Felicidad—Asina Difícil pa Alcansá

PA HOPI tempu rabia, ansiedad i depresion tabata tópico di investigacion científico. Sin embargo, den añanan recien, científiconan prominente ta enfocando nan investigacion riba un experencia humano positivo i deseabel—felicidad.

Kico lo por haci hende mas felis? Si nan ta mas yong, mas ricu, mas salú, mas haltu of mas delegá? Kico ta e clave pa berdadero felicidad? Mayoria hende ta haña e pregunta ei difícil, pa no bisa imposibel, pa contestá. Considerando e fracaso general pa haña felicidad, algun hende tal bes lo haña cu ta muchu mas fácil pa contestá kico no ta e clave pa felicidad.

Pa hopi tempu, sicólogonan prominente a recomendá un filosofia di satisfaccion propio como e clave pa felicidad. Nan a animá hende infelis pa enfocá exclusivamente riba satisfacé nan necesidadnan individual. Den sicoterapia nan a usa lemanan cu a pega unbes, manera “sea bo mes,” “identificá bo sintimentunan interno” i “descubrí bo mes.” Pero, algun di net e expertonan cu a promové e mentalidad aki ta di acuerdo awor cu un actitud individualista asina no ta trece felicidad duradero. Egoismo inevitablemente lo trece dolor i infelicidad. Egoismo no ta e clave pa felicidad.

E Clave pa Infelicidad

Esnan cu ta busca felicidad dor di core tras di placer ta buscando den e direccion robes. Considerá e ehempel di Sálomon, e rey sabí di Israel antiguo. Den e buki bíblico di Eclesiástes, e ta splica: “Nada cu mi wowonan a pidi mi no a tene alehá for di nan. Mi no a retené mi curason di ningun clase di alegria, pasobra mi curason tabata gososo pa causa di tur mi trabou duru, i esaki a yega di ta mi porcion di tur mi trabou duru.” (Eclesiástes 2:10) Sálomon a construí casnan pa su mes, el a planta cunucunan di wijndruif, el a traha hofi, parke i tankinan di awa pa su mes. (Eclesiástes 2:4-6) Un biaha el a puntra: “Ken ta come i ken ta bebe mihó cu ami?” (Eclesiástes 2:25) E mihó cantantenan i músiconan a entreten’é, i el a disfrutá dje compañerismo dje muhernan mas bunita dje pais.—Eclesiástes 2:8.

E punto ta, Sálomon no a keda sin complacé su mes cu actividadnan placentero. Despues di tabatin placernan abundante den bida, na ki conclusion el a yega? El a bisa: “Ami, mi mes, a considerá tur e obranan di mi cu mi mannan a haci i na tur e trabou duru cu mi a traha duru pa logra, i, mira! tur cos tabata banidad i un corementu tras di bientu, i no tabatin nada cu a sirbi di bentaha bou di solo.”—Eclesiástes 2:11.

Te n’e dia djawe e conclusionnan dje rey sabí ta exacto. Tuma por ehempel un pais próspero manera Merca. Durante e último 30 añanan, mericanonan prácticamente a duplicá e cantidad di nan posesionnan material, manera auto i television. Sin embargo, segun expertonan di salú mental, mericanonan no ta mas felis. Segun un fuente, “durante e mésun periodo, e cantidad di hende cu ta sufri di depresion a aumentá drásticamente. Suicidio di tiener a bira tres bes mas tantu. Divorcio a bira dos biaha mas tantu.” Recientemente investigadónan a yega na conclusionnan similar despues di a studia e corelacion entre placa i felicidad den e poblacionnan di rond di 50 diferente pais. Den poco palabra, bo no por cumpra felicidad.

Al contrario, apropiadamente por yama e corementu tras di rikesa e clave pa infelicidad. Apostel Pablo a spierta: “Esnan cu ta determiná pa ta ricu ta cai den tentacion i un las i hopi deseo insensato i perhudicial, cu ta tira hende den destruccion i ruina. Pasobra amor pa placa ta rais di tur sorto di cos perhudicial, i percurando pa realisá e amor aki algun a ser desviá for dje fe i a hinca nan mes tur caminda cu hopi dolor.”—1 Timoteo 6:9, 10.

Ni rikesa, ni salú, ni hubentud, ni bunitesa, ni poder, ni ningun combinacion di esakinan por garantisá felicidad duradero. Pakico no? Pasobra nos no tin e poder pa prevení cos malu di pasa. Rey Sálomon a bisa aptamente: “Hende no conocé su tempu tampoco. Net manera piscá cu ta ser cogé den un reda dañino, i manera para cu ta ser cogé den un trampa, asina e yunan di hende mes ta ser cogé den un las na un tempu calamitoso, ora esaki cai di ripiente riba nan.”—Eclesiástes 9:12.

Un Meta Difícil pa Alcansá

Ningun investigacion científico por bini cu un fórmula of estrategia cu hende a traha pa felicidad. Sálomon a bisa tambe: “Mi a bolbe pa mira cu bou di solo no ta hende lihé tin e careda, ni hende fuerte e bataya, ni hende sabí tampoco tin e cuminda, ni hende entendido tampoco tin e rikesa, ni sikiera hende cu tin conocimentu tin e fabor; pasobra tempu i suceso imprevisto ta cai riba nan tur.”—Eclesiástes 9:11.

Hopi hende cu ta di acuerdo cu e palabranan citá ariba a concluí cu ta irealístico pa spera un bida berdaderamente felis. Un educadó prominente a declará cu “felicidad ta un fantasia.” Otronan ta kere cu e clave pa felicidad ta un secreto misterioso, cu e abilidad pa decifrá e secreto por ta limitá na un par di místico cu a ricibí e don di inteligencia.

Tog, hende ta sigui experimentá cu vários estilo di bida en busca di felicidad. Apesar dje fracaso di nan predecesornan, awe ainda tin hopi hende cu ta sigui core tras di rikesa, poder, salú of placer como e cura pa nan infelicidad. E búskeda ta sigui pasobra den profundidad di nan curason, mayoria hende ta kere cu felicidad duradero no ta simplemente un fantasia. Nan ta spera cu felicidad no ta un soño difícil di alcansá. Lo bo por puntra anto: ‘Con mi por alcans’é?’