Saca Lo Miho di Bo Bida

E TATA tabata na cas, na cama, muriendo di cancer. Su yu tabata den e shop, limpiando e tata su hermentnan di carpinteria. Haciendo esei, el a pensa riba e bunita cosnan cu su tata tabata traha cu esakinan. Aunke e shop tabata pegá cu e cas, e tabata sa cu nunca mas su tata lo drenta eiden, cu nunca mas lo e tene e hermentnan cu e tabata usa asina bon. E tempu ei a pasa.

E yu a pensa riba e texto bíblico na Eclesiástes 9:10: “Tur loke bo man haña pa haci, hacié cu bo forsa mes, pasobra no tin trabou ni formacion di proyecto ni conocimentu ni sabiduria den Sheol [graf], e lugá unda bo ta bayendo.” E tabata conocé e texto ei bon. El a us’é hopi bes ora e tabata siña otronan e berdad di Bijbel, esta, cu morto ta un estado di inactividad. Awor e ta sinti e forsa di Sálomon su argumento profundamente—nos mester hiba un bida pleno i disfrutá di nos dianan miéntras cu nos por, pasobra e tempu lo yega ora nos no por haci esei mas.

Disfrutá di Bida

Atrabes dje buki di Eclesiástes, e rey sabí Sálomon ta urgi su lectornan pa haña goso den bida. Por ehempel, capítulo 3 ta declará: “Mi a yega di sa cu no tin nada mihó pa [hende] cu alegrá i haci bon durante bo bida; i tambe pa tur hende come i en berdad bebe i mira e bon pa tur su trabou duru. Esei ta e don di Dios.”—Eclesiástes 3:12, 13.

Dios a inspirá Sálomon pa ripití e pensamentu aki: “Mira! E mihó cos cu ami mes a mira, cu ta bunita, ta pa un hende come i bebe i mira e bon pa tur su trabou duru cu cua e ta traha duru bou di solo pa e cantidad di dianan di su bida cu e Dios berdadero a dun’é, pasobra esei ta su porcion.”—Eclesiástes 5:18.

Di igual manera, e ta spierta hóbennan: “Alegrá, hóben, den bo hubentud, i laga bo curason haci bon pa bo den bo dianan di adolesencia, i cana den e camindanan di bo curason i den e cosnan cu bo wowo ta mira.” (Eclesiástes 11:9a) Ta ki excelente pa disfrutá plenamente dje forsa i vigor di hubentud!—Proverbionan 20:29.

‘Corda Bo Creador’

Claro cu Sálomon no kier men cu ta sabí pa sigui tras di tur loke nos curason of wowo lo gusta. (Compará cu 1 Juan 2:16.) Esaki ta bisto for di loke e ta skirbi siguientemente: “Pero sabi cu debí na tur e cosnan aki [cosnan buscá cu lo por satisfacé bo deseonan] e Dios berdadero lo hibá bo na huicio.” (Eclesiástes 11:9b) Sea cual sea nos edad, nos mester corda cu Dios ta mira loke nos ta haci cu nos bida i lo husga nos pa eseinan.

Ta bobo pa razoná cu nos por hiba un bida egocéntrico i posponé debocion piadoso te ora nos bira mas grandi! Na cualkier momento nos bida por yega na un fin. Asta si esei no sosodé, no ta mas fácil pa sirbi Jehova na edad avansá. Reconociendo e echo aki, Sálomon ta skirbi: “Corda, awor, bo Magnífico Creador den e dianan di bo hubentud, promé cu e dianan calamitoso procedé di bini, of e añanan yega ora lo bo bisa: ‘Mi no tin deleite den nan.’”—Eclesiástes 12:1.

Behes ta exigí su prijs. Siguientemente Sálomon ta describí den términonan simbólico e efectonan di edad avansá. Man i brasa ta tembla, pianan ta debilitá i djente ta cai. Cabei ta bira blancu i ta cai. Soño ta asina leve cu zonido di un para mes ta lantá bo. E sentidonan—mira, tende, mishi, hole i purba—tur ta faya. E curpa debilitá ta pone e persona haña miedu di cai i di otro “terornan” riba vianan público. Finalmente e persona ta muri.—Eclesiástes 12:2-7.

Behes ta calamitoso foral pa esnan cu no a ‘corda nan Magnífico Creador’ durante nan hubentud. Dor cu un persona asina a desperdiciá su bida, e “no tin deleite” den añanan despues. Un estilo di bida sin Dios tambe por aumentá e problema i dolornan di behes. (Proverbionan 5:3-11) Lamentablemente, ora di wak padilanti, hende asina no ta mira ningun otro futuro cu no ta graf.

Alegrando den Behes

Esaki no ta nificá cu hende bieu no por disfrutá di bida. Den Bijbel, “largura di dianan i añanan di bida” tambe ta ser asociá cu Dios su bendicion. (Proverbionan 3:1, 2) Jehova a bisa su amigu Abraham: “En cuanto abo, . . . lo bo ser derá ora bo ta hopi bieu.” (Génesis 15:15) Apesar dje incomodidadnan di edad avansá, Abraham a haña pas i un bida calmu den su añanan di behes, i ora el a wak bek e por a sintié satisfecho cu el a hiba un bida dedicá na Jehova. Tambe, cu fe el a mira padilanti na un “stad cu tin berdadero fundeshi,” e Reino di Dios. (Hebreonan 11:10) Asina, el a muri “bieu i satisfecho.”—Génesis 25:8.

P’esei Sálomon a urgi: “Si un homber biba asta pa hopi aña, lagu’e alegrá den nan tur.” (Eclesiástes 11:8) Sea nos ta hóben of bieu, berdadero goso ta ligá cu nos relacion cu Dios.

Segun cu e yoncuman den e shop tabata warda e último hermentnan di su tata, el a pensa riba e cosnan aki. El a pensa riba tur e hendenan cu e tabata sa cu a purba saca lo mihó di nan bida, pero cu no a haña felicidad pa motibu cu nan no tabatin un relacion cu nan Creador. Tabata ki apropiado cu despues cu Sálomon a duna animacion pa alegrá durante bo bida, cu el a resumí asuntunan cu e palabranan: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende”!—Eclesiástes 12:13.