalía caba i tabata pasa un warda di poliz ora el a tende e promé tiro di scopet.

Anto cos a cuminza sosode lihé. El a tende un sonido manera klap grandi i a yega di sa cu aire tabata sali for di un tire. Di ripiente el a mira un soldad pará den camina cu un rifle apuntá net na dje. Tres cos a sosode casi hunto: Un cantidad di bala a bora un banda dje jeep, kibrando e glas; David i Rosalía a sag; e soldad a manda un bala door di windshield na nivel di wowo.

Durante cu nan a sigi manda bala den e jeep, David a dal brek lo mihor cu e por cu su curpa gesag. Tanto David como Rosalía a kere cu nan lo muri. Nan a haci oracion na boz halto na Jehova Dios, pidiendo su proteccion. Despues, Rosalía a bisa cu ne momento ei el a pensa con su famía lo reacciona ora nan tende di su morto!

Na bida ainda!

E sonido di tiramento i kibramento di glas a caba por fin, i David a tira un bista riba Rosalía. Ora el a mira un mancha di sanger rondó i chikito riba su lomba, su curazón casi a para. Pero un pida di glas bulando, i no un bala, a hinca su lomba. Su rudía tabata sangra di cortá cu glas bulando a haci, pero di otro manera el a parce bon.

Homber den uniforme militar cu armband blancu a yega cerca e jeep i a mándanan baha cu man na laira. Uno, cu a parce di ser di rangu mas halto, a drai i a bisa e soldad: “Bo tabata mandá pa no tira hende civil.” E soldad a pidi disculpa, bisando cu el a tende tiramento i a kere cu el a bini dje jeep.

Ora David a identifica Rosalía i su mes como Testigo di Jehova, e reaccion tabata favorabel. El a splica loke e tabata haci, pero e soldadnan kier a detenénan toch. Aparentemente, na madrugá un grupo militar a dal un golpi di estado, i soldad ei tabata den e proceso di domina e warda di poliz ora David i Rosalía a pasa den e jeep.

Rosalía a keda mashá molestiá pero cu curashi a keda calmo mientras cu David a pidi nan libertad. Por fin, nan a láganan bai, pero, sin e jeep. Nan tabatin cu bai na pia ne avenida cerca i coge bus pe sucursal, unda e enfermería a atende na Rosalía.

E forza di oracion

David a siña algo for dje experencia​—⁠nunca menospreciá e forza di oracion sincero, i nunca lubida cu identificacion di bo mes cu curashi como Testigo di Jehova hopi bez ta un proteccion. Por ta literalmente cierto cu e “nomber di Jehova ta un toren fuerte. Hende husto ta corre drenta den dje i ta ser duná proteccion.”​—⁠Proverbio 15:29; 18:10; Filipense 4:⁠6.

[Caption on page 19]

Fotografía de Publicaciones Capriles, Caracas, Venezuela