Bo Tabata Sa?

Tabata na su lugá pa Hesus yama komersiante ku tabata bende bestia den e tèmpel di Herúsalèm “ladron”?

E RELATO di e Evangelio di Mateo ta bisa: “Hesus a drenta den tèmpel i a kore ku tur hende ku tabata bende i kumpra kos den tèmpel, i el a bòltu mesa di e kambiadónan di plaka i banki di esnan ku tabata bende palomba. I el a bisa nan: ‘Ta pará skirbí: “Mi kas lo ser yamá un kas di orashon,” ma boso ta hasié un kueba di ladron.’”—Mat. 21:12, 13.

Registronan di historia hudiu ta mustra ku komersiantenan di tèmpel tabata probechá di nan klientenan kobrando nan preisnan eksorbitante. Por ehèmpel, Mishna (Keritot 1:7) ta menshoná un okashon durante promé siglo ora preis di dos pichon pa ofrenda a subi te na un denario di oro. Esei kisas tabata loke un obrero tabata gana pa 25 dia di trabou. Bou di e Lei di Moises, hende pober por a ofresé un pichon òf tòrteldùif, pero asta e preis di e paranan ei a subi asina tantu ku nan no por a kumpra nan. (Lev. 1:14; 5:7; 12:6-8) E situashon ei a pone Rabi Simeon ben Gamaliel rabia asina tantu ku el a baha e kantidat di ofrendanan obligatorio, anto mesora e preis pa dos pichon a baha bira shen biaha ménos.

En bista di loke a ser menshoná anteriormente, tabata na su lugá pa Hesus yama e komersiantenan den tèmpel “ladron,” pasobra nan tabata golos i tabata probechá di hende.