LÈS 55
Kon Bo Por Yuda den Bo Kongregashon?
Rònt mundu, miónes di hende ta sirbi Yehova felismente den míles di kongregashon. Nan ta kontentu di por risibí guia i instrukshon na reunion i nan ta kla pa yuda nan kongregashon na vários manera. Bo tambe ta sinti asina?
1. Kon ta algun manera ku bo por usa bo tempu i energia pa yuda bo kongregashon?
Nos tur por yuda den kongregashon. Por ehèmpel, tin ruman di edat òf ruman ku ta malu den bo kongregashon? Bo por buska nan pa bai reunion? Bo por yuda nan den otro manera práktiko, por ehèmpel, hasi kompra pa nan òf yuda nan ku trabou di kas? (Lesa Santiago 1:27.) Ademas, nos por yuda hasi nos Salòn di Reino limpi i yuda ku mantenshon di salòn. Niun hende no ta obligá nos pa yuda den kongregashon. Mas bien, ta nos amor pa Dios i pa nos rumannan ta motivá nos pa “ofresé [nos] mes boluntariamente” pa yuda.—Salmo 110:3.
E rumannan ku ta batisá por yuda den mas manera. E ruman hòmbernan ku ta spiritualmente kualifiká por yuda komo sirbidó ministerial i despues di tempu komo ansiano. Tantu ruman hòmber komo ruman muhé por hasi mas tantu den e trabou di prediká ora nan sirbi komo pionero. Algun Testigu ta skohe pa yuda ku konstrukshon di lugá di adorashon i tin otro ta muda bai un área kaminda un kongregashon tin mester di mas yudansa.
2. Kon nos por usa nos plaka i nos pertenensianan pa yuda e kongregashon?
Nos por “onra Yehova ku [nos] kosnan di balor.” (Proverbionan 3:9) Nos ta sinti nos felis ku nos por usa nos plaka i otro rekurso material pa yuda nos kongregashon i apoyá e trabou di prediká mundialmente. (Lesa 2 Korintionan 9:7.) Nos donashonnan ta ser usá tambe pa duna ousilio ora di desaster natural. Hopi ruman ta skohe pa regularmente nan “pone algu un banda” pa asina nan por hasi donashon. (Lesa 1 Korintionan 16:2.) Nos por hasi donashon tirando sèn den kaha di kontribushon na nos lugánan di adorashon òf nos por hasi donashon online via donate.jw.org. Yehova ta duna nos e oportunidat pa mustr’é kuantu nos ta stim’é ora nos ta skohe pa usa nos plaka i nos pertenensianan pa yuda e kongregashon.
KIKO MAS NOS POR SIÑA?
Laga nos wak den ki manera nos por yuda nos kongregashon.
3. Nos por usa nos pertenensianan pa yuda e kongregashon
Tantu Yehova komo Hesus ta stima hende ku ta duna ku alegria. Por ehèmpel, Hesus a elogiá un biuda ku tabatin tiki plaka pero ku tòg a duna Yehova algu. Lesa Lukas 21:1-4. Despues, analisá e siguiente preguntanan:
Nos mester duna hopi plaka òf hasi donashon grandi pa nos por agradá Yehova?
Kon Yehova i Hesus ta sinti ora nos ta duna di kurason?
Pasa e VIDIO pa wak kon nos donashonnan ta ser usá. Despues, analisá e siguiente pregunta:
Kon ta usa nos donashonnan pa yuda e kongregashonnan rònt mundu?
4. Nos por yuda komo boluntario
Den tempu bíbliko, e adoradónan di Yehova tabata yuda ku entusiasmo pa mantené nan lugánan di adorashon. Esaki a enserá mas ku djis duna plaka. Lesa 2 Krónikanan 34:9-11. Despues, analisá e siguiente pregunta:
Kon tur israelita a yuda mantené e kas di Yehova, esta, nan lugá di adorashon?
Pasa e VIDIO pa wak kon Testigunan di Yehova ta sigui e ehèmpel bíbliko ei. Despues, analisá e siguiente preguntanan:
Dikon ta importante pa nos tene nos Salòn di Reino limpi i den bon kondishon?
Kon ta algun manera ku bo por yuda ku esei?
5. Ruman hòmber por hasi esfuerso pa haña mas responsabilidat den kongregashon
Beibel ta animá ruman hòmber pa hasi tur nan esfuerso pa yuda e kongregashon. Pa wak kon un ruman hòmber por hasi esei, pasa e VIDIO. Despues, analisá e siguiente pregunta:
Kon Ryan a hasi esfuerso pa yuda mas den kongregashon?
Beibel ta bisa kiko ruman hòmber mester kumpli kuné pa nan por sirbi komo sirbidó ministerial i ansiano. Lesa 1 Timoteo 3:1-13. Despues, analisá e siguiente preguntanan:
Kiko e ruman hòmbernan ku ke sirbi komo sirbidó ministerial i ansiano mester kumpli kuné?
Kon nan famia mester ta?—Wak versíkulo 4 i 11.
Ora ruman hòmber ta hasi tur nan esfuerso pa kumpli ku loke Beibel ta bisa, kon tur hende den kongregashon ta benefisiá?
SI UN HENDE PUNTRA: “Unda Testigunan di Yehova ta haña plaka pa finansiá nan obra?”
Kiko lo bo bisa?
RESÚMEN
Yehova ta keda masha kontentu ora nos ta usa nos tempu, energia i pertenensianan pa yuda nos kongregashon.
Repaso
Kon nos por usa nos tempu i energia pa yuda e kongregashon?
Kon nos por usa nos plaka i nos pertenensianan pa yuda e kongregashon?
Kon lo bo ke yuda e kongregashon?
MAS INFORMASHON INTERESANTE
Wak dikon Dios no ta eksigí pa su sirbidónan duna diesmo mas.
“Kiko Beibel Ta Bisa Tokante Diesmo?” (artíkulo riba jw.org)
Beibel ta menshoná algun responsabilidat ku ruman hòmber batisá tin. Pero kiko si ta un ruman muhé batisá mester kumpli ku e responsabilidatnan ei?
“Outoridat Ku Ansiano Tin den Kongregashon” (E Toren di Vigilansia di febrüari 2021)
Wak kon algun ruman hòmber ta demostrá kurashi i ta hasi gran sakrifisio pa hiba publikashon pa nan rumannan.
Wak kon e manera ku nos obra ta ser finansiá ta hopi diferente for di otro organisashon religioso.
“Kon e Obra di Testigunan di Yehova Ta Ser Finansiá?” (artíkulo riba jw.org)