Mantené Bo Confiansa Firme te n’e Fin

IMAGINA bo un avioneta bulando den mal tempu. E piloto no por distinguí mas e marcanan riba tera cu ta sirbi como guia. Nubianan diki ta cubrié. E no por mira mas aleu cu su ‘windshield,’ tog e ta sigur cu e por completá su biahe sano i salbo. Kico ta e motibu pa su confiansa?

E tin instrumentonan preciso cu ta permitié bula dor di nubia i aterisá den scuridad. Riba su ruta, specialmente den cercania dje aeropuerto, instrumentonan riba tera cu ta transmití señal ta gui’é electrónicamente, i e tin contacto radial cu controladornan di tráfico aéreo na tera.

Den un manera comparabel, nos por enfrentá e futuro cu confiansa, maske condicionnan di mundu ta bira dia pa dia mas scur. Nos biahe dor dje mal sistema aki por ta tumando mas tantu tempu cu algun a spera, pero nos por tin e confiansa cu nos ta riba e curso corecto i cu nos ta na tempu. Pakico nos por ta asina sigur? Pasobra nos tin guia cu ta permití nos detectá loke nos no por mira.

E Palabra di Dios ta un ‘lus pa nos caminda,’ i e ta “confiabel, haciendo esun sin experencia sabí.” (Salmo 19:7; 119:105) Manera marcanan riba tera cu ta indicá e ruta di vuelo dje piloto, Bijbel ta describí futuro sucesonan di un manera exacto i ta duna nos instruccionnan claro afin di haci sigur cu nos ta yega nos destinacion sano i salbo. Sin embargo, pa saca beneficio for di guia divino, nos mester confi’é.

Den su carta n’e hebreonan, Pablo a urgi cristiannan hudiu pa ‘haci nan gara riba e confiansa cu nan tabatin na principio firme te n’e fin.’ (Hebreonan 3:14) Confiansa por ser sagudí si nos gara riba dje no ser ‘hací firme.’ Pues e pregunta ta lanta, Con nos por mantené nos confiansa den Jehova firme te n’e fin?

Ehercé Bo Fe

Promé cu un piloto por bula guiá riba instrumento, i no riba bista, dependiendo totalmente riba su instrumentonan i controladornan di tráfico aéreo, e tin mester di entrenamentu adecuá i hopi ora di vuelo. Di igual manera, un cristian mester ehercé su fe continuamente di manera cu e por mantené su confiansa den e guia di Jehova, specialmente ora circunstancianan difícil ta surgi. Apostel Pablo a skirbi: “Pasobra nos tin e mésun spiritu di fe manera esun di ken ta pará skirbí: ‘Mi a ehercé fe, p’esei mi a papia,’ nos tambe ta ehercé fe i p’esei nos ta papia.” (2 Corintionan 4:13) Pues, ora nos ta papia tocante e bon nobo di Dios, nos ta eherciendo i fortificando nos fe.

Magdalena, kende a pasa cuater aña den un campo di concentracion durante e segundo guera mundial, ta splica e balor dje actividad di predicá: “Mi mama a siñá mi cu pa mantené fe fuerte, ta esencial pa preocupá tocante e bienestar spiritual di otronan. Mi ta corda un incidente cu ta ilustrá con nos a sinti. Despues cu nos a ser lagá liber for dje campo di concentracion Ravensbrück, ami cu mi mama a alcansá nos cas riba un diabierne, físicamente agotá. Pero dos dia despues, riba diadomingo, nos a djoin e rumannan den predicacion di cas pa cas. Mi ta kere firmemente cu si nos concentrá riba yuda otronan confia den e promesanan di Dios, e mésun promesanan ei lo bira mas real pa nos.”—Compará cu Echonan 5:42.

Manteniendo nos confiansa firme te n’e fin ta rekerí actividad spiritual den otro áreanan. Studio personal ta un otro excelente ehercisio fortalecedor di fe. Si nos imitá e bereanonan i examiná diligentemente e Scritura diariamente, lo e yuda nos “tene e pleno siguransa dje speransa te n’e fin.” (Hebreonan 6:11; Echonan 17:11) Ta cierto cu studio personal ta rekerí tempu i determinacion. Posiblemente, p’e motibu ei Pablo a spierta e hebreonan tocante e peliger di ser “slow,” of floho, den asuntunan asina.—Hebreonan 6:12.

Un actitud floho por tin consecuencianan lamentabel den hopi área di bida. Sálomon a remarcá cu “dor di laga e mannan cai e cas ta lek.” (Eclesiástes 10:18) Tardi of trempan awaceru ta cuminsá ‘druppel’ dor di un dak cu no ta ser mantené. Si nos laga nos mannan cai spiritualmente i keda sin mantené nos fe, dudanan por drenta poco poco. Na otro banda, meditacion regular riba e Palabra di Dios i studio di dje lo alimentá i protehá nos fe.—Salmo 1:2, 3.

Edificando Confiansa Mediante Experencia

Naturalmente, un piloto ta siña mediante experencia i tambe mediante estudio cu su instrumentonan ta confiabel. Di igual manera, nos confiansa den Jehova ta crece ora cu nos ta mira den nos propio bida evidencia di su cuido amoroso. Hosué a experenciá esei, i el a recordá su compañeronan israelita: “Boso wel sa cu tur boso curason i cu tur boso alma cu ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso.”—Hosué 23:14.

Josefina, un ruman muher casá di Filipínas, a siña e mésun les. E ta splica con bida tabata promé cu el a conocé e berdad: “Mi esposo tabata bebe hopi, i ora e bira burachi, e tabata rabia i golpiá mi. Nos matrimonio infelis tabata afectando nos yu homber tambe. Ami i mi esposo tur dos tabata traha, ganando basta placa, pero nos tabata perde mayoria di esei cu wega di placa. Mi esposo tabatin hopi amigu, tog mayoria di nan tabata busca su amistad p’e paga p’e bebidanan, i algun asta a purba hacié burachi djis pa harié.

“Cosnan a cambia ora nos a siña conocé Jehova i a tuma su conseho na pechu. Mi esposo no ta bebe mas, nos a stop di hunga placa, i nos tin berdadero amigunan cu ta stima nos i ta yuda nos. Nos matrimonio ta unu felis, i nos yu ta creciendo pa bira un yoncuman excelente. Nos ta traha ménos ora, pero nos tin mas placa. Experencia a siña nos cu Jehova ta manera un Tata amoroso, kende semper ta guia nos den e direccion corecto.”

Como resultado di instruccionnan transmití via radio of un chekeo di instrumento, tin biaha pilotonan ta realisá cu nan mester corigí nan curso. Kisas nos igualmente tin cu cambia direccion segun Jehova su instruccion. “Bo propio oreanan lo tende un palabra bo tras bisando: ‘Esaki ta e caminda. Boso, cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:21) Mediante su Palabra i mediante su organisacion, nos ta ricibí conseho cu ta alertá nos contra peligernan spiritual. Un di esakinan ta toca nos asociacionnan.

Asociacion Por Desviá Nos For di Nos Curso

Un avioneta por ser desviá fácilmente for di su curso si coreccionnan necesario no ser hací. Di igual manera, influencianan djafó ta suta cristiannan constantemente awe. Nos ta biba den un mundu cu inclinacion carnal caminda hopi hende ta haci mofa di balornan spiritual, dunando hopi mas importancia na placa i placer. Pablo a spierta Timoteo cu e último dianan lo ta “duru pa trata cuné.” (2 Timoteo 3:1-5) Tienernan, cu ta anhelá pa aceptacion i popularidad, ta specialmente vulnerabel pa mal asociacion.—2 Timoteo 2:22.

Amanda, kende tin 17 aña di edad, ta splica: “Pa un poco tempu mi fe a ser debilitá te na un cierto grado dor di mi compañeronan di klas. Nan a sigui bisa cu mi religion tabata restrictivo i irazonabel, i esaki a cuminsá desanimá mi. Sin embargo, mi mayornan a yudá mi comprendé cu guia cristian ta sirbi pa protehá nos en bes di restringí nos. Awor mi ta realisá cu e principionan aki ta yudando mi haña un bida mas satisfaciente cu esun di mi ex-compañeronan di scol. Mi a siña confia den esnan cu realmente ta interesá den mi—mi mayornan i Jehova—i mi ta disfrutando di sirbishi di pionero.”

Sea nos ta hóben of bieu, nos lo encontrá hende cu ta haci comentarionan di menosprecio tocante nos creencianan. Nan por parce sofisticá, pero pa Dios nan ta físico, no-spiritual. (1 Corintionan 2:14) Un grupo cu hopi influencia den e stad di Corinto di Pablo su dia tabata e sképticonan sabí den cosnan di mundu. E siñansanan dje filósofonan aki probablemente a hiba algun cristian corintio na perde fe den e speransa di resureccion. (1 Corintionan 15:12) “No sea gañá,” apostel Pablo a spierta. “Mal asociacion ta daña custumbernan útil.”—1 Corintionan 15:33.

N’e otro banda, bon asociacion ta fortalecé nos spiritualmente. Den e congregacion cristian, nos tin e oportunidad pa mescla cu hende cu ta hiba un bida di fe. Norman, un ruman cu a haña e berdad na 1939, ainda ta un fuente di gran animacion pa tur. Kico a mantené su perspectiva spiritual skerpi? “Reunionnan i amistad íntimo cu rumannan fiel ta vital,” e ta contestá. “E clase di asociacion aki a yudá mi mira claramente e diferencia entre e organisacion di Dios i esun di Satanas.”

E Poder Engañoso di Rikesa

Brian, un piloto experenciá, ta splica cu “avéces un piloto por haña ta difícil pa kere su instrumentonan—simplemente pasobra su instintonan ta bisa otro. Pilotonan militar experenciá sa bula nan avion cabes abou pasobra e lusnan riba tera ta parce net manera strea—aunke nan instrumentonan ta bisa nan otro cos.”

Di igual manera, nos instintonan egoista por engañá nos den un sentido spiritual. Jesus a bisa cu rikesa tin “poder engañoso,” i Pablo a spierta cu ‘amor pa placa a alehá hopi hende for dje fe.’—Marco 4:19; 1 Timoteo 6:10.

Mescos cu lusnan engañoso cu ta cende-paga, metanan materialístico por mustra nos e direccion robes. En bes di alegrá den e “expectativa di cosnan sperá,” nos por ser desviá p’e exhibicion grandioso dje mundu cu ta pasando forbij. (Hebreonan 11:1; 1 Juan 2:16, 17) Si nos ta “determiná” pa tin un estilo di bida ricu, probablemente nos lo sobra poco tempu pa crecementu spiritual.—1 Timoteo 6:9; Mateo 6:24; Hebreonan 13:5.

Un homber hóben cu ta casá, yamá Patrick, a admití cu e i su casá a sacrificá metanan spiritual pa por disfrutá di un mihó nivel di bida. E ta splica: “Nos a ser influenciá dor di esnan den e congregacion cu tin auto caru i cas luhoso. Aunke nos nunca a perde bista dje speransa di Reino, nos a sinti cu nos por tabatin un estilo di bida confortabel tambe. Sin embargo, cu tempu, nos a realisá cu berdadero felicidad ta bini dor di sirbi Jehova i for di crece spiritualmente. Awor nos bida ta simpel atrobe. Nos a reducí nos oranan di trabou, i nos a bira pionero regular.”

Fe Ta Dependé Riba Un Curason Receptivo

Un curason receptivo tambe ta hunga un papel importante den edificá confiansa den Jehova. Ta cierto cu “fe ta e expectativa sigur di cosnan sperá, e demostracion evidente [of, “evidencia convincente,” nota] di realidadnan aunke nan no ta ser contemplá.” (Hebreonan 11:1) Pero aménos cu nos tin un curason receptivo, ta improbabel cu nos lo ser convencí. (Proverbionan 18:15; Mateo 5:6) P’e motibu aki apostel Pablo a bisa cu “fe no ta un posesion di tur hende.”—2 Tesalonicensenan 3:2.

Con anto, nos por mantené nos curason receptivo pa tur e evidencia convincente disponibel? Dor di cultivá cualidadnan piadoso, cualidadnan cu ta enrikesé i cu ta stimulá fe. Pedro a insta nos pa ‘suministrá na nos fe birtud, conocimentu, dominio propio, awante, debocion piadoso, cariño fraternal i amor.’ (2 Pedro 1:5-7; Galationan 5:22, 23) N’e otro banda, si nos hiba un bida egocéntrico of rindi Jehova solamente un sirbishi di muestra, nos no por razonablemente spera pa nos fe crece.

Esdras “a prepará su curason” p’e lesa e Palabra di Jehova i pon’é na práctica. (Esdras 7:10) Mikéas di igual manera tabatin un curason receptivo. “En cuanto ami, ta pa Jehova lo mi mantené mi mes vigilante. Lo mi mustra un actitud di spera pa e Dios di mi salbacion. Mi Dios lo tendé mi.”—Mikéas 7:7.

Magdalena, citá anteriormente, tambe ta spera cu pacenshi riba Jehova. (Habacuc 2:3) E ta bisa: “Ya caba nos tin e paradijs spiritual. E di dos stap, e Paradijs físico, lo bini masha pronto. Miéntras tantu cientos di miles ta uniendo cu e multitud grandi. Mi ta emocioná ora mi mira asina tantu hende drentando e organisacion di Dios.”

Mirando n’e Dios di Nos Salbacion

Manteniendo nos confiansa firme te n’e fin ta rekerí pa nos ehercé fe i scucha cuidadosamente n’e guia cu nos ta ricibí for di Jehova i su organisacion. Siguramente e ta bale la pena. Un piloto ta sinti satisfaccion profundo ora cu despues di un biahe largu i difícil, e baha i finalmente pasa dor dje nubianan diki. Ei extendí su dilanti tin e tera—berde i yamand’e bon biní. E pista dje aeropuerto ta abou, sperando pa ricibié.

Un experencia emocionante ta spera nos tambe. E mundu malbado i scur aki lo traha lugá pa un tera nobo di husticia. Un bon biní divino ta spera nos. Nos por yega ei basta nos haci caso dje palabranan dje salmista: “Bo ta mi speransa, O Soberano Señor Jehova, mi confiansa for di mi hubentud. . . . Den bo mi alabansa ta constantemente.”—Salmo 71:5, 6.