Jehova Ta Prepará e Caminda

“E bon nobo aki dje reino lo ser predicá.”—MATEO 24:14.

1. Kico a logra cu e trabou di predicá den tantu promé siglo como den siglo 20?

DEBI cu Jehova ta un Dios di amor, su boluntad ta pa “tur clase di hende ser salbá i yega na un conocimentu exacto dje berdad.” (1 Timoteo 2:4) Esaki a exigí un campaña internacional di predicá i siña otro hende. Den e promé siglo, e actividad di predicá aki a haci e congregacion cristian “un pilar i apoyo dje berdad.” (1 Timoteo 3:15) Despues a bini un periodo largu di apostasia den cua e lus dje berdad a casi paga. Den tempu recien, durante “e tempu di fin,” “berdadero conocimentu” a bira abundante atrobe, treciendo un speransa bíblico di salbacion eterno pa miyones di hende.—Daniel 12:4.

2. Kico Jehova a haci en coneccion cu e actividad di predicá?

² Apesar dje esfuersonan implacabel di Satanas pa frustra e propósito di Dios, e actividad di predicá tantu den promé siglo como den siglo 20 tabata sumamente exitoso. E ta pone nos corda e profecia di Isaías. En coneccion cu e regreso dje exiliadonan hudiu na Huda den siglo 6 P.E.C., Isaías a skirbi: “Laga lanta tur vaye, i baha tur ceru i ceritu. I e tereno yen di bulto tin cu bira tera plat, i e tereno desigual un vaye-yanura.” (Isaías 40:4) Tambe Jehova a prepará i plat e caminda p’e gran campañanan di predicá di tantu promé siglo como di siglo 20.

3. Den ki maneranan Jehova por realisá su propósitonan?

³ Esaki no ta nificá cu Jehova a influenciá directamente tur desaroyo riba tera pa por promové e predicacion dje bon nobo; ni e no ta nificá cu Jehova a ehercé su abilidad pa premirá futuro pa sa en detaye tur loke lo a sosodé. Ta berdad cu e por premirá futuro sucesonan i forma nan. (Isaías 46:9-11) Pero tambe e por reaccioná riba desaroyonan segun cu nan ta tuma lugá. Mescos cu un wardadó di carné experenciá cu sa con pa dirigí i con pa protehá su tou, Jehova ta guia su pueblo. E ta guia nan na salbacion dor di protehá nan spiritualidad i impulsá nan pa probechá di situacion i desaroyonan cu ta promové e predicacion exitoso dje bon nobo rond mundu.—Salmo 23:1-4.

Un Asignacion Difícil

4, 5. Pakico e predicacion dje bon nobo tabata un asignacion difícil?

⁴ Mescos cu construccion dje arca den e tempu di Noe, e trabou di predicá e Reino tabata un proyecto enorme, tantu den e promé siglo como den e tempu actual. E tarea pa alcansá tur hende cu cualkier mensahe ta basta difícil, pero e tarea aki tabata un desafio special. Den e promé siglo, e disipelnan tabata relativamente poco. A ehecutá nan Lider Jesus como un supuesto rebelde contra autoridad. E religion hudiu tabata bon establecí. Den Jerusalem tabatin un tempel magnífico. Religionnan no-hudiu den e área mediteráneo tambe tabata bon establecí, cu hopi tempel i sacerdocio. Di igual manera, ora “e tempu di fin” a cuminsá na 1914, e cristiannan ungí tabata poco, i siguidónan di otro religion cu a pretendé di sirbi Dios tabata hopi.—Daniel 12:9.

⁵ Jesus a spierta su disipelnan cu nan lo ser persiguí. El a bisa: “Hende lo entregá boso na tribulacion i lo mata boso, i boso lo ta obheto di odio di parti di tur nacion pa causa di mi nomber.” (Mateo 24:9) Ademas dje problemanan ei, foral den “e último dianan,” cristiannan lo haña nan mes meimei di “tempu crítico, duru pa trata cuné.” (2 Timoteo 3:1) E magnitud dje trabou, e echo cu persecucion ta bini sigur i e tempu trabahoso a haci e trabou di predicá difícil i un desafio. Un fe grandi ta necesario.

6. Ki garantia di éxito Jehova a duna su pueblo?

⁶ Aunke Jehova tabata sa cu lo a bini tempu difícil, e tabata sa tambe cu nada lo por a para e trabou. Un profecia bon conocí cu a cumpli remarcablemente tantu den promé siglo como den siglo 20, a predicí e éxito dje trabou aki: “E bon nobo aki dje reino lo ser predicá den tur e tera habitá.”—Mateo 24:14.

7. Con extenso e actividad di predicá tabata den promé siglo?

⁷ Yen di fe i spiritu santu, Dios su sirbidónan den promé siglo a sali padilanti pa cumpli cu nan comision. Dor cu Jehova a resultá di ta cu nan, nan a logra hopi mas éxito di loke nan por a spera. P’e tempu cu Pablo a skirbi e colosensenan, rond di 27 aña despues dje morto di Jesus, e por a bisa cu e bon nobo a ser “predicá den tur creacion cu ta bou di shelu.” (Colosensenan 1:23) Na comparacion, yegando na fin di siglo 20, e bon nobo ta ser predicá den 233 pais.

8. Bou di ki clase di circunstancia hopi hende a aceptá e bon nobo? Duna algun ehempel.

⁸ Miyones di hende a aceptá e bon nobo den décadanan recien. Hopi hende a haci esei bou di circunstancianan desfaborabel, esta, durante periodonan di guera, prohibicion i persecucion intenso. Esei tabata e caso tambe den e promé siglo. Na un ocasion durante promé siglo, nan a suta Pablo i Sílas cruelmente cu bara i a tira nan den prizon. Ki un situacion difícil pa haci disipel! Tog, Jehova a usa e situacion pa haci net esei. Pablo i Sílas a sali liber, i e wardadó di prezu huntu cu su famia a bira creyente. (Echonan 16:19-33) Experencianan asina ta mustra cu esnan cu ta contra e bon nobo no por silenci’é. (Isaías 54:17) Asina mes, e historia di cristianismo no tabata unu di contratempu i persecucion implacabel so. Laga nos enfocá awor riba algun desaroyo faborabel cu a yuda suavisá e caminda p’e predicacion exitoso dje bon nobo tantu den promé siglo como den siglo 20.

E Circunstancianan Religioso

9, 10. Con Jehova a crea expectativa p’e predicacion dje bon nobo den promé siglo i siglo 20?

⁹ Den tur dos época, no tabatin ningun casualidad pa cu e orario dje campañanan mundial di predicá. Pa loke ta e circunstancianan den e promé siglo, e profecia dje 70 simannan di aña, hañá na Daniel 9:24-27, a señalá e aña cu e Mesías mester a aparecé: 29 E.C. Aunke e hudiunan di promé siglo no a comprendé e orario exacto di cosnan, nan tabata den expectativa, sperando e Mesías. (Lucas 3:15) E Manuel Biblique na frances ta declará: “Hende tabata sa cu e setenta simannan di aña cu Daniel a establecé tabata yegando nan fin; ningun hende a keda sorprendí ora nan a tende Juan Bautista anunciá cu e reino di Dios a yega cerca.”

¹⁰ Kico dje circunstancianan den tempu moderno? Wel, un desaroyo trasedental tabata e entronisacion di Jesus den shelu, cu a marca e cuminsamentu di su presencia den poder di Reino. Profecia di Bijbel ta mustra cu esaki a tuma lugá na 1914. (Daniel 4:13-17) Anticipacion dje suceso aki tambe a pone cu algun hende religioso den e tempu actual tabata yen di expectativa. Expectativa tabata bisto tambe den e Studiantenan sincero di Bijbel cu a cuminsá publicá e revista aki na 1879 como Zion’s Watch Tower and Herald of Christ’s Presence (E Toren di Vigilancia di Síon i Proclamadó dje Presencia di Cristo). Pues, tantu den e promé siglo como den e tempu actual, expectativa religioso a prepará e circunstancianan p’e predicacion dje bon nobo.a

11. Ki fundeshi religioso a pone pa yuda cu e trabou di predicá e bon nobo?

¹¹ Un otro factor cu a yuda e trabou di cristiannan den ámbos época tabata e echo cu hopi hende tabata conocé e Sagrado Scritura. Den e promé siglo, comunidadnan hudiu tabata plamá den e nacionnan no-hudiu den becindario. E comunidadnan ei tabatin snoa caminda hende tabata bini huntu regularmente pa tende nan lesa i considerá e Scritura. Dje manera ei, e promé cristiannan por a edificá riba e conocimentu religioso cu e hendenan tabatin caba. (Echonan 8:28-36; 17:1, 2) Na principio di nos época, e pueblo di Jehova tabata den un circunstancia similar den hopi pais. Bijbel tabata ampliamente disponibel tur caminda den e teritorio di cristiandad, foral den paisnan protestant. Den hopi misa tabata lesa Bijbel; miyones di hende tabatin un ehemplar. Hende tabatin Bijbel caba, pero nan tabatin mester di yudansa pa comprendé loke nan tabatin.

E Beneficionan di Ley

12. Con ley romano por lo general tabata un proteccion den promé siglo?

¹² Hopi bes ley di gobiernu a beneficiá e trabou cristian di predicá. E Imperio Romano a dominá e mundu di promé siglo, i su leynan skirbí tabatin un influencia profundo riba bida diario. E leynan aki a duna proteccion, i nan a beneficiá e promé cristiannan. Por ehempel, ora Pablo a apelá na ley romano, esei a hiba na su liberacion for di prizon i a salb’é di un halá di sota. (Echonan 16:37-39; 22:25, 29) Ora cu a referí n’e posibilidadnan cu e sistema legal di Roma a ofrecé, esei a yuda calma un multitud desordená furioso na Efeso. (Echonan 19:35-41) Un biaha, Pablo a scapa di violencia na Jerusalem pasobra e tabata ciudadano romano. (Echonan 23:27) Mas despues, ley romano a permitié haci un defensa legal di su fe dilanti César. (Echonan 25:11) Aunke vários dje Césarnan a goberná como tirano, generalmente e leynan den promé siglo a duna espacio pa “defendé i establecé e bon nobo legalmente.”—Filipensenan 1:7.

13. Con hopi bes ley a beneficiá e trabou di predicá den nos tempu?

¹³ Mescos ta e caso den hopi pais awe. Aunke tabatin esnan cu a ‘forma trobel pa medio di decreto,’ leynan den mayoria pais ta considerá libertad di religion como un derecho básico. (Salmo 94:20) Hopi gobiernu a reconocé cu Testigonan di Jehova no ta presentá ningun menasa pa órden social, i p’esei nan a duna nos reconocimentu legal. Na Merca, caminda ta imprimí hopi publicacion dje Testigonan, leynan existente a haci posibel pa producí e revista Toren di Vigilancia pa 120 aña sin interupcion, pa hende di rond mundu lesa.

Periodonan di Pas i Tolerancia

14, 15. Con e stabilidad social relativo a beneficiá e actividad di predicá den promé siglo?

¹⁴ Periodonan di relativo pas tambe a beneficiá e actividad di predicá. Aunke Jesus a predicí cu exactitud cu tantu den promé siglo como den siglo 20 ‘nacion lo a lanta contra nacion,’ tabatin periodonan di stabilidad cu a haci posibel pa predicá e Reino intensamente. (Mateo 24:7) E cristiannan di promé siglo a biba bou dje Pax Romana, esta, pas romano. Un historiadó a skirbi: “Roma tabatin un dominio asina completo riba e pueblonan dje mundu mediteráneo cu el a caba cu nan épocanan di guera casi constante.” E stabilidad aki a habri caminda p’e promé cristiannan biaha den relativo siguridad den henter e mundu romano.

¹⁵ E Imperio Romano a trata na uni pueblonan bou di su man fuerte. E política aki no solamente a promové biahamentu, tolerancia i intercambio di idea, sino tambe e concepto di hermandad internacional. E buki On the Road to Civilization (Riba Caminda pa Civilisacion) ta declará: “E unidad dje Imperio [Romano] a haci e tereno [pa predicacion cristian] unu faborabel. A eliminá bareranan nacional. Un ciudadano romano tabata un ciudadano di mundu. . . . Ademas, un estado cu a desaroyá e idea di ciudadania universal lo a comprendé un religion cu a siña tocante hermandad di hende.”—Compará cu Echonan 10:34, 35; 1 Pedro 2:17.

16, 17. Kico a motivá esfuersonan pa promové pas den tempu moderno, i na ki conclusion hopi hende a yega?

¹⁶ Kico di nos tempu? Siglo 20 a mira e gueranan mas destructivo den historia, i gueranan regional ta sigui haci estrago den algun pais. (Revelacion 6:4) Tog, tabatin tambe periodonan di relativo pas. Pa mas cu 50 aña caba no tabatin guera total entre e podernan importante di mundu. E situacion aki a contribuí hopi n’e predicacion dje bon nobo den e paisnan ei.

¹⁷ E horornan di guera di siglo 20 a hiba hopi hende na reconocé cu tin mester di un gobiernu mundial. Temor di guera mundial a hiba n’e formacion di tantu e Liga di Nacionnan como Nacionnan Uní. (Revelacion 13:14) Un meta cu ámbos organisacion a proclamá tabata e promocion di cooperacion i pas internacional. Hopi bes hende cu ta sinti e necesidad ei ta respondé faborablemente n’e bon nobo dje gobiernu mundial cu lo trece pas genuino i duradero: e Reino di Dios.

18. Ki actitud pa cu religion a faborecé e trabou di predicá?

¹⁸ Aunke algun bes a persiguí cristiannan ferosmente, tantu promé siglo como siglo 20 a mira periodonan di tolerancia religioso. (Juan 15:20; Echonan 9:31) E romanonan a adoptá i adaptá nan mes masha lihé n’e dios i diosanan dje pueblonan cu nan a conkistá. Profesor Rodney Stark a skirbi: “Den hopi sentido Roma a permití un grado mas grandi di libertad religioso cu bo por a mira atrobe te despues dje Revolucion Mericano.” Den e tempu actual, hende den hopi pais a bira mas habrí pa otro punto di bista, cu e resultado cu nan ta dispuesto pa scucha e mensahe di Bijbel cu Testigonan di Jehova ta trece.

E Papel di Tecnologia

19. Con e promé cristiannan a haci uso dje codex?

¹⁹ Finalmente, wak con Jehova a capacitá su pueblo pa saca beneficio for di avancenan tecnológico. Aunke e promé cristiannan no a biba den un era di avance tecnológico rápido, un desaroyo cu sí nan a haci uso di dje tabata e codex, of buki consistiendo di página. E codex a reemplasá e rol incómodo. E buki The Birth of the Codex (Nacementu dje Codex) ta declará: “Miéntras literatura seglar a tarda mashá pa bai over completo n’e uso di codex, ta parce cu e cristiannan a haci uso di dje mesora i universalmente.” E buki di referencia aki ta bisa tambe: “Cristiannan a usa e codex asina universalmente den e di dos siglo cu su introduccion mester ta data hopi promé cu aña 100 A.D.” E codex tabata mas fácil pa usa cu un rol. Por a localisá textonan mas lihé. Esaki sigur a yuda e promé cristiannan cu, mescos cu Pablo, no solamente a splica e Scritura sino tambe a ‘duna prueba via referencia’ dje cosnan cu nan tabata siña.—Echonan 17:2, 3.

20. Con e pueblo di Dios a haci uso di tecnologia moderno den e actividad mundial di predicá, i pakico?

²⁰ E avancenan tecnológico den nos siglo tabata asombroso. Mashin di imprenta di alta velocidad a yuda haci publicacion simultáneo di literatura bíblico den hopi idioma posibel. Tecnologia moderno a acelerá e trabou di traduccion di Bijbel. Truck, trein, barcu i avion ta haci posibel pa transportá literatura bíblico rond tera rápidamente. Telefon i fax a haci comunicacion instantáneo un realidad. Mediante su spiritu, Jehova a impulsá su sirbidónan pa haci uso práctico dje tecnologia ei pa promové e plamamentu dje bon nobo rond mundu. Nan no ta probechá dje desaroyonan ei pa motibu di un deseo pa conocé i usa lo último den e mundu aki. Mas bien, nan promé interes i esun principal ta den loke lo yuda nan cumpli cu nan comision di predicá mas eficasmente.

21. Kico nos por ta sigur di dje?

²¹ “E bon nobo aki dje reino lo ser predicá den tur e tera habitá,” Jesus a predicí. (Mateo 24:14) Mescos cu e promé cristiannan a mira un cumplimentu dje profecia ei, nos awe ta mira un cumplimentu riba un escala inmenso. Apesar cu e trabou ta grandísimo i difícil, e bon nobo a ser predicá i ta ser predicá te ainda den tempu faborabel i desfaborabel, entre ley i actitud cu ta cambia, den guera i pas, i meimei di tur sorto di avance tecnológico. Jehova su sabiduria i abilidad asombroso pa premirá futuro no ta yena bo cu temor reverencial? Nos por ta shen porciento sigur cu e trabou di predicá lo ser completá segun e orario di Jehova i cu su propósito amoroso lo ser lográ p’e bendicion dje hustunan. Nan lo yega na poseé e tera i biba pa semper riba dje. (Salmo 37:29; Habacuc 2:3) Si nos armonisá nos bida cu Jehova su propósito, nos lo ta entre nan.—1 Timoteo 4:16.

[Nota]

Puntonan di Repaso

◻ Di con e predicacion dje bon nobo tabata un asignacion difícil?

◻ Den ki manera areglonan gubernamental i stabilidad social relativo a beneficiá e trabou di cristiannan?

◻ Di ki futuro desaroyonan Jehova su bendicion riba e trabou di predicá ta sigurá nos?