Kiko A Pasa ku Nan?

NOF i No ta e nòmbernan bíbliko original pa e kapitalnan egipsio Menfis i Tebas ku un tempu tabata famoso. Nof (Menfis) tabata situá un 23 kilometer na sùit di Cairo, na e banda wèst di Riu Neil. Sin embargo, ku tempu Menfis a pèrdè su status komo kapital di Egipto. Na prinsipio di siglo 15 promé ku nos era, Egipto tabatin un kapital nobo: No (Tebas), situá un 500 kilometer sùit di Menfis. Entre e hopi ruinanan di tèmpel na Tebas tin esun di Karnak, ku ta ser konsiderá komo e struktura di pilar mas grandi ku hende hamas a konstruí. Tebas i su tèmpel di Karnak tabata dediká na adorashon di Amon, e dios prinsipal di e egipsionan.

Kiko profesia bíbliko a predisí relashoná ku Menfis i Tebas? El a deklará huisio kontra Fárao i e diosnan di Egipto, spesialmente kontra e dios prinsipal, “Amon di Tebas.” (Jeremias 46:25, 26) E multitut di adoradó ku tabata basha bai einan, lo a ser ‘kòrtá kitá afó.’ (Ezekiel 30:14, 15) I asina a sosodé. Tur loke a resta di e adorashon di Amon ta ruinanan di tèmpel. E stat moderno Luxor ta situá riba un parti di e sitio di antiguo Tebas, i tin otro pueblitonan ta eksistí entre su ruinanan.

Pa loke ta Menfis, a resta masha poko di dje, ku eksepshon di su santananan. Eksperto di Beibel, Louis Golding ta bisa: “Pa siglo tras di siglo e konkistadónan árabe di Egipto a usa e ruinanan gigantesko di Menfis komo lugá di saka piedra pa konstruí nan kapital [Cairo] na otro banda di e riu. E kombinashon di e lodo di Neil i e trabou di e konstruktornan árabe tabata asina kabal ku pa vários kilometer den e sirkuito di e stat antiguo bo no ta mira ni un solo piedra ta sali for di e tera pretu.” Realmente, manera Beibel a profetisá, Menfis a bira “un desolashon . . . sin habitante.”—Jeremias 46:19.

Esakinan ta simplemente dos di e hopi ehèmpelnan ku ta demostrá e eksaktitut di profesianan bíbliko. E destrukshon di Tebas i Menfis ta duna nos motibu sólido pa tene pleno konfiansa den e profesianan bíbliko ku ainda no a kumpli.—Salmo 37:10, 11, 29; Lukas 23:43; Revelashon 21:3-5.

[Rekonosementu pa Potrèt na página 32]

Potrèt saká pa kortesia di British Museum