T’e A Guli Jonas?

BIJBEL ta bisa nos cu Jonas, un profeta di Jehova den siglo nuebe P.E.C., huyendo di un asignacion, a barca riba un boto. Durante e biahe tempestuoso den Laman Mediteráneo, e tripulantenan a tir’é for di bordo. “Jehova a asigná un piscá grandi p’e guli Jonas, di manera cu Jonas a yega di ta den e partinan interior dje piscá tres dia i tres anochi.”—Jonas 1:3-17.

Algun hende ta bisa, ‘Imposibel! Ningun criatura den laman lo por guli un homber.’ Pero sea un bayena cachalote (physeter catodon) of un tribon blancu grandi por a haci’é. National Geographic (december 1992) a ofrecé un otro posibilidad—e tribon bayena (Rhincodon typus). Como e tribon conocí di mas grandi, e por crece te na 20 meter largu i pisa 70 ton.

“E tribon bayena su anatomia digestivo no-comun ta pas bon cu historia di Jonas. Ta fácil pa imaginá bo mes ser chupá inadvertidamente den boca di un tribon bayena, cua ta inmenso . . . E boca hol di asta un tribon bayena adulto chikitu por acomodá fácilmente un par di Jonas.”

E tribon bayena su alimento ta plankton, cu “ta laba pasa dor dje corocoro den e sala di bankete inmenso i elástico cu ta e apertura parti ariba dje stoma.” Pero, con un hende por sali afó? National Geographic ta bisa: “Tribon tin un manera no-violento di despedí di obhetonan grandi cu nan guli i cu ta difícil pa digerí . . . Un tribon por haci su stoma parti ariba bashí lentamente dor di bolt’e di paden pa pafó i push’é dor di su boca. . . . Pues, bo por slip sali pafó riba un tapijt cubrí cu slijm, mas lebelebe pero kisas siñando algu for dje experencia.”

Awe, e tribon bayena no ta ser hañá den Laman Mediteráneo, aunke nan a ser hañá na parti nort te na altura dje stad New York. Tabatin den Laman Mediteráneo den tempu di Jonas? Ken por bisa? Bijbel no ta specificá ki clase di criatura di laman Jehova a usa, pero Jesus mes a confirmá cu e relato di Jonas ta berdadero.—Mateo 12:39, 40.

[Rekonosementu di plachi na página 32]

Norbert Wu/Peter Arnold Inc.