“Sea Prepará”
1 Den e profesia remarkabel ku Hesus a duna tokante e fin di e sistema di kosnan aki, el a spièrta nos pa no bira demasiado okupá ku e kosnan diario di bida. (Mat. 24:36-39; Luk. 21:34, 35) Ya ku e tribulashon grandi por dal aden un ora pa otro, ta masha importante pa nos hasi kaso di e spièrtamentu di Hesus: “Sea prepará, pasobra e Yu di hende lo bin na un ora ku boso no ta pensa.” (Mat. 24:44) Kiko por yuda nos den esaki?
2 Kombatí Ansiedat i Distraishon: Un di e trampanan spiritual ku nos tin ku tene kuidou kuné ta ansiedat òf “preokupashonnan di bida.” (Luk. 21:34) Den algun pais, pobresa, desempleo i kosto di bida haltu ta pone ku ta difísil pa hende haña e nesesidatnan di bida. Den otro paisnan ta masha normal pa hende atkerí kosnan material. Si preokupashon ku kosnan material kuminsá dominá nos mente, nos ta kore peliger di pèrdè nos enfoke riba e realidatnan di Reino. (Mat. 6:19-24, 31-33) Reunionnan kristian ta yuda nos mantené nos atenshon fihá riba e realidatnan ei. Bo tin e meta pa asistí na tur reunion?—Heb. 10:24, 25.
3 E mundu djawe tin hopi distraishon ku fásilmente por hòrta nos tempu balioso. Uso di kòmpiuter por bira un trampa si un persona ta pasa un kantidat irasonabel di tempu ta sùrf riba Internet, ta lesa i manda E-mail òf hunga wega di kòmpiuter. Nos por pèrdè masha hopi ora na televishon, pelíkula, hòbi, lesamentu di bukinan mundano i na deporte. Anto esaki por laga nos ku masha poko tempu òf energia pa dediká na metanan spiritual. Ounke rekreo i relahamentu por refreská nos temporalmente, ta studio personal di Beibel i komo famia ta duna benefisionan eterno. (1 Tim. 4:7, 8) Bo ta saka tempu pa meditá riba e Palabra di Dios tur dia?—Efe. 5:15-17.
4 Nos por ta masha gradisidu ku e organisashon di Yehova a hasi areglo pa un programa di instrukshon spiritual pa yuda nos “skapa di tur e kosnan aki ku ta bai tuma lugá, i pa para dilanti di e Yu di hende”! (Luk. 21:36) Laga nos tur probechá plenamente di e perkurashonnan aki i “sea prepará” pa asina nos fe por “resultá den alabansa i gloria i onor ora Hesukristu wòrdu revelá.”—1 Ped. 1:7.