E Punto Di Bista Biblico

Con Cristiannan Mester Mira Sacrificio di Misa?

CATOLICONAN deboto ta di acuerdo cu Papa Juan Pablo II, kende recientemente a “reafirmá cu iglesia ta consider’é un picá si un católico keda sin bai sacrificio di misa,” segun The New York Times. Kico ta sacrificio di misa? Iglesia i Bijbel ta na armonia cu otro den esaki?

Den e buki Things Catholics Are Asked About (Loke Hende Sa Puntra Católiconan), pastor católico Martin J. Scott ta definí sacrificio di misa asina aki: “Sacrificio di misa ta e sacrificio sin sanger dje Curpa i Sanger di Cristo. Calvario tabata e sacrificio cu sanger di Cristo. Sacrificio di misa ta básicamente e mésun sacrificio cu esun na crus. Esaki no ta djis simbolismo, e no ta un metáfora ni un exageracion.” Tambe e ta declará: “Sacrificio di misa ta afirmá di baha e Yu di Dios pone riba nos altar, pa ofrec’é como sacrificio na e Haltísimo.”

Sacrificio di Misa Ta Bíblico?

Católiconan sincero ta kere cu sacrificio di misa ta basá riba siñansa bíblico. Como prueba nan ta mustra loke Jesus a bisa durante loke ta conocí como e Ultimo Cena. Ora el a parti e pan i biña na su apostelnan, Jesus a bisa refiriendo na e pan: “Esaki ta mi Curpa.” Ora di referí na e biña, el a bisa: “Esaki ta mi Sanger.” (Mateo 26:26-28)a Católiconan ta kere cu ora Jesus a expresá e palabranan aki, el a ègt transformá e pan i biña den su curpa i sanger. Sin embargo, New Catholic Encyclopedia (1967) ta duna e spiertamentu aki: “Nos no mester tuma e palabranan ‘esaki ta mi Curpa’ of ‘esaki ta mi Sanger’ muchu literal. . . . Pasobra den frasenan manera ‘cosecha ta fin di mundo’ (Mt 13.39) of ‘ami ta e berdadero mata di binja’ (Jn 15.1) e [verbo “ta”] ta para solamente pa nificá of representá.” Pues, asta e enciclopedia autoritativo aki ta admití cu e palabranan na Mateo 26:26-28 no ta un prueba cu e pan i e biña a cambia den e curpa i sanger literal di Jesus na e Ultimo Cena.

Un hende lo por bisa cu Jesus a yega di bisa: “Ami ta e pam bibo ku a baha bini for di cielo. . . . Esun ku come mi carni i bebe mi sanger, tin bida eterna.” (Juan 6:51, 54) Algun hende cu a scucha Jesus, a tuma e palabranan ei literalmente i a sinti nan ofendí. (Juan 6:60) Pero nos lo por puntra: Acaso Jesus a transformá su carni den pan n’e ocasion ei? Claro cu no! E tabata papia figurativamente. El a compará su mes cu pan, pasobra ta mediante su sacrificio lo e otorgá bida na humanidad. Juan 6:35 i 40 ta indicá masha cla cu hende lo come su carni i bebe su sanger dor di ehercé fe den Jesucristo.

Ya cu sacrificio di misa ta un dje ritonan principal di Iglesia Católico, lo bo por verwagt cu e Scritura ta apoy’é. Pero no ta asina. The Catholic Encyclopedia (edicion di 1913) a splica pakico no: “E fuente principal di nos doctrina . . . ta tradicion, cu for di antaño ta afirmá e balor di sacrificio di misa pa haci súplica.” Sí, e sacrificio di misa católico romano ta basá riba tradicion, no riba Bijbel.

Con sincero cu hende por ta den sigui un tradicion, si e tradicion ta bai contra Bijbel, e no ta aceptabel pa Dios. Jesus a censurá e lidernan religioso di su tempu, bisando: “Boso a kibra forza di palabra di Dios, na fabor di boso propio tradicion.” (Mateo 15:6) Ya cu Jesus a duna gran balor na e Palabra di Dios, laga nos examiná e siñansa tocante sacrificio di misa den lus dje Scritura Santu.

E Sacrificio di Cristo—Cuantu Biaha?

Iglesia Católico ta siña cu cada biaha cu celebrá sacrificio di misa, Jesus ta ser sacrificá, maske e ta afirmá cu e no ta ègt muri i cu e sacrificio ta sin sanger. Bijbel ta apoyá e punto di bista aki? Tuma nota di Hebreonan 10:12 i 14: “[Jesus] ta pa semper sintá na man drechi di Dios, despues di a ofrecé ún sol sacrificio pa picarnan. Pasobra pa ún sol sacrificio El a obra un perfeccion permanente den esnan ku E ta santificá.”

Pero un católico sincero lo por protestá i bisa: ‘Jesus no mester ofrecé su mes hopi biaha? Nos tur ta peca hopi bes.’ Ta haña e contesta di Bijbel na Hebreonan 9:25, 26: “[Cristo] no tin mester di ripití cada bez di nobo e sacrificio di Su mes. . . . Ta ún bez sol El a parce, den plenitud di tempo, pa destruí picar pa medio di su sacrificio.” Tuma bon nota di esaki: Cristo “no tin mester di ripití cada bez di nobo e sacrificio di Su mes.” Na Romanonan 5:19, apostel Pablo ta splica di con no: “Manera pa desobedencia di ún hende [Adam] tur a bira pecador, asina pa obedencia di Uno [Jesus] tur lo keda hustificá.” E solo acto di desobedencia di Adam a pone cu nos tur ta sometí na morto; e solo acto di rescate di Jesus a pone e base pa tur entre nos cu ta ehercé fe den e sacrificio ei, pa nos picánan ser pordoná i pa disfrutá di bida eterno den futuro.

Kico ta e diferencia si Jesus a ser sacrificá un biaha so of si e ta ser sacrificá hopi bes? Ta un asuntu di apreciá e balor di Jesus su sacrificio. Esei ta e regalo mas grandi hamas duná, un regalo asina precioso, asina perfecto, cu no tin nodi ripitié nunca mas.

Sigur, e sacrificio di Jesus ta merecé pa nos record’é. Pero tin un diferencia entre recordá un evento i ripitié. Por ehempel, un pareha lo por celebrá nan aniversario di boda pa recordá e dia cu nan a casa, sin cu nan tin cu ripití e ceremonia di nobo. Tur aña, Testigonan di Jehova ta celebrá e aniversario di Jesus su morto. Nan ta haci esei pa cumpli cu Jesus su mandamentu como ‘un recuerdo’ di dje, no pa sacrifik’é. (Lucas 22:19) Ademas, henter aña e cristiannan aki ta purba cultivá un relacion caluroso cu Jehova Dios mediante Jesucristo dor di pone nan bida, accion i creencianan na armonia cu e Scritura Sagrado.

Hopi bes esaki ta nificá haci cambio den nan manera di pensa. Pero e Testigonan ta contentu di sa cu si nan duna apoyo leal n’e Palabra di Dios en bes di na tradicion humano, nan lo haña bendicion. I si nan ehercé fe den e sanger sacrificá di Jesus, cu el a drama un bes pa semper pa tur hende casi dos mil aña pasá, esei lo haci nan limpi di tur picá.—1 Juan 1:8, 9.

[Notas]

[Plachi na página 18]

Sacrificio di Misa di San Gil (detaye)

[Rekonosementu]

Erich Lessing/Art Resource, NY