Pronto Dios lo usa su Reino pa kaba ku tur nos problemanan. E notisia ei ta asina bon ku tur hende mester tend’é. Hesus tabata ke pa su siguidónan kompartí e mensahe akí ku tur hende! (Mateo 28:19, 20) Kon Testigunan di Yehova ta kumpli ku e mandamentu ei di Hesus?

1. Kon Mateo 24:14 ta kumpliendo den nos tempu?

Hesus a bisa: “E bon notisia akí di e Reino lo ser prediká den henter e tera habitá.” (Mateo 24:14) Testigunan di Yehova ta partisipá ku goso den e trabou importante akí. Nos ta prediká e bon notisia rònt mundu na mas ku 1.000 idioma! E trabou inmenso akí ta rekerí hopi esfuerso i organisashon. Nos lo no por hasi e trabou akí sin Yehova su yudansa.

2. Ki esfuerso nos ta hasi pa prediká na hende?

Nos ta prediká tur kaminda ku nos por haña hende. Meskos ku e kristiannan di promé siglo, nos ta prediká “di kas pa kas.” (Echonan 5:42) E manera di prediká akí ta duna hopi bon resultado i ta permití nos papia ku miónes di hende tur aña. Debí ku no ta semper nos ta haña hende na kas, nos ta prediká na hopi lugá públiko tambe. Semper nos ta buska oportunidat pa konta otro hende tokante Yehova i su propósito.

3. Ken mester prediká e bon notisia?

Tur kristian berdadero mester prediká e bon notisia. Nos ta tuma e trabou di prediká na serio. Nos ta prediká mas tantu posibel pasobra nos sa ku esei ta salba bida di hende. (Lesa 1 Timoteo 4:16.) Niun hende no ta paga nos pa hasi e trabou akí, pasobra Beibel ta bisa: “Boso a risibí pòrnada, duna pòrnada.” (Mateo 10:7, 8) No ta tur hende ta skucha nos mensahe. Pero, nos ta sigui prediká pasobra e ta parti di nos adorashon i e ta hasi Yehova felis.

KIKO MAS NOS POR SIÑA?

4. Nos ta hasi esfuerso pa prediká na tur hende

VIDIO: Predikando te na “e Parti Mas Leu di Tera” (7:38)

• Kiko ta impreshoná bo di e esfuerso ku Testigunan di Yehova ta hasi pa prediká?

Lesa Mateo 22:39 i Romanonan 10:13-15. Despues, analisá e siguiente preguntanan:

• Kon e trabou di prediká ta mustra ku nos ta stima hende?

• Kon Yehova ta mira hende ku ta prediká e bon notisia?—Wak versíkulo 15.

5. Nos ta kompañero di trabou di Dios

Tin hopi eksperensia ku ta mustra ku Yehova ta dirigí nos trabou di prediká. Ban wak loke a sosodé na Nueva Zelandia. Un atardi, un Testigu di Yehova ku yama Paul tabata prediká di kas pa kas i a topa ku un señora. E mainta ei, e señora a hasi orashon na Dios usando Dios su nòmber, Yehova, i el a pidi pa un hende bishit’é i siñ’é tokante Dios. Paul a bisa: “Tres ora despues, mi tabata na su porta.”

Lesa 1 Korintionan 3:9. Despues, analisá e siguiente pregunta:

• Kon eksperensia manera esun na Nueva Zelandia ta mustra ku Yehova ta dirigí e trabou di prediká?

Lesa Echonan 1:8. Despues, analisá e siguiente pregunta:

• Dikon nos tin mester di Yehova su yudansa pa kumpli ku nos trabou di prediká?

Bo tabata sa?

Tur siman, na nos reunion di den siman, nos ta haña entrenamentu pa yuda nos prediká. Si bo a asistí na un di e reunionnan akí, kiko bo a pensa di e entrenamentu ku nos ta risibí?

6. Nos ta obedesé Dios su mandamentu pa prediká

Den promé siglo, e enemigunan di e siguidónan di Hesus a purba di stòp nan di prediká. E kristiannan di promé siglo a “defendé e bon notisia i establesé e derecho legal di predik’é.” (Filipensenan 1:7) Testigunan di Yehova ta hasi meskos awe.a

VIDIO: Defendiendo Nos Derecho di Prediká e Bon Notisia (2:28)

Lesa Echonan 5:27-42. Despues, analisá e siguiente pregunta:

• Dikon nos lo no stòp di prediká?—Wak versíkulo 29, 38 i 39.

RESÚMEN

Hesus a bisa su siguidónan pa prediká e bon notisia na tur nashon. Yehova ta yudando su pueblo pa hasi e trabou akí.

Repaso

• Kon e bon notisia ta ser prediká rònt mundu?

• Kon e trabou di prediká ta mustra ku nos ta stima hende?

• Bo ta kere ku e trabou di prediká por hasi nos felis? Dikon bo ta pensa esei?

MAS INFORMASHON INTERESANTE

Wak kon Testigunan di Yehova ta prediká na hende den stat grandi.

Predikashon Públiko Spesial den Área Metropolitano na Paris (5:11)

Kiko Testigunan di Yehova ta hasi pa yuda refugiado?

Nos Ta Satisfasé Set Spiritual di Refugiado (5:59)

Wak kon felis bo por ta si bo dediká bo bida na e trabou di prediká.

Kontentu di A Skohe e Karera Akí (6:28)

Wak kon algun desishon importante ku korte a tuma a yuda pa asina nos por a sigui prediká.

“Predikadónan di Reino Ta Hiba Nan Kaso Korte” (E Reino di Dios Ta Goberná!, kapítulo 13)

Hesus a bisa ku tur kristian mester batisá. (Lesa Mateo 28:19, 20.) Pero kiko boutismo ta, i kiko un persona mester hasi pa logra e meta ei?

1. Kon mester batisá un persona?

E palabra “batisá” ta bini for di un ekspreshon griego ku ta nifiká “ser di dòp,” òf hinká kompletamente bou di awa. Ora Hesus a batisá, el a ser hinká kompletamente bou di awa den riu Hordan. I despues, el a “sali for di awa.” (Marko 1:9, 10) Meskos ku Hesus, ora un kristian batisá, e ta ser di dòp, òf hinká kompletamente bou di awa.

2. Kiko un hende ta demostrá ora e batisá?

Ora un persona batisá, e ta demostrá ku el a dediká su mes na Yehova Dios. Kon un persona ta hasi un dedikashon na Dios? Promé ku e batisá, e ta bisa Yehova den orashon ku e ke sirbié pa semper. E ta primintí ku lo e adorá Yehova so i ku lo e pone Dios su boluntat na promé lugá den su bida. E ta skohe pa “nenga su mes . . . i sigui” Hesus su ehèmpel i su siñansanan. (Mateo 16:24) Ora e dediká su mes na Dios i batisá, ta bira posibel pa e tin un amistat será ku Yehova i ku otro hende ku ta sirbi Yehova.

3. Kiko un persona mester hasi pa e por batisá?

Promé ku bo por batisá, bo tin ku siña tokante Yehova i fortalesé bo fe den dje. (Lesa Hebreonan 11:6.) Segun ku bo konosementu i fe ta krese, bo amor pa Yehova tambe lo krese. E ora ei, lo bo haña gana di prediká tokante dje i biba di akuerdo ku su normanan. (2 Timoteo 4:2; 1 Huan 5:3) Unabes un persona ta biba “na un manera digno di Yehova a fin di agrad’é plenamente,” e por disidí di dediká su bida na Dios i batisá.—Kolosensenan 1:9, 10.a

KIKO MAS NOS POR SIÑA?

4. Loke nos por siña for di e boutismo di Hesus

Lesa Mateo 3:13-17 pa haña sa mas detaye tokante e boutismo di Hesus. Despues, analisá e siguiente preguntanan:

• Hesus a batisá na bebi?

• Kon Hesus a ser batisá? Nan a djis sprengu awa riba dje?

Despues ku Hesus a batisá, el a kuminsá ku e trabou spesial ku Dios a dun’é pa hasi aki riba tera. Lesa Lukas 3:21-23 i Huan 6:38. Despues, analisá e siguiente pregunta:

• Despues ku Hesus a batisá, ki trabou el a pone na promé lugá den su bida?

5. Bo por logra bo meta pa batisá!

Kisas ora bo kuminsá pensa riba dedikashon i boutismo, bo por haña miedu. Sinembargo, segun ku bo ta progresá, lo bo haña mas konfiansa pa tuma e desishon importante ei. Pa mira ehèmpel di algun persona ku a hasi esei, pasa e VIDIO.

VIDIO: Kultivá un Bon Amistat ku Yehova (1:11)

Lesa Huan 17:3 i Santiago 1:5. Despues, analisá e siguiente pregunta:

• Kiko por yuda un persona yega na boutismo?

1. Ora nos dediká nos mes na Yehova, nos ta bis’é ku nos ke sirbié pa semper

2. Ora nos batisá, nos ta demostrá públikamente ku nos a dediká nos mes na Dios

6. Ora nos batisá, nos ta bira parti di Yehova su famia

Ora nos batisá, nos ta bira parti di un famia mundial ku ta uní. Aunke nos ta di diferente pais i tin otro kultura i kustumber, nos tur tin e mesun kreensianan i ta biba di akuerdo ku e mesun norma- i balornan. Lesa Santiago 2:23 i 1 Pedro 2:17. Despues, analisá e siguiente pregunta:

• Kon un persona su relashon ku Yehova i su amistat ku otro sirbidó di Yehova lo bira despues di boutismo?

RESÚMEN

Hesus a bisa ku tur kristian mester batisá. Promé ku un persona batisá, e mester fortalesé su fe den Yehova, biba segun su normanan i dediká su mes na dje.

Repaso

• Kon mester batisá un persona, i dikon boutismo ta importante?

• Kiko un persona ta demostrá ora e batisá?

• Kiko un persona mester hasi promé ku e dediká su mes na Yehova i batisá?

MAS INFORMASHON INTERESANTE

Haña sa kiko boutismo ta i kiko ta algun idea robes tokante boutismo.

“Kiko Ta Boutismo?” (artíkulo riba jw.org)

Wak algun kos ku un persona por hasi pa yega na boutismo.

“Amor pa Yehova Lo Motivá Bo pa Batisá” (E Toren di Vigilansia di mart 2020)

Lesa kiko a motivá un hòmber pa batisá.

“Nan Tabata Ke pa Mi Mes Wak Kiko Beibel Ta Siña” (E Toren di Vigilansia di 1 di febrüari 2013)

Wak dikon boutismo ta un meta ku ta bale la pena i kiko bo tin ku hasi pa logra e meta ei.

“Mi Mester Batisá?” (Loke Hóben Sa Puntra—Kontesta Práktiko, Tomo 2, kapítulo 37, na spañó)