Bo Tabata Sa?

Ki kustumber hudiu a pone Hesus kondená huramentu?

SEGUN e Lei di Moises, tin biaha tabata apropiá pa hende hasi un huramentu. Sinembargo, den tempu di Hesus, hende tabata hura asina tantu ku nan tabatin e kustumber di hura despues di kada kos ku nan a bisa pa reafirmá esei. Nan tabata hasi esaki pa duna peso na loke nan tabata bisa. Pero dos biaha Hesus a kondená nan pa esei. En bes di esei, el a siña nan: “Simplemente, laga boso ‘sí’ ta sí, i boso ‘nò,’ nò.”—Mat. 5:33-37; 23:16-22.

Segun Theological Dictionary of the New Testament, den algun pasashi di e Talmut nos por mira kon “komun tabata pa e hudiunan hasi un huramentu pa konfirmá tur loke nan tabata bisa.” E Talmut ta bisa presis ki huramentu hende por a kibra i kua no.

No ta Hesus so a kondená e kustumber ei. Por ehèmpel, e historiadó hudiu Flavio Hosefo a bisa di un sekta hudiu: “Nan tabata evitá di hura i tabata konsider’é pió ku gaña bou di huramentu, pasobra nan tabata bisa ku si hende no kere loke bo a bisa komo ku bo no a hura na Dios, bo ta kondená kaba.” E buki apókrifo hudiu konosí komo Sirag, òf Eklesiástiko, (23:11) tambe ta bisa: “Esun ku ta hura hopi, ta peka hopi.” Pues Hesus a kondená e echo ku hende no tabata tuma huramentu na serio. Si tur ora nos ta papia bèrdat, nos no tin nodi di hura pa duna peso na nos palabranan.