Keda Alerta Meskos ku Jeremias

‘Ami [Yehova] ta perkurá pa mi palabra, pa kumpli kuné.’​—JER. 1:12.

1, 2. Ki similaridat tin entre Yehova i palu di almendra?

NA LIBANÓ i Israel ta friu durante e lunanan di yanüari i febrüari. P’esei, palunan no ta floria durante e temporada ei. Pero e palu di almendra sí. E ta saka bunita flor ros i blanku. E ta un di e promé palunan ku ta floria promé ku e temperatura bira mas kayente. Na idioma hebreo, su nòmber ta nifiká literalmente “esun ku ta lanta.”

² Tempu ku Yehova a nombra Jeremias komo su profeta, El a usa e karakterístika ei di palu di almendra pa ilustrá un bèrdat importante. Sí, na prinsipio di e ministerio di Jeremias, usando un vishon, Yehova a mustr’é un sprùit di palu di almendra. Kiko esei a nifiká? Yehova a splik’é: ‘Ami ta perkurá pa mi palabra, pa kumpli kuné.’ (Jer. 1:​11, 12) Meskos ku palu di almendra ta “lanta” trempan na komienso di aña, asina Yehova ‘ta lanta trempan’ den un sentido figurativo pa bisa su pueblo di antemano kiko lo e hasi den futuro. (Jer. 7:25) Ademas, Yehova ta perkurá pa su palabra kumpli. Wak por ehèmpel kiko a pasa ku e pueblo di Huda. Yehova a manda su profetanan pa bisa nan kiko ta e konsekuensianan di nan desobedensia. I e no a sosegá; el a ‘keda lantá’ te ora su palabra profétiko a kumpli. I na aña 607 promé ku nos era, eksaktamente na e tempu ku el a stipulá, Yehova a ehekutá su huisio riba e nashon apóstata di Huda.

3. Dikon nos por tin konfiansa den Yehova su promesanan?

³ Awe tambe Yehova ta atento pa kumpli su boluntat. Ta imposibel p’e keda sin kumpli ku su palabra. Ki efekto esaki tin riba bo? Abo ta kere ku awe tambe Yehova ta “perkurá” pa su promesanan kumpli? Si nos tin kualke duda den esei, nos ta kabishando den sentido spiritual. Pues, ta tempu pa nos lant’ariba. (Rom. 13:11) Un persona ku a keda lantá spiritualmente pa e por a kumpli ku e asignashon ku Yehova a dun’é ta profeta Jeremias. Pero kon bin e por a logra esei? Kiko a motiv’é? E kontesta riba e preguntanan ei por yuda nos perseverá den e trabou ku Yehova a duna nos.

Un Mensahe Urgente

4. Ki desafionan Jeremias a konfrontá ora e tabatin ku proklamá e mensahe di huisio, i dikon e mensahe ei tabata urgente?

⁴ Probablemente Jeremias tabatin kasi 25 aña ora Yehova a asign’é komo vigilante. (Jer. 1:​1, 2) Pero Jeremias tabata sintié manera un mucha, inkapas pa papia ku e ansianonan di e nashon, hòmbernan di edat ku tabatin outoridat. (Jer. 1:6) Jeremias tabatin ku proklamá un mensahe di huisio i di kondena spantoso, spesialmente na e saserdotenan, profetanan falsu, gobernantenan i esnan ku a kohe nan “mes rumbo” i tabata sigui praktiká “apostasia.” (Jer. 6:13; 8:​5, 6) E tèmpel glorioso ku Rei Salomon a konstruí i ku tabata e sentro di adorashon pa kasi kuater siglo lo a ser destruí. Yerusalèm i Huda lo keda desolá i nan habitantenan lo bai den koutiverio. Ta klaru anto ku e mensahe ku Jeremias mester a proklamá tabata urgente!

5, 6. (a) Kon Yehova ta usa kristiannan ungí awe? (b) Kiko nos lo konsiderá den e lès akí?

⁵ Kiko di nos tempu? Den su amor pa hende, Yehova a nombra kristiannan ungí komo vigilante spiritual pa spièrta hende di su benidero huisio riba e mundu akí. Pa dékadanan, e grupo akí ku Jeremias a prefigurá ta urgi hende pa realisá den ki tempu nos ta bibando. (Jer. 6:17) Beibel ta mustra bon kla ku Yehova no ta tarda. Su dia lo bini presis na e tempu ku el a stipulá, ora ku hende no ta ferwagt.​—Sof. 3:8; Mar. 13:33; 2 Ped. 3:​9, 10.

⁶ Nos mester keda kòrda ku Yehova ta lantá i ku pronto lo e trese su hustu sistema nobo. Debí ku e pueblo di Yehova sa esei, nan ta bon konsiente ku nan no tin muchu tempu mas pa prediká. P’esei, ta urgente pa nos proklamá Yehova su mensahe awor! Abo tambe tin e sentido di urgensia ei? E ta motivá bo pa hasi mas esfuerso pa prediká e mensahe? Kòrda ku Hesus a indiká ku tur hende mester haña oportunidat pa disidí si nan ke sirbi Yehova òf nò. Awor laga nos konsiderá tres kualidat ku lo yuda nos keda lantá i kumpli ku nos asignashon meskos ku Jeremias.

Amor pa Hende

7. Splika kon amor a motivá Jeremias pa prediká apesar di situashonnan difísil.

⁷ Kiko a motivá Jeremias pa prediká apesar di situashonnan difísil? Jeremias tabata stima hende. E tabata sa ku hopi di e problemanan ku e pueblo a konfrontá tabata pa motibu di wardadónan falsu. (Jer. 23:​1, 2) P’esei, el a sinti kompashon pa nan i a hasi su trabou ku amor. E tabata ke pa su paisanonan tende e palabra di Dios i biba. E tabata asina preokupá ku el a yora i lamentá pa motibu di e kalamidat ku lo a bini riba nan. (Lesa Jeremias 8:21; 9:1.) E buki bíbliko Lamentashonnan ta revelá bon kla kon preokupá Jeremias tabata i kuantu el a stima Yehova su nòmber i Su pueblo. (Lam. 4:​6, 9) Kiko di abo? Ora bo mira hende “kansá i plamá, manera karné sin wardadó,” bo no ta sinti bo motivá pa hiba e notisia alentador di e Reino di Dios pa nan?​—Mat. 9:36.

8. Ki prueba nos tin ku sufrimentu no a amargá Jeremias?

⁸ Jeremias a sufri na man di e hendenan ku e kier a yuda, pero e no a paga malu ku malu ni bira amargá. E tabatin masha pasenshi ku nan i tabata bondadoso, asta ku e rei korupto Sedekias. Sí, ora Sedekias a entregá Jeremias na esnan ku kier a mat’é, Jeremias a roga Sedekias pa obedesé Yehova. (Jer. 38:​4, 5, 19, 20) Nos amor pa hende ta mes fuerte ku esun di Jeremias?

Dios Ta Duna Kurashi

9. Kon nos por sa ku ta Yehova a duna Jeremias kurashi?

⁹ Ora Yehova a bisa Jeremias di e asignashon ku e tabatin p’e, na promé instante, Jeremias a bini ku èksküs pa no hasi loke Yehova a pidié. Esaki ta yuda nos komprondé ku no ta di naturalesa Jeremias tabata un persona ku kurashi. Mas bien, e fortalesa ekstraordinario ku el a desplegá durante su karera komo profeta tabata debí ku el a dependé kompletamente riba Yehova. Sí, Yehova tabata ku Jeremias “manera un guerero poderoso;” el a sostené Jeremias i a dun’é fortalesa pa kumpli ku su enkargo. (Jer. 20:11) Jeremias tabata asina konosí pa su kurashi ku ora Hesus tabata prediká durante su ministerio riba tera, algun hende a kere ku ta Jeremias a lanta for di morto.​—Mat. 16:​13, 14.

10. Dikon nos por bisa ku e restu ungí ta riba ‘nashonnan i reinonan’?

¹⁰ Yehova e “Rei di nashonnan” a ordená Jeremias pa proklamá un mensahe di huisio na nashon- i reinonan. (Jer. 10:​6, 7) E kristiannan ungí di nos tempu tambe ta “riba e nashonnan i riba e reinonan.” Pero den ki sentido? (Jer. 1:10) Meskos ku e profeta Jeremias, e restu ungí tambe a haña un asignashon serka e Soberano di universo. P’esei, Dios su sirbidónan ungí ta debidamente outorisá pa proklamá mensahe di huisio na tur nashon i reino. Sí, ta ku e outoridat di e Dios Haltísimo nan ta deklará ku e nashonnan i reinonan djawe lo ser destruí na Dios su debido tempu i na e manera ku e disidí. I nan ta hasi esaki usando e idioma kla di Dios su Palabra inspirá. (Jer. 18:​7-10; Rev. 11:18) Pues, e restu ungí ta determiná pa sigui ku e asignashon ku Yehova a duna nan, esta, e trabou di proklamá su mensahe di huisio rònt mundu.

11. Kiko lo yuda nos sigui prediká sin stòp ora nos ta konfrontá situashonnan difísil?

¹¹ Pero tin biaha nos por sinti nos desanimá debí na oposishon, apatia òf otro sirkunstansia difísil. (2 Kor. 1:8) Ma, meskos ku Jeremias, laga nos sigui padilanti i no desanimá. Sigui roga Dios pa su yudansa i dependé kompletamente riba dje, ya ku esei lo duna nos “kurashi.” (1 Tes. 2:2) Komo adoradónan berdadero, nos tin ku keda lantá i kumpli ku e responsabilidatnan ku Dios a duna nos. Nos mester ta determiná pa sigui prediká destrukshon di kristiandat ku a ser prefigurá pa Yerusalèm infiel di pasado. Ku kurashi e restu ungí lo sigui proklamá no solamente “e aña agradabel” di Yehova sino tambe “e dia di vengansa di nos Dios.”​—Isa. 61:​1, 2; 2 Kor. 6:2.

Goso di Kurason

12. Kon nos por sa ku Jeremias a keda ku su goso, i kon bin e por a logra esei?

¹² Jeremias su trabou a dun’é goso. El a bisa Yehova: “Bo palabranan a wòrdu hañá i mi a kome nan, i bo palabranan a bira un goso pa mi i e delisia di mi kurason; pasobra mi a wòrdu yamá na bo nòmber, o SEÑOR.” (Jer. 15:16) Pa Jeremias tabata un privilegio ku e por a representá e Dios berdadero i prediká Su palabra. Ripará ku ta ora Jeremias a presta atenshon na bofon ku e pueblo tabata hasi, el a pèrdè su goso. Pero ora el a para ketu i pensa ki bunita i importante su mensahe ta, el a rekobrá su goso.​—Jer. 20:​8, 9.

13. Pa nos keda ku goso, dikon ta importante pa nos alimentá nos mes ku bèrdatnan profundo di Beibel?

¹³ Pa nos por sigui prediká ku goso, nos tin ku alimentá nos mes ku “kuminda sólido,” esta, e bèrdatnan profundo di Dios su Palabra. (Heb. 5:14) I estudio profundo ta edifiká nos fe. (Kol. 2:​6, 7) E ta yuda nos komprondé ki efekto nos echonan tin riba Yehova. Si nos ta ripará ku nos no tin tempu pa lesa i studia Beibel, nos mester bolbe analisá nos programa. Si tur dia nos tuma sikiera un par di minüt pa studia i meditá, nos lo hala mas serka Yehova i nos lo tin ‘goso i delisia di kurason,’ meskos ku Jeremias.

14, 15. (a) Ki fruta Jeremias su trabou fiel a produsí? (b) Kon e pueblo di Dios ta mira e trabou di prediká awe?

¹⁴ Jeremias a kumpli fielmente ku su asignashon pa spièrta hende i proklamá Yehova su mensahe di huisio. Pero e no a lubidá ku Yehova a dun’é e asignashon tambe “pa edifiká i pa planta,” esta, pa prediká un mensahe ku ta duna speransa na hende sinsero. (Jer. 1:10) I e trabou ei a duna fruta, pasobra algun hudiu i hende di otro nashon a sobrebibí e destrukshon di Yerusalèm na aña 607 promé ku nos era. Nos sa por ehèmpel ku e rekabitanan, Ebed-melek i Baruk, kendenan tabata teme Dios, a skapa. (Jer. 35:​18, 19; 39:​15-18; 43:​5-7) Nos por kompará e amigunan leal ei di Jeremias ku personanan ku awe tin e speransa di biba riba tera, kendenan ta amigu di e grupo ku Jeremias a prefigurá, esta, e restu di kristiannan ungí. I pa e restu di kristiannan ungí ta un goso pa yuda edifiká fe di e “multitut grandi” akí! (Rev. 7:9) Na nan turno, ku gran satisfakshon e miembronan di e multitut grandi ta yuda hende di kurason onrado atkerí konosementu di e bèrdat.

¹⁵ Dios su pueblo ta komprondé ku predikashon di e bon notisia no solamente ta un servisio na hende ku ke skucha, sino tambe un akto di adorashon na nos Dios. Sea ku hende ta skucha òf nò, pa nos ta un goso pa rindi sirbishi sagrado na Yehova mediante nos trabou di prediká.​—Sal. 71:23; lesa Romanonan 1:9.

Keda Lantá i Kumpli ku Bo Asignashon!

16, 17. Kon Revelashon 17:10 i Habakuk 2:3 ta indiká e urgensia di nos tempu?

¹⁶ E profesia na Revelashon 17:10 ta enfatisá e urgensia di nos tempu. Einan, Beibel ta bisa: “Ora ku e [di shete rei] bini, e mester keda pa poko tempu.” Awor, siendo ku e di shete rei, esta, e potensia mundial Anglo-Amerikano a bini na eksistensia den nos tempu, pa aworakí e “poko tempu” ei mester ta serka di yega na su fin. Relashoná ku e fin di e mundu malbado akí, profeta Habakuk ta duna nos e siguiente siguransa: “E vishon lo ta pa e tempu stipulá . . . sper’é; pasobra e lo bini sigur, e lo no tarda.”​—Hab. 2:3.

¹⁷ Puntra bo mes: ‘Mi estilo di bida ta demostrá ku mi ta kere ku nos tempu ta urgente i ku e fin ta serka? Òf mi desishon- i prioridatnan ta demostrá ku mi no ta ferwagt e fin pa aworakí? Òf nan ta demostrá ku mi no ta sigur mes ku e fin lo bini?’

18, 19. Dikon awor no ta tempu pa baha man?

¹⁸ Ainda e vigilante spiritual, esta e restu ungí, tin mas trabou pa hasi. (Lesa Jeremias 1:​17-19.) Ta un goso pa mira kon kristiannan ungí ta mantené un posishon firme manera un “pilá di heru” i “un stat fortifiká”! Nan tin nan “hep fahá ku bèrdat” den e sentido ku nan ta laga Dios su Palabra fortalesé nan te ora nan kompletá e trabou ku Yehova a asigná nan. (Efe. 6:14) E multitut grandi tin e mesun determinashon ei. P’esei, nan ta apoyá e restu ungí.

¹⁹ Aworakí no ta tempu pa baha man na nos aktividatnan kristian; mas bien, nos tin ku pensa seriamente riba loke Jeremias 12:5 ta bisa. (Les’é.) Sí, nos tur ta konfrontá situashonnan ku ta pone nos fe na prueba. Nos por kompará e esfuerso ku nos tin ku hasi pa perseverá durante e pruebanan akí ku e esfuerso ku un hende tin ku hasi pa kompetí den un kareda ku otro “hende na pia.” Sinembargo, segun ku e ‘tribulashon grandi’ ta aserká nos por ferwagt mas i mas difikultat. (Mat. 24:21) Beibel ta kompará e esfuerso ku nos lo tin ku hasi pa perseverá den e situashonnan mas difísil ei ku e gran esfuerso ku un hende lo tin ku hasi pa “kompetí ku kabai.” Si un hende ke hasi esei, e mester di masha perseveransia i resistensia. Pues, ta bon pa nos perseverá awor pasobra e pruebanan ku nos ta konfrontá awe den un sentido ta prepará nos pa perseverá ora nos haña nos ku pruebanan mas difísil den futuro.

20. Kiko bo ta determiná pa hasi?

²⁰ Nos tur por imitá Jeremias i kumpli eksitosamente ku nos asignashon di prediká. Kualidatnan manera amor, kurashi i goso a motivá Jeremias pa sigui kumpli fielmente ku su ministerio durante 67 aña. I e flornan bunita di e palu di almendra ta rekordá nos ku Yehova lo ‘keda lantá’ pa kumpli ku su palabra. Pues, nos tin bon motibu pa hasi meskos. Kòrda, si Jeremias a ‘keda lantá,’ nos tambe por.

Bo Ta Kòrda?

• Kon amor a yuda Jeremias ‘keda lantá’ pa kumpli ku su asignashon?

• Dikon nos tin mester di kurashi ku Dios ta duna?

• Kiko a yuda Jeremias mantené su goso?

• Dikon abo ke ‘keda lantá’?

[Plachinan na página 31]

Lo bo sigui prediká apesar di oposishon?