Ora Oriente ta toca Occidente
“AI, ORIENTE ta Oriente, i Occidente ta Occidente, i nan dos nunca lo toca.” E palabra ei dje poëta británico Rudyard Kipling ta hácinos corda e diferencia cultural grandi cu ta partí humanidad, locual ta contribui na odio tribal, racial, i nacionalista cu ta aumenta lihé na tur banda awe. Hopi hende ta puntra, Dios no por haci algo tocante e situacion? Sí, e por! I e ta haci algo asta awor! E sigiente palabra dje poëma di Kipling a referi na esei. Pa cuanto tempo Oriente lo keda partí for di Occidente? Kipling a bisa: “Te cu Tera i Cielo ta para pronto dilanti dje gran trono di huicio di Dios.”
Dios a duna Jesucristo, su Yiu, e responsabilidad di huzga. (Juan 5:22-24, 30) Pero, ki ora e tempo di huzgamento ta cuminza? Ken ta ser huzgá, i cu ki resultado? Jesús, den profecía, tabata esun cu a duna detaye di gera mundial i tambe di angustia cu a cuminza afligi humanidad na aña 1914. El a bisa cu esei ta identifica e “siñal” di su ‘presencia invisibel i dje conclusion dje sistema di cosnan.’—Mateo 24:3-8.
Ne culminacion dje profecía grandi, Jesús a identifica e tempo actual como un tempo di huicio, bisando di su mes: “Ora e Yiu di hende ta yega den su gloria, i tur angel hunto cuné, anto lo e sinta riba su trono glorioso. I tur nacion lo ser reuní dilanti dje, i lo e separa hende un for di otro, mescos cu wardador ta separa carné foi cabrito. I lo e pone e carnénan na su man drechi, ma e cabritonan na su man robez.” Simbólicamente, tur hende di mundo ta ser reuní awor dilanti dje Huez i ta keda responsabel pe manera cu nan ta responde na su mensahe di salbacion. Ora e huicio ta ser ehecutá pronto den e tribulacion grandi, hende desobediente semehante di cabrito “lo bai na cortamento eterno, ma e hustonan [hende obediente semehante di carné] na bida eterna.”—Mateo 25:31-33, 46; Revelacion 16:14-16.
‘For di salimento di solo i for di drentamento di solo’
Huzgamento di mundo realmente a cuminza durante e añanan tempestuoso di Gera Mundial I. Ne tempo ei, clero di cristiandad a duna nan pleno apoyo ne nacionan den gera. Esei a identificánan como parti dje mundo corrupto cu ta merece e “rabia di Dios.” (Juan 3:36) Pero, con a para cu hende cristian amante di paz cu a eherce fe den Dios? Cuminzando na aña 1919, e reunimento di nan a cuminza ne banda dje Rey, Cristo Jesús.
Nan a bini di tur parti di mundo, cuminzando cu e resto dje 144.000 hende ungí, escogí durante tur e siglonan dje era cristian. Nan lo ser “coheredero cu Cristo” den su Reino celestial. (Romano 8:17) E profeta di Dios a bisa na eseinan: “No tene miedu, pasobra mi ta cu bo. Lo mi trece bo simía for di salimento di solo, i for di drentamento di solo lo mi huntábo. Lo mi bisa e nort, ‘Entrega!’ i ne zuid, ‘No nenga. Trece mi yiu hombernan di leu, i mi yiu muhernan for di extremidad dje tera, tur esnan cu ta ser yamá pa mi nomber i cu mi a crea pa mi mes gloria, cu mi a forma, sí, cu mi a traha.’ ”—Isaías 43:5-7.
Pero, esei no ta tur! Specialmente desde 1935, un huntamento di un multitud grandi, awor na cantidad di miyones, a cuminza. Eseinan ta “carné” cu Jesús a mencioná den Mateo 25:31-46. Mescos cu e resto ungí promé cu nan, e multitud grandi ta yega di “pone fe” den Esun cu a declara: ‘Boso ta mi testigonan, i mi ta Dios.’ (Isaías 43:10-12) E reunimento dje multitud grandi també ta sigi ‘for di salimento i drentamento di solo, for di nort i zuid, i te na extremidad dje tera.’
Tal carné amante di paz ta ser uní den un solo hermandad internacional. Nan ta papia hopi diferente idioma dje 231 tera unda nan ta biba. Sin embargo, nan ta uní spiritualmente siñando e “idioma puro” dje mensahe bíblico di Reino, “pa nan tur inboca e nomber di Jehova, pa sirbié scouder cu scouder.” (Sofonías 3:9) Nan unidad di kerimento, propósito, i accion ta duna testimonio maraviyoso cu Oriente en berdad a toca Occidente, i hende di tur parti di mundo, pe sirbishi i alabanza di Señor Soberano Jehova.
Den algun país e reunimento ta tuma lugar den circunstancia di mas notable, segun cu e sigiente raport ta mustra.