Ki Ora Ta Apropiá pa Papia?

1. Kiko Eklesiástes 3:1 i 7 ta siña nos?

ALGUN di nos gusta papia hopi. Pero tin di nos apénas ta papia. Manera e teksto sentral ta indiká, tin un tempu pa papia i un tempu pa keda ketu. (Lesa Eklesiástes 3:1, 7.) Tin biaha kisas nos ta deseá pa algun di nos rumannan papia mas i pa otro papia ménos.

2. Ken tin derecho di disidí ki ora i kon nos mester papia?

² E abilidat i kapasidat di papia ta un regalo di Yehova. (Éks. 4:10, 11; Rev. 4:11) Den su Palabra, e ta siña nos kon pa usa e regalo ei na un bon manera. Den e artíkulo akí, nos lo analisá algun ehèmpel bíbliko ku lo yuda nos sa ki ora pa papia i ki ora pa keda ketu. Tambe nos lo mira kiko Yehova ta pensa di loke nos ta bisa nos rumannan. Pero promé, laga nos wak ki ora nos mester papia.

ORA KU NOS MESTER PAPIA

3. Ki animashon Romanonan 10:14 ta duna nos?

³ Semper nos mester ta kla pa papia tokante Yehova i e Reino. (Mat. 24:14; lesa Romanonan 10:14.) Asina, nos ta imitá Hesus. Un di e motibunan prinsipal ku el a bini na tera tabata pa bisa hende e bèrdat tokante su Tata. (Huan 18:37) Pero, ta importante tambe pa nos presta atenshon na kon nos ta papia. P’esei, ora nos ta papia ku un hende tokante Yehova, nos mester hasi esei “na un manera suave i ku rèspèt profundo,” i nos mester tene kuenta ku su sintimentu- i kreensianan. (1 Ped. 3:15) E ora ei nos lo hasi mas ku djis papia. Nos lo siña hende e bèrdat i kisas te asta yega na nan kurason.

4. Segun Proverbionan 9:9, kon ansiano por yuda otro ruman?

⁴ Ora ansiano mira ku un ruman mester di konseho, nan sa ku ta ora pa papia. Ta klaru ku nan lo no hasi esei dilanti di otro ruman. Nan lo skohe un momento apropiá pa papia ku e ruman, kisas na un lugá diskreto, pa nan no lag’é pasa bèrgwensa. Ansiano semper mester hasi esfuerso pa trata un ruman ku dignidat. Pero, nan no ta keda sin mustr’é prinsipio bíbliko ku por yud’é hasi loke ta sabí. (Lesa Proverbionan 9:9.) Dikon ta asina importante pa nos tin kurashi pa papia ora ta nesesario? Laga nos wak dos ehèmpel ku ta kompletamente diferente for di otro. E promé ta di un hòmber ku mester a korigí su yunan. E di dos ta di un señora ku mester a papia ku un futuro rei.

5. Dikon nos por bisa ku Elí a faya den su manera di papia ku su yunan?

⁵ Sumo Saserdote Elí tabata stima su dos yunan mashá. Pero, nan no tabatin niun tiki rèspèt pa Yehova. Nan tabatin un asignashon importante di sirbi komo saserdote den e tabernakel. Ma, nan tabata abusá di nan outoridat, nan a demostrá un falta di rèspèt pa e ofrendanan di Yehova i a kometé inmoralidat seksual abiertamente. (1 Sam. 2:12-17, 22) Segun Lei di Moises, nan a meresé morto. Pero Elí tabata demasiado tolerante ku nan, el a djis skual nan suavemente i a laga nan sigui sirbi den e tabernakel. (Deu. 21:18-21) Kiko Yehova a pensa di esei? El a bisa Elí: “Pakiko bo ta . . . onra bo yu hòmbernan mas ku mi?” Yehova a disidí di mata e dos hòmbernan malbado ei.—1 Sam. 2:29, 34.

6. Ki lès importante nos ta siña for di Elí?

⁶ Nos ta siña un lès importante for di Elí. Si nos haña sa ku un amigu òf un famia di nos a kibra un lei di Dios, nos no mester keda ketu—nos mester papia kuné tokante Yehova su normanan. Djei, nos mester hasi sigur ku e ta haña e yudansa ku e tin mester for di e representantenan di Yehova. (Sant. 5:14) Hamas nos lo ke ta meskos ku Elí i onra un amigu òf un famia di nos mas ku Yehova. Ta eksigí kurashi pa papia ku un ruman ku mester di korekshon, pero e esfuerso ta bale la pena. Awor, laga nos wak e diferensia entre loke Elí a hasi i loke un israelita ku yama Abigail a hasi.

7. Dikon Abigail a papia ku David?

⁷ Abigail tabata kasá di Nabal, un hòmber riku ku tabata doño di hopi tereno. Ora David i su hòmbernan tabata hui for di Rei Saul, nan a pasa algun tempu ku Nabal su wardadónan di karné i a protehá e tounan for di ladron. Akaso Nabal a demostrá gratitut pa nan yudansa? Nò! Ora David a pidié pa duna su hòmbernan un tiki kuminda i awa, Nabal a rabia, el a rous nan i a insultá nan. (1 Sam. 25:5-8, 10-12, 14) Ta p’esei David kier a mata delaster un hòmber di Nabal su kas. (1 Sam. 25:13, 22) Kon por a evitá e desaster ei di sosodé? Abigail a realisá ku tabata ora pa papia. Ku kurashi el a bai topa David i su 400 hòmbernan yen di hamber, rabiá i armá, i el a papia kuné.

8. Kiko e ehèmpel di Abigail ta siña nos?

⁸ Ora Abigail a papia ku David, el a hasié ku kurashi i rèspèt, i na un manera konvinsente. Aunke e situashon desagradabel ei no tabata su falta, el a pidi David pordon. El a bisa ku e sa ku David ta un bon hende i lo hasi lo korekto. Abigail a konfia riba Yehova pa yudansa. (1 Sam. 25:24, 26, 28, 33, 34) Meskos ku Abigail, nos mester tin kurashi pa papia si nos mira ku un ruman ta bai kometé un eror grave. (Sal. 141:5) Nos mester hasi esei na un manera respetuoso. Ora amor ta motivá nos pa duna un hende konseho ku e mester, nos ta demostrá ku nos ta berdadero amigu.—Pro. 27:17.

9-10. Kiko e ansianonan mester kòrda ora nan ta konsehá un ruman?

⁹ Ta spesialmente importante pa e ansianonan tin kurashi pa papia ku ruman den kongregashon ku dal un paso robes. (Gal. 6:1) Nan ta humilde i sa ku, komo ku nan tambe ta imperfekto, kisas un dia nan mester di konseho. Pero, esei no ta stroba nan di korigí ruman ku mester di disiplina. (2 Tim. 4:2; Tito 1:9) Ora nan konsehá un ruman, nan ta hasi esfuerso pa siñ’é na un manera ábil i ku pasenshi. Nan ta stima nan rumannan i p’esei nan ke yuda nan. (Pro. 13:24) Pero, riba tur kos, nan ta interesá den onra Yehova. P’esei, nan ta defendé e normanan di Dios i protehá e kongregashon di kualke peliger.—Echo. 20:28.

¹⁰ Te asina leu, nos a wak ki ora nos mester papia. Pero, den e siguiente paragrafnan nos lo bai siña ki ora ta mihó pa keda ketu.

ORA NOS MESTER KEDA KETU

11. Ki ilustrashon Santiago a usa, i dikon e ta na su lugá?

¹¹ No ta semper fásil pa kontrolá nos lenga. Pa deskribí esei, Santiago, un eskritor di Beibel, a usa un ilustrashon ku ta na su lugá. El a bisa: “Si un hende no ta trompeká den loke e ta bisa, e ta un hòmber perfekto, kapas pa frena tambe henter su kurpa.” (Sant. 3:2, 3) Frena ta loke ta bai den boka di un kabai. Ora e ginete hala e riendanan, e por guia òf frena e kabai. Pero, si e no keda ku e riendanan tené, e kabai por kore pa loko i por hasi su mes òf e ginete daño. Asina tambe, tin situashon ku nos mester frena nos lenga, sino e por kousa hopi daño. Laga nos wak algun ehèmpel.

12. Ki ora nos mester frena nos lenga?

¹² Kiko abo ta hasi ora un ruman tin sierto informashon ku ta konfidensial? Por ehèmpel, imaginá ku bo konosé un publikadó ku ta biba den un pais unda nos obra ta prohibí. Lo ta bon pa puntr’é detaye tokante nos aktividatnan einan? Sin duda, bo tin bon motivashon. Nos ta stima nos rumannan i ta interesá pa sa kon ta bai ku nan. Ademas, nos ke ta spesífiko ora nos ta hasi orashon pa nan. Pero, esei ta un di e situashonnan ku nos tin ku frena nos lenga. Si nos preshoná un ruman pa divulgá informashon konfidensial, nos ta demostrá falta di amor. Nos ta demostrá falta di amor tambe na e rumannan ku ta biba den e pais ei, ya ku e informashon ku e ruman divulgá por pone nan na peliger. Sigur, niun di nos lo no ke pone ku e situashon lo bira mas difísil pa nos rumannan ku ta biba den pais unda nos obra ta prohibí. Na e mesun momento, si nos ta sirbi den un pais asina, nos lo no divulgá informashon tokante kon nos ta prediká i ta hasi otro aktividat.

13. Segun Proverbionan 11:13, kiko ansiano mester hasi, i dikon?

¹³ Spesialmente ansiano mester apliká e prinsipio na Proverbionan 11:13 (les’é) pa warda informashon sekreto, esta, konfidensial. Kisas esei por ta un reto, foral si e ansiano ta kasá. Ta bèrdat ku, pa tene un matrimonio fuerte, ta nesesario pa e esposo i esposa kòmbersá tokante nan pensamentu, sintimentu i ansiedatnan. Pero, un ansiano sa ku e no mester divulgá informashon konfidensial di otro ruman. Si e hasi esei, e por pèrdè konfiansa di e rumannan i daña su reputashon. Ruman ku tin responsabilidat den kongregashon no por “tin dos lenga.” (1 Tim. 3:8) Ke men, nan no mester ta desonesto ni gusta hasi redu. Si un ansiano ta stima su kasá, lo e no bis’é informashon ku e no mester sa.

14. Kon kasá di un ansiano por yud’é mantené un bon reputashon?

¹⁴ Kasá di un ansiano por yud’é mantené un bon reputashon. Kon? Ora e no ta preshoná su esposo pa papia tokante asuntu konfidensial. Asina ei, no solamente e ta apoyá su esposo pero ta demostrá rèspèt na e rumannan ku a konfia su esposo. Anto mas importante ainda, e ta hasi Yehova kontentu pasobra el a kontribuí na pas i union di e kongregashon.—Rom. 14:19.

KIKO YEHOVA TA PENSA DI LOKE NOS TA BISA?

15. Kiko Yehova a pensa tokante e tres hòmbernan ku a bai wak Yòb, i dikon?

¹⁵ E buki di Yòb ta siña nos hopi tokante ki ora pa papia i kiko pa bisa. Despues ku Yòb a sufri un tragedia tras di otro, kuater hòmber a bin konsol’é i dun’é konseho. E hòmbernan ei a pasa basta tempu sin bisa un pia di palabra. Pero loke tres di nan, Elifaz, Bildad i Sofar, a bisa despues a demostrá bon kla ku nan no a usa e tempu ei pa pensa kon pa yuda Yòb. Mas bien, nan tabata pensa kon pa proba ku el a hasi algu malu. Algun kos ku nan a bisa tabata kuadra, pero gran parti di loke nan a bisa tokante Yòb i tokante Yehova tabata falsu i no amabel. Nan a akusá Yòb di ta un mal hende. Kiko Yehova a pensa di esei? Su furia a sende kontra e tres hòmbernan ei. El a yama nan bobo i a pone nan pidi Yòb resa pa nan.—Yòb 32:1-3; 42:7-9.

16. Ki lès e mal ehèmpel di Elifaz, Bildad i Sofar ta siña nos?

¹⁶ E mal ehèmpel di Elifaz, Bildad i Sofar ta siña nos vários lès. Promé, nos no mester husga, òf akusá, nos rumannan. (Mat. 7:1-5) Mas bien, nos mester skucha nan atentamente promé ku nos papia. Ta e ora ei so, nos lo komprondé nan situashon. (1 Ped. 3:8) Di dos, ora nos ta papia, nos mester hasi sigur ku nos palabranan ta amabel i eksakto. (Efe. 4:25) Di tres, Yehova ta masha interesá den loke nos ta bisa nos rumannan.

17. Kiko nos ta siña for di e ehèmpel di Eliú?

¹⁷ E di kuater hòmber ku a bishitá Yòb tabata Eliú, un desendiente di Abraham. El a skucha segun ku Yòb i e tres otro hòmbernan tabata papia. Aparentemente el a presta bon atenshon na loke nan a bisa, pasobra el a duna Yòb konseho amabel pero sinsero ku lo a yud’é kambia su manera di pensa. (Yòb 33:1, 6, 17) Loke tabata mas importante pa Eliú tabata onra Yehova, no su mes ni otro hende. (Yòb 32:21, 22; 37:23, 24) Su ehèmpel ta siña nos ku tin un tempu pa keda ketu i skucha. (Sant. 1:19) Nos ta siña tambe ku si nos tin ku duna konseho, riba tur kos, nos interes mester ta den onra Yehova i no nos mes.

18. Kon nos por demostrá nos gratitut pa e abilidat i kapasidat di papia?

¹⁸ Ora nos sigui e konseho di Beibel tokante ki ora pa papia i kiko pa bisa, nos ta demostrá nos gratitut pa e abilidat i kapasidat di papia ku Yehova a regalá nos. Rei sabí Sálomon bou di inspirashon a skirbi: “Un palabra papiá na ora apropiá ta manera un apel di oro den montura di plata.” (Pro. 25:11) Si nos skucha otro atentamente i nos pensa promé ku nos papia, nos palabranan lo ta manera e apel di oro ei: balioso i bunita. Pues, sea ku nos ta papia hopi òf tiki, nos palabranan por edifiká nos rumannan, i nos lo hasi Yehova sintié orguyoso di nos. (Pro. 23:15; Efe. 4:29) Esei ta e mihó manera pa demostrá nos gratitut pa e regalo ei di Dios!