E Nacion Cu Ta Warda Integridad

“Habri e portanan p’e nacion hustu cu ta manteniendo conducta fiel por drenta.”​—⁠ISAIAS 26:⁠2.

1. Pakico e declaracion di Isaías tocante un “nacion hustu” por bini como un sorpresa?

AWENDIA, tin tur clase di nacion. Algun tin gobiernu democrático, algun tin gobiernu dictatorial. Algun ta próspero, algun ta pober. Nan tin un cos en comun: Tur ta parti dje mundu di cua Satanas ta dios. (2 Corintio 4:⁠4) En bista di esaki, e palabranan di Isaías por bini como un sorpresa pa algun hende ora e ta bisa: “Boso habri e portanan p’e nacion hustu cu ta manteniendo conducta fiel por drenta.” (Isaías 26:⁠2) Un nacion hustu? Sí, tin un nacion hustu ya cu e profecia ta señalá na su existencia den nos tempu. Con un hende por identificá e nacion extraordinario aki?

2. Kico ta “e nacion hustu”? Con nos sa esei?

² Manera e Traducción del Nuevo Mundo a traducí Isaías 26:​2, e texto ta bisa cu e nacion ta “manteniendo conducta fiel.” King James Version (márgen) ta traducí e versículo, “e nacion hustu cu ta mantené e berdadnan.” Tur dos ta descripcionnan apropiado. En realidad, e nacion hustu ta fácil pa reconocé pasobra e ta e único nacion riba tera cu ta sumiso na Cristo e Rey, p’esei no ta parti dje mundu di Satanas. (Juan 17:16) Como tal, su miembronan ta conocí pa ‘nan mantenimentu di conducta excelente entre e nacionnan.’ Nan ta sigui un estilo di bida cu ta glorificá Dios. (1 Pedro 2:12) Ademas, unda cu nan ta den e mundu, nan ta parti di “e congregacion dje Dios bibu, un pilar i apoyo dje berdad.” (1 Timoteo 3:15) Apoyando e berdad, nan ta rechasá e filosofianan pagano cu cristiandad ta siña, i nan ta defendé “e lechi no-adulterá cu ta pertenecé n’e palabra”​—⁠e Palabra di Dios, e Bijbel. (1 Pedro 2:⁠2) Ademas, nan ta predicá celosamente e bon nobo di Reino “den tur creacion cu ta bou di cielu.” (Colosense 1:23) Por tin cualkier duda cu e nacion aki ta consistí di e resto di “e Israel di Dios,” e congregacion di cristian ungí? Definitivamente cu no!​—⁠Galatio 6:16.

E Nacion A Nace

3. Describí con “e nacion hustu” a nace.

³ Na ki tempu “e nacion hustu” a nace? Su principio a ser profetisá den e buki di Isaías. Na Isaías 66:​7, 8, nos ta lesa: “Promé cu el [Sion] a cuminsá haña dolor di haña yu, el a duna lus. Promé cu e dolornan di parto por a yega cerca dje, el a asta duna lus na un yu homber. . . . Sion a haña dolor di haña yu i tambe a duna lus na su yu hombernan.” Como algu masha excepcional, Sion, e organisacion celestial di Dios, mester a duna lus na “un yu homber” promé cu el a sufri dolornan di parto. Na 1914 e Reino mesiánico a ser producí den cielu. (Revelacion 12:⁠5) Despues di esei, mas i mas nacion a haña nan enbolbí den e promé guera mundial, i cristiannan ungí a sufri di angustia i persecucion severo. Finalmente, na aña 1919, e nacion spiritual, e “yu homber,” a ser producí riba tera. Pues Sion ‘a duna lus na su yu hombernan,’​—⁠miembronan ungí dje “nacion hustu” nobo​—⁠i esakinan a ser organisá pa un trabou di duna testimonio cu ta expandiendo constantemente.​—⁠Mateo 24:​3, 7, 8, 14; 1 Pedro 2:⁠9.

4. Pakico e nacion hustu di Dios tabatin cu lucha pa mantené integridad?

⁴ Desde su principio, e nacion aki a confrontá pruebanan severo di su integridad. Pakico? Ora e Reino celestial a nace, Satanas i su demoñonan a ser tirá for di cielu aki bou riba tera. Un bos duru a proclamá: “Awor a sosodé e salbacion i e poder i e reino di nos Dios i e autoridad di su Cristo, pasobra e acusador di nos rumannan a ser tirá abou, kende ta acusá nan dia i anochi dilanti nos Dios! I nan a venc’é debí n’e sanger dje Lamchi i debí n’e palabra di nan testimonio, i nan no a stima nan alma ni den peliger di morto.” Satanas a reaccioná riba e cambio di circunstancia aki cu gran rabia “i a bai pa haci guera contra e resto di [e muher] su simia, kende ta warda e mandamentunan di Dios i tin e trabou di duna testimonio di Jesus.” Enfrentá cu e atakenan di Satanas, cristiannan ungí a para firme. Te awe, miembronan celoso dje nacion hustu di Dios ta ehercé fe den Jesus su sanger rescatador i ta sigui duna Jehova un contesta p’e gran bofonador dor di warda integridad asta “den peliger di morto.”​—⁠Revelacion 12:​1, 5, 9-12, 17; Proverbio 27:11.

5. Ki actitud excelente di Testigonan di tempu moderno a yuda nan warda integridad?

⁵ Na 1919, ora e testimonio dje Reino di Dios di tempu moderno a cuminsá, e Studiantenan di Bijbel, manera Testigonan di Jehova tabata yamá n’e tempu ei, tabata poco na cantidad pero fuerte den fe. Nan a bira e miembronan dje fundeshi di ‘un stad fuerte, cu salbacion poné como muraya i baluarte.’ Nan confiansa tabata den “Jah Jehova [kende] ta e Baranca di tempu indefiní.” (Isaías 26:​1, 3, 4) Mescos cu Moises di pasado, nan a proclamá: “Lo mi declará e nomber di Jehova. Boso atribuí grandesa na nos Dios! E Baranca, perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.”​—⁠Deuteronomio 32:​3, 4.

6. Den ki manera Jehova a bendicioná su pueblo den e último dianan aki?

⁶ Desde e tempu ei, e portanan dje areglo dje Reino di Dios a keda hanchu habrí segun cu, promé, e resto dje 144.000 cristiannan ungí a ser recogé i awor un multitud grandi di “otro carnénan” ta uniendo den e declaracion dje propósitonan di Jehova su Reino. (Juan 10:16) Pues, por ser anunciá gososamente: “Bo a agregá n’e nacion; O Jehova, bo a agregá n’e nacion; bo a glorificá bo mes. Bo a extendé na un distancia grandi tur e fronteranan dje pais.” (Isaías 26:15) Segun cu nos ta analisá e campo mundial awe, nos ta mira ki cierto e palabranan ei ta! Mediante poder di spiritu santu, e testimonio di Cristo su Reino entrante a ser duná “te n’e partinan mas lehano dje tera.” (Echo 1:⁠8) E alcanse dje expansion ei por ser midí for dje Raport di Aña di Sirbishi di 1994 di Testigonan di Jehova Mundialmente, cu ta aparecé riba página 12 pa 15.

Un Máximo Nobo di Publicadornan

7, 8. (a) Ki evidencia tin cu e pueblo di Dios a ‘alargá e cabuyanan di nan tent’? (b) Mirando e Raport di Aña di Sirbishi di 1994, cua áreanan bo ta mira cu ta ‘extendiendo nan fronteranan’ sobresalientemente?

⁷ Considerá algun dje puntonan sobresaliente dje raport aki. E máximo di publicadornan di Reino den e campo a alcansá 4.914.094! Ta ki emocionante pa observá e recogementu constante dje “multitud grandi . . . for di tur nacion i tribu i pueblo i lenga, pará dilanti e trono i dilanti e Lamchi, bistí cu mantel blancu”! Sí, esakinan tambe a proba di ta wardadornan di integridad. “Nan a laba nan mantelnan i a haci nan blancu den e sanger dje Lamchi,” siendo considerá hustu dor cu nan ta ehercé fe den Jesus su sacrificio di rescate.​—⁠Revelacion 7:​9, 14.

⁸ Particularmente desde 1919, e mandamentu a ser transmití n’e organisacion di Jehova: “Haci e lugá di bo tent mas espacioso. I laga nan extendé e telanan di tent di bo magnífico tabernáculo. No tene bo mes atras. Alargá e cabuyanan di bo tent, i haci e stacanan ei di bo tent fuerte.” (Isaías 54:⁠2) Como reaccion, e trabou di predicacion ta sigui cu pleno vigor, asta na Yukon extremamente friu, cu ta na frontera cu Alaska, unda un grupo resistente di pioneronan ta soportá temperaturanan cu por baha te 45 pa 50 grado Celsio bou di cero pa simannan largu tras di otro. Den añanan reciente multitud di hende ta drentando na cantidad aumentante den Jehova su nacion wardador di integridad. E portanan a habri mas hanchu pa ricibí esakinan for di paisnan asiático pafó di cristiandad, for di paisnan unda un tempu comunismo a dominá, for di hopi pais africano, i for di paisnan cu influencia católico, manera Italia, Spaña, Portugal i Sur América. Personanan desplasá a habri e campo di teritorionan di idioma stranhero. Na Inglatera, por ehempel, e Testigonan ta percurando p’e necesidadnan di 13 grupo étnico di idioma stranhero.

“Sigui Haci Esaki”

9. (a) Kico e asistencia na Memorial di 1994 ta indicá? (b) Cua ta algun dje paisnan cu tabatin asistencia excepcionalmente haltu na Memorial?

⁹ Un otro punto sobresaliente dje raport anual ta e asistencia na Memorial. Djis promé cu Jesus a muri, el a instituí e Memorial conmemorando su morto i a bisa su siguidornan: “Sigui haci esaki na mi recuerdo.” (1 Corintio 11:24) Tabata emocionante na 1994 pa mira 12.288.917 persona​—⁠hopi mas cu dobel e cantidad di publicadornan activo​—⁠bini huntu pa obedecé e mandamentu ei, sea como participante of como observador. Den algun pais e proporcion di asistencia na Memorial pa publicador tabata asta mas haltu. E 4.049 publicadornan na Estonia, Latvia i Lituania tabata encantá cu nan asistencia di 12.876 persona na Memorial, mas cu tres biaha e cantidad di publicador. I na Benin, e asistencia di 16.786 persona na Memorial a representá casi cincu biaha e cantidad di publicador. Un congregacion di rond di 45 publicador tabatin un asistencia di 831 persona!

10. (a) Ki responsabilidad e asistencia haltu na Memorial ta pone riba nos? (b) Describí loke por sosodé ora un persona cu a asistí na Memorial ta ricibí mas yudansa.

¹⁰ Testigonan di Jehova ta contentu cu asina tantu personanan interesá a uni cu nan n’e ocasion significativo ei. Awor nan kier yuda esakinan haci mas progreso den nan comprendimentu i amor dje berdad. Algun kisas ta reaccioná manera Alla na Rusia a reaccioná. Alla tabata studiando cu un ruman muher pionero special pero a haci poco progreso, pues e studio a para. No obstante, Alla a aceptá un invitacion pa asistí na Memorial. E reunion ei, cu tin asina tantu nificacion, a haci un impresion profundo riba dje. Regresando cas, el a tira afó tur su imágennan i a resa na Jehova pa yudansa. Dos dia despues e pionero a bishitá Alla pa mira kico el a gusta dje Memorial. A sigui un combersacion fructífero. Alla su studio a ser reanudá. Pronto e tabata participando den e trabou di duna testimonio. E experencia aki ta mustra e balor di bai bek cerca esnan cu a asistí na Memorial. Probablemente, hopi lo reaccioná mescos cu Alla.

“Sin Bandoná Nos Reunimentu Huntu”

11-13. (a) Kico ta parti dje conducta fiel dje nacion hustu? (b) Pakico cristiannan berdadero mester asistí n’e reunionnan?

¹¹ E Memorial ta e reunion di mas importante riba e calender di Testigonan di Jehova, pero di ningun manera e ta e único reunion. Tur siman Testigonan di Jehova ta reuní huntu den obedencia n’e palabranan di apostel Pablo: “Laga nos considerá un e otro pa stimulá na amor i obranan excelente, sin bandoná nos reunimentu huntu, manera algun tin e custumber, sino animá un e otro, i tantu mas segun cu boso ta contemplá e dia yegando cerca.” (Hebreo 10:​24, 25) Nan ta asociá cu Jehova su nacion hustu cu ta ser identificá dor di su conducta fiel. Conducta fiel ta incluí asistí n’e reunionnan fielmente.

¹² Esaki evidentemente ta ser comprendé claramente na Filipínas, caminda e promedio di asistencia di henter e pais n’e reunionnan di diadomingo ta 125 porciento dje cantidad di publicadornan. Esei ta ser comprendé claramente tambe, dor di un grupo di Testigo i hende interesá na Argentina. Nan ta biba rond di 20 kilometer for dje Salon di Reino. No obstante, e superintendente di circuito ta informá cu, excepto den caso di malesa, ningun di nan ta falta e reunionnan. Nan ta biaha pa cuater ora den un garoshi halá dor di cabai of riba lomba di cabai, i durante winter nan ta haci e biahe pa cas den scuridad djanochi.

¹³ Segun cu e fin dje sistema aki ta yega mas cerca, bida ta bira mas difícil, problemanan ta aumentá, i asistencia regular n’e reunionnan por ta un desafio mas grandi. Pero bou di circunstancianan asina, nos tin mas necesidad cu nunca dje alimento spiritual i compañerismo caluroso cu por ser hañá solamente na reunionnan asina.

“Ocupá Bo den dje Urgentemente”

14. Pakico Testigonan di Jehova tin un sentido di urgencia en cuanto nan ministerio, i ki resultadonan ta demostrá esaki?

¹⁴ Aña pasá, Iglesia Católico na Italia a referí n’e trabou di Testigonan di Jehova como “combertimentu agresivo di hende.” Pero, realmente no tin nada agresivo den loke e Testigonan ta haci. Mas bien, nan ministerio ta un expresion di amor profundo pa nan próhimo. Tambe e ta evidencia di obedencia n’e palabranan di Pablo: “Predicá e palabra, ocupá bo den dje urgentemente den tempu faborabel, i den tempu difícil.” (2 Timoteo 4:⁠2) Un sentido di urgencia ta impulsá Testigonan di Jehova pa ta celoso den nan ministerio, manera por ser mirá den nan dedicacion di un total di 1.096.065.354 ora na 1994 predicando na nan próhimo, haciendo rebishita i conduciendo semanalmente 4.701.357 studio di Bijbel. Hopi ruman por a participá den e sirbishi di pionero, loke ta demostrá cu e spiritu di pionero ta bibu i activo. E promedio di 636.202 pionero rond mundu ta proba esaki.

15, 16. (a) Con tantu hóben como bieu a demostrá e spiritu di pionero? (b) Mirando e paisnan individual den e Raport di Aña di Sirbishi di 1994, unda bo ta mira cantidadnan sobresaliente di pionero?

¹⁵ Entre e pioneronan ei tin hopi tiener. Algun na Merca ta sirbiendo awor como pionero regular bayendo scol secundario, cu nan compañénan di klas como nan teritorio principal. E hóbennan aki a haña cu trahando pionero ta e mihó manera pa protegá nan mes contra droga, inmoralidad i violencia cu ta penetrá den hopi scol n’e pais ei. Hopi otro hóben tin trabou di pionero como nan meta pa ora nan caba scol. Irina, na Ukrania, a traha pionero auxiliar durante tur su añanan di scol secundario pa por prepará su mes pa traha pionero despues di graduacion. Ora el a caba scol, su famia a ofrecé pa yuda cu su necesidadnan financiero di manera cu e por a representá nan den e trabou di pionero regular. Económicamente, cosnan no ta fácil na Ukrania. Pero Irina ta bisa: “Mi sa cu mi ta haciendo un trabou cu ta nificá bida, no solamente pa mi sino tambe pa esnan na ken mi ta predicá.” Ta berdaderamente un deleite pa mira asina tantu hóben awe cu ta pensa manera Irina. Ki mihó manera tin pa nan ‘corda nan Magnífico Creador den e dianan di nan hubentud’?​—⁠Eclesiastes 12:⁠1.

¹⁶ Un gran cantidad di pionero ta di edad avansá. Un di nan ta informá cu durante e segundo guera mundial, su tata i su ruman homber a ser matá bringando den e guera, i su mama i su ruman muher a ser tirá den un bario isolá. Despues el a perde su yu homber den morto. Awor, den su behes i sufriendo di kebranto di salú, Jehova a dun’é, den e congregacion cristian, un famia muchu mas grandi cu esun cu el a perde. I e ta haña su goso den yuda otronan como un pionero regular.

17, 18. Con cada un di nos, sea pionero of no, por demostrá e spiritu di pionero?

¹⁷ Naturalmente, no ta tur hende por ta un pionero. Jehova ta contentu pa aceptá henter nos décimo, lo mihó cu nos por ofrecé, kico cu esaki por ta den nos caso particular. (Malaquías 3:​10) En berdad, nos tur por cultivá e spiritu dje pioneronan celoso aki i haci loke nos circunstancianan ta permití pa adelantá e predicacion dje bon nobo.

¹⁸ Por ehempel, na Australia, 16 di april a ser designá como un dia special pa duna testimonio riba caya. El a ser apoyá bon dor di tantu publicadornan como pioneronan, manera tabata evidente den e máximo nobo di publicador di 58.780 p’e luna ei. Ademas, 90.000 mas tantu revista a ser plamá compará cu den e mésun luna aña pasá. Durante e dia special, un ruman muher a laga revista cu un homber, i miéntras e tabata skirbiendo su nomber i adres pa rebishitá e persona, el a descubrí cu nan tabata famia di otro! A resultá cu nan tabata primu cu no a mira otro pa 30 aña. Esei siguramente a crea oportunidad pa algun rebishita masha felis!

Warda Integridad te n’e Fin

19. Pakico ta urgente pa Jehova su nacion hustu warda integridad te n’e fin?

¹⁹ Ta urgente pa tur persona den e nacion hustu di Dios warda integridad segun cu Satanas su mundu ta drenta su etapa final. Pronto, Jehova su nacion santu lo tende e yamada: “Bai, mi pueblo, drenta den bo kambernan interior, i cera bo portanan bo tras. Sconde bo mes pa un momento so te ora e denunciacion pasa.” E mundu culpabel di sanger aki inevitablemente lo topa cu huicio divino. “Pasobra, mira! Jehova ta saliendo for di su lugá pa exigí cuenta p’e eror dje habitante dje tera contra dje, i e tera siguramente lo exponé su dramamentu di sanger i lo no tapa mas esnan di dje cu el a mata.” (Isaías 26:​20, 21) Laga cada un di nos para firme como un cristian cu ta warda integridad asociá cu Jehova su nacion hustu. Anto nos lo alegrá pa obtené bida eterno den e dominio terenal of celestial dje Reino di Cristo.

Bo Ta Corda?

◻ Na ki tempu “e nacion hustu” a nace?

◻ Pakico e pueblo di Dios tabatin mester di awante durante e último dianan aki?

◻ Kico ta ser demostrá dor dje cantidad haltu di publicadornan i e oranan dedicá den e ministerio segun e Raport di Aña di Sirbishi di 1994?

◻ Pakico asistencia na reunionnan ta asina importante segun cu e mundu aki ta yegando mas i mas cerca su fin?

◻ Pakico tur cu ta asociá cu Dios su nacion hustu mester warda integridad?

[Tabèl na página 12-15]

RAPORT DI AÑA DI SIRBISHI PA 1994 DI TESTIGONAN DI JEHOVA MUNDIALMENTE

(See bound volume)

[Plachi na página 18]

Wardadornan di integridad den Jehova su nacion hustu lo alcansá bida eterno den perfeccion