Ser un Bon Hende Ta Garantisá Bo un Futuro Sigur?

Pa vários siglo, hopi hende a pensa ku si bo ta un bon hende, lo bo tin un futuro sigur. Por ehèmpel, hopi hende na Asia ta di akuerdo ku loke un filósofo famoso ku yama Confucius (551-479 P.K.) a bisa: “Loke bo no ke pa hende hasi ku bo, no hasi ku nan.”a

UN MANERA DI BIBA KU HOPI HENDE TA SKOHE

Hopi hende ainda ta kere ku si nan hasi loke ta bon, nan lo tin un futuro sigur. Nan ta purba di mustra rèspèt, tin bon manera, kumpli ku nan ròl den komunidat i mantené un bon konsenshi. Linh, un señora ku ta biba na Vietnam, a bisa: “Semper mi a kere ku si mi ta onesto i sinsero, lo mi tin un bon bida.”

E mesun señora ei ta sirbiendo kuminda na hende pober i hende sin kas.

Algun hende ta purba di hasi loke ta bon pa motibu di nan kreensianan religioso. Hsu-Yun, un hòmber ku ta biba na Taiwan, a bisa: “Mi a ser siñá ku si un persona hasi kos bon, lo e ta felis despues ku e muri. Pero si e hasi kos malu, lo e sufri despues ku e muri.”

KIKO TA E RESULTADO?

Na fin di dia, e señora tin su yu den su brasa, i e ta tristu i morto kansá.

Ta bèrdat ku ora nos hasi kos bon pa otro hende, nos lo haña hopi benefisio. Sinembargo, hopi hende ku ta purba di trata otro hende bon, ta realisá ku no ta semper nan ta risibí e mesun trato bèk. Shiu Ping, un señora ku ta biba na Hong Kong, a bisa: “Mi a realisá ku hende ku ta hasi bon, no semper ta risibí bendishon. Mi a hasi mi bèst pa kuida mi famia i hasi loke ta bon. Pero mi matrimonio a frakasá i mi esposo a bandoná ami i mi yu hòmber.”

Hopi hende a realisá ku no ta tur hende religioso ta bon hende. Etsuko, un señora ku ta biba na Hapon, a bisa: “Mi a djòin un religion, i mi a kuminsá organisá aktividat pa e hóbennan. M’a keda di shòk ora mi a mira ku algun di e hendenan den e religion tabata inmoral, nan tabata bringa pa poder i tabata hasi mal uso di e plaka di misa.”

“Mi a hasi mi bèst pa kuida mi famia i hasi loke ta bon. Pero mi matrimonio a frakasá i mi esposo a bandoná ami i mi yu hòmber.”—SHIU PING, HONG KONG

Algun hende ku ta masha religioso i ku ta purba di hasi loke ta bon a keda desapuntá ora ku tòg kos malu a pasa ku nan. Asina Van, un señora di Vietnam, a sinti. El a bisa: “Tur dia mi tabata kumpra fruta, flor i kuminda pa pone riba altar di mi antepasadonan, pensando ku lo mi haña hopi bendishon den futuro. Apesar di tur e kosnan bon i ritonan religioso ku mi tabata hasi pa hopi aña, mi esposo a haña un malesa grave. Despues, mi yu muhé ku tabata studia na otro pais a muri ku 20 aña.”

SER UN BON HENDE SO NO TA SUFISIENTE

Ta importante pa ta un bon hende, pero esei no ta sufisiente pa garantisá un futuro sigur. Dikon nò? Wak kiko e Skritura Santu ta bisa.

NO TA TUR HENDE TA SKOHE PA HASI LOKE TA BON

“Ún pekadó ta destruí hopi kos bon.”—EKLESIÁSTES 9:18.

Asta si bo hasi bo bèst pa ta un bon hende, e kosnan egoista ku otro hende ta hasi por afektá bo futuro. Por ehèmpel, durante un pandemia bo por sigui konseho di outoridat superior i mantené distansia físiko. Pero kiko si algun hende no ke obedesé outoridat superior? Nan komportashon por pone ku hende ku ta purba di hasi loke ta bon ta bira malu.

HENDE POR TIN IDEA ROBES TOKANTE KIKO TA BON I KIKO TA MALU

“Tin un kaminda ku ta parse bon den bista di hende, ma su fin ta e kaminda di morto.”—PROVERBIONAN 14:12.

Atraves di historia hopi hende a hasi kos ku nan a pensa ta korekto, pero despues nan a realisá ku nan tabata robes. Aunke nan a pensa ku loke nan tabata hasi tabata bon, tòg nan a sufri e konsekuensianan di nan mal desishonnan.

NOS NO SA KON NOS BIDA LO TA MAÑAN

“Boso no sa kon boso bida lo ta mañan.”—SANTIAGO 4:14.

Asta un bon hende por muri inesperá. Por ehèmpel, durante e pandemia di COVID-19, hopi hende a muri segun ku nan tabata purba di yuda otro hende. Òf wak e ehèmpel di Liting, un señora di China ku a pèrdè su tata den un aksidente di outo. El a bisa: “Mi no por komprondé kon un persona asina amabel por a muri. Mi tata tabata un hende ku ta traha duru, e tabata humilde i sinsero. E tabata e úniko persona den e outo ku a pèrdè su bida.”

Si ser un bon hende no ta sufisiente pa garantisá un futuro sigur, kiko sí por? Pa kontestá e pregunta ei, nos mester di un guia ku nos por konfia—un fuente di informashon ku por kontestá nos preguntanan i mustra nos kon nos por tin un futuro sigur. Unda nos por haña un guia asina?

a Pa mas informashon tokante e siñansanan di Confucius, wak kapítulo 7, paragraf 31-35, di e buki El hombre en busca de Dios, publiká pa Testigunan di Yehova i ku ta disponibel online riba www.jw.org.