LÈS 29

Kiko Ta Pasa ku Nos ora Nos Muri?

Edishon Imprimí

Bo a yega di pèrdè un ser kerí den morto? Na un momento difísil asina, kisas bo ta puntra bo mes: ‘Kiko ta pasa ku nos ora nos muri? Nos lo por mira nos sernan kerí atrobe?’ E kontestanan ku Beibel ta duna ta konsolá nos. Nos lo wak e kontestanan ei den e lès akí i e siguiente lès.

1. Kiko ta pasa ku nos ora nos muri?

Hesus a kompará morto ku un soño profundo. Dikon? Wèl, un persona ku ta den un soño profundo no sa kiko ta pasa rònt di dje. Di mes manera, ora un hende muri, e no ta konsiente di nada. Pues, e no ta sinti doló ni e no ta sufri mas. Beibel ta bisa: “E mortonan no ta konsiente di apsolutamente nada.”—Lesa Eklesiástes 9:5.

2. Dikon ta bon pa nos sa e bèrdat tokante morto?

Hopi hende tin miedu di muri, i algun hende tin asta miedu di hende morto. Sinembargo, loke Beibel ta bisa tokante morto por konsolá bo. Hesus a bisa: “E bèrdat lo hasi boso liber.” (Huan 8:32) Algun religion ta siña hende ku ora nos muri, di un manera òf otro, un parti di nos ta sigui biba. Pero esei no ta loke Beibel ta siña. Pues, no tin sufrimentu despues di morto. Ademas, komo ku hende morto no sa nada, nan no por hasi nos daño. P’esei, nos no mester hasi orashon pa hende morto ni adorá nan ni sinti ku nos tin ku komplasé nan pa nan no rabia ku nos.

Algun hende ta bisa ku nan por papia ku hende morto. Pero esei ta imposibel. Manera nos a kaba di siña, hende morto no ta konsiente di nada. Hende ku ta kere ku nan ta papiando ku nan sernan kerí ku a muri por ta papiando ku demoño ya ku e demoñonan por pretendé di ta nan sernan kerí ku a muri. Pues, ora nos sa e bèrdat tokante morto, esei por protehá nos kontra e demoñonan. Yehova ta spièrta nos pa no papia ku hende morto pasobra e sa ku kontakto ku demoño lo hasi nos daño.—Lesa Deuteronomio 18:10-12.

KIKO MAS NOS POR SIÑA?

Wak kiko mas Beibel ta siña nos tokante morto. Ademas, wak dikon bo por tin sigur ku Yehova, un Dios di amor, no ta kastigá hende ku a muri.

Un hòmber ta sintá ku su dos yunan chikitu riba un banki na e entiero di su kasá i mama di su yunan. Famia i amigu ta purba di konsolá i apoyá nan.

3. Haña sa loke realmente ta pasa ku nos ora nos muri

Rònt mundu, hende tin diferente opinion tokante kiko ta pasa ku nos ora nos muri. Pero no ta tur loke hende ta bisa ta bèrdat.

Kaminda abo ta biba, kiko hende ta pensa ta pasa ku nos ora nos muri?

Pa haña sa loke Beibel ta siña, pasa e VIDIO.

VIDIO: Kiko Ta Pasa ku Nos ora Nos Muri?—Fragmento (1:19)

Kolekshon di plachi: Esena di e vidio ‘Kiko Ta Pasa ku Nos ora Nos Muri?—Fragmento.’ 1. Kurpa di un hende morto riba un kama di hospital. 2. Un hòmber ta pega soño meimei di dos hende miéntras e ta sintá den trein.

Lesa Eklesiástes 3:20. Despues, analisá e siguiente preguntanan:

Segun e versíkulo akí, kiko ta pasa ku un hende ora e muri?
Ora un hende muri, su spiritu òf alma ta sigui biba un otro kaminda?

Beibel ta papia tokante e morto di Lázaro, kende tabata un bon amigu di Hesus. Segun ku bo ta lesa Huan 11:11-14, tuma nota kon Hesus a deskribí loke a pasa ku Lázaro. Despues, analisá e siguiente preguntanan:

Ku kiko Hesus a kompará morto?
Kon e komparashon akí ta yuda nos komprondé loke ta pasa ku nos ora nos muri?
Kiko abo ta pensa di loke Beibel ta bisa tokante morto?

4. Ora nos sa e bèrdat tokante morto, esei ta hasi nos liber

Ora nos sa e bèrdat tokante morto, nos lo no tin miedu di hende morto mas. Lesa Eklesiástes 9:10. Despues, analisá e siguiente pregunta:

Hende morto por hasi nos daño?

Ora nos haña sa loke Beibel ta siña, nos lo no kere e mentira ku nos mester komplasé òf adorá hende ku a muri. Lesa Isaías 8:19 i Revelashon 4:11. Despues, analisá e siguiente pregunta:

Kon bo ta kere Yehova ta sinti ora un persona ta adorá òf buska yudansa serka hende ku a muri?

Kolekshon di plachi: Kustumber ku tin di haber ku dunamentu di onor na hende morto. 1. Un hòmber ta hasi orashon na rudia dilanti di un graf ku tin ofrenda di kuminda. 2. Tres hòmber di un tribu ta baila den nan trahe. 3. Un grupo di hende ku maskarada di karpachi ta karga pòpchi di skelèt grandi riba Dia di Tur Defuntu. — E bèrdat tokante morto ta libra nos for di vários kustumber ku ta desagradá Yehova

5. E bèrdat tokante morto ta konsolá nos

Hopi hende a siña ku ora nan muri, nan lo haña kastigu pa e kosnan malu ku nan a hasi. Pero ta un konsuelo pa sa ku ningun hende no ta sufri despues di morto, ni hende ku a hasi kos hopi malu. Lesa Romanonan 6:7. Despues, analisá e siguiente pregunta:

Beibel ta bisa ku ora un persona muri, Dios no ta konsider’é kulpabel di su pikánan mas. Pues, abo ta pensa ku un hende ku a muri por ta sufriendo pa motibu di su pikánan?

Mas nos konosé Yehova, mas nos lo realisá ku nunka lo e pone hende morto sufri. Lesa Deuteronomio 32:4 i 1 Huan 4:8. Despues, analisá e siguiente preguntanan:

Un Dios ku tin e kualidatnan ku nos a mira den e versíkulonan akí lo tormentá hende ku a muri?
Bo ta haña ku e bèrdat tokante morto ta konsolá bo? Dikon bo ta bisa esei?

LOKE HENDE SA BISA: “Mi tin miedu di sufri despues ku mi muri.”