Con Sabiduria Divino Ta Ser Manifestá?

“SABIDURIA di esun den necesidad ta ser despreciá, i su palabranan no ta ser scuchá.” Cu e palabranan aki, rey sabí Sálomon a concluí e relato di un homber humilde, pero sabí, cu a scapa henter un stad di destruccion. Pero, lamentablemente, “niun hende no a corda riba e homber den necesidad ei.”—Eclesiástes 9:14-16.

Hende tin tendencia di menospreciá personanan di poco recurso, asta si e hendenan pober aki a efectuá actonan noble. Esaki tabata cierto den e caso di Jesus. Isaías a profetisá di dje: “Hende a despreci’é i a evit’é, un homber destiná pa dolor i pa ta conocí cu enfermedad.” (Isaías 53:3) Algun hende a despreciá Jesus djis pasobra e no tabatin e posicion of prominencia dje lidernan religioso di su tempu. Sin embargo, e tabatin hopi mas tantu sabiduria cu cualkier hende pecaminoso. Hendenan dje stad caminda Jesus a lanta, a nenga di reconocé cu e ‘yu di carpinté’ aki a manifestá asina un sabiduria i a efectuá obranan asina poderoso. Sin embargo, esei tabata un eror grave, pasobra e relato ta sigui bisa cu Jesus “no a haci hopi obra poderoso ei debí na nan falta di fe.” Cuantu e hendenan ei a perde!—Mateo 13:54-58.

Laga nos no cometé e mésun eror. Jesus di: “Sabiduria ta ser probá hustu dor di su obranan.” Esnan cu ta haci e trabou di Dios i cu ta duna di conocé e sabiduria celestial ta ser distinguí, no dor di nan státus of posicion social, sino dor di “fruta excelente” cu nan ta manifestá, esta, nan fe i obranan basá riba Bijbel.—Mateo 7:18-20; 11:19.