“E bon notisia di e reino . . . ”​—MATEO 24:14, BPK.

DEN su famoso Sermon Riba Seru, Hesus a duna su siguidónan un ehèmpel kon pa hasi orashon. Den e orashon tin e petishon akí: “Ku bo reino bin.” Miónes di hende a memoris’é i ripitié hopi bes. Un ensiklopedia a bisa ku e ta “e orashon di mas importante ku tur kristian ta usa den nan adorashon di tur dia.” Sinembargo, hopi di esnan ku ta ripitié no sa kiko e Reino ta ni kiko lo e hasi ora e bini.​—Mateo 6:​9, 10.

Esei no ta nada straño, ya ku e splikashon ku lidernan di kristiandat ta duna enkuanto e Reino ta kontradiktorio, konfuso i kompliká. Un di nan a skirbi ku e Reino di Dios ta “algu sobrenatural, . . . un laso íntimo ku e Dios bibu . . .  i un eksperensia ku Dios den kua hende hòmber i muhé ta haña salbashon.” Un otro a bisa ku e evangelio di Reino ta “reglanan di iglesia.” I e Catisashi di Iglesia Catolico a bisa: “E Reino di Dios ta husticia y paz y goso den Spirito Santo.”

Wak awor un splikashon hopi mas komprendibel ku tin na página 2 di e Toren di Vigilansia akí. E ta bisa: “E Reino di Dios, ku ta un berdadero gobièrnu den shelu, pronto lo kaba ku tur maldat i hasi mundu un paradeis.” Laga nos analisá kiko ta e base bíbliko pa e splikashon ei.

Futuro Gobernantenan di Henter e Tera

Un reino ta un gobièrnu ku tin un rei. Despues di Hesukristu su resurekshon, el a bira Rei di e Reino di Dios. Den un vishon ku profeta Daniel a haña, el a deskribí Hesus su koronashon den shelu. Daniel a skirbi: “Mi a sigui wak den e vishon di anochi, i mira, ku e nubianan di shelu tabata bin unu manera un yu di hende [Hesus], i el a bin serka e Ansiano di Dianan [Yehova Dios] i a wòrdu presentá Su dilanti. I na dje a wòrdu duná dominio, gloria i un reino, pa tur pueblo, nashon i hende di tur idioma por sirbié. Su dominio ta un dominio eterno ku lo no pasa nunka, i su reino ta un ku lo no wòrdu destruí.”​—Daniel 7:​13, 14.

E buki di Daniel ta papia tambe di e echo ku Dios lo establesé e Reino firmemente, ku e Reino lo pone un fin na tur gobièrnu humano i ku nunka ningun hende lo tumb’é. Daniel kapítulo 2 ta papia di un soño ku e rei di Babilonia a haña bou di inspirashon. Den e soño el a mira un estatua grandi ku ta representá podernan mundial ku lo sigui un tras di otro. Profeta Daniel a interpretá e soño ei. El a skirbi: “Den e último dianan, . . . e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí, ma e mes lo dura pa semper.”​—Daniel 2:​28, 44.

Hesus komo e Rei di e Reino di Dios no ta goberná su so. Durante su ministerio riba tera, el a sigurá su fiel apòstelnan ku tantu nan komo otro sirbidónan fiel lo haña resurekshon pa biba den shelu i sinta riba trononan. (Lukas 22:​28-30) Hesus no tabata papia di trononan literal, pasobra manera el a indiká, e Reino lo ta den shelu. Beibel ta bisa ku esnan ku lo goberná huntu kuné ta “for di tur tribu i lenga i pueblo i nashon.” Nan lo ta un reino i saserdotenan pa nos Dios, i nan lo goberná e tera.​—Revelashon 5:9; 20:​4, 6.

Dikon Nos Por Bisa Ku e Notisia di Reino Ta Bon

Manera bo a ripará, Kristu Hesus lo goberná riba “tur pueblo, nashon i hende di tur idioma” i esnan ku lo reina huntu kuné lo goberná e tera. Ken lo ta siudadanonan di e Reino akí? Esnan ku ta reakshoná faborablemente na predikashon di e bon notisia awe. I tambe esnan ku haña resurekshon pa biba riba tera i ku tin speransa di biba pa semper.

Na un manera bon kla Beibel ta deskribí e bendishonnan ku hende lo bai disfrutá di dje bou di e Reino. At’akí algun di nan:

“E ta hasi gueranan stòp te na e fin di tera; e ta kibra bog i ta kòrta lansa na dos; e ta kima e garoshinan ku kandela.”​—Salmo 46:9.

“Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome.”​—Isaias 65:​21, 22.

“[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”​—Revelashon 21:​3, 4.

“E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria.”​—Isaias 35:​5, 6.

“E ora lo yega den kual tur ku ta den graf lo tende [Hesus] su bos, i lo sali; esnan ku a hasi bon, pa un resurekshon di bida.”​—Juan 5:​28, 29.

“E humildenan lo heredá e tera, i lo deleitá nan mes den pas abundante.”​—Salmo 37:11.

Esaki sí ta bon notisia! Ademas, tur e profesianan di Beibel ku a kumpli kaba ta mustra ku e tempu ta serka pa e Reino hustu kuminsá goberná henter e tera.

“E bon notisia . . . ”​—MATEO 24:14, BPK.

KRISTIANNAN tin ku prediká “e bon notisia di e reino,” splikando otro hende ku e Reino lo bai goberná henter e tera ku hustisia. Otro ekspreshon ku Beibel ta usa pa e “bon notisia” ta ‘e bon nobo di salbashon’ (Salmo 96:2); “e bon notisia di Dios” (Romanonan 15:16, BPK) i “e bon notisia tokante Hesu-Kristu.”​—Marko 1:1, BPK.

E bon notisia ta abarká tur e bèrdatnan ku Hesus a papia di dje i ku su disipelnan a skirbi. Promé ku Hesus a subi na shelu, el a bisa su siguidónan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:​19, 20) Pues, un berdadero kristian su trabou no ta solamente pa informá otro hende tokante e Reino, sino e mester hasi disipel tambe.

Kon ta bai ku iglesianan den e aspekto akí? Hopi di nan no ta komprondé kiko e Reino ta i p’esei nan no por siña otro hende kiko e ta presis. En bes di esei, nan ta papia riba pordon di piká i fe den Hesus djis pa pone hende sinti bon. Ademas, pa nan haña mas miembro, nan ta purba mehorá kalidat di bida di hende òf traha hospital, skol i kas pa hende pober. Loke nan ta hasi por oumentá e kantidat di miembro, pero esei no ta nifiká ku e miembronan ei ta bira kristiannan berdadero ku ta purba sinseramente di biba na armonia ku Hesus su siñansa.

Un teólogo a skirbi: “Mayoria di eksperto i lider den e sírkulo kristian lo rekonosé ku nos tin ku hasi disipel òf alumno di Hesus i siña nan pa hasi tur loke Hesus a bisa. . . . Al fin i al kabo, Hesus su instrukshonnan tokante e asuntu akí ta masha kla. Simplemente nos no ta hasi loke el a bisa. Nos no ta hasi sufisiente esfuerso pa kumpli ku esei. I aparentemente nos no sa kon pa hasié.”

Asina tambe, un enkuesta bou di katólikonan na Merka a mustra ku 95 porshento ta di akuerdo ku predikashon di e bon notisia ta parti di nan adorashon. Pero tòg, kasi tur a opiná ku e mihó manera pa hasi esaki no ta dor di papia tokante dje, sino dor di biba di tal manera ku nan por ta un ehèmpel pa otro hende. Un persona ku a partisipá den e enkuesta a bisa: “Pa evangelisá bo no tin nodi papia. Sino mas bien, bo mester ta un ehèmpel bibu di e Bon Notisia.” E revista U.S. Catholic, ku a hasi e enkuesta, a bisa ku hopi katóliko no ta papia ku otro hende tokante nan kreensia debí na “e mal imágen ku iglesia a haña pa motibu di e eskándalonan di abusu seksual ku a sali na kla resientemente i siñansanan problemátiko di iglesia.”

Na un otro pais, un obispu metodista a lamentá ku su iglesianan ta dividí i konfundí, nan no tin kurashi pa kumpli ku nan mishon i mayoria di miembro ta sigui e mesun normanan moral ku tur otro hende. Frustrá el a puntra: “Ken ta esnan ku ta digno pa duna testimonio di e evangelio di e Reino i ken ta hasiendo esei?”

E obispu no a kontestá e pregunta ei. Pero tin un kontesta sí. E kontesta ta den e siguiente artíkulo.

[Komentario na página 6]

E bon notisia ta tokante e Reino di Dios i salbashon pa medio di fe den Hesukristu