Hibando e Yugo den Hubentud

DEN e ‘tempu crítico aki, duru pa trata cuné,’ hóbennan ta enfrentá hopi presion. (2 Timoteo 3:1) Nan ta ser bombardiá diariamente cu propaganda cu ta animá inmoralidad, humamentu i otro formanan di comportacion destructivo. Esnan cu ta sigui normanan di Bijbel por ser ridiculisá dor cu nan ta nenga di sigui e multitud, i algun cristian por sinti cu lo ta mas fácil pa sucumbí.

Cerca e fin di siglo shete P.E.C., Jeremías a skirbi: “Ta bon pa un hende físicamente capacitá carga e yugo durante su hubentud.” (Lamentacionnan 3:27) Kico e tabata kier men? Cu ora un hóben siña trata cu pruebanan ora e ta yong, esei ta yud’é prepará pa enfrentá e problemanan difícil ora e ta adulto. Aunke contratempunan ta desagradabel, nan ta inevitabel pa tantu hóben como adultonan cristian. (2 Timoteo 3:12) Pero e beneficionan di fieldad tin muchu mas balor cu cualkier alivio temporal cu comprometé por trece cuné.

Si bo ta un hóben, enfrentá pruebanan di fe cara cara. Ora bo ser tentá pa participá den mal conducta, nenga di comprometé. Aunke n’e momento ei por ta difícil pa haci esaki, a lo largu, lo bo tin ménos ansiedad. Jesus a primintí: “Tuma mi yugo riba boso . . . , i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:29, 30.

Aceptá e desafio di biba segun principionan bíblico. Haciendo esei lo duná bo e mihó moda di biba awor i un speransa sigur pa futuro. Manera Bijbel ta declará, “mundu ta pasa bai i tambe su deseo, pero esun cu ta haci e boluntad di Dios ta permanecé pa semper.”—1 Juan 2:17.