Un Secreto Cu Cristiannan No Ta Tribi di Warda!
“Mi a papia cu e mundu públicamente. . . . Mi no a papia nada den secreto.”—JUAN 18:20.
1, 2. Kico ta e nificacion dje palabra griego my·steʹri·on manera e ta ser usá den e Scritura?
E PALABRA griego my·steʹri·on ta ser traducí den e Traducción del Nuevo Mundo de las Santas Escrituras 25 biaha como “secreto sagrado” i 3 biaha como “misterio.” Un secreto cu ta ser yamá sagrado mester ta importante en berdad! Cualkier hende cu tin e privilegio di gana conocimentu di un secreto asina mester sinti su mes sumamente onrá, ya cu el a ser considerá digno pa compartí un secreto cu e Dios Supremo di universo.
2 E Expository Dictionary of Old and New Testament Words di Vine ta confirmá cu den mayoria caso “secreto sagrado” ta un traduccion mas apropiado cu “misterio.” E ta bisa di my·steʹri·on: “Den e [Scritura Griego Cristian] e ta denotá, no loke ta misterioso (manera e palabra ingles ta indicá), sino loke, siendo fuera dje abilidad natural humano pa comprendé, por ser hací conocí solamente dor di revelacion Divino, i ta ser hací conocí den un manera i na un tempu fihá dor di Dios, i solamente na esnan cu ta ser iluminá dor di Su Spiritu. Den e sentido comun un misterio ta implicá conocimentu cu ta ser retené; ora e ta ser usá den Bijbel e ta implicá e berdad revelá. P’esei e expresionnan specialmente asociá cu e asuntu di misterio ta ‘hací conocí,’ ‘manifestá,’ ‘revelá,’ ‘predicá,’ ‘comprendé,’ ‘distribuí.’”
3. Con e congregacion cristian dje promé siglo a diferenciá for di cierto gruponan religioso misterioso?
3 E splicacion aki ta resaltá un diferencia principal entre e gruponan religioso misterioso cu a florecé den e promé siglo i e congregacion cristian cu a caba di ser formá. Miéntras cu esnan cu tabata ser hací miembro den cultonan secreto hopi biaha tabata mará mediante un voto di silencio pa warda siñansanan religioso, cristiannan nunca a ser poné bou di un restriccion asina. Ta cierto cu apostel Pablo a papia di “e sabiduria di Dios den un secreto sagrado,” yamand’e “sabiduria scondí,” esta, scondí for di “e gobernantenan dje sistema di cosnan aki.” E no ta scondí for di cristiannan na kendenan el a ser revelá mediante e spiritu di Dios, di manera cu nan por hacié público.—1 Corintionan 2:7-12; compará cu Proverbionan 1:20.
E “Secreto Sagrado” Identificá
4. Riba ken e “secreto sagrado” ta enfocá, i den ki manera?
4 E “secreto sagrado” di Jehova ta enfocá riba Jesucristo. Pablo a skirbi: “[Jehova] a duna nos di conocé e secreto sagrado di su boluntad. Esei ta segun su bon gustu cu el a proponé den su mes pa un administracion n’e límite completo dje tempu señalá, esta, pa recogé tur cos huntu atrobe den e Cristo, e cosnan den shelu i e cosnan riba tera. Sí, den dje.” (Efesionan 1:9, 10) Pablo asta tabata mas specífico tocante e caracter dje “secreto sagrado” ora el a señalá n’e necesidad pa “un conocimentu exacto dje secreto sagrado di Dios, esta, Cristo.”—Colosensenan 2:2.
5. Kico ta enbolbí den e “secreto sagrado”?
5 Sin embargo, mas ta enbolbí pasobra e “secreto sagrado” ta un secreto cu hopi faceta. E no ta simplemente e identificacion di Jesus como e Simia of Mesías primintí; e ta encerá e papel cu e ta ser asigná pa hunga den e propósito di Dios. E ta enbolbé un gobiernu celestial, e Reino Mesiánico di Dios, manera Jesus a splica claramente ora el a bisa su disipelnan: “Ta duná na boso pa comprendé e secretonan sagrado dje reino di shelu, pero no ta duná na e hendenan ei.”—Mateo 13:11.
6. (a) Pakico ta corecto pa bisa cu e “secreto sagrado” a ser “wardá den silencio pa tempunan di duracion largu”? (b) Con el a ser revelá progresivamente?
6 Un periodo largu di tempu mester a pasa entre e promé mencion dje propósito di Dios pa percurá un base p’e Reino Mesiánico i e trecementu di ‘e secreto sagrado na un fin.’ (Revelacion 10:7; Génesis 3:15) Su trecementu na un fin lo a tuma lugá ora e Reino a ser establecí, manera un comparacion di Revelacion 10:7 cu 11:15 ta proba. De echo, mas o ménos 4.000 aña a pasa for di tempu cu e promé promesa di Reino a ser duná den Eden te n’e aparicion dje Rey-Designá na 29 E.C. Un 1.885 aña mas a pasa promé cu e Reino a ser establecí den shelu na 1914. Asina e “secreto sagrado” a ser revelá progresivamente durante un periodo di casi 6.000 aña. (Mira página 16.) Pablo en berdad tabata corecto ora el a papia tocante “e revelacion dje secreto sagrado cu a ser wardá den silencio pa tempunan di duracion largu, pero cu a ser sacá na cla awor i duná di conocé.”—Romanonan 16:25-27; Efesionan 3:4-11.
7. Pakico nos por tin pleno confiansa den e clase di esclabo fiel i discreto?
7 Na contraste cu hende, cu tin un duracion corticu di bida, Jehova nunca ta sinti presion di tempu pa revelá su secretonan prematuramente. E echo aki mester prevení nos di bira impaciente ora cierto preguntanan di Bijbel no por ser splicá awor aki na nos satisfaccion. Modestia di parti dje clase di esclabo fiel i discreto, cu tin e comision di duna e famia cristian alimento na e tempu apropiado, ta previnié di pasa bai presuntuosamente dilanti i speculá pa loco tocante cosnan cu ainda no ta muchu cla. E clase di esclabo ta purba evitá di ser dogmático. E no ta muchu orguyoso pa admití cu pa awor aki e no por contestá tur pregunta, teniendo Proverbionan 4:18 claramente na mente. Pero ta ki emocionante pa sa cu Jehova, na su mes tempu i na su mes manera, lo sigui revelá su secretonan relacioná cu su propósitonan! Nunca nos mester bira impaciente cu Jehova su areglo, purbando indiscretamente di pasa bai dilanti e Revelador di secreto. Ta ki trankilisante pa sa cu e canal cu Jehova ta usando awe no ta haci esei! E ta tantu fiel como discreto.—Mateo 24:45; 1 Corintionan 4:6.
E Secreto cu A Ser Revelá Tin cu Ser Contá!
8. Con nos sa cu e “secreto sagrado” tin cu ser hací conocí?
8 Jehova no a revelá su “secreto sagrado” na cristiannan pa nan ten’é scondí. E mester ser hací conocí, na armonia cu e principio cu Jesus a establecé pa tur su siguidónan—no solamente pa algun clero: “Boso ta e lus di mundu. Un stad no por ser scondí ora e ta situá riba un ceru. Un lampi no ta ser cendé i poné bou dje macutu di midi, sino riba e candelaria, i e ta lusa riba tur hende cu ta den e cas. Di igual manera, laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.”—Mateo 5:14-16; 28:19, 20.
9. Kico ta proba cu Jesus no tabata revolucionario, manera algun hende ta pretendé?
9 Jesus no tabatin intencion revolucionario di forma un organisacion clandestino di siguidónan pa sigui tras di propósitonan secreto. Den e buki Early Christianity and Society, Robert M. Grant a skirbi tocante e manera cu e apologista Justino Martir di siglo dos a sali na defensa dje cristiannan di promé: “Si cristiannan tabata revolucionista nan lo a keda scondí pa por a alcansá nan meta.” Pero con cristiannan por a “keda scondí” i na mésun tempu ser manera “un stad . . . situá riba un ceru”? Nan no a tribi di sconde nan lus bou di un macutu di midi! P’esei, e gobiernu no tabatin nada di teme di nan actividad. E escritor aki a pasa na describí nan como “e mihó aliadonan dje emperador den e causa di pas i órden.”
10. Pakico cristiannan no mester tene nan identidad secreto?
10 Jesus no tabata kier pa su disipelnan tene nan identidad como miembro di un asina yamá secta religioso secreto. (Echonan 24:14; 28:22) Keda sin laga nos lus briya awe lo desagradá tantu Cristo como su Tata, e Revelador di secreto, i esei lo no haci nos felis.
11, 12. (a) Pakico Jehova ta deseá pa cristianismo ser hací conocí? (b) Con Jesus a pone e ehempel corecto?
11 Jehova “no ta deseá pa ningun hende ser destruí sino ta deseá pa tur alcansá repentimentu.” (2 Pedro 3:9; Ezekiel 18:23; 33:11; Echonan 17:30) E base pa pordon di picá di hende repentí ta fe den e sacrificio di rescate di Jesucristo, kende a duna su mes como un rescate pa tur—no pa solamente un par—pa asina “tur cu ehercé fe den dje no sea destruí sino haña bida eterno.” (Juan 3:16) Ta vital pa yuda hende dal e pasonan necesario cu lo cualificá nan pa ser husgá como carné, no cabritu, durante e huicio binidero.—Mateo 25:31-46.
12 Berdadero cristianismo no mester ta scondí; e tin cu ser hací conocí den tur manera apropiado posibel. Jesus mes a pone e ehempel corecto. Ora e sacerdote principal a interogu’é tocante su disipelnan i su siñansa, el a bisa: “Mi a papia cu e mundu públicamente. Mi semper a siña den un snoa i den e tempel, unda tur e hudiunan ta bini huntu; i mi no a papia nada den secreto.” (Juan 18:19, 20) En bista dje precedente aki, cua persona temeroso di Dios lo tribi di tene secreto loke Dios a declará cu mester ser hací público? Ken lo tribi di sconde “e yabi di conocimentu” cu ta hiba na bida eterno? Haciendo esei, lo haci e persona ei mescos cu e hipócritanan religioso dje promé siglo.—Lucas 11:52; Juan 17:3.
13. Pakico nos mester predicá na tur oportunidad?
13 Laga nos nunca duna ningun hende chens di bisa cu como Testigo di Jehova nos a tene e mensahe dje Reino di Dios secreto! Sea e mensahe ta ser aceptá of rechasá, hende mester sa cu el a ser predicá. (Compará cu Ezekiel 2:5; 33:33.) P’esei laga nos probechá di tur oportunidad pa papia e mensahe di e berdad cu tur hende, unda cu nos topa nan.
Poniendo Hak den Cachete di Satanas
14. Pakico nos no mester vacilá pa ta habrí den nos adoracion?
14 Den hopi lugá Testigonan di Jehova ta birando mas i mas e centro di atencion den medionan di comunicacion. Mescos cu a sosodé cu e cristiannan di promé, hopi biaha nan ta ser malrepresentá i poné den e mésun categoria cu cultonan religioso cuestionabel i organisacionnan secreto. (Echonan 28:22) Acaso nos actitud habrí den predicacion ta duna hende mas chens di atacá nos? Siguramente lo ta imprudente, i no na armonia cu e conseho di Jesus, pa mete nos mes innecesariamente den controversia. (Proverbionan 26:17; Mateo 10:16) Sin embargo, nos no mester sconde e trabou beneficioso di predicá e Reino i yuda hende mehorá nan bida. E ta glorificá Jehova, exaltand’e, dirigiendo atencion na dje i na su Reino establecí. E reaccion faborabel cu tin último tempu riba e berdad di Bijbel na Oost Europa i partinan di Africa tabata parcialmente debí n’e actitud mas habrí cu cua e berdad por ser predicá awor aya.
15, 16. (a) Ki propósitonan nos actitud habrí i prosperidad spiritual ta sirbi, pero esaki ta un motibu di preocupacion? (b) Pakico Jehova ta pone hak den Satanas su cachete?
15 Ta cierto cu e actitud habrí cu cua Testigonan di Jehova ta predicá, e paradijs spiritual cu nan ta disfrutá di dje, i nan prosperidad—tantu na recurso humano como na posesion material—no ta keda sin ser ripará. Miéntras cu e factornan aki ta atraé hende di curason onrado, nan por disgustá opositornan. (2 Corintionan 2:14-17) Realmente, e prosperidad aki cu tempu asta por sirbi pa lok Satanas su forsanan pa atacá e pueblo di Dios.
16 Esaki mester ta un motibu di preocupacion? No segun e profecia di Jehova cu nos ta haña na Ezekiel capítulo 38. E ta predicí cu Gog di Magog, cu ta un descripcion di Satanas e Diabel desde cu el a ser degradá n’e becindario dje tera despues cu e Reino a ser establecí na 1914, lo conducí un atake riba e pueblo di Dios. (Revelacion 12:7-9) Jehova ta bisa Gog: “Bo tin cu bisa: ‘Lo mi subi contra e tera di region rural abierto. Lo mi bini riba esnan cu ta sin disturbio, bibando den siguridad, nan tur bibando sin muraya, i nan no tin ni sikiera bara i porta.’ Lo e ta pa haña un gran botin i pa haci hopi sakeo, afin di bira bo man bek riba lugánan desolá cu a ser habitá di nobo i riba un pueblo cu a ser recogé for dje nacionnan, unu cu ta acumulando rikesa i propiedad, esnan cu ta bibando den e centro dje tera.” (Ezekiel 38:11, 12) Sin embargo, versículo 4 ta mustra cu e pueblo di Dios no tin nodi tene miedu dje atake aki, pasobra e ta un obra di Jehova. Pero pakico Dios lo permití—sí, asta provocá—un atake completo riba su pueblo? Na versículo 23 nos ta lesa Jehova su contesta: “Siguramente lo mi engrandecé mi mes i santificá mi mes i haci mi mes conocí dilanti e wowonan di hopi nacion; i nan lo tin cu sa cu ami ta Jehova.”
17. Con nos mester mira e atake inminente di Gog?
17 P’esei, en bes di biba den temor dje atake di Gog, e pueblo di Jehova ta anhelá cu anticipacion n’e desaroyo aki dje cumplimentu di profecia di Bijbel. Ta ki emocionante pa sa cu dor di prosperá i bendicioná su organisacion visibel, Jehova ta hinca hak den Satanas su cachete i ta hal’é huntu cu su forsa militar na nan derota!—Ezekiel 38:4.
Awor Mas cu Nunca!
18. (a) Kico hopi hende ta realisando awor, i pakico? (b) Con e reaccion riba e predicacion di Reino ta sirbi como un motivacion poderoso?
18 Den tempu moderno Testigonan di Jehova tabata masha habrí den expresá nan punto di bista basá riba Bijbel, maske esaki no tabata popular. Pa décadanan nan a spierta dje peligernan di humamentu i abusu di droga, e falta di perspicacia den e entrenamentu permisivo di yu, e mal efectonan di entretenimentu saturá cu sex ilegal i violencia, i e rísiconan di transfusion di sanger. Tambe nan a señalá n’e inconsistencianan dje teoria di evolucion. Mas i mas hende ta bisando awor, “Testigonan di Jehova tin rason tog.” Si nos no tabata asina habrí den haci nos punto di bista público, nan lo no por a reaccioná den e manera aki. I no pasa por haltu dje echo cu dor di haci un declaracion asina, nan ta dal un stap den e direccion di bisa, “Satanas, bo ta un mentiroso; Jehova tin rason tog.” Ki un motivacion poderoso pa nos continuá siguiendo Jesus su ehempel, papiando públicamente e palabra dje berdad!—Proverbionan 27:11.
19, 20. (a) Ki determinacion e pueblo di Jehova a expresá na 1922, i e palabranan aki ta aplicá ainda? (b) Con nos mester considerá e “secreto sagrado” di Jehova?
19 Pa hopi tempu e pueblo di Jehova a comprendé nan obligacion den esaki. Na un congreso notabel na 1922, J. F. Rutherford, e tempu ei presidente di Sociedad Watch Tower, a emocioná su auditorio bisando: “Sea sobrio, sea vigilante, sea activo, sea balente. Sea testigonan fiel i berdadero p’e Señor. Sigui padilanti den e bataya te ora tur rastro di Babilonia keda desolá. Proclamá e mensahe na tur parti. E mundu tin cu sa cu Jehova ta Dios i cu Jesucristo ta Rey di reynan i Señor di señornan. Esaki ta e dia di tur dia. Mira, e Rey ta reina! Boso ta su agentenan di publicidad. P’esei, anunciá, anunciá, anunciá, e Rey i su reino.”
20 Con importante cu e palabranan aki tabata na 1922, cuantu mas nan ta 75 aña despues, ora e revelacion di Cristo como Hues i Vengador ta muchu mas cerca! E mensahe di Jehova su Reino establecí i dje paradijs spiritual cu e pueblo di Dios ta disfrutá di dje ta un “secreto sagrado” simplemente demasiado magnífico pa warda. Manera Jesus mes a declará asina claramente, cu yudansa di spiritu santu su siguidónan tin cu ser testigo “te n’e parti mas lehano dje tera” relacioná cu su lugá clave den Jehova su propósito eterno. (Echonan 1:8; Efesionan 3:8-12) De echo, como sirbidónan di Jehova, e Dios cu ta revelá secreto, nos no ta tribi di warda e secreto aki pa nos mes!
Con Lo Bo Contestá?
◻ Kico ta e “secreto sagrado”?
◻ Con nos sa cu e mester ser publicá?
◻ Kico ta ocasioná e atake di Gog riba e pueblo di Jehova, i con nos mester considerá esaki?
◻ Kico nos cada un mester ta determiná pa haci?
[Kuadro na página 16]
Un “Secreto Sagrado” Cu A Ser Revelá Progresivamente
◻ Despues di 4026 P.E.C.: Dios ta primintí di lanta un Simia pa destruí Satanas.—Génesis 3:15
◻ 1943 P.E.C.: E pacto di Abraham a drenta na vigor, primintiendo cu e Simia lo a bini mediante Abraham.—Génesis 12:1-7
◻ 1918 P.E.C.: Nacementu di Isaac como heredero dje pacto.—Génesis 17:19; 21:1-5
◻ c. 1761 P.E.C.: Jehova ta confirmá cu e Simia lo bini mediante Jacob, yu di Isaac.—Génesis 28:10-15
◻ 1711 P.E.C.: Jacob ta indicá cu e Simia lo bini mediante su yu Huda.—Génesis 49:10
◻ 1070-1038 P.E.C.: Rey David ta haña sa cu e Simia lo ta su desendiente i lo goberná pa semper como Rey.—2 Samuel 7:13-16; Salmo 89:35, 36
◻ 29-33 E.C.: Jesus ta ser identificá como e Simia, e Mesías, e futuro hues i e Rey-Designá.—Juan 1:17; 4:25, 26; Echonan 10:42, 43; 2 Corintionan 1:20; 1 Timoteo 3:16
◻ Jesus ta revelá cu lo e tin co-gobernante i huesnan, cu e Reino celestial lo tin súbditonan terenal, i cu tur su siguidónan lo ta predicadónan di Reino.—Mateo 5:3-5; 6:10; 28:19, 20; Lucas 10:1-9; 12:32; 22:29, 30; Juan 10:16; 14:2, 3
◻ Jesus ta revelá cu e Reino lo ser establecé na un tempu definí, manera sucesonan di mundu ta confirmá.—Mateo 24:3-22; Lucas 21:24
◻ 36 E.C.: Pedro ta haña sa cu no-hudiunan tambe lo ta coheredero di Reino.—Echonan 10:30-48
◻ 55 E.C.: Pablo ta splica cu e coherederonan di Reino lo ser resucitá na inmortalidad i incorupcion durante Cristo su presencia.—1 Corintionan 15:51-54
◻ 96 E.C.: Jesus, gobernando ya caba riba su siguidónan ungí, ta revelá cu nan cantidad final lo ta 144.000.—Efesionan 5:32; Colosensenan 1:13-20; Revelacion 1:1; 14:1-3
◻ 1879 E.C.: Zion’s Watch Tower ta señalá na 1914 como un aña di gran nificacion den e realisacion dje “secreto sagrado” di Dios
◻ 1925 E.C.: The Watch Tower [E Toren di Vigilancia] ta splica cu e Reino a nace na 1914; e “secreto sagrado” tocante e Reino tin cu ser publicá.—Revelacion 12:1-5, 10, 17
[Plachinan na página 15]
Mescos cu nan Lider, Jesus, Testigonan di Jehova ta declará e Reino di Jehova públicamente