Hui na Siguridad Prome cu e “Tribulacion Grandi”

“Ora boso mira Jerusalem rondoná pa ehércitonan den campamentu, . . . laga esnan den Hudea cuminsá hui p’e cerunan.”—LUCAS 21:20, 21.

1. Pakico ta urgente pa esnan cu ainda ta parti dje mundu hui?

PA TUR persona cu ta parti dje mundu di Satanas, ta urgente pa hui. Si nan kier ser conserbá cu bida ora e sistema actual di cosnan ser eliminá for dje tera, nan mester duna evidencia convincente cu nan a tuma nan posicion firmemente n’e banda di Jehova i no ser parti mas dje mundu di cua Satanas ta gobernante.—Santiago 4:4; 1 Juan 2:17.

2, 3. Ki preguntanan relacioná cu Jesus su palabranan registrá na Mateo 24:15-22 nos ta bai considerá?

² Den su gran profecia relacioná cu e conclusion dje sistema di cosnan, Jesus a enfatisá e necesidad vital pa un huimentu asina. Cu frecuencia nos ta considerá loke ta pará skirbí na Mateo 24:4-14; sin embargo, loke ta sigui despues no ta ménos importante. Nos ta animá bo pa habri bo Bijbel awor i lesa versículonan 15 pa 22.

³ Kico e profecia ei kier men? Den e promé siglo, kico tabata “e cos repugnante cu ta causa desolacion”? Kico su paramentu “den un lugá santu” a indicá? Kico e desaroyo ei ta nificá pa nos?

“Laga e Lector Usa Dicernimentu”

4. (a) Kico Daniel 9:27 a bisa lo sigui despues dje hudiunan su rechaso dje Mesías? (b) Ora Jesus a referí na esaki, pakico, evidentemente, el a bisa, “Laga e lector usa dicernimentu”?

⁴ Ripará na Mateo 24:15 cu Jesus a referí na loke tabata skirbí den e buki di Daniel. Den capítulo 9 dje buki ei tin un profecia cu a predicí e binimentu di Mesías i e huicio cu lo ser ehecutá riba e nacion hudiu dor cu nan a rechas’é. E último parti di versículo 27 ta bisa: “I riba e hala di cosnan repugnante lo tin esun cu ta causando desolacion.” Tradicion hudiu di promé a aplicá e parti ei dje profecia di Daniel n’e profanacion dje tempel di Jehova den Jerusalem dor di Antioco IV den siglo dos P.E.C. Pero Jesus a spierta: “Laga e lector usa dicernimentu.” E profanacion dje tempel dor di Antioco IV, aunke esei siguramente tabata repugnante, no a resultá den desolacion—di Jerusalem, dje tempel ni dje nacion hudiu. Dje manera ei Jesus evidentemente tabata spiertando su oyentenan cu cumplimentu di esaki no tabata den pasado sino tabata ainda den futuro.

5. (a) Con un comparacion dje relatonan di Evangelio ta yuda nos identificá e “cos repugnante” dje promé siglo? (b) Pakico Cesto Galo a pura e trupanan romano pa Jerusalem na 66 E.C.?

⁵ Kico tabata “e cos repugnante” pa cua nan mester tabata alerto? Ta notabel cu e relato di Mateo ta bisa: “Ora boso haña bista dje cos repugnante cu ta causa desolacion . . . pará den un lugá santu.” Sin embargo, e relato paralelo na Lucas 21:20 ta bisa: “Ora boso mira Jerusalem rondoná pa ehércitonan den campamentu, sabi e ora ei cu e desolacion di dje a yega cerca.” Na 66 E.C., e cristiannan cu tabata biba den Jerusalem a mira loke Jesus a predicí. Un seri di incidente cu a enbolbé conflicto entre e hudiunan i oficialnan romano a pone cu Jerusalem a bira un foco di rebelion contra Roma. Como resultado, violencia a lanta cabes atrabes di henter Hudea, Samaria, Galilea, e Decápolis i Fenicia, parti nort drenta Siria, i parti sur drenta Egipto. Pa por a restorá un midí di pas p’e parti ei dje Imperio Romano, Cesto Galo a pura e forsanan militar for di Siria pa Jerusalem, di cua e hudiunan a papia como nan “stad santu.”—Nehemías 11:1; Isaías 52:1.

6. Den ki manera tabata cierto cu un “cos repugnante” cu por a causa desolacion tabata “pará den un lugá santu”?

⁶ E legionnan romano tabatin custumber di carga emblemanan, cu nan a considerá como sagrado pero cu e hudiunan a considerá como idolatria. Interesantemente, e palabra hebreo traducí como “cos repugnante” den e buki di Daniel ta ser usá principalmente pa ídolonan i idolatria.a (Deuteronomio 29:17) Apesar di resistencia di parti dje hudiunan, e forsanan romano cu tabata carga nan emblemanan di idolatria a penetrá den Jerusalem na november di 66 E.C., anto a cuminsá debilitá e muraya dje tempel na parti nort. No tabatin duda tocante esei—un “cos repugnante” cu por a causa desolacion completo di Jerusalem tabata “pará den un lugá santu”! Pero con cualkier persona por a hui?

Tabata Urgente pa Hui!

7. Kico e ehército romano a haci inesperadamente?

⁷ Di ripiente i sin ningun aparente motibu for di un punto di bista humano, ora a parce cu Jerusalem por a ser capturá fácilmente, e ehército romano a retirá. E insurgentenan hudiu a core tras dje trupanan romano cu a bati retirada pero yegando solamente te Antípatris, mas o ménos 50 kilometer for di Jerusalem. Anto nan a bolbe bek. Ora nan a yega Jerusalem, nan a bini huntu den e tempel pa planea nan siguiente strategia di guera. Hóbennan a ser reclutá pa fortalecé fortificacionnan i pa sirbi den e ehército militar. E cristiannan lo a enbolbé nan mes den esaki? Asta si nan a evit’é, nan lo ta den e zona di peliger ainda ora e ehército romano a regresá?

8. Ki accion urgente e cristiannan a tuma den obedencia na Jesus su palabranan profético?

⁸ Cristiannan den Jerusalem i den tur Hudea a actua pronto riba e spiertamentu profético cu Jesus a duna i a hui for dje zona di peliger. Tabata urgente pa hui! Cu tempu nan a alcansá e regionnan di ceru, caminda posiblemente algun a establecé nan mes na Pella, den e provincia di Perea. Esnan cu a haci caso di Jesus su spiertamentu no a bira bek di un manera bobo pa purba salba nan posesionnan material. (Compará cu Lucas 14:33.) Bandonando Jerusalem bou dje circunstancianan ei, muhernan embarasá i mamanan cu yu na pechu siguramente a haña esei un biahe difícil pa haci na pia. Restriccionnan di dia di sabat no a stroba nan huida, i aunke winter tabata cerca, e no a yega ainda. Esnan cu a haci caso di Jesus su spiertamentu pa hui rápidamente tabata pronto sano i salbo pafó di Jerusalem i Hudea. Nan bida a dependé riba esaki.—Compará cu Santiago 3:17.

9. Con lihé e forsanan romano a regresá, i cu ki resultado?

⁹ E siguiente aña mes, na 67 E.C., e romanonan a cuminsá accionnan di guera atrobe contra e hudiunan. Promé, Galilea a ser dominá. E siguiente aña, Hudea a ser desolá. Pa 70 E.C., e forsanan romano a rondoná Jerusalem mes. (Lucas 19:43) Hamber a bira extremamente severo. Esnan atrapá den e stad a atacá un e otro. Cualkier persona cu a trata na hui a ser matá. Loke nan a experenciá tabata, manera Jesus a bisa, “tribulacion grandi.”—Mateo 24:21.

10. Si nos lesa cu dicernimentu, kico mas nos lo ripará?

¹⁰ Esei a cumpli completamente cu loke Jesus a profetisá? No, mas sucesonan mester a tuma lugá. Si, manera Jesus a consehá, nos lesa e Scritura cu dicernimentu, nos lo no keda sin tuma nota di loke ta den futuro ainda. Tambe nos lo pensa seriamente tocante su implicacionnan den nos propio bida.

E “Cos Repugnante” Djawe

11. Den ki otro dos pasashinan Daniel ta referí na “e cos repugnante,” i ki periodo di tempu ta ser considerá ei?

¹¹ Nota cu, ademas di loke nos a mira na Daniel 9:27, na Daniel 11:31 i 12:11 tin mas referencia na “e cos repugnante cu ta causando desolacion.” Den ningun dje último casonan aki e destruccion di Jerusalem ta ser considerá. En realidad, loke ta ser bisá na Daniel 12:11 ta aparecé djis dos versículo despues di un referencia na “e tempu di fin.” (Daniel 12:9) Nos ta bibando den un periodo di tempu asina desde 1914. Pues nos mester ta alerto pa identificá e ‘cos repugnante djawe cu ta causando desolacion’ anto haci sigur cu nos ta sali for dje zona di peliger.

12, 13. Pakico ta apropiado pa describí e Liga di Nacionnan como e “cos repugnante” djawe?

¹² Kico ta e “cos repugnante” djawe? E evidencia ta señalá n’e Liga di Nacionnan, cu a cuminsá funcioná na 1920, djis despues cu e mundu a drenta su tempu di fin. Pero con esei por tabata un “cos repugnante cu ta causa desolacion”?

¹³ Corda, e palabra hebreo pa “cos repugnante” ta ser usá den Bijbel principalmente pa referí na ídolonan i prácticanan di idolatria. E Liga a ser adorá como ídolo? Sigur cu sí! Clero a pon’é “den un lugá santu,” i nan siguidornan a dun’é debocion ardiente. E Conseho Federal dje Iglesianan di Cristo na Merca a declará cu e Liga lo ta “e expresion político dje Reino di Dios riba tera.” Senado Mericano a ricibí un avalancha di carta for di gruponan religioso urgiend’e pa ratificá e Pacto dje Liga di Nacionnan. E órgano general dje religionnan bautista, congregacionalista i presbiteriano na Inglatera a alab’é como “e único instrumento disponibel pa alcansá [pas riba tera].”—Mira Revelacion 13:14, 15.

14, 15. Den ki manera e Liga i mas despues Nacionnan Uní a bin para “den un lugá santu”?

¹⁴ E Reino Mesiánico di Dios a ser establecí den shelu na 1914, pero e nacionnan a procedé na bringa pa nan propio soberania. (Salmo 2:1-6) Ora e Liga di Nacionnan a ser proponé, e nacionnan cu a caba di bringa den e promé guera mundial, i tambe e clero cu a bendicioná nan trupanan, a demostrá caba cu nan a bandoná e ley di Dios. Nan no tabata acudiendo na Cristo como Rey. Asina nan a asigná e papel dje Reino di Dios na un organisacion humano; nan a pone e Liga di Nacionnan “den un lugá santu,” un lugá unda e no a pertenecé.

¹⁵ Como sucesor dje Liga, Nacionnan Uní a ser lantá dia 24 di october, 1945. Despues, papanan di Roma a aclamá Nacionnan Uní como “e último speransa pa armonia i pas” i “e foro supremo pa pas i husticia.” Sí, Liga di Nacionnan, huntu cu su sucesor, Nacionnan Uní, berdaderamente a bira un ídolo, un “cos repugnante” den bista di Dios i di su pueblo.

Hui For di Kico?

16. For di kico stimadornan di husticia tin cu hui awe?

¹⁶ ‘Hañando bista’ di esaki, reconociendo loke e organisacion internacional ei ta i con e ta ser adorá como ídolo, stimadornan di husticia tin cu hui na siguridad. Hui for di kico? For di loke ta e antitipo actual di Jerusalem infiel, esta, cristiandad, i for di tur parti di Babilonia e Grandi, e sistema mundial di religion falsu.—Revelacion 18:4.

17, 18. Ki desolacion e “cos repugnante” di tempu actual lo causa?

¹⁷ Corda, tambe, cu den e promé siglo, ora e ehército romano cu su emblemanan di idolatria a penetrá den e stad santu dje hudiunan, e tabata ei pa trece desolacion riba Jerusalem i su sistema di adoracion. Den nos tempu, e desolacion lo bini, no meramente riba un stad, no solamente riba cristiandad, sino riba henter e sistema mundial di religion falsu.—Revelacion 18:5-8.

¹⁸ Na Revelacion 17:16, ta ser profetisá cu un bestia salbahe figurativo di color scarlata, cu a resultá di ta Nacionnan Uní, lo bira contra Babilonia e Grandi semehante na un muher di mala bida i destruyé violentamente. Usando idioma gráfico, e ta bisa: “E dies cachunan cu bo a mira, i e bestia salbahe, esakinan lo odia e muher di mala bida i lo hacié desolá i sunú, i lo come su carni i lo kim’é completamente cu candela.” Loke esaki lo nificá ta horibel pa contemplá. Lo e resultá den e fin di tur clase di religion falsu den tur parti dje tera. Esaki en berdad lo mustra cu e tribulacion grandi a cuminsá.

19. Ki elementonan tabata parti di Nacionnan Uní desde su formacion, i pakico esaki ta significativo?

¹⁹ Ta notabel cu desde cu Nacionnan Uní a cuminsá funcioná na 1945, elementonan ateista, anti-religion tabata miembronan prominente. Na vários ocasion rond mundu, tal elementonan radical a contribuí mashá pa prácticanan religioso ser restringí severamente of prohibí completamente. Sin embargo, den e último par di añanan, na hopi lugá a mengua e presion cu gobiernu tabata ehercé riba gruponan religioso. Pa algun hende por parce cu cualkier peliger pa religion a pasa.

20. Ki sorto di reputacion e religionnan di mundu a traha pa nan mes?

²⁰ E religionnan di Babilonia e Grandi ta sigui ser un forsa violentamente destructivo den e mundu. Titularnan di noticia frecuentemente ta identificá faccionnan den guera contra otro i gruponan terorista mencionando nomber dje religion cu nan ta apoyá. Polis anti-motin i soldat tabatin cu habri caminda cu forsa pa drenta tempelnan pa stop violencia entre faccionnan religioso rival. Organisacionnan religioso a financiá revolucion político. Odio religioso a frustra esfuersonan cu Nacionnan Uní a haci pa mantené relacionnan stabil entre gruponan étnico. Siguiendo tras dje meta di pas i siguridad, elementonan den Nacionnan Uní lo kier mira e eliminacion di cualkier influencia religioso cu ta para den nan caminda.

21. (a) Ken lo determiná ki ora Babilonia e Grandi tin cu ser destruí? (b) Kico ta urgente pa haci promé cu e tempu ei?

²¹ Tin tambe un otro factor importante pa considerá. Aunke e cachunan militarisá for di den Nacionnan Uní lo ser usá pa destruí Babilonia e Grandi, e destruccion ei realmente lo ta un expresion di huicio divino. E ehecucion di huicio lo bini n’e debido tempu di Dios. (Revelacion 17:17) Kico nos mester haci miéntras tantu? “Sali for di dje”—sali for di Babilonia e Grandi—Bijbel ta contestá.—Revelacion 18:4.

22, 23. Kico un huimentu asina ta enbolbé?

²² E huimentu aki pa siguridad no ta un mudansa geográfico, manera esun cu e hudiunan cristian a haci ora nan a bandoná Jerusalem. E ta un huimentu for dje religionnan di cristiandad, sí, for di cualkier parti di Babilonia e Grandi. E ta nificá separá bo mes completamente no solamente for di organisacionnan religioso falsu sino tambe for di nan custumbernan i e ambiente cu nan ta fomentá. E ta un huimentu n’e lugá di siguridad den Jehova su organisacion teocrático.—Efesionan 5:7-11.

²³ Ora Jehova su sirbidornan ungí na principio a identificá e cos repugnante djawe, e Liga di Nacionnan, despues di Guera Mundial I, con e Testigonan a reaccioná? Ya caba nan a corta nan lasonan cu e iglesianan di cristiandad. Pero gradualmente nan a realisá cu ainda nan tabata pegando na algun custumber i práctica di cristiandad, manera uso di crus i celebracion di Pascu di Nacementu i otro dianan di fiesta pagano. Ora nan a siña e berdad tocante e cosnan aki, nan a actua mesora. Nan a tuma na pechu e conseho na Isaías 52:11: “Apartá boso, apartá boso, sali for di ei, no mishi cu nada impuru; sali for di meimei di dje, mantené boso mes limpi, boso cu ta cargando e hermentnan di Jehova.”

24. Specialmente desde 1935, ken a uni den e huimentu?

²⁴ Specialmente desde 1935 padilanti, un multitud creciente di otro personanan, hende cu a brasa e prospecto di biba pa semper den un paradijs riba tera, a cuminsá tuma accion similar. Nan tambe a ‘haña bista dje cos repugnante pará den un lugá santu,’ i nan ta reconocé loke esei ta nificá. Despues di tuma nan decision pa hui, nan a laga kita nan nomber for dje lista di miembro di organisacionnan cu ta parti di Babilonia e Grandi.—2 Corintionan 6:14-17.

25. Kico ta necesario ademas di kibra cu cualkier laso cu un persona por tin cu religion falsu?

²⁵ Sin embargo, hui for di Babilonia e Grandi ta enbolbé hopi mas cu bandoná religion falsu. Mas ta necesario cu solamente asistí na algun reunion na un Salon di Reino of sali predicá e bon nobo den e ministerio di veld un of dos biaha pa luna. Un persona por ta físicamente pafó di Babilonia e Grandi, pero e berdaderamente a bandon’é completamente? El a separá su mes for dje mundu di cua Babilonia e Grandi ta un parti prominente? Ainda e ta pega na e cosnan cu ta reflehá su spiritu—un spiritu cu ta menospreciá normanan hustu di Dios? E ta tratando moralidad sexual i fieldad matrimonial como algu leve? E ta enfatisá interesnan personal i material mas cu interesnan spiritual? E no mester permití su mes ser formá segun e sistema di cosnan aki.—Mateo 6:24; 1 Pedro 4:3, 4.

No Laga Nada Stroba Bo Huida!

26. Kico lo yuda nos pa no djis cuminsá e huida sino pa complet’é exitosamente?

²⁶ Den nos huida pa siguridad, ta imperativo pa nos no anhelá e cosnan cu nos a laga atras. (Lucas 9:62) Nos mester tene nos mente i curason firmemente fihá riba e Reino di Dios i su husticia. Nos ta determiná pa demostrá nos fe dor di busca esakinan promé, cu confiansa cu Jehova lo bendicioná un curso fiel asina? (Mateo 6:31-33) Nos conviccionnan basá riba Bijbel mester incitá nos n’e meta ei segun cu nos ta spera ansiosamente e desenlace di desaroyonan significativo riba e esena di mundu.

27. Pakico ta importante pa pensa seriamente riba e preguntanan cu ta ser hací aki?

²⁷ E ehecucion di huicio divino lo cuminsá cu e destruccion di Babilonia e Grandi. E imperio di religion falsu ei semehante na un muher di mala bida lo ser eliminá pa semper for di existencia. E tempu ei ta masha cerca! Kico lo ta nos posicion como individuo ora e tempu trasedental ei yega? I n’e culminacion dje tribulacion grandi, ora e resto di Satanas su mal sistema di cosnan ser destruí, na ki banda nos lo ser hañá? Si nos tuma e accion necesario awor, nos siguridad ta garantisá. Jehova ta bisa nos: “En cuanto esun cu ta scuchá mi, lo e biba den siguridad.” (Proverbionan 1:33) Dor di sigui sirbi Jehova lealmente i gososamente durante e conclusion dje sistema aki, nos por cualificá pa sirbi Jehova pa semper.

[Nota]

Bo Ta Corda?

◻ Kico ta e “cos repugnante” djawe?

◻ Den ki sentido ‘e cos repugnante . . . ta pará den un lugá santu’?

◻ Kico ta enbolbí den hui na siguridad awor?

◻ Pakico accion asina ta urgente?

[Plachi na página 16]

Pa sobrebibí, Jesus su siguidornan tabatin cu hui sin tarda