“Bai i Hasi . . . Disipel”

1-3. (a) Kiko un kunukero ta hasi ora e kosecha ta muchu hopi p’e so rekoh’é? (b) Ki reto Hesus a konfrontá den lènte di aña 33, i kon el a solushoná e situashon?

PENSA riba e reto ku un kunukero ta konfrontá den e siguiente senario. Algun luna promé e kunukero a plug su tereno i sembra simia. Ku hopi interes el a wak e promé blachinan kuminsá sali, i ku satisfakshon a mira e planchinan krese bira grandi. Tempu di kosecha a yega, i awor lo e ser rekompensá pa tur su trabou duru. Pero e tin un dilema: E kosecha ta muchu hopi p’e so rekoh’é. Pa resolvé e problema aki, e ta tuma e desishon sabí di kontratá algun trahadó i ta manda nan bai kosechá den su kunuku. E kos ta ku e tempu pa rekohé su kosecha presioso ta limitá.

² Den lènte di aña 33 di nos era, Hesus resusitá a konfrontá un reto similar. Durante su ministerio terenal, el a sembra simianan di e bèrdat. Awor tabatin un kosecha abundante pa rekohé. Hopi hende ku a reakshoná faborablemente mester a ser rekohé pa bira disipel. (Juan 4:35-38) Kon Hesus a resolvé e problema aki? Riba un seru na Galilea, djis promé ku el a subi na shelu, el a duna su disipelnan un enkargo ku lo a resultá den mas trahadó, bisando: “Bai i hasi tur e nashonnan disipel di mi, i batisá nan . . . i siña nan pa kumpli ku tur loke mi a ordená boso.”—Mateo 28:19, 20.

³ E enkargo ei ta un aspekto fundamental di loke ta nifiká ser un berdadero siguidó di Kristu. P’esei laga nos analisá tres pregunta. Dikon Hesus a duna e enkargo pa haña mas trahadó? Kon el a entrená su disipelnan pa hasi esaki? Kon nos ta enbolbí den e enkargo aki?

Pakiko Tabatin Mester di Mas Trahadó

4, 5. Dikon Hesus lo no por a kaba ku e trabou ku el a kuminsá kuné, i ken lo tabatin ku sigui ku e trabou despues ku el a bai shelu bèk?

⁴ Ora Hesus a kuminsá ku su ministerio na aña 29, e tabata sa ku el a inisiá un trabou ku riba su mes lo e no a kaba kuné. E área ku lo e por a abarká i e kantidat di hende ku lo e por a alkansá ku e mensahe di Reino, den e tempu kòrtiku ku a rest’é riba tera, tabata limitá. Ta bèrdat ku el a limitá su predikashon prinsipalmente na hende hudiu i prosélito, “e karnénan pèrdí di e kas di Israel.” (Mateo 15:24) Sin embargo, e “karnénan pèrdí” ei tabata plamá den henter Israel, un pais ku a abarká míles di kilometer kuadrá. Ademas, ku tempu lo mester a hiba e bon nobo na e restu di e kampo mundial.—Mateo 13:38; 24:14.

⁵ Hesus a rekonosé ku despues di su morto lo a keda hopi trabou pa hasi. El a bisa su 11 fiel apòstelnan: “Di bèrdat, di bèrdat, mi ta bisa boso, esun ku kere den mi, e obranan ku mi ta hasi e tambe lo hasi; i obranan mas grandi ku esakinan e lo hasi, pasobra mi ta bai serka e Tata.” (Juan 14:12) Siendo ku e Yu lo a bai shelu bèk, ta su siguidónan—no solamente e apòstelnan sino tambe tur futuro disipel—lo tabatin ku kontinuá ku e trabou di prediká i siña hende. (Juan 17:20) Hesus a rekonosé humildemente ku nan obranan lo ta “mas grandi” ku esnan di dje. Kon asina? Den tres manera.

6, 7. (a) Den ki manera e obranan ku e siguidónan di Hesus lo a hasi lo ta mas grandi ku esnan di dje? (b) Kon nos por demostrá ku Hesus no a kiboká su mes ora ku el a pone su konfiansa den su siguidónan?

⁶ Di promé, e siguidónan di Hesus lo a kubri mas teritorio. Awe, nan predikashon a yega den tur skina di e tera, hopi mas leu ku e fronteranan di e pais kaminda Hesus mes a prediká. Di dos, nan lo a alkansá mas hende. E grupo chikí di disipel ku Hesus a laga atras, rápidamente a krese bira míles di persona. (Echonan 2:41; 4:4) Awor nan ta miónes, anto sientos di míles di hende nobo ta batisá tur aña. Di tres, nan lo a prediká pa un tempu mas largu; te ku awe nan ta prediká, kasi 2.000 aña despues ku Hesus su ministerio di tres aña i mei a terminá.

⁷ Bon mirá, Hesus a ekspresá konfiansa den su siguidónan ora ku el a bisa ku nan lo hasi “obranan mas grandi ku esakinan.” El a laga den nan man un obra ku tabata di sumo importansia p’e, e trabou di prediká i siña hende e bon nobo di “e reino di Dios.” (Lukas 4:43) Hesus tabata konvensí ku nan lo a kumpli ku e asignashon fielmente. Kiko esaki ta nifiká pa nos awe? Ku ora nos ta dediká nos mes na e ministerio ku selo i ku henter nos kurason, nos ta demostrá ku Hesus no a kiboká su mes ora ku el a pone su konfiansa den su siguidónan. Esaki no ta un privilegio remarkabel?—Lukas 13:24.

Entrená pa Duna Testimonio

8, 9. Ki ehèmpel Hesus a pone den e ministerio, i kon nos por imitá su ehèmpel den nos ministerio?

⁸ Hesus a duna su disipelnan e mihó entrenamentu ku tabatin pa e ministerio. Mas ku tur kos, el a pone un ehèmpel perfekto pa nan. (Lukas 6:40) Den e kapítulo anterior, nos a konsiderá su aktitut relashoná ku e ministerio. Pensa un ratu riba e disipelnan ku a biaha huntu ku Hesus durante su giranan di predikashon. Nan a opservá ku e tabata prediká unda ku tabatin hende: kantu di awa i na barika di seru, den stat i na plasa, i den kasnan privá. (Mateo 5:1, 2; Lukas 5:1-3; 8:1; 19:5, 6) Nan a mira ku e tabata un persona trahadó, ku a lanta mainta trempan i a sirbi te anochi lat. E ministerio no tabata djis un hòbi ku e tabata okupá su mes kuné den su tempu liber! (Lukas 21:37, 38; Juan 5:17) Sin duda nan a ripará ku ta amor profundo pa hende a motivá Hesus. Kisas nan a mira den su kara e kompashon ku el a sinti den su kurason. (Marko 6:34) Ki efekto bo ta kere e ehèmpel di Hesus tabatin riba su disipelnan? Kon lo el a influensiá abo?

⁹ Komo siguidó di Kristu, nos ta imitá su ehèmpel den nos ministerio. P’esei nos ta probechá di tur oportunidat pa duna “testimonio kabal.” (Echonan 10:42, NW) Meskos ku Hesus, nos ta bishitá hende na nan kas. (Echonan 5:42) Si ta nesesario, nos ta ahustá nos programa pa bishitá nan ora ku nos tin mas chèns di haña nan na kas. Ademas, nos ta buska hende na lugánan públiko i ta prediká na nan diskretamente; sea ta riba kaya, den parke, den tienda i na nos trabou. Nos ta sigui “traha duru i ta hasi esfuerso” den e ministerio, pasobra nos ta tuma e trabou aki na serio. (1 Timoteo 4:10, NW) Amor profundo i sinsero pa otro hende ta motivá nos pa sigui buska oportunidat pa prediká tur kaminda i tur momento ku nos por haña hende.—1 Tesalonisensenan 2:8.

10-12. Ki lèsnan importante Hesus a siña su disipelnan promé ku el a manda nan bai prediká?

¹⁰ Un otro manera ku Hesus a entrená su disipelnan tabata dor di duna nan instrukshonnan detayá. Promé ku el a manda e 12 apòstelnan i despues e 70 disipelnan bai prediká, el a tene loke nos por yama seshonnan di entrenamentu. (Mateo 10:1-15; Lukas 10:1-12) E entrenamentu a duna bon resultado, pasobra Lukas 10:17 ta informá: “E setentanan a bolbe ku goso.” Laga nos konsiderá dos lès importante ku Hesus a siña nan, pero nos tin ku kòrda ku mester komprondé su palabranan den lus di e kustumbernan hudiu den tempu bíbliko.

¹¹ Hesus a siña su disipelnan pa konfia den Yehova. El a bisa nan: “No buska oro, ni plata, ni koper pa hiba den boso faha; ni saku pa biaha kuné, ni dos túnika, ni sandalia, ni garoti; pasobra e trahadó ta digno di su mantenshon.” (Mateo 10:9, 10) E tempu ei biaheronan tabatin e kustumber di kana ku un faha ku a fungi komo pòtmòni, un saku i un èkstra par di sandalia.a Ora Hesus a instruí su disipelnan pa no wòri tokante e kosnan ei, de echo e tabata bisando: “Pone boso pleno konfiansa den Yehova, pasobra lo e sòru pa boso nesesidatnan.” Yehova lo a perkurá pa nan dor di motivá e hendenan ku a aseptá e bon nobo pa mustra hospitalidat na nan, lokual tabata un kustumber den Israel.—Lukas 22:35.

¹² Hesus a siña su disipelnan tambe pa evitá distraishonnan innesesario. E di: “No saludá ningun hende na kaminda.” (Lukas 10:4) Akaso Hesus tabata ke pa nan trata hende na un manera friu òf seku? Klaru ku nò. Den tempu bíbliko, saludá un hende a enserá mas ku djis bisa ‘kumbai.’ Saludonan di kustumber a enserá vários formalidat i kòmbersashonnan masha largu. Un komentarista bíbliko a deklará: “Hende di Oriente no tabata kumindá otro ku djis bùig kabes òf duna man, manera serka nos, sino mas bien [a] efektuá hopi brasamentu i bùigmentu, i asta tiramentu di kurpa plat abou riba suela. Tur esaki a rekerí hopi tempu.” P’esei ora Hesus a bisa su disipelnan pa no partisipá den e saludamentu di kustumber, de echo e tabata bisando: “Usa boso tempu mas efikasmente posibel, pasobra e mensahe ku boso ta hiba ta urgente.”b

13. Den ki maneranan nos por demostrá ku nos ta tuma na pechu e instrukshonnan ku Hesus a duna su disipelnan di promé siglo?

¹³ Nos ta tuma na pechu e instrukshonnan ku Hesus a duna su disipelnan di promé siglo. Ora nos ta efektuá nos ministerio, nos ta pone nos pleno konfiansa den Yehova. (Proverbionan 3:5, 6) Nos sa ku nunka nos lo falta e nesesidatnan di bida si nos sigui “buska promé e reino di Dios.” (Mateo 6:33) Predikadónan di Reino di tempu kompletu na tur parti di mundu por konfirmá ku asta durante tempu difísil, Yehova su man nunka ta kòrtiku. (Salmo 37:25) Nos ta rekonosé tambe ku ta nesesario pa evitá kosnan ku por kita nos atenshon for di e ministerio. Si nos no tene kuidou, e sistema di kosnan aki por desviá nos fásilmente. (Lukas 21:34-36) Sin embargo, awor no ta tempu pa ser distraí. Bida di hende ta den wega, p’esei nos mensahe ta urgente. (Romanonan 10:13-15) Si nos mantené un sentido di urgensia den nos kurason, esei lo yuda nos pa no laga e distraishonnan di e mundu aki apsorbá e tempu i energia ku nos lo por a usa mihó den e ministerio. Kòrda, e tempu ku a resta ta kòrtiku i e kosecha ta grandi.—Mateo 9:37, 38.

Un Trabou Ku Ta Enbolbé Nos Tur

14. Kiko ta indiká ku e enkargo ku tin na Mateo 28:18-20 ta apliká na tur siguidó di Kristu? (Wak tambe e nota na pia di página.)

¹⁴ Ku e palabranan “Bai i hasi . . . disipel,” Hesus resusitá a pone un responsabilidat pisá riba su siguidónan. No ta e disipelnan so ku tabata presente e dia ei riba seru di Galilea e tabatin na mente.c E trabou ku el a enkargá nan a enserá yega na hende di “tur e nashonnan,” i e trabou ta sigui “te na fin di mundu.” Ta bisto anto ku e enkargo aki ta apliká na tur siguidó di Kristu, inkluso nos awe. Laga nos analisá e palabranan di Hesus na Mateo 28:18-20.

15. Dikon ta sabí pa nos obedesé Hesus su mandamentu pa hasi disipel?

¹⁵ Promé ku el a duna e enkargo, Hesus a bisa: “Tur outoridat a wòrdu duná na mi den shelu i riba tera.” (Versíkulo 18) Di bèrdat Hesus tin un outoridat asina grandi? Sí! E ta e arkangel ku ta na kabes di míles i míles di angel. (1 Tesalonisensenan 4:16; Revelashon 12:7) Komo ‘kabes di e kongregashon,’ e tin outoridat riba su siguidónan riba tera. (Efesionan 5:23) For di aña 1914, e ta goberná komo Rei Mesiániko den shelu. (Revelashon 11:15) Su outoridat ta yega asta te den graf, pasobra e tin e poder pa resusitá e mortonan. (Juan 5:26-28) E echo ku Hesus a deklará promé kon ekstenso su outoridat ta, ta indiká ku e palabranan ku a sigui no ta un sugerensia sino un mandamentu. Ta sabí di nos parti pa obedes’é, pasobra no ta é a tuma e outoridat ei riba su mes sino ta Dios a dun’éle.—1 Korintionan 15:27.

16. Ora Hesus a bisa nos pa “bai,” ta kiko el a manda nos hasi, i kon nos ta kumpli ku e aspekto aki di e enkargo?

¹⁶ Despues Hesus a deskribí e enkargo, ku ta kuminsá ku un solo palabra: “Bai.” (Versíkulo 19) Pues el a manda nos tuma e inisiativa pa hiba e mensahe di Reino na otro hende. Pa nos kumpli ku e aspekto aki di nos enkargo, nos por usa vários método. Un di nan ta e predikashon di kas pa kas; esei ta un manera masha efektivo pa hasi kontakto personal ku hende. (Echonan 20:20) Tambe nos ta buska oportunidat pa duna testimonio informalmente; nos ta ansioso pa kuminsá un kòmbersashon tokante e bon nobo na unda ku ta apropiá durante nos bida diario. Nos métodonan spesífiko di prediká por varia, ya ku nos ta adaptá nan na e nesesidat- i sirkunstansianan lokal. Pero un kos sí ta keda meskos: Nos ta “bai” i buska hende ku ta digno di e mensahe.—Mateo 10:11.

17. Kon nos ta ‘hasi disipel’?

¹⁷ Siguientemente Hesus a splika e meta di e enkargo, esta, pa ‘hasi disipel.’ (Versíkulo 19) Kon nos ta ‘hasi disipel’? Básikamente, un disipel ta un persona ku ta den e proseso di siña, ku ta hañando siñansa. Sin embargo, hasi disipel no ta djis un asuntu di duna konosementu na otro hende. Ora nos ta studia Beibel ku personanan interesá, nos meta ta pa yuda nan bira siguidó di Kristu. Ki ora ku ta posibel, nos ta enfatisá e ehèmpel di Hesus di manera ku nos studiantenan ta siña wak riba dje komo nan Maestro i Modelo, bibando manera el a biba i hasiendo e trabou ku el a hasi.—Juan 13:15.

18. Dikon boutismo ta e logro di mas importante den bida di un disipel?

¹⁸ Un parti masha importante di e enkargo ta ser ekspresá den e palabranan: “Batisá nan den nòmber di e Tata i di e Yu i di e spiritu santu.” (Versíkulo 19) Boutismo ta e logro di mas importante den bida di un disipel, pasobra e ta un símbolo apropiá di e dedikashon di henter kurason ku el a hasi na Dios. Pues, e ta esensial pa salbashon. (1 Pedro 3:21) Sí, e disipel batisá ku ta sigui hasi su bèst pa sirbi Yehova, por antisipá bendishonnan eterno den e mundu nobo ku ta na kaminda. Abo a yega di yuda un hende bira un disipel batisá di Kristu? Den e ministerio kristian, no tin un motibu mas grandi di goso ku esei.—3 Juan 4.

19. Kiko nos ta siña hende nobo, i dikon kisas nos lo tin ku sigui siña nan despues ku nan batisá?

¹⁹ Hesus a splika e siguiente parti di su enkargo, bisando: “Siña nan pa kumpli ku tur loke mi a ordená boso.” (Versíkulo 20) Nos ta siña hende nobo obedesé e mandamentunan di Hesus, entre otro, e mandamentunan pa stima Dios, stima próhimo i hasi disipel. (Mateo 22:37-39) Progresivamente nos ta siña nan kon pa splika bèrdatnan bíbliko i defendé nan fe ku ta kresiendo. Ora nan ta kualifiká pa partisipá den e predikashon públiko, nos ta traha huntu ku nan, i ta siña nan mediante palabra i ehèmpel kon nan por hasi e trabou aki na un manera produktivo. No ta tur biaha nos ta kaba di siña disipelnan nobo promé ku nan batisá. Personanan resien batisá kisas tin mester di mas instrukshon pa yuda nan trata ku e retonan ku hende ku ta sigui Kristu ta haña nan kuné.—Lukas 9:23, 24.

“Mi Ta ku Boso Semper”

20, 21. (a) Dikon nos no tin nodi tene miedu segun ku nos ta kumpli ku e enkargo ku Hesus a duna? (b) Dikon awor no ta tempu pa nos bai pokopoko, i kiko lo mester ta nos determinashon?

²⁰ E último palabranan di Hesus su enkargo ta masha trankilisante: “Mira, mi ta ku boso semper, te na fin di mundu.” (Mateo 28:20) Hesus a rekonosé ku e asignashon aki ta unu di peso. E tabata sa tambe ku ora nos ta kumpli kuné esei tin biaha ta provoká reakshonnan agresivo di parti di opositornan. (Lukas 21:12) Sin embargo, nos no tin nodi tene miedu. Nos Lider no ta spera di nos pa nos kumpli ku e asignashon aki sin yudansa òf nos so. No ta un konsuelo pa sa ku Esun ku tin “tur outoridat . . . den shelu i riba tera” ta ku nos pa sostené nos segun ku nos ta kumpli ku e enkargo aki?

²¹ Hesus a sigurá su disipelnan ku lo e ta ku nan den e ministerio atraves di siglonan te “na fin di mundu.” Tanten ku e fin no bin, nos tin ku sigui kumpli ku e enkargo di Hesus. Awor no ta tempu pa bai pokopoko. Tin un kosecha spiritual abundante ta tumando lugá! Personanan ku ta reakshonando faborablemente ta ser rekohé na gran kantidat. Komo siguidó di Kristu, laga nos ta determiná pa kumpli ku e enkargo importante ku Hesus a konfia na nos. Laga nos ta determiná pa duna di nos tempu, energia i rekursonan pa kumpli ku e mandamentu di Kristu: “Bai i hasi . . . disipel.”