Capítulo Bintiseis
“Ningun Residente Lo Bisa: ‘Mi Ta Malu’”
1. Di con e palabranan di Isaías 33:24 ta un consuelo?
“HENTER e creacion ta sigui suspirá huntu i keda den dolor huntu te awor.” Asina apostel Pablo a bisa. (Romanonan 8:22) Apesar di avancenan riba tereno di ciencia médico, malesa i morto ta sigui plaga e rasa humano. P’esei, ki maraviyoso ta e promesa cu ta culminá e pasashi aki dje profecia di Isaías! Imaginá bo e tempu ora cu “ningun residente lo bisa: ‘Mi ta malu.’” (Isaías 33:24) Ki dia i con e profecia aki lo cumpli?
2, 3. (a) Den ki sentido e nacion di Israel ta enfermo? (b) Con Dios ta usa Asiria como su “bara” di disiplina?
2 Isaías ta skirbiendo na un tempu cu e pueblo cu tin un pacto cu Dios ta enfermo den sentido spiritual. (Isaías 1:5, 6) Nan a cai asina hundu den apostasia i inmoralidad cu nan tin mester di disiplina severo for di Jehova Dios. Jehova ta usa Asiria como e “bara” pa duna e disiplina ei. (Isaías 7:17; 10:5, 15) Promé, Israel su reino di dies tribu di nort ta cai den man dje asirionan na aña 740 P.E.C. (2 Reynan 17:1-18; 18:9-11) Un par di aña despues, rey Senákerib di Asiria ta lansa un atake fuerte contra Huda su reino di zuid. (2 Reynan 18:13; Isaías 36:1) Segun cu e monster destructivo di Asiria ta baha riba e pais, Huda su destruccion total ta parce inevitabel.
3 Pero Asiria ta bai mas ayá di su encargo pa disipliná e pueblo di Dios, i awor ta siguiendo su propio ambicion golos di conkistá mundu. (Isaías 10:7-11) Jehova lo keda sin castigá e manera brutal cu e ta maltratá su pueblo? E nacion lo cura di su enfermedad spiritual? Na Isaías capítulo 33 nos ta lesa Jehova su contesta riba e preguntanan aki.
Ta Plunder Esun Cu Ta Plunder Otronan
4, 5. (a) Con e rol di Asiria lo cambia? (b) Ki oracion Isaías ta haci na fabor dje pueblo di Jehova?
4 E profecia ta cuminsá: “Ai di bo cu ta plunder violentamente, sin cu bo mes ta ser di plunder violentamente, i di bo cu ta trata cu traicion, sin cu otronan a trata bo cu traicion! Asina cu bo caba di plunder violentamente, abo lo ser di plunder violentamente. Asina cu bo a caba di trata cu traicion, nan lo trata bo cu traicion.” (Isaías 33:1) Isaías ta dirigí su mes directamente na esun cu ta plunder violentamente: Asiria. Na e punto máximo di su poder, e nacion agresivo ei ta parce invencibel. El a ‘plunder violentamente sin cu e a ser di plunder violentamente,’ destrosando stadnan di Huda, i asta a poderá dje rikesa dje cas di Jehova, i aparentemente sin haña castigu! (2 Reynan 18:14-16; 2 Crónicanan 28:21) Sin embargo, awor e rolnan ta cambia. “Abo lo ser di plunder violentamente,” Isaías ta declará cu curashi. Ki un consuelo e profecia aki ta pa esnan fiel!
5 Durante e periodo di tempu spantoso ei, adoradónan leal di Jehova lo tin cu acudí na dje pa yudansa. P’esei Isaías ta resa: “O Jehova, mustra nos fabor. Nos a pone nos speransa den bo. Bira nos brasa [di fortalesa i apoyo] tur mainta, sí, nos salbacion den e tempu di angustia. Riba zonido di tumulto pueblonan a hui. Ora bo a lanta, nacionnan a plama.” (Isaías 33:2, 3) Apropiadamente, Isaías ta pidi den oracion pa Jehova libra Su pueblo manera El a haci hopi biaha den pasado. (Salmo 44:3; 68:1) I apénas Isaías ta caba di haci oracion cu e ta profetisá Jehova su contesta riba esei!
6. Kico lo pasa cu Asiria, i pakico esaki ta na su lugá?
6 “I boso botin [dje asirionan] realmente lo ser recogé manera ora kakalaka ta recogé, manera ora trupa di dalakochi ta basha bini contra un hende.” (Isaías 33:4) Pa Huda, invasion devastador di insecto no ta algu straño. Pero e biaha aki, ta Huda su enemigu lo ser destruí. Asiria lo sufri un derota humiyante, i su soldánan lo haña nan obligá ta hui, lagando atras un botin grandi pa e habitantenan di Huda recogé! Ta bon pa Asiria, conocí pa su crueldad, sinti kico kier men ora nan plunder bo.—Isaías 37:36.
E Asirio Moderno
7. (a) Cu ken awe e nacion di Israel spiritualmente enfermo ta comparabel? (b) Ken lo sirbi como e “bara” di Jehova pa destruí cristiandad?
7 Con e profecia di Isaías ta aplicá den nos tempu? E nacion di Israel, spiritualmente enfermo, ta comparabel cu cristiandad infiel. Mescos cu Jehova a usa Asiria como un “bara” pa castigá Israel, asina lo e usa un “bara” pa castigá cristiandad i tambe e resto dje imperio mundial di religion falsu, “Babilonia e Grandi.” (Isaías 10:5; Revelacion 18:2-8) E “bara” ei lo ta nacionnan miembro di Nacionnan Uní, un organisacion representá den Revelacion como un bestia salbahe color scarlata cu shete cabes i dies cachu.—Revelacion 17:3, 15-17.
8. (a) Cu ken nos por compará Senákerib awe? (b) E Senákerib moderno lo tribi atacá ken, i cu ki resultado?
8 Ora cu e asirio moderno ta pasa violentamente riba henter e dominio di religion falsu, lo parce como si fuera nada no por stop e. Cu un actitud mescos cu di Senákerib, Satanas e Diabel lo tribi atacá no solamente organisacionnan apóstata cu ta merecé castigu, sino tambe cristiannan berdadero. Huntu cu e resto di Jehova su yunan spiritual ungí, miyones di hende cu a sali for dje mundu di Satanas, cu ta incluí Babilonia e Grandi, ta tuma nan posicion na banda dje Reino di Jehova. Furioso pasobra cristiannan berdadero ta nenga di rindi homenahe na dje, “e dios dje sistema di cosnan aki,” Satanas, lo lansa un atake fuerte contra nan. (2 Corintionan 4:4; Ezekiel 38:10-16) Pa spantoso cu e atake aki sin duda lo ta, e pueblo di Jehova lo no tin nodi krimp di miedu. (Isaías 10:24, 25) Dios ta sigurá nan cu lo e ta nan “salbacion den e tempu di angustia.” Lo e intervení, i trece destruccion riba Satanas i su multitud. (Ezekiel 38:18-23) Mescos cu den tempu antiguo, esnan cu ta purba plunder Dios su pueblo violentamente mes lo ser di plunder violentamente! (Compará cu Proverbionan 13:22b.) Jehova su nomber lo ser santificá i lo recompensá e sobrebibientenan pasobra nan a busca “sabiduria i conocimentu [i] e temor di Jehova.”—Lesa Isaías 33:5, 6.
Un Spiertamentu pa Esnan Infiel
9. (a) Kico Huda su “héroenan” i “mensaheronan di pas” lo haci? (b) Con e asirio lo reaccioná riba iniciativanan di pas cu bini di Huda?
9 Pero kico lo para di esnan infiel den Huda? Isaías ta pinta un cuadro scur di nan fin inminente na man di Asiria. (Lesa Isaías 33:7.) Huda su “héroenan” militar lo sclama di miedu ora nan mira e avance asirio. “Mensaheronan di pas,” diplomáticonan mandá pa negoshá pas cu e asirionan cu gusta guera, ta haña un trato di bofon i humiyacion. Nan lo yora amargamente pa nan fracaso. (Compará cu Jeremías 8:15.) E asirio cruel lo no sinti duele di nan. (Lesa Isaías 33:8, 9.) Sin piedad lo e ignorá pactonan cu el a cera cu e habitantenan di Huda. (2 Reynan 18:14-16) E asirio lo “menospreciá e stadnan” di Huda, pues lo e mira nan cu desprecio i lo no tene respet pa bida di hende. E situacion lo ta asina devastador cu e tera mes, na moda di papia, lo ta di luto. Líbanon, Saron, Basan i Carmelo tambe lo ta di luto debí na e desolacion.
10. (a) Con e intentonan di “héroenan” di cristiandad lo resultá di ta ineficas? (b) Ken lo protehá cristiannan berdadero durante cristiandad su dia di angustia?
10 Sin duda circunstancianan similar lo desaroyá den futuro cercano ora cu e nacionnan cuminsá atacá religion. Mescos cu den tempu di Ezekías, lo ta en bano pa resistí e forsanan destructivo aki físicamente. E “héroenan” di cristiandad—su políticonan, financiadónan i otro hendenan influyente—lo no por auxili’é. E ‘pactonan,’ esta acuerdonan político i financiero, formulá pa protehá e interesnan di cristiandad lo ser kibrá. (Isaías 28:15-18) Intentonan desesperá pa evitá destruccion usando medionan diplomático, lo fracasá. Lo bini un paro na actividadnan comercial, segun cu propiedad i inversionnan di cristiandad ta ser confiscá i destruí. Ken cu ainda ta sinti simpatia pa cristiandad lo limitá su mes na keda na un distancia prudente i lamentá cu el a yega na su fin. (Revelacion 18:9-19) Cristianismo berdadero lo ser destruí huntu cu esun falsu? No, pasobra Jehova mes ta garantisá: “‘Awor lo mi lanta para,’ Jehova ta bisa, ‘awor lo mi halsa mi mes; awor lo mi hisa mi mes na haltu.’” (Isaías 33:10) Finalmente, Jehova lo intervení na fabor di hende fiel, manera Ezekías, i para e avance di Asiria.—Salmo 12:5.
11, 12. (a) Na ki tempu i con e palabranan di Isaías 33:11-14 ta cumpli? (b) Jehova su palabranan ta duna ki spiertamentu pa nos tempu?
11 Esnan infiel no por stèns riba tal proteccion. Jehova ta bisa: “Boso ta concibí yerba secu; boso lo duna lus na cabitu di maishi. Boso propio spiritu lo come boso, mescos cu un candela. I pueblonan tin cu bira manera ora kima kalki. Manera sumpiña cortá, lo cende nan asta cu candela. Tende, boso cu ta leu, loke mi tin cu haci! I boso cu ta cerca, conocé mi poder. Den Síon e pecadónan ta yen di miedu; calafriu a gara e apóstatanan: ‘Cua di nos por biba pa un tempu cu un candela devorador? Cua di nos por biba pa un tempu cu candelanan di duracion largu?’” (Isaías 33:11-14) E palabranan aki ta aplicá evidentemente na e ocasion cu Huda ta enfrentá un enemigu nobo, Babilonia. Despues di morto di Ezekías, Huda ta bolbe bek na su mal caminda. Durante e siguiente décadanan, e situacion di Huda ta bai atras te n’e punto caminda henter e nacion tin cu sufri dje candela dje rabia di Dios.—Deuteronomio 32:22.
12 Plan i complotnan malbado cu e desobedientenan ta conspirá pa evitá e huicio di Dios ta resultá mes inútil cu cabitu di maishi. De echo, ta e spiritu rebelde i orguyoso dje nacion ta loke lo start e sucesonan cu ta hiba na su destruccion. (Jeremías 52:3-11) E malbadonan lo “bira manera ora kima kalki,” esta, totalmente destruí! Segun cu e habitantenan di Huda ta contemplá nan destruccion inminente, nan ta sinti un miedu horibel. Jehova su palabranan dirigí na Huda infiel ta ilustrá e situacion dje miembronan di cristiandad djawe. Si nan no haci caso dje spiertamentu di Dios, un futuro scur ta warda nan.
“Cana den Husticia Continuo”
13. Ki promesa ta ser hací na esun “cu ta cana den husticia continuo,” i con esaki a cumpli den caso di Jeremías?
13 Como contraste Jehova ta bisa a continuacion: “Tin unu cu ta cana den husticia continuo i cu ta papia loke ta recto, cu ta rechasá ganashi inhustu for di fraude, cu ta sagudí su mannan pa tene nan liber di gara soborno, cu ta tapa su orea di scucha dramamentu di sanger, i cu ta cera su wowonan pa asina no mira loke ta malu. E ta esun cu lo biba asta den haltura; su haltura sigur lo ta lugánan yen di baranca steil difícil pa yega. Lo dun’é sigur su propio pan; su suministro di awa lo no caba.” (Isaías 33:15, 16) Manera apostel Pedro a expres’é mas despues: “Jehova sa con pa libra hende deboto na dje for di prueba, pero pa reservá hende inhustu p’e dia di huicio pa ser cortá.” (2 Pedro 2:9) Jeremías a experenciá un liberacion asina. Durante cu Babilonia tabata sitia e stad, e pueblo tabatin cu “come pan na peso i cu preocupacion ansioso.” (Ezekiel 4:16) Algun muher a asta come e carni di nan propio yu. (Lamentacionnan 2:20) Sin embargo, Jehova a soru pa nada no pasa cu Jeremías.
14. Con cristiannan djawe por sigui “cana den husticia continuo”?
14 Di igual manera cristiannan djawe tin cu “cana den husticia continuo,” wardando e normanan di Jehova tur dia. (Salmo 15:1-5) Nan tin cu “papia loke ta recto” i rechasá mentira i falsedad. (Proverbionan 3:32) Fraude i soborno kisas ta comun den hopi pais, pero pa e persona cu ta “cana den husticia continuo” nan ta cosnan repugnante. Tambe cristiannan mester tin “un concenshi onrado” den actividadnan comercial, i haci esfuerso pa no mete cu negoshinan dudoso of fraudulento. (Hebreonan 13:18; 1 Timoteo 6:9, 10) I un persona cu a ‘tapa su orea pa no scucha dramamentu di sanger, i cu a cera su wowonan pa asina no mira loke ta malu’ lo ta selectivo den e tipo di música i entretenimentu cu e ta scoge. (Salmo 119:37) Durante su dia di huicio, Jehova lo protehá i sostené su adoradónan cu ta biba segun e normanan ei.—Sofonías 2:3.
Nan Ta Contemplá Nan Rey
15. Ki promesa lo sostené hudiunan fiel den exilio?
15 Awor Isaías ta duna e bistaso briyante aki di futuro: “Un rey den su bunitesa ta loke bo wowonan lo contemplá; nan lo mira un tera leu. Bo propio curason lo comentá den tono abou riba un cos spantoso: ‘Unda e secretario ta? Unda esun cu ta entregá e pago ta? Unda esun cu ta conta e torennan ta?’ Lo bo no mira un pueblo insolente, un pueblo cu un idioma muchu profundo pa scucha, di un lenga cu ta gaga cu bo no por comprendé.” (Isaías 33:17-19) E promesa dje futuro Rey Mesiánico i su Reino lo sostené hudiunan fiel durante e décadanan largu di exilio na Babilonia, maske ta di leu so nan por mira e Reino. (Hebreonan 11:13) Ora cu e gobernacion dje Mesías por fin bira un realidad, e tirania di Babilonia lo ta un recuerdo leu. Sobrebibientenan dje atake asirio lo puntra felismente: “Unda e funcionarionan dje tirano ta, esnan cu a cobra nos belasting, pone peso riba nos i tuma nos tributo?”—Isaías 33:18, Moffatt.
16. For di ki tempu e pueblo di Dios por a “contemplá” e Rey Mesiánico, i cu ki resultado?
16 Aunke e palabranan di Isaías ta garantisá liberacion for di cautiverio na Babilonia, exiliadonan hudiu individual lo tin cu warda riba e resureccion pa disfrutá dje cumplimentu completo dje parti aki dje profecia. Ke tal dje sirbidónan di Dios djawe? Desde 1914, e pueblo di Jehova por a “contemplá,” es decir dicerní, e Rey Mesiánico, Jesucristo, den tur su bunitesa spiritual. (Salmo 45:2; 118:22-26) Como resultado, nan a ser librá for di opresion i control dje sistema malbado di Satanas. Bou di Síon, e asiento dje Reino di Dios, nan ta disfrutá di berdadero siguridad spiritual.
17. (a) Ki promesanan ta ser hací relacioná cu Síon? (b) Con e promesanan di Jehova relacioná cu Síon ta cumpli riba e Reino Mesiánico i riba hende cu ta apoy’é riba tera?
17 Isaías ta sigui: “Contemplá Síon, e stad di nos ocasionnan festivo! Bo propio wowonan lo mira Jerusalem un lugá di habitacion sin disturbio, un tent cu niun hende lo empaketá. Nunca lo ranca e stacanan di su tent, i ningun di su cabuyanan lo no kibra na dos. Mas bien einan e Mahestuoso, Jehova, lo ta pa nos un lugá di riu, di canalnan hanchu. Riba dje ningun flota di boto di rema lo pasa, ni ningun barcu mahestuoso lo pasa riba dje.” (Isaías 33:20, 21) Isaías ta sigurá nos cu Dios su Reino Mesiánico no por ser rancá ni destruí. Ademas, ta claro cu tal proteccion ta extendé awe na hende fiel riba tera cu ta apoyá e Reino ei. Asta ora hopi persona ta ser someté na pruebanan severo, súbditonan dje Reino di Dios tin e garantia cu ningun intento pa destruí nan como congregacion lo por tin éxito. (Isaías 54:17) Jehova lo protehá su pueblo mescos cu un rooi of canal ta protehá un stad. Cualkier enemigu cu subi contra nan lo ser destruí, maske e ta mes poderoso cu un “flota di boto di rema” of un “barcu mahestuoso”!
18. Ki responsabilidad Jehova ta aceptá?
18 Pero di con amantenan dje Reino di Dios por ta asina sigur di proteccion divino? Isaías ta splica: “Jehova ta nos Hues, Jehova ta nos Dunador di Statuto, Jehova ta nos Rey; e mes lo salba nos.” (Isaías 33:22) Jehova ta aceptá e responsabilidad di protehá i dirigí su pueblo cu ta reconocé su posicion como Soberano Supremo. Boluntariamente nan ta someté nan mes na su gobernacion mediante e Rey Mesiánico, reconociendo cu ta Jehova tin e autoridad pa no solamente traha ley, sino tambe pa soru cu hende ta cumpli cu nan. Sin embargo, como cu Jehova ta stima husticia i rectitud, su gobernacion, mediante su Yu, no ta un carga pa su adoradónan. Mas bien, nan ta ‘beneficiá nan mes’ dor di someté na su autoridad. (Isaías 48:17) Nunca lo e no bandoná esnan cu ta leal na dje.—Salmo 37:28.
19. Con Isaías ta describí e inefectividad dje enemigunan di Jehova su pueblo fiel?
19 Isaías ta bisa enemigunan di Jehova su pueblo fiel: “Bo cabuyanan mester cologá los; nan lo no tene nan master firmemente stret; nan no a habri un bela. Na e tempu ei, lo tin cu asta parti botin na abundancia; asta e cohonan realmente lo plunder hopi cos.” (Isaías 33:23) Cualkier enemigu cu yega cerca lo resultá di ta mes inefectivo i impotente contra Jehova cu un barcu di guera cu su cabuyanan los, cu un master cu ta tambaleá i sin bela. E destruccion dje enemigunan di Dios lo producí asina hopi botin cu asta esnan desabilitá lo participá den e sakeo. P’esei nos por tin confiansa cu mediante e Rey Jesucristo, Jehova lo triunfá riba su enemigunan den e binidero “tribulacion grandi.”—Revelacion 7:14.
Un Curacion
20. E pueblo di Dios lo experenciá ki clase di curacion i na ki tempu?
20 E seccion aki dje profecia di Isaías ta concluí cu e promesa alentador: “Ningun residente lo bisa: ‘Mi ta malu.’ E pueblo cu ta biba den e tera lo ta esnan pordoná pa nan eror.” (Isaías 33:24) E malesa cu Isaías ta papia di dje ta principalmente den sentido spiritual, pasobra e ta conectá cu picá, esta “eror.” Den e promé aplicacion dje palabranan aki, Jehova ta primintí cu despues dje nacion su liberacion for di cautiverio na Babilonia, nan lo ser curá spiritualmente. (Isaías 35:5, 6; Jeremías 33:6; compará cu Salmo 103:1-5.) E hudiunan cu a regresá ta ricibí pordon di nan picánan di pasado i lo reestablecé adoracion puru den Jerusalem.
21. Den ki maneranan e adoradónan di Jehova djawe ta experenciá curacion spiritual?
21 Sin embargo, e profecia di Isaías tin un cumplimentu moderno. E pueblo di Jehova djawe tambe ta disfrutá di un curacion spiritual. Nan a ser librá for di siñansanan falsu manera inmortalidad di alma, Trinidad i fiernu di candela. Nan ta ricibí guia moral cu ta libra nan di prácticanan inmoral i ta yuda nan tuma bon decision. I danki na Jesucristo su sacrificio di rescate, nan tin un posicion limpi dilanti Dios i ta disfrutá di un concenshi limpi. (Colosensenan 1:13, 14; 1 Pedro 2:24; 1 Juan 4:10) E curacion spiritual aki tin su beneficionan físico. Por ehempel, abstené di relacion sexual inmoral i uso di tabaco ta protehá cristiannan di malesanan transmití sexualmente i di cierto tipo di cancer.—1 Corintionan 6:18; 2 Corintionan 7:1.
22, 23. (a) Ki cumplimentu magnífico Isaías 33:24 lo tin den futuro? (b) Kico ta e determinacion di adoradónan berdadero djawe?
22 Ademas, despues di Armagedon, den Dios su mundu nobo, lo tin un cumplimentu mas grandioso dje palabranan di Isaías 33:24. Bou di mando dje Reino Mesiánico, hende lo experenciá un gran curacion físico huntu cu nan curacion spiritual. (Revelacion 21:3, 4) Djis despues di destruccion dje sistema di cosnan di Satanas, lo tuma lugá sin duda na un escala mundial milagernan manera esnan cu Jesus a efectuá tempu e tabata riba tera. Ciegu lo mira, surdu lo tende, coho lo cana! (Isaías 35:5, 6) Esaki lo permití tur sobrebibiente dje tribulacion grandi participá den e trabou magnífico di transformá e tera den un paradijs.
23 Despues, ora cu resureccion cuminsá, esnan cu bolbe na bida sin duda lo lanta cu bon salú. Pero segun cu ta aplicá e balor dje sacrificio di rescate na un grado mas extenso, mas beneficionan físico lo sigui te ora cu humanidad alcansá perfeccion. E ora ei, e hustunan lo “yega di biba” den e pleno sentido dje palabra. (Revelacion 20:5, 6) N’e tempu ei, tantu den sentido spiritual como físico, “ningun residente lo bisa: ‘Mi ta malu.’” Esta un promesa excitante! Laga tur adoradó berdadero djawe sea determiná pa ta entre esnan cu lo experenciá e cumplimentu aki!
[Plachi na página 344]
Isaías ta resa na Jehova cu confiansa
[Plachi na página 353]
Danki na e sacrificio di rescate, Jehova su pueblo tin un posicion limpi dilanti dje
[Plachi na página 354]
Den e mundu nobo, lo tin un gran curacion físico