“Mas Cu un Pueblo Fuerte”
“SEGUN loke ta sosode actualmente, rond di 40% di yiu americano lo mira e kibramento dje matrimonio di nan mayornan promé cu e yiunan ta yega 18 aña di edad.” (Science di 7 di Juni di 1991) Ki un porciento spantoso! Pakico esei ta sosode?
Huez Edward M. Ginsburg di voogdijraad, den un entrevista cu e curant The Boston Globe, a expresa su punto di bista. El a bisa: “Nos ta hende egoísta. Nos kier cosnan pa ‘nos.’ Nos ta puntra, ‘Kico tin den dje pa mi awor?’ Nos kier satisfaccion mesora.”
Tal egoísmo inmaduro ta resulta den amargura i conflicto den matrimonio. Huez Ginsburg a bisa cu ora pareha finalmente ta para dilanti raad di divorcio, esposo i esposa kier vindicacion. Nan kier pa un hende bísanan cu nan tin razón i cu nan casá tin e falta. Nan kier pa un hende bisa: “Bo a gana e bataya.”
Su palabra ta hácinos corda e proverbio inspirá: “Un ruman ofendí ta mas cu un pueblo fuerte.” (Proverbio 18:19) Sí, ora cu contencion ta cuminza den un matrimonio, e dos partido den e conflicto por ta irrazonabel i stijf. Hopi bez, nan ta nenga absolutamente di entrega, mescos cu un “pueblo fuerte” bao di atake.
Cosnan tin cu ser asina? No, tin alternativa. Matrimonio ta fuerte i permanente ora esposo i esposa, desde e principio mes di nan matrimonio, ta obedece e palabra di apóstol Pablo: “Bira bondadoso un cu otro, tiernamente compasivo, pordonando otro libremente mescos cu Dios també mediante Cristo a pordona boso libremente.” (Efesio 4:32) Ta fácil pa cultiva tal calidad? No cada bez. Pero, ki fácil ta divorcio? Ki doloroso ta e carga pisá emocional i financiero di un matrimonio kibrá? I, kico dje yiunan, cu hopi bez tin e cicatriz dje divorcio di nan mayornan te cu nan ta grandi?
Ta hopi mas mihor pe pareha traha pa conserba nan matrimonio i no keda sin pordona otro, manera “un pueblo fuerte.” E conseho di Pablo pa hende cristian ta aplica specialmente na pareha: “Bisti boso cu amor, pasobra esei ta e enlace perfecto di union.”—Colosense 3:14.
[Caption on page 32]
The Complete Encyclopedia of Illustration/J. G. Heck