Logra Evita e Laz di Golosidad

“Esnan cu ta keda determiná di ser ricu ta cai den tentacion i laz.”—1 TIMOTEO 6:9.

1. Pakico nos mester preocupános tocante laz?

E PALABRA “laz” por hacíbo corda un jagdor cu ta pone canaster pa coge un víctima inocente. Pero, Dios ta haci claro cu e laz mas peligroso pa nos tá, no un trampa literal, sino loke por enlazános spiritualmente of moralmente. E Diabel ta un experto den ponimento di tal laz.—2 Corintio 2:11; 2 Timoteo 2:24-26.

2. (a) Con Jehova Dios ta yúdanos evita laz peligroso? (b) Cua clase special di laz ta ser halá na nos atencion awor?

² Jehova Dios ta yúdanos identificando algun dje cantidad i variedad di laz cu Satanás tin. Por ehempel, Dios ta dúnanos e spiertamento di cu nos lip, of boca, por ta un laz si nos ta papia imprudentemente, of lihé, tocante loke nos no mag. (Proverbio 18:7; 20:25) Orguyo por ta un laz, mescos cu sigimento den compañía di hende cu sa rabia lihé. (Proverbio 22:24, 25; 29:25) Pero, láganos considera un otro laz: “Esnan cu ta keda determiná di ser ricu ta cai den tentacion i laz i hopi deseo irrazonabel i perhudicial, cu ta tira hende den destruccion i ruina.” (1 Timoteo 6:9) Loke ta scondí den laz of ta e base di dje por ta identificá cu e palabra “golosidad.” Aunque hopi bez golosidad ta ser manifestá den un determinacion di ser ricu, realmente golosidad ta un laz cu hopi aparencia.

Jehova ta advertínos di peliger

3, 4. Historia humano di antigua ta contene cua les tocante golosidad?

³ Básicamente, golosidad ta un deseo desenfrená of extremo pa haya mas, sea cu ta placa, propiedad, poder, sexo, of otro cos. Nos no ta e promé hende pa ser den peliger di laz di golosidad. Ayá den e hofi di Eden, golosidad a enlazá Eva, anto Adam. E casá di Eva cu tabatin mas experencia den bida cu Eva, a recibi instruccion personal di Jehova. Dios a percura un habitacion paradísico pa nan. Nan por a disfruta di un abundancia di bon cuminda i na variedad, cu a crece for di tera incontaminá. Nan por a spera di haya yiu perfecto, cu locual nan por a biba i sirbi Dios pa semper. (Génesis 1:27-31; 2:15) Esei no ta parce suficiente pa satisface cualkier hende?

⁴ Sin embargo, aunque hende tin basta, esei no ta preveni golosidad di bira un laz. Loke a enlazá Eva tabata e prospecto di bira manera Dios, tene mas independencia i establece su mes ley. Ta parce cu Adam a deseá e compañía continuo di su bonita esposa, cueste loke cueste. Siendo cu golosidad a enlazá asta hende perfecto, bo por comprende pakico golosidad por ta un peliger pa nos.

5. Ta ki importante pa nos evita e laz di golosidad?

⁵ Nos mester vigila contra e trampa di golosidad pasobra apóstol Pablo a advertínos: “Boso no sa cu hende inhusto lo no hereda e reino di Dios? No sea gañá. Ni fornicador, ni idólatra, ni adúltero, ni homber wardá pa propósito innatural, ni homber cu ta drumi cu homber, ni ladrón, ni haragán . . . lo hereda e reino di Dios.” (1 Corintio 6:9, 10) Pablo també a bísanos: “Ni sikiera menciona fornicacion ni impureza di ningun sorto ni golosidad den boso.” (Efesio 5:3) P’sei golosidad no mester tá ni sikiera un tópico di conbersacion afin di satisface nos carni imperfecto.

6, 7. (a) Cua ehempel bíblico ta enfatizá ki fuerte golosidad por tá? (b) Pakico ehempel asina mester ta un advertencia pa nos?

⁶ Jehova a inspirá hopi skirbimento di ehempel pa alertános ne peliger di golosidad. Corda e golosidad di Acán. Dios a bisa cu Jericó tabatin cu ser destruí, pero e oro, plata, coper, i heru di dje tabata pa Su tesorería. Kizás na principio Acán tabatin intencion di sigi tal mandamento, pero golosidad a enlazé. Asina cu el a yega Jericó, tabata como si fuera un biahe pa haci compras unda el a mira ganga increíbel, incluyendo un bistí bonita cu a parce net pe. Cogiendo oro i plata di balor di miles di florín, e por a pensa, ‘Ki un tesoro! Por nada mes, casi manera hortamento.’ Realmente, esei tabata hortamento! Codiciando loke e mester a destruí of entregá na autoridad, el a horta foi Dios, i esei a costa Acán su bida. (Hosué 6:17-19; 7:20-26) Considera, també, ehempel di Guehazi i Hudas Iscariote.—2 Rey 5:8-27; Juan 6:64; 12:2-6.

⁷ Nos no mag pasa por halto dje echo di cu e tres hende mencioná anteriormente no tabata hende pagano cu no a conoce e ley di Jehova. Mas bien, nan tabata den un relacion di dedicacion na Dios. Nan tur a mira milagro cu mester a impresioná riba nan e poder di Dios i e importancia di retene su fabor. No obstante, e laz di golosidad a causa nan caimento. Nos també por daña nos relacion cu Dios si nos ta laga golosidad di cualkier forma enlazános. Ki tipo of forma di golosidad por ta specialmente peligroso pa nos?

Enlazá pa golosidad pa riqueza of propiedad

8. E Bijbel ta duna cua advertencia tocante riqueza?

⁸ Casi tur hende cristian a tende spiertamento claro dje Bijbel contra e desaroyo di amor pa riqueza, un deseo fuerte pé. Pakico no repasa algun di eseinan, locual ta hayá den Mateo 6:24-33; Lucas 12:13-21; i 1 Timoteo 6:9, 10? Aunque bo por kere cu bo ta acepta i ta sigi tal conseho, no ta posibel cu Acán, Guehazi, i Hudas lo a bisa cu nan també tabata di acuerdo cuné? Claramente, nos tin cu bai mas ayá cu simplemente un acuerdo mental. Nos tin cu percura pe laz di golosidad pa riqueza of propiedad no afecta nos bida diario.

9. Pakico nos mester examina nos actitud en cuanto hacimento di compras?

⁹ Den nos bida diario, hopi bez nos tin cu haci compras di cuminda, paña, i artículo pe cas. (Génesis 42:1-3; 2 Rey 12:11, 12; Proverbio 31:14, 16; Lucas 9:13; 17:28; 22:36) Pero e mundo di comercio ta estimula deseo pa mas cos i cos mas nobo. Hopi propaganda comercial cu ta yena curant, revista, i pantaya di television ta esfuerzo disfrazá pa instiga golosidad. Tal esfuerzo por existi també den tienda i pacús cu tin un cantidad di blusa, bachi, shimí, i sweater, un cantidad di zapato nobo, aparato electrónico, i cámara. Ta prudente pa hende cristian puntra nan mes, ‘Hacimento di compras ta sobresali of ta e placer principal den mi bida?’ ‘Mi realmente tin mester di artículo nobo cu mi ta mira, of e mundo di comercio simplemente ta planta simía di golosidad den mi?’—1 Juan 2:16.

10. Cua trampa di golosidad ta specialmente un peliger pa hende homber?

¹⁰ Si hacimento di compras ta un trampa común pa hende muher, ganamento di mas placa ta un trampa pa un cantidad incontable di homber. Jesús a ilustra e trampa usando un homber ricu cu tabatin un bon entrada pero a keda determiná di ‘kibra mangazina di dje i traha otronan mas grandi pa warda tur su grano i otro cosecha.’ Jesús no a laga duda en cuanto e peliger: “Tene boso wowo habrí i warda boso di tur sorto di cudishi” of golosidad. (Lucas 12:15-21) Sea cu nos ta ricu of no, nos mester obedece e conseho ei.

11. Con hende cristian por cai den trampa di golosidad pa mas placa?

¹¹ Golosidad pa mas placa, of pa loke placa por cumpra, hopi bez ta cultivá bao di disfraz. E por ta presentá como un idea pa bira ricu lihé, kizás un oportunidad cu ta presenta un solo biaha den bo bida pa haya siguridad financiero den inversion peligroso. Of tal bez hende ta tentá pa gana placa den trámite cuestionable of ilegal. Tal deseo codicioso por bira irresistible, un trampa. (Salmo 62:10; Proverbio 11:1; 20:10) Algun hende den e congregacion cristian a cuminza negoshi cu e speranza cu rumanan cu ta confiánan lo ser nan cliente principal. Si nan meta no tabata pa simplemente percura un producto necesario of un sirbishi ‘haciendo trabao duro, haciendo cu nan man loke ta bon trabao,’ sino nan meta tabata pa gana placa lihé riba custía di otro hende cristian, anto nan ta impulsá pa golosidad. (Efesio 4:28; Proverbio 20:21; 31:17-19, 24; 2 Tesalonicense 3:8-12) Golosidad pa placa a hiba algun hende na wega di placa den rifa, cinco i seis, of lotería. Otronan, ignorando compasion i sano huicio, a lanta caso di daño i perhuicio lihé cu e speranza di recibi hopi placa of reglamento di cuenta.

12. Pakico nos sa cu nos por vence golosidad pa riqueza?

¹² Lo anterior ta sector den locual examinacion propio ta apropiado di manera cu nos por mira onradamente si golosidad por ta obrando den nos. Aunque ta asina, nos por cambia. Corda cu Zaqueo a cambia. (Lucas 19:1-10) Si bo ta haya cu golosidad pa riqueza of propiedad ta un problema, bo mester keda tanto determiná como Zaqueo pa scapa for dje trampa.—Jeremías 17:9.

Golosidad den otro aspecto di bida

13. Salmo 10:18 ta hala nos atencion na cua otro trampa di golosidad?

¹³ Algun hende ta haya cu ta mas fácil pa mira e peliger di golosidad pa placa of propiedad cu den otro manera cu e ta presenta. Un diccionario di griego ta bisa cu e grupo di palabra traducí “golosidad” of “cudishi” tin e sentido di “‘deseá mas,’ cu un referencia na poder etc. i també na propiedad.” Sí, nos por cai den trampa di e deseo golós di eherce poder riba otro hende, kizás pa hácinan tembla bao di nos autoridad.—Salmo 10:18.

14. Den ki sector un deseo pa poder a causa daño?

¹⁴ Desde e principio hende imperfecto a gusta tene poder riba otronan. Dios a mira di antemano cu un resultado tristu di picá humano lo ta cu hopi esposo lo “domina” nan esposa. (Génesis 3:16) Sin embargo, tal fayo a extende mas ayá cu matrimonio. Miles di aña despues, un skirbidor bíblico a bisa cu “hende a domina hende pa nan perhuicio.” (Eclesiastés 8:9) Probablemente bo sa ki cierto esei tá den asunto político i militar, pero por ta cierto cu den nos mes bida nos ta haci esfuerzo pa obtene mas poder of control personal?

15, 16. Di ki manera hende cristian por cai den trampa di deseo pa mas poder? (Filipense 2:3)

¹⁵ Nos tur ta relacioná cu otro hende—den nos famía inmediato of mas leu, den nos trabao seglar of na scol, den nos amigonan, i den e congregacion. Por ta cu na ocasion, of frecuentemente, nos tin un boz den loke lo ser hací, i també den con pa hacié i na ki tempo. Esei di su mes no ta incorrecto of malu. Pero, nos ta gusta demasiado pa usa cualkier autoridad cu nos por tin? Por ta cu nos ta gusta tuma e decision final i ta deseá esei mas i mas? Hopi bez gerente i hefe di mundo ta demonstra tal actitud scogiendo hende cu ta dal un amén na tur cos, cu nunca ta ofrece alternativa ni cu ta reta e golosidad pa poder di nan hefe.

¹⁶ Esei ta un trampa pa evita den nos tratamento cu otro hende cristian. Jesús a bisa: “Boso sa cu gobernante dje nacionan ta dominánan i hende grandi ta eherce autoridad riba nan. No ta asina den boso; ma ken cu kier bira grandi den boso mester ta boso sirbidor.” (Mateo 20:25, 26) Tal humildad mester ta manifestá ora anciano cristian ta trata un cu otro, cu sirbidor ministerial, i cu e tao. Por ehempel, un superintendente presidente no ta manifesta un deseo pa poder ora e ta consulta cu otro anciano solamente riba asunto menor pero e mes ta tuma tur decision clave? E realmente ta dispuesto pa delega trabao? Problema por resultá si un sirbidor ministerial cu ta dirigi un reunion pa sirbishi di feld ta irrazonablemente exigente den arreglo cu e ta haci, i asta ta traha regla.—1 Corintio 4:21; 9:18; 2 Corintio 10:8; 13:10; 1 Tesalonicense 2:6, 7.

17. Pakico ta apropiado pa considera cuminda den un consideracion dje laz di golosidad?

¹⁷ Cuminda ta un otro categoría den locual hopi hende ta enlazá pa golosidad. Ta claro cu ta natural pa hende gusta come i bebe; e Bijbel ta mencioná esei cu aprobacion. (Eclesiastés 5:18) Pero, no ta straño pa un deseo di come i bebe aumenta durante un periodo di tempo, extendiendo hopi mas ayá cu loke ta razonablemente gozoso i suficiente. Si esei no ta un sector apropiado pa preocupacion di parti di sirbidor di Dios, pakico e Palabra di Jehova ta bisa den Proverbio 23:20: “No yega di ser hunto cu esnan cu ta bebe biña di mas, hunto cu esnan cu ta comedor glotón di carni”? Pero, con nos por evita e trampa?

18. Cua examinacion propio nos por haci tocante cuminda i bebida?

¹⁸ Dios no ta sugeri pa su pueblo existi sigiendo un dieta severo. (Eclesiastés 2:24, 25) Ni tampoco e no ta aproba di costumber di haci cuminda i bebida un parti dominante di nos conbersacion i planificacion. Nos por puntra nos mes, ‘Mi ta bira demasiado entusiasmá hopi bez ora mi ta papia tocante un cuminda cu mi a goza of ta planeá pa goza?’ ‘Tur ora mi ta papia tocante cuminda i bebida den mi conbersacion?’ Un otro indicacion por ta e manera cu nos ta reacciona ora nos ta come loke nos no a prepara of no a paga pe, kizás ora nos ta invitado den cas di otro hende of ora cuminda ta disponibel na un asamblea cristian. Por ta cu ne ocasion nos ta keda incliná di come hopi mas cu nos costumber? Nos ta corda cu Esau a laga cuminda bira indebidamente importante, pa su perhuicio eterno.—Hebreo 12:16.

19. Con golosidad por ta un problema en cuanto placer sexual?

¹⁹ Pablo a dúnanos discernimiento di un otro laz: “Ni sikiera menciona fornicacion ni impureza di ningun sorto ni golosidad den boso, tal como ta propio pa hende santo.” (Efesio 4:17-19; 5:3) Realmente, golosidad por desaroya pa placer sexual. Naturalmente, tal gozo tin un expresion apropiado den enlace matrimonial. Amor íntimo asociá cu tal placer ta hunga un papel yudando esposo i esposa keda deboto un na otro durante hopi aña di matrimonio. Sin embargo, poco hende ta nenga cu e mundo djawe ta duna énfasis extremo na sexo, presentando como normal loke realmente ta un refleccion dje golosidad cu Pablo a mencioná. Ta specialmente fácil pa hende adoptá tal punto di bista incorrecto di placer sexual, hende cu ta gusta mira e inmoralidad i desnudez cu ta común awe den hopi película, video, i revista, i també den lugar di diverticion.

20. Con hende cristian por mustra cu nan ta alerto ne peliger di golosidad den asunto sexual?

²⁰ E cuenta dje picá di David cu Bat-seba ta mustra cu un sirbidor di Dios por cai den trampa di golosidad sexual. Aunque David tabatin e libertad di disfruta di placer den su mes matrimonio, el a laga su deseo sexual incorrecto crece. Mirando ki atractivo esposa di Urías tabata, David a duna rienda liber ne idea—i ne echo—di haya placer sexual incorrecto cu Bat-seba. (2 Samuel 11:2-4; Santiago 1:14, 15) Siguramente nos mester evita tal forma di golosidad. Asta den matrimonio, ta apropiado pa evita golosidad. Esei ta inclui evita costumber sexual extremo. Esposo determiná di evita golosidad den tal sector ta berdaderamente interesá den nan esposa, di manera cu cualkier decision cu nan dos a haci tocante planificacion di famía lo no califica e placer dje esposo como mas importante cu e salud actual i di futuro di su esposa.—Filipense 2:4.

Sigi keda determiná di evitá golosidad

21. Pakico nos consideracion di golosidad no mester desanimános?

²¹ Jehova Dios no ta duna aviso of advertencia debí na un falta di confianza. E sa cu sirbidor deboto di dje kier sirbié lealmente, i e tin e confianza di cu e mayoría grandi di nan lo sigi haci esei. E por bisa mescos tocante su pueblo en conhunto loke el a bisa tocante Job den su papiamento cu Satanás: “Bo a fiha bo curazón riba mi sirbidor Job, cu no tin ningun manera dje riba tera, un homber sin culpa i recto, temeroso di Dios i apartá for di maldad?” (Job 1:8) Nos Tata celestial, amoroso i confiá, ta alertános na trampa peligroso, tal como esnan relacioná cu tur forma di golosidad, pasobra Dios kier pa nos sigi sin contaminacion i fiel na dje.

22. Kico nos mester haci si nos estudio a revela un forma di peliger of debilidad personal?

²² Cada un di nos a hereda un tendencia di ser golós, i por a desaroya esei mas bao di influencia dje mundo malbado. Kico lo bo haci si bo a mira un forma di debilidad durante nos estudio di golosidad—relacioná cu riqueza, propiedad, poder i autoridad, cuminda, of placer sexual? Anto tuma na pecho e conseho di Jesús: “Si na cualkier tempo bo man ta hacíbo trompica, corté afó; ta mihor pa bo drenta den bida mancá en bez di cu dos man bai den Gehena.” (Marco 9:43) Haci cualkier cambio necesario den bo actitud of interés. Evita e laz fatal di golosidad. Pues, cu e ayudo di Dios, bo por “drenta den bida.”

Kico mi a siña?

◻ Pakico nos mester ta preocupa tocante e laz di golosidad?

◻ Di ki manera golosidad pa riqueza i propiedad por enlazános?

◻ Di ki manera golosidad den otro sector di nos bida por presenta berdadero peliger?

◻ Nos mester tene cua actitud tocante cualkier debilidad cu nos tin en cuanto golosidad?