LÈS 12
Kiko Por Yuda Bo Sigui Studia Beibel Apesar di Difikultat?
Bo por saka hopi benefisio for di bo kurso di Beibel. Pero no ta semper fásil pa sigui studia Beibel. Tin biaha, bo por asta duda si bo por sigui ku bo kurso di Beibel. Apesar di esei, dikon ta bale la pena pa sigui ku bo kurso di Beibel? Kiko lo por yuda bo hasi esei apesar di difikultat?
1. Dikon ta importante pa bo studia Beibel?
“E palabra di Dios ta bibu i poderoso.” (Hebreonan 4:12) Beibel ta un buki importante, pasobra den dje nos ta haña sa kon Dios ta pensa i kuantu e ta stima nos. Beibel por yuda bo bira realmente sabí. Ademas, Beibel por duna bo speransa pa futuro. Mas importante ainda, Beibel por yuda bo bira amigu di Yehova. Sí, ora bo ta studia Beibel, lo bo por hiba un mihó bida.
2. Dikon ta importante pa bo balorá e bèrdatnan ku tin den Beibel?
E bèrdatnan ku tin den Beibel ta manera tesoro presioso. P’esei, Beibel ta animá nos pa ‘kumpra bèrdat, i no bend’é.’ (Proverbionan 23:23) Ora nos keda kòrda kon balioso e bèrdatnan di Beibel ta, nos lo sigui hasi esfuerso pa studia Beibel asta ora nos enfrentá difikultat.—Lesa Proverbionan 2:4, 5.
3. Kon Yehova por yuda bo sigui studia Beibel?
Yehova ta bo Kreador i Amigu. P’esei, e ke pa bo siña konos’é. Komo ku Yehova ta Todopoderoso, e por duna bo “tantu e deseo komo e poder pa hasi tur loke ta agrad’é.” (Lesa Filipensenan 2:13.) Pues, Yehova por duna bo e motivashon ku bo tin mester pa sigui studia i e por yuda bo apliká loke bo ta siñando. Ademas, Yehova por duna bo forsa pa vense kualke opstákulo òf pa enfrentá kualke oposishon. Pidi Yehova regularmente den orashon pa yuda bo sigui studia Beibel.—1 Tesalonisensenan 5:17.
KIKO MAS NOS POR SIÑA?
Laga nos wak kon bo por sigui ku bo kurso di Beibel apesar di un programa yen òf oposishon. Ademas, wak kon Yehova por yuda bo sigui studia Beibel.
4. Hasi bo kurso di Beibel un prioridat
Tin biaha, bo por ta asina drùk ku ta parse ku bo no tin sufisiente tempu pa studia Beibel. Kiko por yuda bo? Lesa Filipensenan 1:10. Despues, analisá e siguiente preguntanan:
Segun bo, kiko ta “e kosnan mas importante” den bida?
Kon bo por traha tempu pa studia Beibel regularmente?
Si bo yena santu den un hèmber i despues purba di hinka piedra den dje, tur e piedranan lo no por pas den e hèmber
Si bo pone e piedranan promé, lo bo tin espasio pa pone mayoria di e santu. Di mes manera, si bo pone “e kosnan mas importante” na promé lugá den bo bida, lo bo tin tempu pa hasi nan i lo bo tin asta tempu pa hasi otro kos
Ora nos ta studia Beibel, esei ta benefisiá nos pasobra nos ta satisfasé nos nesesidat spiritual, esta, e nesesidat ku nos tin pa siña konosé Dios i ador’é. Lesa Mateo 5:3. Despues, analisá e siguiente pregunta:
Ora nos hasi nos kurso di Beibel un prioridat, kon esei ta benefisiá nos?
5. Sea determiná pa sigui studia apesar di oposishon
Tin biaha, hende por purba di stòp bo di studia Beibel. Wak kiko a pasa ku Francesco. Pasa e VIDIO. Despues, analisá e siguiente preguntanan:
Kiko e amigunan i famia di Francesco a pensa ora el a konta nan loke e tabata siñando for di Beibel?
Ki bendishon Francesco a haña komo ku e tabata determiná pa sigui studia Beibel?
Lesa 2 Timoteo 2:24, 25. Despues, analisá e siguiente preguntanan:
Kiko bo famia- i amigunan ta pensa tokante loke bo ta siñando for di Beibel?
Segun e teksto akí, kon bo mester reakshoná ora otro hende no ta kontentu ku bo ta studiando Beibel? Dikon ta bon pa bo reakshoná asina?
6. Konfia ku Yehova lo yuda bo
Segun ku nos amistat ku Yehova ta bira mas fuerte, nos lo haña mas gana di hasi loke ta agrad’é. Tòg tin biaha por ta difísil pa nos hasi sierto kambio i biba manera Yehova ke. Si bo sa sinti asina, no entregá. Yehova siguramente lo yuda bo. Pasa e VIDIO. Despues, analisá e siguiente preguntanan:
Segun loke nos a wak den e vidio, ki kambio Jim a hasi pa e por a agradá Yehova?
Kiko bo a gusta mas di Jim su ehèmpel?
Lesa Hebreonan 11:6. Despues, analisá e siguiente preguntanan:
Kiko Yehova lo hasi pa hende ku “ta hasi esfuerso pa busk’é,” esta, hende ku ta hasi tur nan bèst pa konosé Yehova i hasi loke ta agrad’é?
Kon bo ta kere Yehova ta sinti ora e wak ku bo ta hasi esfuerso pa sigui studia Beibel?
SI UN HENDE PUNTRA: “Dikon bo ta studia Beibel?”
Kiko lo bo kontestá?
RESÚMEN
Kisas no ta semper fásil pa sigui studia Beibel, pero bo kurso di Beibel por yuda bo disfrutá di bida pa semper. Konfia den Yehova i lo e bendishoná bo.
Repaso
Dikon bo ta haña e bèrdatnan ku tin den Beibel presioso?
Kon bo por demostrá ku bo kurso di Beibel ta hopi importante pa bo?
Dikon bo tin ku pidi Yehova pa yuda bo sigui studia Beibel?
MAS INFORMASHON INTERESANTE
Wak kuater método ku a yuda hopi hende usa nan tempu na un manera sabí.
“Hasi Bon Uso di Bo Tempu” (Spièrta! di febrüari 2014, na spañó)
Un señora tabata ke sirbi Dios, pero su kasá no tabata komprondé dikon e tabata hasi asina tantu esfuerso pa sirbi Dios. Wak kon Yehova a yuda e señora akí.
Wak ki bon efekto un esposa su determinashon pa sirbi Dios tabatin riba su esposo.
Algun hende ta bisa ku Testigunan di Yehova ta kibra famia. Pero, esei ta bèrdat?
“Testigunan di Yehova Ta Kibra Famia òf Ta Uni Famia?” (artíkulo riba jw.org)