Tene Trabou i Tempu Liber den Balansa

“TEMPU liber ta un bistí bunita, pero no pa tur ora.” Cu e palabranan aki un escritor anónimo ta ilustrá aptamente e balor di tempu liber. Tog e ta mustra cu mester balans’é cu actividad productivo.

Escritor bíblico inspirá, Sálomon, tambe a trata e asuntu aki. E rey sabí aki a mencioná dos extremo cu nos mester evitá. Promé, el a bisa: “Esun estúpido ta crusa su mannan i ta come su mes carni.” (Eclesiástes 4:5) Sí, flohera por hinca un hende den pobresa. Esei por tin como resultado cu e persona floho su salú i asta su bida por ta na peliger. Di otro banda, tin hende cu ta sacrificá tur cos pa traha mata curpa. Sálomon a yama e trahamentu duru sin stop aki, “banidad i un corementu tras di bientu.”—Eclesiástes 4:4.

Cu bon motibu anto, Sálomon a recomendá un balansa: “Mihó un man yen di descanso, cu dos man yen di trabou duru i corementu tras di bientu.” (Eclesiástes 4:6) Un persona mester “mira e bon pa motibu di su trabou duru.” Esei ta nificá cu regularmente e mester tuma tempu pa disfrutá di loke el a gana. (Eclesiástes 2:24) I den bida mester tin otro cos fuera di trabou seglar. Nos famia merecé algu di nos tempu. Sálomon a enfatisá cu nos obligacion principal ta, no trabou seglar, sino sirbi Dios. (Eclesiástes 12:13) Bo ta un dje hendenan cu tin un punto di bista balansá di trabou?