Bo Ta Reconoce e Organisacion di Jehova?

“Esaki ta loke Jehova a bisa: ‘Shelu ta mi trono, i tera ta mi bank’i pone pia.’”—ISAIAS 66:1.

1, 2. (a) Ki evidencia visibel dje organisacion di Jehova bo por mustra riba dje? (b) Unda Jehova ta biba?

BO TA kere cu Jehova tin un organisacion? Si ta asina, pakico bo ta kere esei? Kisas bo ta contestá: ‘Wel, nos tin un Salon di Reino. Nos tin un congregacion bon organisá cu un cuerpo di anciano. Nos tin un superintendente di circuito debidamente nombrá cu ta bishitá nos regularmente. Nos ta asistí na asamblea i congresonan organisá. Nos tin un sucursal di Sociedad Watch Tower den nos pais. Tur esaki sigur, i hopi mas, ta proba cu Jehova tin un organisacion cu ta funcioná.’

² Rasgonan asina ta duna evidencia di un organisacion. Pero si tur loke nos ta mira i reconocé ta aki riba tera, nos no ta comprendiendo completamente kico e organisacion di Jehova ta. Jehova a bisa Isaías cu e tera ta solamente Su bank’i pone pia, pero shelu ta Su trono. (Isaías 66:1) Na cua “shelu” Jehova tabata referí? Na nos atmósfera? Na espacio den universo? Of na un otro nivel di bida? Isaías ta papia di Jehova su “habitacion haltu di santidad i bunitesa,” i e salmista ta describí e shelu aki como “e lugá establecí unda e ta biba.” Pues, e “shelu” na Isaías 66:1 ta referí n’e region spiritual invisibel den cua Jehova ta ocupá e posicion supremo of mayor.—Isaías 63:15; Salmo 33:13, 14.

3. Con nos por vence duda?

³ P’esei, si di berdad nos kier percibí i reconocé e organisacion di Jehova, nos tin cu mira na shelu. I einan ta sinta un problema pa algun hende. Siendo cu Jehova su organisacion celestial ta invisibel, con nos por sa cu di berdad e ta existí? Kisas algun ta asta sinti nan manera nan ta den un tunel di duda, puntrando nan mes: ‘Con nos por ta sigur?’ Wel, con fe por vence duda? Dos manera clave ta studio personal intenso dje Palabra di Dios i asistencia regular na reunionnan cristian huntu cu participacion den nan. E ora ei nos ta mira e lus dje berdad na fin dje tunel. Tabatin otro sirbidónan di Dios cu tabatin duda. Laga nos considerá e caso dje sirbidó di Eliseo ora Israel tabata bou di atake dje rey di Siria.—Compará cu Juan 20:24-29; Santiago 1:5-8.

Unu Cu A Mira e Ehércitonan Celestial

4, 5. (a) Ki problema e sirbidó di Eliseo tabatin? (b) Con Jehova a contestá Eliseo su oracion?

⁴ E rey di Siria a manda un forsa militar pisá den anochi pa Dotan pa capturá Eliseo. Ora e sirbidó di Eliseo a lanta mainta trempan i a sali pafó, tal bes pa coge un tiki aire frescu riba e dak plat di nan bibienda den Medio Oriente, wel, ki un shok el a haña! Henter un ehército di sirio cu cabai i garoshi di guera a rondoná e stad, wardando pa capturá e profeta di Dios. E sirbidó a sclama na Eliseo: “Ai, mi shon! Kico nos lo haci?” Evidentemente, di un manera calmu i cu conviccion, Eliseo a respondé: “No tene miedu, pasobra tin mas cu ta cu nos cu esnan cu ta cu nan.” E sirbidó lo mester a puntra su mes: ‘Unda nan ta? Mi no ta mira nan!’ Tin biaha esei por ta nos problema tambe—nos no ta mira cu wowo di comprendimentu, of percibí, e ehércitonan celestial.—2 Reynan 6:8-16; Efesionan 1:18.

⁵ Eliseo a pidi Dios pa habri wowo di su sirbidó. Kico a sosodé e ora ei? “Inmediatamente Jehova a habri wowo dje sirbidó, di manera cu el a mira; i, ata! e region montañoso tabata yen di cabai i garoshi di guera di candela tur rond di Eliseo.” (2 Reynan 6:17) Sí, el a mira e ehércitonan celestial angelical cla pa protehá Dios su sirbidó. Awor e por a comprendé di con Eliseo por tabata asina confiá.

6. Con nos por haña un comprendimentu penetrante di Jehova su organisacion celestial?

⁶ Nos tambe sa tin problema pa percibí cosnan, mescos cu e sirbidó di ELiseo tabatin? Nos ta incliná na mira solamente e banda físico di situacionnan cu ta menasá nos of ta menasá e trabou cristian na cierto pais? Si ta asina, nos por spera cu un vision special lo iluminá nos? No, pasobra nos tin algu cu e sirbidó di Eliseo no tabatin—un buki completo cu ta contené hopi vision: Bijbel. E por duna nos comprendimentu penetrante di e organisacion celestial. Tambe e Palabra inspirá ei ta duna principionan guiador pa rectificá nos manera di pensa i di biba. Sin embargo, nos tin cu haci esfuerso pa busca dicernimentu i cultivá aprecio p’e areglo di Jehova. I nos por haci esei pa medio di studio personal, huntu cu oracion i meditacion.—Romanonan 12:12; Filipensenan 4:6; 2 Timoteo 3:15-17.

Studia pa Percibí

7. (a) Ki problema algun por tin cu studio personal di Bijbel? (b) Pakico studio personal ta bal e esfuerso?

⁷ Pa hopi hende, studio personal no ta ègt un cos agradabel cu nan ta anhelá, specialmente esnan cu nunca a gusta studia na scol of cu nunca tabatin e oportunidad di bai scol. Sin embargo, si nos kier percibí i reconocé e organisacion di Jehova cu nos wowo di comprendimentu, nos tin cu cultivá un deseo di studia. Bo por disfrutá di un bon cuminda sin prepar’é? Manera cualkier chefkok of koki lo bisá bo, preparacion di un cuminda delicioso ta exigí basta trabou. Sin embargo, kisas bo ta com’é den mei ora of ménos. Di otro banda, e beneficionan di studio personal por dura pa henter bo bida. Studio personal por bira algu cu nos ta bai gusta mas i mas ora nos mira e progreso cu nos por haci. Apostel Pablo a bisa corectamente cu nos mester presta atencion constante na nos mes i na nos siñamentu i pa nos sigui dedicá nos mes na lesamentu público. Esfuerso consistente ta necesario, pero e beneficionan por ta eterno.—1 Timoteo 4:13-16.

8. Ki actitud Proverbionan ta recomendá pa nos tin?

⁸ Un homber sabí di antaño a bisa: “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si, ademas, bo sclama pa comprendimentu mes i duna bo bos pa dicernimentu mes, si bo sigui busk’é como pa plata, i como pa tesoro scondí bo sigui en busca di dje, den tal caso lo bo comprendé e temor di Jehova, i lo bo haña e conocimentu mes di Dios.”—Proverbionan 2:1-5.

9. (a) Cuantu balor oro tin compará cu “e conocimentu mes di Dios”? (b) Ki hermentnan nos tin mester pa haña conocimentu exacto?

⁹ Bo ta reconocé ken tin e responsabilidad di haci esfuerso? E frase cu ta ripití ta ‘si bo.’ I tuma nota dje expresion: ‘Si bo sigui busk’é como pa tesoro scondí.’ Pensa riba e mineronan cu pa siglonan a coba busca plata i oro na Bolivia, México, Sur Africa i otro paisnan. Nan a traha duru, usando piki cu skop, pa coba e baranca for di cua nan por a haña e metalnan precioso. Nan a duna asina tantu balor na oro cu den un solo mina na California, Merca, nan a coba 591 kilometer di tunel, alcansando un profundidad vertical di rond di un kilometer i mei—djis pa haña oro. Sin embargo, bo por come oro? Bo por bebe oro? Lo e sostené bo den un desierto si bo ta muriendo di hamber i sed? No, su balor ta artificial i ta basá riba preferencia personal, i e ta cambia di un dia pa otro segun e mercadonan internacional ta cambia. No obstante, hende a muri p’e. Awor, cuantu esfuerso nos tin cu haci pa haña oro spiritual, “e conocimentu mes di Dios”? Pensa riba esei, e conocimentu mes dje Señor Soberano di universo, su organisacion, i su propósitonan! Den e contexto aki, nos por usa piki cu shòbel spiritual. Eseinan ta e publicacionnan basá riba Bijbel cu ta yuda nos coba den Jehova su Palabra i dicerní su nificacion.—Job 28:12-19.

Cobando en Busca di Comprendimentu Penetrante

10. Kico Daniel a mira den un vision?

¹⁰ Laga nos coba un tiki den sentido spiritual pa nos por cuminsá haña e conocimentu mes dje organisacion celestial di Jehova. Pa un comprendimentu penetrante clave, laga nos bai n’e vision cu Daniel a haña dje Anciano di Dianan riba su trono. Daniel ta skirbi: “Mi a sigui contemplá te ora nan a pone trononan i e Anciano di Dianan a sinta. Su paña tabata blancu manera sneu, i e cabei di su cabes tabata manera lana limpi. Su trono tabata vlamnan di candela; su wielnan tabata un candela ardiente. Tabatin un riu di candela cu tabata core i sali for di su dilanti. Tabatin mil di miles cu a sigui sirbié, i dies mil bes dies mil cu a sigui para net su dilanti. E Tribunal a tuma asiento, i tabatin bukinan cu a habri.” (Daniel 7:9, 10) Ken tabata e miles aki cu tabata sirbiendo Jehova? E referencianan den márgen den e Traducción del Nuevo Mundo, usá como “piki” i “skop,” ta hiba nos na referencianan manera Salmo 68:17 i Hebreonan 1:14. Sí, esnan cu tabata sirbi ta angelnan celestial!

11. Con Daniel su vision por yuda nos comprendé e palabranan di Eliseo?

¹¹ E relato di Daniel no ta bisa cu el a mira tur e angelnan fiel cu Dios tin na su disposicion. Lo por tin miyones mas. Pero sigur nos por comprendé awor pakico Eliseo por a bisa: “Tin mas cu ta cu nos cu esnan cu ta cu nan.” E ehército celestial di Jehova tabata muchu mas cu e ehército dje rey di Siria, maske esei tabatin e apoyo di angelnan infiel, e demoñonan!—Salmo 34:7; 91:11.

12. Con bo por haña sa mas tocante e angelnan?

¹² Tal bes lo bo kier sa mas tocante e angelnan aki, manera cua ta e papel cu nan ta hunga den sirbi Jehova. For dje palabra griego pa angel, nos por mira cu nan ta mensahero pasobra e ta nificá “mensahero” tambe. Sin embargo, nan tareanan ta encerá hopi mas. Pero, pa haña sa kico esei ta, bo tin cu coba. Si bo tin e buki Perspicacia para comprender las Escrituras disponibel, bo por studia e artículo “Angelnan,” of bo por consultá artículonan bieu tocante angel den E Toren di Vigilancia. Lo bo keda sorprendí cuantu bo por siña tocante e sirbidónan celestial di Dios aki i lo bo bin comprendé con nan ta apoyá nos. (Revelacion 14:6, 7) Sin embargo, den e organisacion celestial di Dios, algun criatura spiritual ta sirbi propósitonan special.

Loke Isaías A Mira

13, 14. Kico Isaías a mira den vision, i ki efecto esaki tabatin riba dje?

¹³ Awor laga nos coba un tiki den e vision di Isaías. Ora bo lesa capítulo 6, versículo 1 pa 7, bo mester keda impresioná. Isaías ta bisa cu el a “mira Jehova, sintá riba un trono,” i “tabatin serafinnan pará ariba di dje.” Nan tabata proclamando e gloria di Jehova, alabando su santidad. Asta ora bo lesa e relato aki, lo e mester tin un efecto riba bo. Con Isaías a reaccioná? “Mi a pasa na bisa: ‘Ai di mi! Pasobra mi por bien conta cu mi a ser trecé na silencio [den Sheol], pasobra un homber impuru di lip mi ta, i meimei di un pueblo impuru di lip mi ta bibando; pasobra mi wowonan a mira e Rey mes, Jehova di ehércitonan!’” Ki impresioná e tabata cu e vision ei! Abo tambe?

¹⁴ Pues con Isaías por a soportá e bista glorioso aki? E ta splica cu un serafin a bin na su rescate i a bisa: “Bo eror a bai i bo picá mes a keda expiá.” (Isaías 6:7) Isaías por a confia den e misericordia di Dios i a presta atencion n’e palabranan di Jehova. Awor, lo bo no kier sa mas tocante e criaturanan spiritual di rango haltu aki? Wel, kico bo tin cu haci? Coba busca pa mas informacion. Un herment cu bo por usa ta e Watch Tower Publications Index, siguiendo su referencianan na hopi fuente di informacion clarificador.

Kico Ezekiel A Mira?

15. Kico ta indicá cu Ezekiel su vision ta confiabel?

¹⁵ Laga nos bai awor na un otro tipo di creacion spiritual. Ezekiel tabatin e privilegio di haña un vision inspirador miéntras ainda e tabata prezu na Babilonia. Habri bo Bijbel na Ezekiel capítulo 1, e promé tres versículonan. Con e relato ta cuminsá? E ta bisa: ‘Un biaha tabatin den un tera leu . . . ’? No, esaki no ta un cuenta di ada den tempu di mitologia. Versículo 1 ta declará: “Awor bon, den e di trinta aña, den e di cuater luna, riba e di cincu dia di luna, miéntras mi tabata meimei dje pueblo exiliá banda di riu Kebar, a sosodé cu shelu a habri i mi a cuminsá mira visionnan di Dios.” Kico bo ta ripará tocante e versículo aki? E ta duna un fecha exacto i un lugá concreto. E detayenan aki ta señalá n’e di cincu aña di exilio di Rey Joakin, e aña 613 P.E.C.

16. Kico Ezekiel a mira?

¹⁶ E man di Jehova a bini riba Ezekiel, i el a cuminsá mira un vision inspirador di temor di Jehova riba un trono den un inmenso garoshi celestial cu tabatin wielnan masha grandi cu wowo tur rond dje rimnan. E detaye cu ta interesá nos aki ta cu tabatin cuater criatura, unu pará na cada wiel. “Esaki ta loke nan a parce: nan tabatin e aparencia di hende terenal. I cada un tabatin cuater cara, i cada un tabatin cuater hala. . . . I en cuanto e aparencia di nan cara, nan cuater tabatin cara di hende cu cara di leon na banda drechi, i nan cuater tabatin cara di toro na banda robes, nan cuater tabatin cara di águila tambe.”—Ezekiel 1:5, 6, 10.

17. Kico e cuater caranan dje kerubinnan ta representá?

¹⁷ Kico e cuater criaturanan bibiente aki tabata? Ezekiel mes ta bisa nos cu nan tabata kerubin. (Ezekiel 10:1-3, 14) Pakico nan tabatin cuater cara? Pa representá e cuater atributonan sobresaliente dje Señor Soberano Jehova. E cara di águila tabata un símbolo di sabiduria penetrante. (Job 39:27-29) Kico e cara dje toro a representá? Hende a yega di mira un toro bringadó, cu e tremendo forsa di su garganta i scouder, hisa un cabai i su ginete manda laira. Siguramente, e toro ta un símbolo di Jehova su poder ilimitá. E leon ta ser usá como símbolo di husticia compañá cu curashi. Finalmente, e cara di hende apropiadamente ta representá e amor di Dios, siendo cu hende ta e único criatura terenal cu por manifestá e cualidad aki di un manera inteligente.—Mateo 22:37, 39; 1 Juan 4:8.

18. Con apostel Juan ta yuda nos haña un mihó percepcion dje organisacion celestial?

¹⁸ Tin otro visionnan cu por yuda nos completá e cuadro. Esakinan ta, entre otro, Juan su visionnan relatá den e buki bíblico di Revelacion. E, mescos cu Ezekiel, ta mira Jehova riba un trono glorioso compañá pa kerubin. Kico e kerubinnan ta haciendo? Nan ta resoná e proclamacion dje serafinnan di Isaías capítulo 6, bisando: “Santu, santu, santu ta Jehova Dios, e Todopoderoso, cu tabata i cu ta i cu ta bini.” (Revelacion 4:6-8) Tambe Juan ta mira un lamchi banda dje trono. Ken esei lo ta representá? E lamchi di Dios mes, Jesucristo.—Revelacion 5:13, 14.

19. Mediante e studio aki, kico bo a percibí tocante e organisacion di Jehova?

¹⁹ Pues pa medio dje visionnan aki, kico nos a percibí? Cu e organisacion celestial tin na su zénit Jehova Dios, sintá riba su trono compañá p’e Lamchi, Jesucristo, kende ta e Palabra, of Lógos. Despues nos a mira un multitud celestial di angel, incluyendo serafin i kerubinnan. Nan ta parti di un inmenso organisacion uní cu ta sirbi Jehova su propósitonan. I un dje propósitonan ei ta e predicacion dje bon nobo rond mundu den e tempu di fin aki.—Marco 13:10; Juan 1:1-3; Revelacion 14:6, 7.

20. Ki pregunta lo ser contestá den e siguiente artículo?

²⁰ Finalmente, nos tin Testigonan di Jehova riba tera cu ta reuní den nan Salonnan di Reino pa por siña con pa haci e boluntad dje Señor Soberano. Awor sigur nos por comprendé cu tin mas cu ta cu nos cu esnan cu ta cu Satanas i e enemigunan dje berdad. Pero ta keda e pregunta: Kico e organisacion celestial tin di haber cu e predicacion dje bon nobo di Reino? E siguiente artículo lo examiná esei i otro asuntunan.

Preguntanan di Repaso

◻ Pa reconocé e organisacion di Jehova, kico nos tin cu percibí?

◻ Kico e sirbidó di Eliseo a pasa den, i con e profeta a anim’é?

◻ Con nos mester mira studio personal?

◻ Con Daniel, Isaías i Ezekiel ta duna detayenan dje organisacion celestial?

[Plachi na página 13]

E beneficionan di studio personal ta muchu mas tantu cu di un cuminda bon prepará

[Plachi na página 15]

Un vision di ehércitonan celestial tabata Jehova su contesta riba Eliseo su oracion