Cultivando Temor Piadoso

“Teme Jehova i apartá bo di loke ta malu.”—PROVERBIO 3:7.

E BUKI bíblico di Proverbio ta contené un rikesa di conseho spiritual. Jehova a percurá e guia aki inicialmente pa instruí su nacion típico di Israel. Awe, e ta percurá dichonan sabí pa su nacion cristian santu, “riba ken e fin dje sistema di cosnan a yega.”—1 Corintio 10:11; Proverbio 1:1-5; 1 Pedro 2:9.

² Birando na Proverbio 3:7, nos ta lesa: “No bira sabí den bo mes bista. Teme Jehova i apartá bo di loke ta malu.” Desde e tempu di nos promé mayornan, ora e Colebra a tenta Eva cu e promesa di nan “conociendo bon i malu,” simpel sabiduria humano no por a contestá e necesidadnan di humanidad. (Génesis 3:4, 5; 1 Corintio 3:19, 20) E periodo den historia cu esaki a bira mas bisto ta e siglo 20 aki—e “último dianan” aki ora humanidad, cosechando fruta di pensamentu ateo i evolucionario, ta plagá cu racismo, violencia i tur sorto di inmoralidad. (2 Timoteo 3:1-5, 13; 2 Pedro 3:3, 4) E ta un ‘desordu di mundu nobo’ cu ni Nacionnan Uní ni e religionnan fragmentá dje mundu por decifrá.

³ E Palabra profético di Dios ta informá nos cu forsanan demoniaco a sali pa “e reynan di henter e tera habitá, pa reuní nan huntu p’e guera dje gran dia di Dios Todopoderoso . . . n’e lugá cu na hebreo ta ser yamá Har-Magedon.” (Revelacion 16:14, 16) Pronto teror for di Jehova lo cubri e reynan, of gobernantenan ei. Lo e ta manera e spantu cu a cai riba e cananeonan ora Hosué i e israelitanan a bini pa ehecutá huicio riba nan. (Hosué 2:9-11) Pero awe ta esun cu Hosué a tipificá, Cristo Jesus—e “Rey di reynan i Señor di señornan”—kende lo ‘dal e nacionnan i pastoreá nan cu un bara di heru’ como expresion dje “rabia dje furia di Dios e Todopoderoso.”—Revelacion 19:15, 16.

⁴ Ken lo haña salbacion n’e tempu ei? Esnan librá lo no ta esnan poderá di spantu, sino tur cu a cultivá un temor reverencial pa Jehova. En bes di bira sabí den nan mes bista, esakinan ta ‘apartá di loke ta malu.’ Den humildad, nan ta alimentá nan mente cu loke ta bon, di manera cu loke ta malu ta ser sacá for di nan pensamentu. Nan ta cultivá un respet saludabel p’e Señor Soberano Jehova, e “Hues di tur e tera,” kende ta cla pa ehecutá tur hende cu ta pega na maldad, mescos cu el a likidá e sodomitanan corumpí. (Génesis 18:25) En berdad, pa Dios su propio pueblo, “temor pa Jehova ta un pos di bida, pa apartá dje lasnan di morto.”—Proverbio 14:27.

⁵ Den e dia di huicio divino aki, tur persona cu dedicá nan mes henteramente na Jehova den temor di desagrad’é hamas, lo yega na realisá e berdad cu a ser declará figurativamente na Proverbio 3:8: “Laga [e temor pa Jehova] bira un curacion pa bo lombrishi i un refrescamentu pa bo wesunan.”

Onrando Jehova

⁶ Nos temor apreciativo pa Jehova, huntu cu amor intenso p’e, mester motivá nos pa tuma Proverbio 3:9 na pechu: “Onra Jehova cu bo cosnan balioso i cu e promé frutanan di tur bo productonan.” Nos no ta ser presioná pa onra Jehova cu nos ofrendanan. Esakinan mester ta boluntario, manera ta ser indicá rond di 12 biaha for di Éxodo 35:29 te Deuteronomio 23:23 relacioná cu sacrificio den Israel di antigua. E promé frutanan aki na Jehova mester ta realmente e mihó regalonan cu nos por ofrecé, reconociendo e amabilidad i bondad amoroso cu nos a disfrutá na su man. (Salmo 23:6) Nan mester reflehá nos determinacion pa “sigui . . . busca promé e reino i su husticia.” (Mateo 6:33) I kico ta resultá for di onra Jehova cu nos cosnan balioso? “E ora ei bo mangazinanan di suministro lo ta yená cu abundancia; i bo propio bakinan di pers biña lo basha over cu biña nobo.”—Proverbio 3:10.

⁷ Jehova su manera primario di bendicioná nos ta spiritual. (Malaquías 3:10) Pues, e promé frutanan cu nos ta ofrecé na dje mester ta primeramente spiritual. Nos mester usa nos tempu, energia i forsa vital pa haci su boluntad. Esaki en buelta lo nutri nos den e mesun manera cu tal actividad a bira “cuminda” fortalecedor pa Jesus. (Juan 4:34) Nos mangazinanan spiritual di suministro lo ta yená, i nos goso, simbolisá pa biña nobo, lo basha over. Ademas, segun cu nos ta resa cu confiansa pa suficiente cuminda material pa cada dia, nos por contribuí consistentemente i generosamente for di nos medionan pa sostené e trabou mundial di Reino. (Mateo 6:11) Tur loke nos ta poseé, incluyendo nos posesionnan material, nos a haña di nos Tata celestial amoroso. Lo e drama mas bendicion, te n’e grado cu nos ta usa e cosnan balioso aki pa su alabansa.—Proverbio 11:4; 1 Corintio 4:7.

Reprendimentu di Amor

⁸ Den versículo 11 i 12, Proverbio capítulo 3 ta papia atrobe dje relacion felis di tata-i-yu cu ta existí den famianan piadoso, i tambe entre Jehova i su yunan spiritual stimá riba tera. Nos ta lesa: “E disiplina di Jehova, O mi yu, no rechas’é; i no odia su reprendimentu, pasobra Jehova ta reprendé esun cu e ta stima, mescos cu un tata ta haci cu un yu den ken e tin placer.” Hende di mundu ta aborecé reprendimentu. Jehova su pueblo mester apreci’é. Apostel Pablo a cita e palabranan aki for di Proverbio, bisando: “Mi yu, no menospreciá e disiplina for di Jehova, ni desmayá ora e ta corigí bo; pasobra ken cu Jehova ta stima e ta disipliná . . . Ta cierto cu ningun disiplina ta parce gososo ora di hañ’é, sino penoso; sin embargo despues pa esnan cu a ser entrená p’e, e ta duna fruta pacífico, esta husticia.”—Hebreo 12:5, 6, 11.

⁹ Sí, reprendimentu i disiplina ta un parti necesario dje entrenamentu di cada un di nos, sea nos ta ricibi’é for di mayornan, mediante e congregacion cristian, of segun cu nos ta meditá rib’e Scritura durante nos studio personal. Ta un asuntu di bida i morto pa nos tuma disiplina na pechu, manera Proverbio 4:1, 13 tambe ta declará: “Scucha, O yunan, n’e disiplina di un tata i presta atencion, pa asina conocé comprendimentu. Gara disiplina; no lagu’e bai. Salbaguard’é, pasobra e mes ta bo bida.”

E Mayor Felicidad

¹⁰ Ki bunita expresion ta sigui awor, en berdad ‘palabranan deleitabel i corecto dje berdad’! (Eclesiastés 12:10) E palabranan inspirá aki di Salomon ta describí berdadero felicidad. Nan ta palabranan cu nos mester graba riba nos curason. Nos ta lesa:

¹¹ “Felis ta e homber cu a haña sabiduria, i e homber cu ta haña dicernimentu, pasobra ten’é como ganashi ta mihó cu tene plata como ganashi i ten’é como producto [mihó] cu oro mes. E ta mas precioso cu coral, i tur bo otro deleitenan no por ser igualá cuné. Largura di dianan ta den su man drechi; den su man robes tin rikesa i gloria. Su camindanan ta camindanan agradabel, i tur su bereanan ta pas. E ta un palu di bida pa esnan cu ta gar’é, i esnan cu ta teniend’e firmemente gará mester ser yamá felis.”—Proverbio 3:13-18.

¹² Sabiduria—cuantu biaha esaki ta ser mencioná den e buki di Proverbio, 46 bes na tur! “Temor pa Jehova ta e principio di sabiduria.” Esaki ta e sabiduria piadoso, práctico, basá riba conocimentu dje Palabra di Dios cu ta permití su pueblo manehá un curso sigur dor dje tempestadnan peligroso cu ta reina den e mundu di Satanas. (Proverbio 9:10) Dicernimentu, cu ta ser mencioná 19 bes den Proverbio, ta e criá di sabiduria, cu ta yuda nos pa combatí e trampanan di Satanas. Den ehecucion di su obranan mañoso, e gran Adversario tin su tras miles di aña di experencia. Pero nos tin algu muchu mas balioso cu experencia como un maestro—dicernimentu piadoso, e abilidad di distinguí bon fo’i malu i pa scoge e caminda corecto pa sigui. Esaki ta loke Jehova ta siña nos mediante su Palabra.—Proverbio 2:10-13; Efesio 6:11.

¹³ E cáos económico den e mundu djawe ta un siñal dje cumplimentu dje profecia na Ezekiel 7:19: “Den caya nan lo tira nan plata mes, i nan propio oro lo bira un cos aborecibel. Ni nan plata ni nan oro lo por libra nan den e dia di furia di Jehova.” Tur e rikesa material riba tera no por ta ni comparabel cu e poder salbador di sabiduria i dicernimentu. Rey sabí Salomon a declará na un otro ocasion: “Sabiduria ta pa un proteccion mescos cu placa ta pa un proteccion; pero e bentaha di conocimentu ta cu sabiduria mes ta conservá bibu su doñonan.” (Eclesiastés 7:12) Felis en berdad ta tur cu awe ta cana den e camindanan agradabel di Jehova i cu den sabiduria ta scoge “largura di dianan,” bida eterno cua ta e regalo di Dios pa tur cu ta ehercé fe den e sacrificio di rescate di Jesus!—Proverbio 3:16; Juan 3:16; 17:3.

Cultivando Berdadero Sabiduria

¹⁴ Ta apropiado pa nos como hende, kendenan ta creá den e imágen di Dios, forsa pa cultivá sabiduria i dicernimentu, cualidadnan cu Jehova mes a manifestá ora el a efectuá su obranan maraviyoso di creacion. “Jehova mes cu sabiduria a funda e tera. El a establecé firmemente e cielu cu dicernimentu.” (Proverbio 3:19, 20) El a pasa na traha criaturanan bibiente, no mediante algun proceso di evolucion místico i inexplicabel, sino mediante obranan directo di creacion, cada un “segun su sorto” i pa un propósito sabí. (Génesis 1:25) Ora hende finalmente a ser creá cu inteligencia i abilidadnan hopi mas superior cu esnan di bestia, e aplouso dje yunan angelical di Dios mester a resoná i bolbe resoná den cielu. (Compará cu Job 38:1, 4, 7.) Jehova su pre-vision cu dicernimentu, su sabiduria i su amor ta claramente bisto den tur su produccionnan riba tera.—Salmo 104:24.

¹⁵ Nos no solamente mester cultivá Jehova su cualidadnan di sabiduria i dicernimentu sino tambe gara nan firmemente, sin nunca floha den nos studio di su Palabra. E ta spierta nos: “Mi yu, no laga nan scapa for di bo bista. Salbaguardá sabiduria práctico i abilidad di pensa, i nan lo resultá di ta bida pa bo alma i encanto pa bo garganta.” (Proverbio 3:21, 22) Pues nos por cana den siguridad i den pas mental, asta durante e yegada estilo di ladron dje dia di “destruccion di ripiente” cu lo rementá rib’e mundu di Satanas. (1 Tesalonicense 5:2, 3) Durante e tribulacion grandi mes, “lo bo no tin cu teme nada cu ta trece spantu di ripiente, ni dje tempestad riba e malbadonan, debí cu e ta biniendo. Pasobra Jehova mes lo resultá di ta, en efecto, bo confiansa, i lo e siguramente warda bo pia di captura.”—Proverbio 3:23-26.

Amor pa Haci Loke Ta Bon

¹⁶ Awor aki ta tempu pa mustra celo den predicacion dje bon nobo di Reino aki pa un testimonio pa tur nacion. Pero e trabou aki di duna testimonio mester ser apoyá pa otro actividad cristian, manera Proverbio 3:27, 28 ta describí: “No retené e bon di esnan na ken bo ta debe, ora ta sosodé cu e ta den e poder di bo man pa haci’é. No bisa bo próhimo: ‘Bai, i bini bek i mañan lo mi duná bo,’ ora bo tin algu huntu cu bo.” (Compará cu Santiago 2:14-17.) Cu gran parti dje mundu den e gara di pobresa i scarcedad di cuminda, tabatin yamadanan urgente pa nos yuda nos próhimo, specialmente nos rumannan spiritual. Con Testigonan di Jehova a reaccioná?

¹⁷ Tuma un ehempel: Durante aña pasá, un yamada urgente pa yudansa a bini for di loke tabata Yugoslavia. E hermandad den paisnan bisiña a reaccioná maraviyosamente. Durante e lunanan friu di último winter, varios convoi di auxilio a logra penetrá e áreanan di guera, transportando publicacionnan coriente, paña pa friu, cuminda i remedi p’e Testigonan den necesidad. Na un ocasion, e rumannan a pidi un permit pa pasa 15 ton di suministro di auxilio, pero ora nan a ricibí e permit, e tabata pa 30 ton! Testigonan di Jehova na Austria a despachá lihé tres truck mas. Na tur, 25 ton a alcansá nan destinacion planeá. Ki contentu nos rumannan tabata pa ricibí e abundante provisionnan spiritual i material aki!

¹⁸ Con e recipientenan a respondé? Mas promé den e aña aki, un anciano a skirbi: “E rumannan na Sarajevo ta bibu i bon di salú, i loke ta mas importante, ainda nos ta spiritualmente fuerte pa soportá e guera absurdo aki. E situacion tabata masha difícil pa loke ta cuminda. Cu Jehova bendicioná i recompensá boso p’e esfuersonan cu boso a haci pa nos. E autoridadnan tin respet special pa Testigonan di Jehova debí na nan manera ehemplar di bida i debí na nan respet pa autoridad. Tambe nos ta gradicidu p’e alimento spiritual cu boso a entregá nos.”—Compará cu Salmo 145:18.

¹⁹ E rumannan den peliger aki a mustra aprecio, tambe, dor di nan ministerio di veld celoso. Hopi bisiña ta bini cerca nan pa pidi studio di Bijbel na cas. Den e stad di Tuzla, unda cincu ton di cuminda di auxilio a ser entregá, 40 publicador a raportá 25 ora cada un den sirbishi como promedio p’e luna, como un apoyo excelente p’e nuebe pioneronan den e congregacion. Nan tabatin un asistencia remarcabel di 243 persona n’e Memorial di Jesus su morto. E kerido rumannan aki en berdad ta “saliendo completamente victorioso mediante esun cu a stima nos.”—Romano 8:37.

²⁰ E generosidad cu a ser manifestá den e convoinan grandi di cuminda di auxilio i paña pa friu mandá pa ex-Union Soviético a ser igualá tambe p’e celo dje rumannan aya. Por ehempel, na Moscú e asistencia na Memorial dje aña aki tabata 7.549, compará cu 3.500 aña pasá. Durante e mesun periodo, e congregacionnan den e stad ei a aumentá di 12 pa 16. Den henter ex-Union Soviético (sin conta Estadonan Báltico), e aumento den congregacion tabata 14 porciento, den publicador di Reino 25 porciento i den pionero 74 porciento. Ki un spiritu di celo i sacrificio-propio! E ta poné bo corda dje promé siglo ora tabatin “un igualacion.” E cristiannan cu tabatin posesionnan spiritual i material a haci donacionnan generoso na esnan den lugánan ménos pudiente, miéntras e celo di esnan afligí a trece goso i animacion n’e dunadornan.—2 Corintio 8:14.

Odia Loke Ta Malu!

²¹ Siguientemente, e di tres capítulo di Proverbio ta presentá un seri di contraste, concluyendo cu e spiertamentu aki: “No bira envidioso dje homber di violencia, ni scoge ningun di su camindanan. Pasobra e persona tramposo ta un cos detestabel pa Jehova, pero Su intimidad ta cu esnan recto. E maldicion di Jehova ta riba cas dje malbado, pero e lugá di habitacion dje hustunan e ta bendicioná. Si ta trata di mofadornan, e mes lo haci bofon; pero n’e mansunan lo e mustra fabor. Onor ta loke esnan sabí lo yega na poseé, pero esnan stúpido ta halsando desonor.”—Proverbio 3:29-35.

²² Con nos por evitá di ser contá entre esnan stúpido? Nos mester siña odia loke ta malu, sí, aborecé loke Jehova ta aborecé—tur e caminda tramposo dje mundu violento, culpabel di sanger aki. (Mira tambe Proverbio 6:16-19.) Na contraste, nos mester cultivá loke ta bon—rectitud, husticia i mansedumbre—pa asina den humildad i temor pa Jehova nos por alcansá “rikesa i gloria i bida.” (Proverbio 22:4) Esaki lo ta e recompensa pa nos tur cu lealmente ta aplicá e spiertamentu: “Confia den Jehova cu tur bo curason.”

[Study Questions]

1. Pa ken Proverbio a ser skirbí?

2. Pakico e spiertamentu na Proverbio 3:7 ta masha oportuno awe?

3. Cua desaroyonan a ser profetisá pa nos tempu?

4, 5. Ken lo haña salbacion, i pakico?

6. Kico mester motivá nos pa tuma Proverbio 3:9 na pechu?

7. Ki sorto di promé frutanan nos mester ofrecé na Jehova, i kico lo ta e resultado?

8, 9. Con nos mester considerá reprendimentu i disiplina?

10, 11. Cua ta algun faceta dje palabranan deleitabel na Proverbio 3:13-18?

12. Con sabiduria i dicernimentu mester beneficiá nos?

13. Kico por protegá nos durante tempu di dificultad económico, i den ki manera?

14. Den ki manera Jehova a manifestá sabiduria ehemplar?

15. (a) Pakico no ta suficiente pa simplemente cultivá sabiduria? (b) Ki confiansa Proverbio 3:25, 26 mester lanta den nos?

16. Cua accion ta ser rekerí di cristiannan ademas di celo den e ministerio?

17-19. (a) Ki necesidad urgente a ser satisfacé durante 1993, i cu ki reaccion? (b) Kico ta demostrá cu nos rumannan sitiá dor di guera ta “saliendo completamente victorioso”?

20. Ki “igualacion” a tuma lugá na ex-Union Soviético?

21. Con esnan sabí i esnan stúpido ta para na contraste cu otro den e palabranan di conclusion di Proverbio capítulo 3?

22. (a) Con nos por evitá e destino di esnan stúpido? (b) Kico esnan sabí ta odia, i kico nan ta cultivá, cu ki recompensa?

[Picture on page 18]

Esnan cu ta ofrecé lo mihó di nan mes den sacrificio na Jehova lo ser bendicioná abundantemente

Kico Ta Bo Comentario?

◻ Con e texto dje tema dje studio aki ta aplicá awe?

◻ Con nos por onra Jehova?

◻ Pakico nos no mester menospreciá disiplina?

◻ Unda e mayor felicidad ta ser hañá?

◻ Con nos por stima loke ta bon i odia loke ta malu?