Pregunta di Lector
“E Toren di Vigilancia” di 1 di november, 1995, a enfocá riba loke Jesus a bisa tocante “e generacion aki,” manera nos ta lesa na Mateo 24:34. Esaki ta nificá cu tin algun insiguridad tocante si e Reino di Dios a ser establecé den shelu na 1914?
E consideracion ei den E Toren di Vigilancia no a presentá absolutamente ningun cambio den nos siñansa fundamental tocante 1914. Jesus a describí e señal cu ta marca su presencia den poder di Reino. Nos tin evidencia amplio cu e señal aki a bin ta cumpli desde 1914. E echonan tocante guera, hamber, plaga, temblor i otro evidencianan ta confirmá cu desde 1914, Jesus tabata activo como Rey dje Reino di Dios. Esaki ta indicá cu desde e tempu ei nos ta den e conclusion dje sistema di cosnan.
Kico, anto, E Toren di Vigilancia tabata clarificando? Wel, e clave tabata e sentido den cua Jesus a usa e palabra “generacion” na Mateo 24:34. E pasashi ta bisa: “Di berdad mi ta bisa boso cu e generacion aki lo no pasa forbij di ningun manera te ora tur e cosnan aki sosodé.” Kico Jesus tabata kier men cu “generacion,” tantu den su tempu como den di nos?
Hopi texto ta confirmá cu Jesus no a usa “generacion” relacioná cu un of otro grupo chikitu en particular, indicando solamente e lidernan hudiu of solamente su disipelnan leal. Mas bien, el a usa “generacion” pa condená e gran cantidad di hudiunan cu a rechas’é. Sin embargo, afortunadamente, individuonan por a haci loke apostel Pedro a urgi riba e dia di Pentecoste, repentí i “salba . . . for dje generacion perverso aki.”—Echonan 2:40.
Den e declaracion ei, Pedro claramente no tabata refiriendo precisamente na hende di un cierto grupo di edad of duracion di tempu, tampoco e tabata conectando e “generacion” na un cierto fecha. E no a bisa cu hende mester a ser salbá for dje generacion cu a nace den e mésun aña cu Jesus of e generacion cu a nace na 29 E.C. Pedro tabata papiando tocante e hudiunan no-creyente dje periodo ei—algun kisas siendo basta yong, otronan siendo mas bieu—cu a ser exponé na Jesus su siñansa, cu a mira of tende di su milagernan, i cu no a acept’é como Mesías.
Evidentemente asina Pedro a comprendé Jesus su uso di “generacion” ora e i tres otro apostel tabata huntu cu Jesus riba e Ceru di Olijfi. Segun Jesus su declaracion profético, hudiunan dje periodo ei—básicamente, Jesus su contemporáneonan—tabata bai experenciá of tende di gueranan, temblornan, hamber i otro evidencianan cu e fin dje sistema hudiu tabata cerca. En realidad, e generacion ei no a pasa promé cu e fin a bini na 70 E.C.—Mateo 24:3-14, 34.
Nos tin cu reconocé cu no semper nos a tuma Jesus su palabranan den e sentido ei. Hende imperfecto tin un tendencia di kier ta specífico tocante e fecha ki ora e fin lo yega. Corda cu asta e apostelnan a busca cosnan mas specífico, puntrando: “Señor, bo ta restorá e reino na Israel n’e tempu aki?”—Echonan 1:6.
Cu intencionnan igualmente sincero, sirbidónan di Dios den tempu moderno a purba derivá for di loke Jesus a bisa tocante “generacion” un elemento specífico di tempu calculá for di 1914. Por ehempel, un argumento tabata cu un generacion por ta 70 of 80 aña, consistiendo di hende cu suficiente edad pa capta e nificacion dje promé guera i otro desaroyonan; asina nos por calculá mas o ménos con cerca e fin ta.
Maske con bon intencioná e razonamentu ei tabata, el a cumpli cu e conseho cu Jesus a pasa na duna? Jesus a bisa: “En cuanto e dia i ora ei ningun hende no sa, ni e angelnan di shelu ni e Yu, sino solamente e Tata. . . . P’esei sigui vigilá, pasobra boso no sa riba ki dia boso Señor ta bini.”—Mateo 24:36-42.
Pues e informacion recien den E Toren di Vigilancia tocante “e generacion aki” no a cambia nos comprendimentu di loke a sosodé na 1914. Pero sí el a duna nos un comprendimentu mas cla di Jesus su uso dje término “generacion,” yudando nos pa mira cu su uso no tabata un base pa calculá—contando for di 1914—con cerca dje fin nos ta.