“Stima Berdad i Pas”!

“E palabra di Jehova di ehércitonan a sigui yega na mi, bisando: ‘. . . Stima berdad i pas.’”—ZACARIAS 8:18, 19.

1, 2. (a) Kico ta e registro di humanidad pa loke ta pas? (b) Pakico e mundu actual aki hamas lo mira berdadero pas?

“NUNCA e mundu tabatin pas. Un of otro caminda—i frecuentemente den hopi lugá n’e mésun tempu—semper tabatin guera.” Asina Profesor Milton Mayer di e Universidad di Massachusetts, Merca, a bisa. Ki un comentario tristu tocante humanidad! Ta cierto cu hende a deseá pas. Políticonan a purba tur sorto di manera pa manten’é, for di Pax Romana dje época romano te n’e política di “Destruccion Mutuamente Garantisá” durante e Guera Friu. Sin embargo, finalmente tur nan esfuersonan a fracasá. Manera Isaías a expres’é hopi siglo pasá, ‘e mensaheronan mes di pas a yora amargamente.’ (Isaías 33:7) Pa ki motibu?

² Esei ta pasobra un pas duradero tin cu originá for di un ausencia di odio i golosidad; e mester ta fundá den e berdad. Pas no por ta basá riba mentira. P’e motibu ei ora Jehova a primintí restoracion i pas pa Israel di antigwedad, el a bisa: “Aki mi ta extendiendo na dje pas net manera un riu i e gloria dje nacionnan net manera un coriente di awa inundante.” (Isaías 66:12) E dios dje sistema di cosnan aki, Satanas e Diabel, ta “un matador,” un asesino, i “un mentiroso i e tata di mentira.” (Juan 8:44; 2 Corintionan 4:4) Con un mundu cu un dios asina hamas por tin pas?

3. Ki don remarcabel Jehova a duna su pueblo, apesar cu nan ta biba den un mundu yen di dificultad?

³ No obstante, ta remarcabel cu Jehova ta duna pas na su pueblo apesar cu nan ta biba den Satanas su mundu asotá dor di guera. (Juan 17:16) Den e di seis siglo P.E.C., el a cumpli cu su promesa mediante Jeremías i a duna “pas i berdad” na su nacion special ora el a restorá nan na nan patria. (Jeremías 33:6) I den e último dianan aki, el a duna “pas i berdad” na su pueblo den nan “tera,” of condicion spiritual terenal, aunke nan a experenciá e tempu di mas difícil cu e mundu aki a mira te awor. (Isaías 66:8; Mateo 24:7-13; Revelacion 6:1-8) Segun cu nos ta sigui nos consideracion di Zacarías capítulo 8, nos lo haña un aprecio mas profundo dje pas i berdad aki cu Dios ta duna i mira kico nos mester haci pa mantené nos parti den dje.

“Laga Boso Mannan Sea Fuerte”

4. Con Zacarías a animá Israel pa actua si nan kier a experenciá pas?

⁴ Pa di seis biaha den Zacarías capítulo 8, nos ta tende un pronunciacion emocionante for di Jehova: “Esaki ta loke Jehova di ehércitonan a bisa, ‘Laga boso mannan sea fuerte, boso cu ta tendiendo den e dianan aki e palabranan aki for di boca dje profetanan, riba e dia den cua e fundeshi dje cas di Jehova di ehércitonan a ser poné, pa e tempel ser edificá. Pasobra promé cu e dianan ei no tabata existí salario pa humanidad; i en cuanto e salarionan di animalnan doméstico, no tabatin tal cos; i pa esun cu tabata sali i esun cu tabata drenta no tabatin pas debí n’e adversario, ya cu mi a sigui instigá tur hende contra otro.’”—Zacarías 8:9, 10.

5, 6. (a) Debí n’e desanimacion dje israelitanan, kico tabata e situacion den Israel? (b) Ki cambio Jehova a primintí Israel si el a pone su adoracion na promé lugá?

⁵ Zacarías a papia e palabranan aki miéntras cu e tempel tabata ser reconstruí den Jerusalem. Anteriormente, e israelitanan cu a regresá for di Babilonia a bira desanimá i a para e trabou di construccion dje tempel. Debí cu nan a dirigí nan atencion na nan mes comodidad, nan no tabatin bendicion ni pas for di Jehova. Maske nan a cultivá nan tera i a cuida nan cunucu di wijndruif, nan no a prosperá. (Ageo 1:3-6) Tabata como si fuera nan tabata trahando sin “salario.”

⁶ Awor cu e tempel tabata ser reconstruí, Zacarías a animá e hudiunan pa “sea fuerte,” pa pone cu curashi e adoracion di Jehova na promé lugá. Kico lo a pasa si nan a haci esei? “‘Awor lo mi no ta manera den e dianan anterior pa esnan cu ta resta dje pueblo aki,’ ta e expresion di Jehova di ehércitonan. ‘Pasobra lo tin e simia di pas; e palu di wijndruif mes lo duna su fruta, i e tera mes lo duna su producto, i cielunan mes lo duna nan serena; i ami siguramente lo causa pa esnan cu ta resta dje pueblo aki heredá tur e cosnan aki. I mester sosodé cu mescos cu boso a bira un maldicion entre e nacionnan, O cas di Huda i cas di Israel, asina lo mi salba boso, i boso mester bira un bendicion. No tene miedu. Laga boso mannan sea fuerte.’” (Zacarías 8:11-13) Si Israel lo a actua cu determinacion, lo el a prosperá. Anteriormente, ora e nacionnan a deseá pa cita un ehempel di maldicion, nan lo por a señalá na Israel. Awor Israel lo tabata un ehempel di un bendicion. Ki un motibu excelente pa ‘laga nan mannan sea fuerte’!

7. (a) Ki cambionan emocionante Jehova su pueblo a experenciá, culminando den e aña di sirbishi di 1995? (b) Mirando e raport anual, cua paisnan bo ta mira cu tin un registro remarcabel di publicador, pionero i promedio di ora?

⁷ Kico di awe? Wel, den e añanan promé cu 1919, e pueblo di Jehova tabata falta un poco celo. Nan no a adoptá un posicion completamente neutral den e promé guera mundial, i nan tabatin e tendencia pa sigui un homber mas bien cu nan Rey, Jesucristo. Como resultado, algun a ser desanimá dor di oposicion for di paden i pafó dje organisacion. Anto, na 1919, cu e yudansa di Jehova, nan a laga nan mannan ser fuerte. (Zacarías 4:6) Jehova a duna nan pas, i nan a prosperá di un manera poderoso. Esaki ta ser mirá den nan registro dje último 75 añanan, culminando den e aña di sirbishi di 1995. Como un pueblo, Testigonan di Jehova ta rechasá nacionalismo, tribalismo, prehuicio i tur otro fuente di odio. (1 Juan 3:14-18) Nan ta sirbi Jehova cu berdadero celo den su tempel spiritual. (Hebreonan 13:15; Revelacion 7:15) Aña pasá so, nan a dedicá mas cu mil miyon ora papiando cu otronan tocante nan Tata celestial! Tur luna, nan a conducí 4.865.060 studio bíblico. Un promedio di 663.521 a participá den e sirbishi di pionero tur luna. Ora cleronan den cristiandad kier duna un ehempel di un pueblo cu ta berdaderamente entusiástico den nan adoracion, tin biaha nan ta mustra riba Testigonan di Jehova.

8. Con cada cristian individual por saca beneficio for di “e simia di pas”?

⁸ Debí na nan celo, Jehova ta duna su pueblo “e simia di pas.” Tur individuo cu ta cultivá e simia ei lo mira pas crece den su curason i den su bida. Tur cristian creyente cu ta sigui tras di pas cu Jehova i cu compañeronan cristian ta participá den e berdad i pas di e pueblo cu ta carga Jehova su nomber. (1 Pedro 3:11; compará cu Santiago 3:18.) Esei no ta maraviyoso?

“No Tene Miedu”

9. Ki cambio den su tratamentu cu su pueblo Jehova a primintí?

⁹ Awor nos ta lesa un di siete pronunciacion for di Jehova. Kico esei ta? “Esaki ta loke Jehova di ehércitonan a bisa, ‘Net manera mi a pensa di haci loke tabata calamitoso cu boso debí cu boso antepasadonan a indigná mi,’ Jehova di ehércitonan a bisa, ‘i mi no a sinti duele, asina lo mi tin pensá atrobe den e dianan aki pa trata bon cu Jerusalem i cu e cas di Huda. No tene miedu.’”—Zacarías 8:14, 15.

10. Ki registro di Testigonan di Jehova ta mustra cu nan no tabatin miedu?

¹⁰ Aunke Jehova su pueblo a ser plamá den un sentido spiritual durante e promé guera mundial, den nan curason nan tabata kier a haci loke tabata corecto. P’esei, Jehova, despues cu el a duna nan algun disiplina, a cambia su manera di trata cu nan. (Malakías 3:2-4) Awe, nos ta mira atras i ta gradicié fervientemente pa loke el a haci. Ta cierto cu nos tabata “obheto di odio di parti di tur nacion.” (Mateo 24:9) Hopi a ser encarcelá, i algun asta a muri pa nan fe. Hopi biaha nos ta enfrentá apatia of hostilidad. Pero nos no tin miedu. Nos sa cu Jehova ta mas fuerte cu cualkier oposicion, visibel of invisibel. (Isaías 40:15; Efesionan 6:10-13) Nos lo no stop di presta atencion n’e palabranan: “Spera den Jehova; tene curashi i laga bo curason sea fuerte.”—Salmo 27:14.

“Papia e Berdad Un cu Otro”

11, 12. Kico nos individualmente mester tene na mente si nos kier participá plenamente den e bendicionnan cu Jehova ta duna su pueblo?

¹¹ Pa participá plenamente den e bendicionnan di Jehova, tin cosnan cu nos mester corda. Zacarías ta bisa: “‘Esakinan ta e cosnan cu boso mester haci: Papia e berdad un cu otro. Cu berdad i e huicio di pas haci boso husgamentu den boso portanan. I no trama calamidad pa otro den boso curason, i no stima ningun huramentu falsu; pasobra tur esakinan ta cosnan cu mi a odia,’ ta e expresion di Jehova.”—Zacarías 8:16, 17.

¹² Jehova ta urgi nos pa papia e berdad. (Efesionan 4:15, 25) E no ta tende e oracionnan di esnan cu ta trama cosnan perhudicial, cu ta sconde e berdad pa probecho personal of cu ta expresá huramentu falsu. (Proverbionan 28:9) Siendo cu e ta odia apostasia, e kier pa nos pega n’e berdad di Bijbel. (Salmo 25:5; 2 Juan 9-11) Ademas, mescos cu e ancianonan n’e portanan dje stad den Israel, ancianonan cu ta atendé casonan hudicial mester basa nan conseho i decisionnan riba e berdad di Bijbel, no riba opinion personal. (Juan 17:17) Jehova kier pa nan busca un “huicio di pas,” tratando, como wardadornan cristian, pa restorá pas entre partidonan cu tin desacuerdo cu otro i yuda pecadornan repentí recobrá pas cu Dios. (Santiago 5:14, 15; Hudas 23) N’e mésun tempu, nan ta preservá e pas dje congregacion, expulsando cu curashi esnan cu ta perturbando e pas ei dor di persistí intencionalmente den malecho.—1 Corintionan 6:9, 10.

“Un Hubilamentu i un Alegramentu”

13. (a) Ki cambio relacioná cu yunamentu Zacarías a profetisá? (b) Ki yunamentu tabata ser observá den Israel?

¹³ Awor, nos ta tende un di ocho pronunciacion solem: “Esaki ta loke Jehova di ehércitonan a bisa, ‘E yunamentu dje di cuater luna, i e yunamentu dje di cincu luna, i e yunamentu dje di siete luna, i e yunamentu dje di dies luna lo bira pa e cas di Huda un hubilamentu i un alegramentu i bon periodonan di fiesta. Pues, stima berdad i pas.’” (Zacarías 8:19) Bou dje Ley di Moises, e israelitanan tabata yuna riba e Dia di Expiacion pa expresá duele pa nan picánan. (Levítico 16:29-31) E cuater yunamentunan cu Zacarías a mencioná, aparentemente tabata ser observá pa lamentá sucesonan en coneccion cu e derota i destruccion di Jerusalem. (2 Reynan 25:1-4, 8, 9, 22-26) Sin embargo, awor, e tempel tabata ser reconstruí i Jerusalem tabata ser poblá di nobo. Lamentacion tabata ser cambiá den alegramentu, i e yunamentunan por a bira temporadanan di fiesta.

14, 15. (a) Con e celebracion di Memorial tabata un gran causa pa alegramentu, i kico esaki mester recordá nos di dje? (b) Manera nos por mira den e raport anual, cua paisnan tabatin un asistencia sobresaliente n’e Memorial?

¹⁴ Awe, nos no ta observá e yunamentunan cu Zacarías a mencioná of e yunamentu prescribí den e Ley. Desde cu Jesus a ofrecé su bida pa nos picánan, nos ta disfrutando dje bendicionnan di un Dia di Expiacion mas grandi. Nos picánan ta ser cubrí, no simplemente como un muestra, sino completamente. (Hebreonan 9:6-14) Siguiendo e mandamentu dje Sumo Sacerdote celestial, Jesucristo, nos ta observá e Memorial di su morto como e único celebracion solem riba e calender cristian. (Lucas 22:19, 20) Nos no ta experenciá “un hubilamentu i un alegramentu” segun cu nos ta reuní huntu tur aña p’e celebracion ei?

¹⁵ Aña pasá, 13.147.201 persona a bini huntu pa celebrá e Memorial, 858.284 mas cu na 1994. Ki un multitud! Imaginá e alegramentu den e 78.620 congregacionnan di Testigonan di Jehova segun cu cantidadnan excepcionalmente grandi a reuní den nan Salonnan di Reino p’e celebracion. Siguramente, tur esnan presente a ser conmoví pa “stima berdad i pas” segun cu nan a recordá e morto di Esun cu ta “e caminda i e berdad i e bida” i kende awor ta reina como Jehova su gran “Prins di Pas”! (Juan 14:6; Isaías 9:6) E celebracion ei tabatin nificacion special pa esnan cu a observ’é den paisnan tormentá pa disturbio i guera. Algun di nos rumannan a presenciá horornan indescriptibel durante 1995. Tog, ‘e pas di Dios cu ta surpasá tur pensamentu a warda nan curason i nan facultadnan mental pa medio di Cristo Jesus.’—Filipensenan 4:7.

‘Laga Nos Suavisá e Cara di Jehova’

16, 17. Con hende dje nacionnan por “suavisá e cara di Jehova”?

¹⁶ Sin embargo, di unda tur e miyones di personanan ei cu a asistí n’e Memorial ta bini? E di nuebe expresion di Jehova ta splica: “Esaki ta loke Jehova di ehércitonan a bisa, ‘Lo ta ainda cu e pueblonan i e habitantenan di hopi stad lo bini; i e habitantenan di un stad siguramente lo bai cerca esnan di un otro, bisando: “Laga nos den tur seriedad ban suavisá e cara di Jehova i busca Jehova di ehércitonan. Ami mes tambe lo bai.” I hopi pueblo i nacionnan poderoso realmente lo bini pa busca Jehova di ehércitonan den Jerusalem i pa suavisá e cara di Jehova.’”—Zacarías 8:20-22.

¹⁷ E hendenan cu a asistí n’e Memorial kier a “busca Jehova di ehércitonan.” Hopi di esakinan tabata su sirbidornan dedicá i bautisá. Miyones di otronan cu a asistí ainda no a alcansá e fase ei. Den algun pais e asistencia na Memorial tabata cuater of cincu biaha e cantidad di publicador di Reino. E hopi personanan interesá aki mester di yudansa pa sigui haci progreso. Laga nos siña nan hubilá den e conocimentu cu Jesus a muri pa nos picánan i cu awor e ta gobernando den e Reino di Dios. (1 Corintionan 5:7, 8; Revelacion 11:15) I laga nos animá nan pa dedicá nan mes na Jehova Dios i someté na su Rey nombrá. Den e manera aki nan lo “suavisá e cara di Jehova.”—Salmo 116:18, 19; Filipensenan 2:12, 13.

“Dies Homber di Tur e Idiomanan dje Nacionnan”

18, 19. (a) Den e cumplimentu di Zacarías 8:23, ken awe ta “un hudiu”? (b) Ken awe ta e ‘dies hombernan’ cu ta “gara e saya di un homber cu ta un hudiu”?

¹⁸ Pa e último biaha den capítulo ocho di Zacarías, nos ta lesa: “Esaki ta loke Jehova di ehércitonan a bisa.” Kico ta Jehova su proclamacion final? “Den e dianan ei lo sosodé cu dies homber di tur e idiomanan dje nacionnan lo gara, sí, nan realmente lo gara e saya di un homber cu ta un hudiu, bisando: ‘Nos lo bai cu boso, pasobra nos a tende cu Dios ta cu boso.’” (Zacarías 8:23) Den tempu di Zacarías, Israel natural tabata e nacion scogí di Dios. Sin embargo, den e promé siglo, Israel a rechasá Jehova su Mesías. P’esei, nos Dios a scoge “un hudiu”—un Israel nobo—como su pueblo special, “e Israel di Dios” consistiendo di hudiunan spiritual. (Galationan 6:16; Juan 1:11; Romanonan 2:28, 29) E cantidad final di esakinan mester tabata 144.000, scogí for di entre humanidad pa reina cu Jesus den su Reino celestial.—Revelacion 14:1, 4.

¹⁹ Mayoria dje 144.000 aki a muri fiel caba i a bai pa nan recompensa celestial. (1 Corintionan 15:51, 52; Revelacion 6:9-11) Algun di nan ainda ta riba tera i esakinan ta alegrá pa mira cu e ‘dies hombernan’ kendenan ta scoge pa bai huntu cu e “hudiu” ta en berdad “un multitud grandi . . . for di tur nacion i tribu i pueblo i lenga.”—Revelacion 7:9; Isaías 2:2, 3; 60:4-10, 22.

20, 21. Segun cu e fin dje mundu aki ta acercá, con nos por permanecé na pas cu Jehova?

²⁰ Segun cu e fin dje mundu aki ta yega inevitablemente mas cerca, cristiandad ta manera Jerusalem den tempu di Jeremías: “Tabatin un speramentu pa pas, pero nada bon a bini; i pa un tempu di curacion, i, mira! teror!” (Jeremías 14:19) E teror ei lo alcansá un culminacion ora e nacionnan bira contra religion falsu i trec’é na un fin violento. Djis despues, e nacionnan mes lo experenciá destruccion den Dios su guera final, Armagedon. (Mateo 24:29, 30; Revelacion 16:14, 16; 17:16-18; 19:11-21) Ki un tempu di tumulto esei lo ta!

²¹ Atrabes di tur esei, Jehova lo protehá esnan cu ta stima e berdad i ta cultivá “e simia di pas.” (Zacarías 8:12; Sofonías 2:3) Laga nos, anto, permanecé sano i salbo den e tera di su pueblo, alaband’e cu celo públicamente i yudando mas tantu hende posibel pa “suavisá e cara di Jehova.” Si nos haci esei, pa semper nos lo disfrutá dje pas di Jehova. Sí, “Jehova mes en berdad lo duna fortalesa na su pueblo. Jehova mes lo bendicioná su pueblo cu pas.”—Salmo 29:11.

Bo Por Splica?

◻ Con e pueblo di Dios a ‘laga nan mannan sea fuerte’ den tempu di Zacarías? Awe?

◻ Con nos ta reaccioná na persecucion, hostilidad i apatia?

◻ Kico ta enbolbí den nos ‘papiamentu di berdad un cu otro’?

◻ Con un persona por “suavisá e cara di Jehova”?

◻ Ki gran causa pa alegramentu ta ser mirá den e cumplimentu di Zacarías 8:23?

[Plachi na página 18]

Aña pasá, Testigonan di Jehova a dedicá 1.150.353.444 ora papiando cu hende tocante e Reino di Dios