E texto principal cu nan ta cita pa apoyá e doctrina aki ta Daniel 8:14. E ta bisa: “El a bisá mi, Te na dos mil treshen dia; e ora ei e santuario lo ser limpiá.” (King James Version) Pa motibu dje frase “e ora ei e santuario lo ser limpiá,” hopi adventista ta relacioná e versículo aki cu Levítico capítulo 16. E ta describí e limpiamentu dje santuario dor dje sumo sacerdote hudiu riba e Dia di Expiacion. Tambe nan ta conectá e palabranan di Daniel cu Hebreonan capítulo 9, cu ta describí Jesus como e Gran Sumo Sacerdote den shelu. Un erudito ASD ta bisa cu e razonamentu aki ta basá riba e método di “texto di prueba.” Un persona ta haña “un cierto palabra manera santuario den Dan. 8:14, e mésun palabra den Lev. 16, e mésun palabra den Heb. 7, 8, 9” i ta concluí “cu nan tur ta papiando di e mésun cos.”

E adventistanan ta razoná asina aki: E sacerdotenan di Israel di antigwedad tabata efectuá un ministerio diario den e compartimentu dje tempel yamá e Lugá Santu, resultando den pordon di picá. Riba e Dia di Expiacion, e sumo sacerdote tabata efectuá un ministerio anual den e Lugá Santísimo (e cuarto mas interior dje tempel) cu a resultá den e eliminacion di picá. Nan ta concluí cu e ministerio sacerdotal di Cristo den shelu ta consistí di dos fase. E promé a cuminsá cu su asencion den e promé siglo, a terminá na 1844, i a resultá den pordon di picá. E di dos, of “fase di huicio,” a cuminsá dia 22 di october, 1844, ta sigui ainda, i lo resultá den e eliminacion di picá. Con esaki ta ser lográ?

Nan ta bisa cu desde 1844 Jesus ta investigando e registro di bida di tur cu ta yama nan mes creyente (promé dje mortonan, despues dje bibunan) pa determiná si nan ta merecé bida eterno. E examinacion aki ta e “huicio investigativo.” Despues cu hende ser husgá asina, e picánan di esnan cu ta pasa e prueba aki ta ser eliminá for dje bukinan di registro. Pero, segun splicacion di Ellen White, en cuanto esnan cu no pasa e prueba aki, ‘nan nomber lo ser eliminá for dje buki di bida.’ Asina, “a determiná si e destino di cada persona lo ta pa bida of morto.” N’e punto ei, e santuario celestial ta ser limpiá i Daniel 8:14 ta ser cumplí. Esei ta loke adventistanan di shete dia ta splica. Pero e publicacion ASD Adventist Review ta admití: “E término huicio investigativo no ta ser hañá den Bijbel.”

Ta Falta un Coneccion Lingwístico

E siñansa aki a molestiá algun adventista. “Historia ta mustra,” segun un comentarista, “cu lidernan leal den nos filanan a pasa den agonia di alma ora nan tabata investigá nos siñansa tradicional riba e huicio investigativo.” Den añanan recien, e ta agregá, agonia a bira duda segun cu eruditonan a cuminsá “cuestioná hopi pilar di nos splicacion acustumbrá di nos doctrina relacioná cu e limpiamentu dje santuario.” Laga nos examiná dos di nan awor.

Promé pilar: Daniel capítulo 8 ta ser conectá cu Levítico capítulo 16. Dos problema ta debilitá e hipótesis aki—idioma i contexto. Di promé, considerá idioma. Adventistanan ta kere cu e ‘santuario limpiá’ den Daniel capítulo 8 ta e cumplimentu profético dje ‘santuario limpiá’ di Levítico capítulo 16. E similaridad aki a parce aceptabel te ora traductornan a haña sa cu “limpiá” den King James Version ta un traduccion robes di un forma dje verbo hebreo tsa·dhaqʹ (nificando “ser recto”) cu ta ser usá na Daniel 8:14. Profesor di teologia Anthony A. Hoekema ta comentá: “Ta un poco lamentabel cu e palabra a yega di ser traducí como ser limpiá, siendo cu e verbo hebreo generalmente traducí como limpiá [ta·herʹ] no ta ser usá aki mes.”a E ta ser usá den Levítico capítulo 16 caminda King James Version ta traducí formanan di ta·herʹ como “limpia” i “ser limpi.” (Levítico 16:19, 30) P’esei, Dr. Hoekema ta concluí corectamente: “Si Daniel kier a referí na e clase di limpiamentu cu a ser hací riba e Dia di Expiacion, lo el a usa taheer [ta·herʹ] en bes di tsadaq [tsa·dhaqʹ].” Sin embargo, tsa·dhaqʹ no ta ser hañá den Levítico, i ta·herʹ no ta ser hañá den Daniel. Ta falta e coneccion lingwístico.

Kico e Contexto Ta Revelá?

Awor considerá e contexto. Segun adventistanan, Daniel 8:14 ta “isolá for di su contexto,” sin ningun coneccion cu su contexto i sin ningun relacion cu e versículonan anterior. Pero bo ta haña e impresion ei ora bo lesa Daniel 8:9-14 den e cuadro acompañante titulá “Daniel 8:14 den Su Contexto”? Versículo 9 ta identificá un agresor, un cachu chikitu. Versículo 10-12 ta revelá cu e agresor aki lo atacá e santuario. Versículo 13 ta puntra, ‘Pa cuantu tempu e agresion aki lo continuá?’ I versículo 14 ta contestá: “Te cu dos mil treshen anochi i mainta; i e lugá santu siguramente lo ser hibá na su condicion corecto.” Claramente, versículo 13 ta lansa un pregunta cu ta ser contestá den versículo 14. Teólogo Desmond Ford ta bisa: “No tin un splicacion pa apoyá e separacion di Dan. 8:14 for dje gritu aki [“Pa cuantu tempu?” versículo 13].”b

Pakico e adventistanan ta separá versículo 14 for dje contexto? Esei ta pa evitá un conclusion embarasoso. E contexto ta atribuí e contaminacion dje santuario, mencioná den versículo 14, n’e actividadnan dje cachu chikitu. Sin embargo, e doctrina di “huicio investigativo” ta atribuí e contaminacion dje santuario n’e actividadnan di Cristo. Segun nan el a transferí e picánan di creyentenan n’e santuario celestial. Pues, kico ta sosodé si adventistanan aceptá tantu e doctrina como e contexto? Dr. Raymond F. Cottrell, un adventista di shete dia i ex-editor asociá di e SDA Bible Commentary, ta skirbi: “Gañando nos mes pa kere cu e interpretacion di ASD ta examiná Daniel 8:14 den su contexto, esei lo ta mescos cu identificá e cachu chikitu como Cristo.” Dr. Cottrell ta admití onestamente: “Nos no por armonisá e consideracion dje contexto i e interpretacion dje adventistanan cu otro.” P’esei, pa pega n’e “huicio investigativo,” Iglesia Adventista tabatin cu scoge—of aceptá e doctrina of aceptá e contexto di Daniel 8:14. Desafortunadamente, nan a aceptá e doctrina i a rechasá e contexto. Nada straño, Dr. Cottrell ta bisa, cu studiantenan di Bijbel bon informá ta culpa adventistanan di ta “lesa den Scritura” loke no por ser “sacá for di Scritura”!

Na 1967, Dr. Cottrell a prepará un les tocante e buki di Daniel pa duna n’e scol di sabat, cua a ser mandá pa iglesianan di ASD rond mundu. El a siña cu Daniel 8:14 en berdad ta relacioná cu su contexto i cu e ‘limpiamentu’ no ta referí na creyentenan. Notablemente, e les a omití cualkier mencion di un “huicio investigativo.”

Algun Contesta Remarcabel

Te na ki grado adventistanan ta conciente cu e pilar aki ta muchu swak pa apoyá e doctrina di “huicio investigativo”? Dr. Cottrell a puntra 27 teólogo adventista principal, ‘Ki motibunan lingwístico of di contexto bo por duna pa e coneccion entre Daniel capítulo 8 i Levítico capítulo 16?’ Nan contesta?

“Tur bintishete a afirmá cu no ta existí ningun motibu lingwístico of di contexto pa aplicá Dan. 8:14 n’e dia di expiacion antitípico i e huicio investigativo.” El a puntra nan, ‘Bo tin cualkier otro motibu pa haci e coneccion aki?’ Mayoria dje eruditonan adventista a bisa cu nan no tabatin otro motibu, cincu a contestá cu nan a haci e coneccion aki pasobra Ellen White a hacié, i dos a bisa cu nan a basa e doctrina riba un “casualidad afortuná” den traduccion. Teólogo Ford ta remarcá: “Conclusionnan asina cu nos mihó eruditonan ta ofrecé en efecto ta afirmá cu nos no por defendé nos siñansa tradicional riba Dan. 8:14.”

E Buki di Hebreonan Ta Yuda?

Di dos pilar: Daniel 8:14 ta ser conectá cu Hebreonan capítulo 9. “Tur nos obranan antiguo ta haci uso di Heb. 9 ora di splica Dan. 8:14,” teólogo Ford ta bisa. E coneccion aki a originá despues dje “Gran Desapunte” na 1844. Buscando guia, e millerita Hiram Edson a tira su Bijbel riba un mesa p’e por a cai habri. E resultado? E Bijbel a cai habri na Hebreonan capítulo 8 i 9. Ford ta bisa: “Kico por tabata mas apropiado i simbólico dje pretension adventista di cu e capítulonan aki tabata contené e clave p’e nificacion di 1844 i Dan. 8:14!”

“E pretension ei ta crucial pa adventistanan di shete dia,” Dr. Ford ta agregá den su buki Daniel 8:14, the Day of Atonement, and the Investigative Judgment. “Solamente den Heb. 9 . . . por haña un splicacion detayá dje importancia di . . . e doctrina di santuario cu ta asina vital pa nos.” Sí, Hebreonan capítulo 9 ta e capítulo den e “Testament Nobo” pa splica e nificacion profético di Levítico capítulo 16. Pero adventistanan ta bisa tambe cu Daniel 8:14 ta e versículo den e “Testament Bieu” cu ta haci esei. Si tur e dos declaracionnan ei ta cierto, mester tin un coneccion entre Hebreonan capítulo 9 i Daniel capítulo 8 tambe.

Desmond Ford ta comentá: “Cierto cosnan ta resaltá unbes ora bo lesa Heb. 9. No tin ningun referencia obvio n’e buki di Daniel, i siguramente ningun na Dan. 8:14. . . . E capítulo den su totalidad ta un aplicacion di Lev. 16.” E ta declará: “Nos siñansa di santuario no por ser hañá den e único buki di e Testament Nobo cu ta trata e nificacion dje servicionan di santuario. Esaki ta loke escritornan adventista bon conocí rond mundu a confirmá.” Pues, anto, e di dos pilar tambe ta muchu swak pa apoyá e doctrina problemático.

Sin embargo, e conclusion aki no ta nada nobo. Pa hopi aña, Dr. Cottrell ta bisa, “e iglesia su eruditonan di Bijbel tabata bon na altura dje problemanan cu e splicacion di nos interpretacion tradicional di Daniel 8:14 i Hebreonan 9 ta encontrá.” Rond di 80 aña pasá, e influyente adventista di shete dia, E. J. Waggoner, a skirbi: “Siñansa adventista relacioná cu e santuario, cu su ‘Huicio Investigativo’ . . . , ta prácticamente un rechaso dje expiacion.” (Confession of Faith) Mas cu 30 aña pasá, e problemanan ei a ser presentá n’e Conferencia General, e liderato di Iglesia Adventista di Shete Dia.

Problemanan i un Impase

E Conferencia General a apuntá un “Comité Riba Problemanan den e Buki di Daniel.” E comité tabatin cu prepará un informe riba con pa resolvé e dificultadnan cu tabata concentrá riba Daniel 8:14. E 14 miembronan dje comité a studia e cuestion pa cincu aña, pero no por a proponé un solucion unánime. Na 1980, e miembro di comité, Cottrell, a bisa cu mayoria miembro di comité a haña cu e adventistanan su interpretacion di Daniel 8:14 por a ser “establecí satisfactoriamente” dor di un seri di “suposicionnan” i cu problemanan “mester ser lubidá.” El a agregá: “Corda, e nomber dje comité tabata e Comité Riba Problemanan den e Buki di Daniel, i e mayoria tabata sugerí pa nos lubidá e problemanan i no bisa nada tocante nan.” Esei lo tabata ekivalente na “admití cu nos no tabatin ningun contesta.” Pues e minoria a nenga di respaldá e punto di bista dje mayoria, i no tabatin un informe oficial. E problemanan di doctrina a keda sin ser resolvé.

Comentando riba e impase aki, Dr. Cottrell ta bisa: “Ainda nos tin e cuestion di Daniel 8:14 pasobra nos no tabata dispuesto, te asina leu, pa enfrentá e echo cu un problema masha real cu splicacion tá existí. E cuestion ei lo no disparcé tanten nos sigui pretendé cu no tin problema, tanten nos sigui insistí riba tene nos cabesnan, individualmente i colectivamente, den e santu di nos opinionnan formá adelantá.”—Spectrum, un revista publicá dor di Foro di Asociacion di Adventista.

Dr. Cottrell ta urgi adventistanan pa haci “un reexaminacion cuidadoso dje suposicionnan básico i e principionan di splicacion riba cua nos a basa nos interpretacion di [Dan. 8:14] cu—pa adventismo—ta un pasashi indispensabel dje Scritura.” Nos lo kier animá adventistanan pa examiná e doctrina di “huicio investigativo” pa mira si su pilarnan ta basá sólidamente riba Bijbel of ta fundá riba santu instabil di tradicion.c Apostel Pablo a urgi sabiamente: “Haci sigur di tur cos; tene firmemente gará loke ta excelente.”—1 Tesalonicensenan 5:21.

Daniel 8:14 den Su Contexto

DANIEL 8:9 “I for di un di nan a sali un otro cachu, un chikitu, i el a sigui haci su mes muchu mas grandi den direccion di zuid i den direccion dje salimentu di solo i den direccion di e Decoracion. 10 I el a sigui bira mas grandi te ora el a yega te n’e ehército di shelu, di manera cu el a pone algun dje ehército i algun dje streanan cai na tera, i el a pasa na trapa nan. 11 I te n’e Prins di e ehército el a desplegá un aire di arogancia, i for di dje e rasgo constante a ser kitá, i e lugá establecí di su santuario a ser tirá abou. 12 I un ehército mes a ser entregá gradualmente, huntu cu e rasgo constante, pa motibu di transgresion; i el a sigui tira e berdad na tera, i el a actua i tabatin éxito.

“13 I mi a cuminsá tende un cierto santu papia, i un otro santu a procedé na bisa na esun cu tabata papia: ‘Cuantu tempu e vision dje rasgo constante i dje transgresion cu ta causa desolacion lo dura, pa haci tantu e lugá santu como e ehército cosnan pa trapa ariba?’ 14 Di manera cu el a bisá mi: ‘Te cu dos mil treshen anochi i mainta; i e lugá santu siguramente lo ser hibá na su condicion corecto.’”—Traducción del Nuevo Mundo de las Santas Escrituras.