Bo Ta Haña Bo Trabou Laf?

PROBABLEMENTE bo ta traha ocho ora pa dia. Esei ta demasiado tempu i un parti demasiado grandi di bo bida pa sacrifik’é na ferfelá bo mes! Sin embargo, hopi trabou den siglo 20 ta monótono i ta duna e trahadó poco pa ta orguyoso di dje.

P’esei, bo por saca hopi probecho dor di haci bo trabou interesante. Bo ta haña mas goso di traha, i bo ta siña e secreto pa enrikesé cualkier futuro trabou cu bo haci. Laga nos explorá anto, algun manera pa logra esaki.

Actua Entusiasmá

Algun autoridad ta recomendá pa bo traha como si fuera bo ta disfrutá di dje. Si bo haci esei, tin hopi chens cu esei ta loke lo bo bai sinti berdad.

Tal bes bo ta bisa: ‘Pero nunca lo mi por ta entusiasmá cu mi trabou!’ Kisas bo trabou ta enbolbé un rutina estricto, manera un trabou na un lopende band. Of kisas bo a haci e trabou ei pa asina tantu aña cu bo ta sinti cu ta imposibel pa bo renobá bo interes den dje. Sin embargo, cosnan simpel manera smile i para regt lo por yudá bo sinti mas entusiasmá cu bo trabou.

Lo por ta un yudansa tambe pa bo enfocá totalmente riba loke bo ta haciendo. No hinca bo mes den piloto automático, na moda di papia, i no haci bo trabou miéntras bo ta pensa riba e cuminda di merdia, e fin di siman of asta un otro trabou cu bo falta pa haci. Por lo general ta sabí pa concentrá totalmente riba e tarea cu bo ta bezig cuné. Kico lo ta e resultado? Lo bo cuminsá disfrutá di bo trabou anto e ora ei lo parce cu tempu ta bula.

Esaki ta loke ta sosodé di mes ora bo ta absorbá den un actividad cu bo ta ègt gusta. Lo bo por logra e mésun efecto si bo haci un esfuerso pa duna tur bo atencion na trabou cu normalmente bo no ta gusta.

Haci Lo Mihó cu Bo Por

Algu cu lo yudá bo logra haña satisfaccion den bo trabou ta haci lo mihó cu bo por. Naturalmente, e conseho aki ta contrali n’e idea popular cu ora bo ta haña cu e trabou no ta interesante, bo mester purba hinca ménos esfuerso posibel den dje. Pero cu tur probabilidad negligencia, posponementu i esfuerso mínimo lo agotá bo energia i lo hací bo anshá i fatigá. Den algun caso por ta masha bon cu e persona cu ta yega cas yen di stres, anshá i agotá for di trabou, ta sufriendo pa motibu cu e no ta haci su trabou diligentemente.

Segun Bijbel, ora bo traha duru riba un proyecto, asta bo oranan liber lo ta mas agradabel. “Pa loke ta un hende, no tin nada mas mihó cu e come i en berdad bebe i laga su alma mira e bon pa motibu di su trabou duru.” (Eclesiástes 2:24) Pa algun hende, esaki lo por parce un lema anticuá, pero otronan ta aplicando e principio aki cu no ta mará na tempu. Nan ta di acuerdo cu berdad, “no tin nada mas mihó” cu disfrutá dje fruta di nan trabou duru. E buki The Joy of Working (E Goso di Traha) ta admití: “Un trabou bon hací ta duná bo un sensacion interno di satisfaccion.”

P’esei, haci e trabou lo mihó cu bo por, i probablemente esei lo yená bo cu energia. Haci mas cu solamente lo mínimo, i a lo mehor lo bo sintí bo mas felis. Haci e tareanan importante promé, i lo bo disfrutá di bo cuminda di merdia i di bo finnan di siman mas cu esun cu ta agotá su mes dor di posponé trabou.—Compará cu Ester 10:2; Romanonan 12:11; 2 Timoteo 2:15.

En bes di competí cu otronan, haci esfuerso pa surpasá bo mes. (Galationan 6:4) Fiha normanan nobo, metanan nobo. Haci un esfuerso pa haci mihó. Un señora, kende su trabou ta di cose mésun cos, loke algun hende lo considerá como desesperadamente laf, a hacié un wega pa midi e tempu cu e ta haci su trabou. E tabata conta cuantu e tabata haci cada ora, anto e tabata purba aumentá esei. Di berdad e ta disfrutá di su trabou, pasobra e ta trata na alcansá su potencial.—Proverbionan 31:31.

“Decorá” Bo Trabou

Doctornan Dennis T. Jaffe i Cynthia D. Scott ta recomendá: “Mira bo trabou manera un cas bashí. Bo ta muda bai aden i ta observá su forma i structura. Anto bo propio creatividad ta ser stimulá. Bo ta diseñá bo espacio. Bo ta decorá bo cas i ta combirtié den bo hogar. Bo ta personalis’é dor di dun’é bo propio estilo.”

Mayoria trabou ta ser asigná na bo cu un descripcion general di regla i instruccionnan. Haci solamente loke ta ser sperá di bo ta mescos cu habitá un cas bashí. E no tin ningun personalidad. Pero si bo agregá bo mes estilo personal na dje, bo trabou por bira muchu mas interesante. No tin dos hende cu lo “decorá” un trabou den e mésun manera. Un waiter lo memorisá e pedido di clientenan vast. Un otro lo ta hopi amabel i cortes. Tur dos ta disfrutá di nan trabou, pasobra nan a hinca un parti di nan mes den loke nan ta haci.

Sigui Siña

Un otro manera pa disfrutá di bo trabou ta siña. E buki Tension Turnaround (Boltu Tension) ta splica cu segun cu nos ta crece, nos celebro ta aumentá su capacidad di procesá informacion. Esaki ta splica pakico cosnan cu na un tempu a excitá nos, lo por aburí nos awor. E solucion ta satisfacé e apetit dje celebro pa haña informacion nobo dor di siña cos nobo.

Siña mas tocante bo trabou lo por hiba cu, cu tempu, nan lo duná bo trabou cu ta mas atractivo. Pero asta si esei no sosodé, e proceso di siña riba su mes lo haci bo trabou mas interesante i satisfaciente. E autornan Charles Cameron i Suzanne Elusorr ta señalá: “Siña no solamente ta aumentá bo confiansa dor cu bo ta aumentá bo abilidadnan, pero tambe e ta influenciá bo den e manera con bo ta mira bida: cu tin solucion pa problemanan, cu por superá dificultadnan, cu miedunan por bai i cu mas cos cu bo a imaginá ta posibel.”

‘Pero,’ kisas bo ta protestá, ‘mi a siña tur loke tin di sa tocante mi trabou hopi tempu pasá!’ Den e caso ei, lo bo por siña cosnan cu ta indirectamente relacioná cu bo trabou? Por ehempel, lo bo por dicidí di siña mas tocante relacionnan humano of tocante e aparatonan cu bo ta traha cuné. Kisas lo bo por siña con pa skirbi un mihó memo of con pa conducí un mihó reunion. Bo por siña cua ta mihó maneranan pa trata cu shefnan.

Con bo por siña e cosnan aki? Kisas bo compania ta ofrecé cursonan cu bo por saca probecho di dje. Of kisas un biblioteca tin net e bukinan cu bo tin mester. Pero no pasa por haltu di fuentenan di informacion ménos obvio. Bo por siña hopi dor di observá hende na trabou i ripará nan puntonan fuerte i esnan débil. Bo por siña di bo erornan, i bo por siña di bo logronan tambe, dor di analisá loke bo a haci bon. Loke bo ta siña for di bo propio experencia i dor di observá otronan por siñá bo loke lo bo no por lesa nunca den buki of tende den un curso.

Algun Sugerencia Final

Tin un otro manera mas cu bo por mira bo trabou. Lo por haña cu bo merecé mihó, cu ta otronan ta haña tur oportunidad i cu abo nunca a haña e chens di haci e trabou cu di berdad bo kier haci. Lo bo por papia sin fin cu otronan cu ta di acuerdo cu bo, i kisas lo bo por keda convencí cu tur esaki ta berdad.

Pero kisas e no ta berdad. Hopi hende cu ta disfrutá di nan trabou a siña haci esei. Un persona cu ta gusta diseñá cas, lo por siña disfrutá tambe di core bus. Di con? Pasobra su actitud creativo pa cu e trabou ta dun’é goso i satisfaccion.

P’esei, deshací di pensamentu negativo cu ta haci e dianan di trabou scur, compará cu fin di siman. No perde tempu repasando bo fracasonan di pasado, imaginando loke lo bai malu un djis, i preocupando tocante loke otro hende ta pensa di bo. Mira e trabou bo dilanti. Dun’é tur bo atencion. Trata di bira mes absorbá den dje cu lo bo ta den bo hobi faborito. Duna e mihó di loke bo a yega di duna, i sinti goso di mira un trabou bon hací.

[Kuadro/Plachi na página 27]

No Neglishá Bo Trabou

Bijbel ta bisa na Proverbionan 27:23, 24: “Positivamente bo tin cu conocé e aparencia di bo tou. Fiha bo curason riba bo trupanan; pasobra tesoro lo no t’ei pa tempu indefiní, ni un diadema pa tur generacion.” Kico esei ta nificá?

Esei ta nificá cu rikesa (tesoro) i posicionnan prominente (un diadema), si bo a adkirié mes, hopi bes ta resultá di ta temporal. P’esei, den tempu bíblico un wardadó di carné a desplegá sabiduria si el a presta atencion diligente na e cuido di su carnénan, esta, a ‘fiha su curason riba su trupanan.’ Manera e tres siguiente versículonan ta mustra, e resultado lo ta siguridad pa e trahadó i pa su famia.—Proverbionan 27:25-27.

Kico di awe? Hopi bes hende ta fiha nan curason riba adkerí un fortuna of un posicion prominente, cu, nan ta spera, lo haci posibel pa nan kita di nan trabou actual. Algun tin plannan realístico; otronan ta soña so. Den ámbos caso ta imprudente pa despreciá of neglishá bo trabou actual. E ta, i lo por sigui ta, e fuente di entrada mas confiabel. Ta muchu mas sabí pa un hende fiha su curason riba su “trupanan,” enfocando completamente riba su trabou confiabel. Probablemente dor di haci asina lo e haña siguridad material awor i den futuro.