Mescos Cu Dalakochi

BO A yega di cana keiru den un sabana den zomer i mira masha hopi dalakochi bula kita for di bo caminda? A parce cu nan tabata tur rond di bo, aunke kisas apenas bo a presta atencion na nan. Di tur manera, nan ta parce inofensivo i insignificante.

Sin embargo, e insignificancia di dalakochi en berdad ta haci nan un símbolo apropiado pa humanidad. Aunke algun hende prominente por considerá nan mes altamente importante, nos Creador ta pensa otro. Su profeta Isaías a bisa: “Tin Un cu ta bibando riba e círculo dje tera, di cua su habitantenan ta manera dalakochi.”—Isaías 40:22.

Jehova Dios su grandesa, poder i sabiduria ta elev’é leu riba e region di simpel hende, mescos cu homber ta hopi superior na dalakochi den intelecto i poder. Sin embargo, Dios su cualidad supremo ta amor. I su amor incomparabel ta impuls’é pa tuma nota di nos, pa yuda nos i pa salba nos—si nos ta stim’é i obedec’é. Jehova ta trata cu nos amorosamente, maske nos ta manera dalakochi insignificante. E salmista a bisa: “Ken ta manera Jehova nos Dios, esun cu ta trahando su habitacion den haltura? E ta rebahando su mes p’e mira cielu i tera, lantando esun di condicion humilde for di stof mes.”—Salmo 113:5-7.

Manera e salmo aki ta splica, Jehova amorosamente ta extendé yudansa na esun di condicion humilde. Sí, E ta yuda esnan cu humildemente ‘ta busca Dios pa nan realmente por hañ’é.’ (Echo 17:27) Esnan cu ta haña Dios—i ta sirbi’é—ta bira asta precioso den su bista. (Compará cu Isaías 43:4, 10.) Pues, e dalakochi humilde ta sirbi pa recordá nos di nos propio insignificancia i dje amor di nos Creador todopoderoso, kende ta duna hende obediente su amistad i bondad inmerecí. Abo ta mustrando aprecio pa Dios su amor?