LÈS 05
Beibel Ta Mensahe di Dios pa Nos
Yehova a duna nos un regalo maravioso: Beibel. Beibel ta konsistí di 66 buki chikitu. Awor, kisas bo ta puntra bo mes: ‘Kon hende a logra haña Beibel? Ken ta outor di Beibel?’ Laga nos trata kontesta pa e preguntanan ei.
1. Si hende a skirbi Beibel, dikon nos ta bisa ku e mensahe ku tin den Beibel ta bini di Dios?
Mas o ménos 40 hòmber a skirbi Beibel. Beibel a ser skirbí durante un periodo di mas o ménos 1.600 aña, kuminsando for di aña 1513 promé ku Kristu te ku mas o ménos aña 98 despues di Kristu. E eskritornan di Beibel tabata masha diferente for di otro. Por ehèmpel, algun di nan tabata wardadó di karné, piskadó i rei. Apesar di esei, loke e eskritornan a skirbi no ta kontradisí otro. Kon esei ta posibel? Wèl, pasobra ta Dios ta Outor di Beibel. Ku otro palabra, tur loke tin skirbí den Beibel ta bini di Dios. (Lesa 1 Tesalonisensenan 2:13.) E eskritornan no a skirbi nan mes pensamentunan. Mas bien, nan “a papia di parti di Dios segun ku spiritu santu tabata guia nan.”a (2 Pedro 1:21) Dios a usa su spiritu santu pa inspirá òf guia e hòmbernan akí pa skirbi su pensamentunan.—2 Timoteo 3:16.
2. Ken por benefisiá di loke Beibel ta siña?
“Tur nashon, tribu, idioma i pueblo” por benefisiá di e bon notisianan ku tin den Beibel. (Lesa Revelashon 14:6.) Dios a pèrkurá pa Beibel ta disponibel den mas tantu idioma ku kualke otro buki. Awe, kasi tur hende por haña un Beibel pa nan lesa, sin importá unda nan ta biba òf ki idioma nan ta papia.
3. Kon Yehova a protehá Beibel?
E eskritornan a skirbi Beibel riba material ku no tabata duradero, manera kueru di bestia. Pero pa Beibel por a keda eksistí, algun hende ku tabatin masha apresio pa Beibel a hasi vários kopia di Beibel na man. Nan a hasi sigur di kopia eksaktamente loke tabatin skirbí. Aunke algun gobernante i lider religioso a purba di kaba ku Beibel, algun otro hende a riska nan bida pa preservá Beibel. Yehova no a laga nada ni niun hende strob’é di laga su Palabra yega serka nos. Beibel ta bisa: “E palabranan di nos Dios ta keda pa semper.”—Isaías 40:8.
KIKO MAS NOS POR SIÑA?
Laga nos wak kon Dios a inspirá algun hòmber pa skirbi Beibel, kon el a protehá Beibel i kon el a hasi Beibel disponibel pa tur hende.
4. Beibel ta revelá ken ta su Outor
Pasa e VIDIO. Despues, lesa 2 Timoteo 3:16 i analisá e siguiente preguntanan:
Si ta hende a skirbi Beibel, dikon Beibel ta ser yamá Palabra di Dios?
Bo ta kere ku di bèrdat Dios por a laga e eskritornan sa kiko ta su pensamentunan?
Un doño di trabou ta laga un sekretario skirbi un karta. Pero e mensahe ku tin den e karta ta bini di e doño di trabou. Di mes manera, hende a skirbi Beibel, pero tur loke tin skirbí den Beibel ta bini di Dios
5. Beibel a keda eksistí apesar ku algun hende a purba di destruyé
Beibel ta bini di Dios. P’esei, Dios a hasi sigur pa Beibel keda eksistí te den nos tempu. Atraves di historia, algun hende den puesto di outoridat a purba di destruí Beibel. Ademas, e lidernan religioso no tabata ke pa hende lesa Beibel. Apesar di oposishon i menasa di morto, hopi hende a riska nan bida pa preservá Beibel. Pa wak ehèmpel di un hòmber ku a hasi esaki, pasa e VIDIO. Despues, analisá e siguiente preguntanan:
Awor ku bo a haña sa loke algun hende a hasi pa preservá Beibel, esei ta duna bo mas gana di les’é? Dikon bo ta bisa asina?
Lesa Salmo 119:97. Despues, analisá e siguiente pregunta:
Kiko a motivá hopi hende pa riska nan bida pa tradusí i distribuí Beibel?
6. Beibel ta un buki pa tur hende
Atraves di historia, Beibel ta e buki ku mas a ser tradusí i distribuí. Lesa Echonan 10:34, 35. Despues, analisá e siguiente preguntanan:
Dikon Dios ke pa su Palabra, Beibel, ser tradusí den asina tantu idioma i distribuí na gran eskala?
Di loke nos a trata den e lès akí, kiko bo ta gusta tokante Beibel?
Kasi
100%
di poblashon di mundu
por haña Beibel na un idioma ku nan ta komprondé
Beibel ta disponibel na mas ku
3.000
idioma,
sea kompleto òf en parte
5.000.000.000
E sifra akí ta indiká mas o ménos kuantu Beibel a ser produsí,
muchu mas tantu ku kualke otro buki
LOKE HENDE SA BISA: “Beibel ta djis un buki ku hende a skirbi hopi tempu pasá.”
Kiko abo mes ta pensa?
Ki prueba tin ku Beibel ta Palabra di Dios?
RESÚMEN
Beibel ta Palabra di Dios. Ademas, Dios a hasi sigur pa Beibel ta disponibel pa henter humanidat.
Repaso
Kon Dios a yuda algun hòmber skirbi Beibel?
Kiko bo ta pensa tokante loke a ser hasí pa Beibel por ta disponibel pa nos awe?
Kon bo ta sinti bo awor ku bo sa ku Dios a hasi asina tantu esfuerso pa komuniká ku bo?
MAS INFORMASHON INTERESANTE
Lesa tokante historia di Beibel. Wak kon Beibel a bai di manuskrito antiguo pa tradukshon moderno.
“Kon Beibel A Keda Eksistí te den Nos Tempu?” (Spièrta! di novèmber 2007, na spañó)
Wak kon Beibel a keda eksistí apesar di tres peliger grandi.
“Beibel—Historia di Su Sobrebibensia” (E Toren di Vigilansia Num. 4 2016)
Wak kon algun hende a riska nan bida pa tradusí Beibel.
Hende a hasi vários kopia di Beibel na man i a tradusí Beibel diferente biaha. Kon bo por sa sigur ku loke tin skirbí den Beibel no a kambia?