E Punto Di Bista Biblico

Ta Tres Rey A Bishitá Jesus na Betlehem?

DESPUES cu Jesus a nace, personanan prominente for di Oriente a yega Betlehem pa rindié homenahe como rey di hudiu. Te awe hopi hende rond mundu cu ta celebrá Pascu ta conmemorá e bishita ei.

Na algun lugá hende ta traha esenanan di pesebre cu ta mustra e bishitantenan oriental como tres rey cu ta bini cu regalo cerca Jesus recien nací. Den otro paisnan, muchanan ta cana rond den nan bario bistí na trahe di “e Reynan Santu.” Despues di 20 siglo, ainda hende na tur parti ta corda e bishitantenan poco comun ei. Ken precis nan tabata?

Nan Tabata Rey?

Nos ta haña e registro histórico dje suceso aki den e buki bíblico di Mateo. Ei nos ta lesa: “Despues di Jesus su nacementu . . . un dia astrólogonan for di oriente a yega Jerusalem puntrando: ‘Unda e rey di hudiu recien nací ta? Nos a mira su strea ora el a sali i a bini pa rindié homenahe.’ ” (Mateo 2:1, 2, New American Bible) Di con e traduccion di Bijbel aki ta yama e bishitantenan for di Oriente astrólogo i no rey?

E texto aki ta usa e forma plural dje palabra griego má·gos. Vários traduccion di Bijbel ta traducié como “sabionan,” “astrólogonan” of “hende cu ta wak strea,” of nan ta simplemente transliterá e palabra como ‘mago.’ E palabra aki ta referí na esnan cu ta duna conseho i ta haci pronóstico basá riba e posicion dje strea i planetanan. Pues Bijbel ta identificá e bishitantenan na Betlehem como adivinadónan, kendenan tabata usa prácticanan oculto cu Dios a desaprobá.—Deuteronomio 18:10-12.

Nan tabata rey tambe? Si tabata asina, ta razonabel pa verwagt cu Bijbel lo a identificá nan como tal. Mateo 2:1-12 ta usa e palabra “rey” cuater biaha, un biaha e ta referí na Jesus i tres biaha na Herodes. Pero niun biaha e no ta yama e magonan rey. Riba e punto aki The Catholic Encyclopedia ta declará: “Ningun Tata di Iglesia ta bisa cu e magonan tabata rey.” Bijbel tampoco no ta bisa esei.

Nan Tabata Tres?

E registro bíblico no ta mencioná e cantidad di mago. No obstante, esenanan di pesebre i canticanan di Pascu ta apoyá e opinion tradicional cu nan tabata tres. Evidentemente esaki a sali for dje echo cu tabatin tres tipo di regalo. Bijbel ta bisa relacioná cu nan: “Tambe nan a habri nan tesoronan i a presentá regalonan na [Jesus], oro i olíbano i mirra.”—Mateo 2:11.

Ta lógico pa concluí cu como cu e magonan a duna tres diferente regalo, nan mester tabata tres? Laga nos considerá e relato di un otro bishitante prominente na Israel. E reina di Saba un biaha a bishitá rey Sálomon i a regal’é “zeta di bálsamo i masha hopi oro i piedra precioso.” (1 Reynan 10:2) Aunke Bijbel ta papia di tres diferente tipo di regalo, e único persona cu e ta bisa a duna nan ta e reina di Saba. E cantidad di su regalonan no a indicá cu ta tres hende a acercá Sálomon n’e ocasion ei. Mescos anto, e tres regalonan cu nan a duna Jesus casi no tin nada di haci cu e cantidad di hende cu a trece nan.

The Catholic Encyclopedia ta comentá: “E relato dje Evangelio no ta mencioná e cantidad di mago, i no tin un tradicion specífico den e asuntu aki. Tin dje Tatanan a papia di tres mago; muy probablemente nan a ser influenciá dor dje cantidad di regalo.” E enciclopedia ta sigui bisa cu vários obra di arte ta mustra dos, tres, cuater i asta ocho mago ta bishitá Jesus. Tin tradicion ta na fabor di 12. Simplemente no tin ningun manera pa verificá e cantidad di mago.

Un Relato Popular Pero Inexacto

Contrario na creencia popular, e magonan a yega Jerusalem promé i no Betlehem, despues cu Jesus a nace. Nan no tabata presente na e ocasion di Jesus su nacementu. Despues, ora nan a bai Betlehem, Bijbel ta bisa cu “ora nan a drenta den e cas nan a mira e mucha.” (Mateo 2:1, 11) Pues, ta bisto cu pa ora e magonan a bishitá Jesus, su famia a muda pa un cas normal. Nan no a haña Jesus den un pesebre.

Den lus dje Scritura, e cuenta popular dje tres reynan cu ta onra Jesus ora el a nace, no ta exacto. Manera a ser mencioná ariba, Bijbel ta siña cu e magonan cu a bishitá Jesus no tabata rey sino astrólogo cu a practicá ocultismo. E registro bíblico no ta bisa cuantu nan tabata. Ademas, nan no a bishitá Jesus ora el a nace, ora e tabata den un pesebre, sino mas bien, poco tempu despues, ora su famia tabata biba den un cas.

Por lo general hende ta mira e relato popular dje tres reynan i otro cuentanan tradicional di Pascu, maske nan ta bíblicamente inexacto, como cuentanan inofensivo di dianan di fiesta. Sin embargo, cristiannan ta duna masha balor na un forma di adoracion cu ta liber di falsedad. Asina Jesus mes a pensa tambe. Den oracion na su Tata, el a bisa un biaha: “Bo palabra ta e berdad.” (Juan 17:17) El a bisa cu “berdadero adoradónan lo adorá e Tata cu spiritu i cu berdad, pasobra, en realidad, e Tata ta busca hende asina pa ador’é.”—Juan 4:23.

[Plachi na página 25]

“Adoracion dje Magonan”