Cumplimento di Profecía
ORA disípel di Cristo Jesús a puntra tocante e siñal di su presencia invisibel den poder di Reino, Jesús a profetiza di un “aumento di maldad.” (Mateo 24:3, 12) E profecía ta ser cumplí den nos tempo?
Di tur manera! E buki na inglés Naciones Unidas i control di crimen, cu NU a publica na October di 1991, ta bisa: “Crimen serio ta un problema excepcionalmente severo pe mayor parti di nacion di mundo. Crimen nacional ta fuera di control den casi tur país individual i crimen internacional a aumenta hopi mas ayá cu e alcance dje comunidad internacional. . . . Crimen cu grupo criminal ta organizá a aumenta te na proporcion alarmante, cu consecuencia specialmente serio den término di violencia fisical, intimidacion i corrupcion di funcionario público. Terrorismo a mata diez di miles di víctima inocente. E tráfico criminal di droga cu ta causa adiccion a bira un tragedia mundial. Destruccion criminal i descuidadoso di naturaleza a adopta forma i a alcanza dimension asina alarmante cu e ta ser calificá como un crimen contra e mundo mes.”
Asalto: Un aumento di 150 asalto pa cada 100.000 hende na 1970 te casi 400 pa cada 100.000 hende na 1990.
Hortamento: Un aumento for di un poco mas cu 1.000 pa cada 100.000 hende na 1970 te na 3.500 pa cada 100.000 hende na 1990.
Asesinato intencional: Den país desaroyando, un aumento for di 1 te 2,5 pa cada 100.000 hende entre 1975 i 1985. Den país desaroyá e aumento durante e mesun tempo tabata for di menos cu 3 te na mas cu 3,5.
Crimen relacioná cu droga: E buki ta bisa: “Cartel principal di narcotráfico literalmente tin mas placa i arma cu tur gobierno di nacion chikito, i te awor a logra frustra esfuerzo di país industrializá pa frena nan accion i pone e ley na vigor.”
Grado total di crimen: Nan ta spera pe bira dobel for di 4.000 pa cada 100.000 hende na 1985 te na casi 8.000 na aña 2000.
E aumento mundial di crimen ta un solo rasgo dje profecía di Jesús cu ta indica cu nos ta biba den e “conclusion dje sistema di cosnan.” (Mateo 24:3) Jesús a bisa: “Ora boso mira e cosnan ei sosode, boso sa cu e reino di Dios ta cerca.”—Lucas 21:31.