Haci Sigur di Pone Cosnan Importante na Promé Luga!

Awenochi tin reunion, pero bo tin cos di haci. Kico lo bo pone na promé lugá?

BO TA un esposo i tata. Ora un dia largu i duru di trabou ta yegando su fin, bo ta cuminsá pensa riba e reunion di congregacion cu ta programá p’e anochi ei. Si bo sali mesora despues di trabou, lo bo tin tempu net pa dal un baño, cambia paña i come algu leve promé cu bo bai reunion. Di ripiente, bo doño di trabou ta acercá bo i e ta pidí bo pa traha overtime. E ta primintí di duná bo un bon pago. I abo mester dje cen.

Of bo ta un esposa i mama. Preparando cena, bo wowo ta cai riba un bonder di paña cu no ta striká ainda, i algun di nan ta pa bisti mañan. Bo ta puntra bo mes: ‘Si mi bai reunion awenochi, ki ora lo mi haña chens di strika?’ Bo a caba di cuminsá traha un trabou di ocho ora, i ta ripará con difícil ta pa percurá pa bo responsabilidadnan di famia, miéntras bo ta gana bo pan.

Of bo ta un alumno. Den bo kamber, riba bo lesenar, tin bòshi di huiswerk. Mayoria di nan ta tareanan cu bo a haña for di algun tempu pasá, pero bo a posponé nan, i awor bo tin cu haci vários di nan pareu. Bo tin gana di pidi bo mayornan si bo mag keda cas sin bai reunion, pa bo caba cu bo huiswerk.

Cua di nan abo lo pone na promé lugá: traha overtime, strika paña, traha huiswerk of bai reunion di congregacion? Kico kier men, den un sentido spiritual, pone cosnan importante na promé lugá? Kico ta Jehova su punto di bista?

Kico Mester Bini na Promé Lugá?

Djis despues cu e israelitanan a ricibí e Dies Mandamentu, a descubrí un homber ta piki palu riba sabat. E Ley a prohibí esaki estrictamente. (Númeronan 15:32-34; Deuteronomio 5:12-15) Con abo lo a husga den e caso aki? Lo bo a despensá e homber, cu e argumento cu tog e no tabata trahando pa hiba un bida luhoso, sino pa percurá p’e necesidadnan di su famia? Lo bo a razoná cu durante un aña lo bai tin hopi oportunidad pa warda sabat, i cu si e homber falta unu, kisas dor cu e no a planea di antemano, lo por a pordon’é numa?

Jehova a mira e asuntu como algu mas serio. “Cu tempu,” Bijbel ta bisa, “Jehova a bisa Moises: ‘Sin falta e homber mester ser matá.’” (Númeronan 15:35) Pakico Jehova tabatin un sintimentu asina fuerte pa loke e homber a haci?

E pueblo tabatin seis dia pa nan recogé palu i tambe atendé nan necesidadnan di cuminda, paña i cas. Nan mester a dedicá e di shete dia na nan necesidad spiritual. Aunke piki palu riba su mes no tabata malu, tabata robes pa piki palu durante e tempu cu nan mester a apartá pa adorá Jehova. Aunke cristiannan no ta bou di Ley di Moises, e incidente aki no ta siña nos un les tocante con pa pone prioridad awe?—Filipensenan 1:10.

Despues cu nan a pasa 40 aña den desierto, e israelitanan tabata cla pa drenta e Tera Primintí. Algun di nan a cansa di come mana cu Dios a percurá i sin duda nan tabata anhelá pa haña algu otro pa come. Pa yuda nan mantené un punto di bista apropiado ora nan tabata cerca di drenta e tera “cu ta abundá cu lechi i miel,” Jehova a recordá nan: “Hende no ta biba di pan so, sino di tur expresion cu ta sali for di boca di Jehova hende ta biba.”—Exodo 3:8; Deuteronomio 8:3.

E israelitanan lo tabatin cu traha duru pa nan “lechi i miel.” Nan mester a vence ehércitonan, traha cas i planta cunucu. I tog, Jehova a manda e pueblo pa apartá tempu tur dia pa meditá riba cosnan spiritual. Tambe nan tabatin cu tuma tempu pa siña nan yunan e caminda di Dios. Jehova a bisa: “Tambe boso tin cu siña [mi mandamentunan] na boso yunan, pa papia di nan ora boso ta sinta den boso cas i ora boso ta cana riba caminda i ora boso ta drumi i ora boso ta lanta.”—Deuteronomio 11:19.

Tres bes pa aña tur homber israelita i prosélito den e tera mester a aparecé dilanti Jehova. Sabiendo cu e famia completo lo a saca beneficio spiritual for di e ocasionnan aki, hopi cabes di famia a haci areglo pa nan casá i yunan compañá nan. Pero ken lo a protehá nan cas i cunucu for di atakenan di enemigu ora cu e famia no tabat’ei? Jehova a primintí: “Ningun hende lo deseá bo tereno miéntras bo ta subiendo pa mira e cara di Jehova bo Dios tres bes pa aña.” (Exodo 34:24) Fe tabata necesario pa e israelitanan kere cu, si nan pone interesnan spiritual na promé lugá, nan lo no a sali perdí den sentido material. Jehova a cumpli cu su palabra? Sigur cu sí!

Sigui Busca Promé e Reino

Jesus a siña su disipelnan pa pone cosnan spiritual promé cu tur otro cos. Den e Sermon Riba Ceru, el a consehá su oyentenan: “Nunca sea anshá i bisa: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ Sigui . . . busca promé e reino i Su husticia, i tur e cosnan [material necesario] aki lo ser agregá na boso.” (Mateo 6:31, 33) Pronto despues di Jesus su morto, cristiannan cu a caba di bautisá a sigui e conseho ei. Hopi di nan tabata hudiu of prosélito hudiu cu a biaha bai Jerusalem pa celebrá e fiesta di Pentecoste na 33 E.C. Ora nan tabata ei, algu inesperá a sosodé. Nan a tende i a brasa e bon nobo tocante Jesucristo. Ansioso pa siña mas di nan fe recien, nan a keda Jerusalem. Nan provisionnan a cuminsá caba, pero nan a pone comodidad material na di dos lugá. Nan a haña e Mesías! Nan rumannan cristian a compartí cu nan loke nan tabatin na cosnan material, i asina nan tur por a sigui “dedicá nan mes n’e siñansa dje apostelnan i . . . na oracion.”—Echonan 2:42.

Cu tempu, algun cristian a cuminsá neglishá e necesidad pa asociá regularmente na reunion. (Hebreonan 10:23-25) Kisas nan a bira materialista i a neglishá cosnan spiritual miéntras cu nan tabata purba garantisá un siguridad financiero pa nan mes i nan famia. Despues cu apostel Pablo a urgi su rumannan pa no bandoná e reunionnan, el a skirbi: “Laga boso moda di biba sea liber di amor pa placa, miéntras boso ta contentu cu e cosnan actual. Pasobra el a bisa: ‘Lo mi no bandoná bo di ningun manera ni desampará bo di ningun manera.’”—Hebreonan 13:5.

Pablo su conseho a resultá di ta mashá oportuno. Rond di cincu aña despues cu Pablo a skirbi su carta n’e hebreonan, e ehército romano bou di direccion di Cesto Galo, a rondoná Jerusalem. Cristiannan fiel a corda Jesus su spiertamentu: “Ora boso haña bista di [esaki] . . . , laga e hende riba dak di cas no baha, ni drenta paden pa saca nada for di su cas; i laga e hende den cunucu no bolbe pa cosnan atras pa coge su bistí exterior.” (Marco 13:14-16) Nan tabata sa cu nan sobrebibencia a dependé, no dje stabilidad di nan empleo of e balor di nan pertenencianan material, sino di nan obedencia na instruccionnan di Jesus. Compará cu cualkier persona cu no por a libra su mes di amor pa placa, esnan cu a sigui e conseho di Pablo i a pone cosnan spiritual na promé lugá, sin duda a haña cu tabata mas fácil pa laga cas, empleo, paña i cosnan di balor personal atras pa hui bai n’e cerunan.

Con Algun Ta Pone Cosnan Importante na Promé Lugá Awe

Awe, cristiannan fiel ta gusta asociá regularmente cu nan rumannan, i hopi di nan ta haci sacrificio pa nan por asistí na nan reunionnan. Na cierto lugánan, ta trabou di warda so tin. Un ruman homber ta ofrecé pa reemplasá su coleganan diasabra anochi, ora mayoria hende den su comunidad ta preferá di recreá, si su coleganan na nan turno ta dispuesto pa traha su wardanan ora e tin cu traha riba dia di reunion. Otro rumannan cu ta traha warda, ta asistí na reunion di otro congregacion den cercania si nan trabou ta stroba nan di bai na nan mes congregacion. Dje forma aki, casi nunca nan ta falta reunion. Na Cánada, un señora cu a cuminsá mustra interes den e berdad a comprendé mashá lihé cu e Scol di Ministerio Teocrático i Reunion di Sirbishi ta importante, pero su orario di trabou tabata strob’é di asistí. P’esei, el a paga un colega di trabou pa traha su warda pa asina e por tabata liber pa asistí na e reunionnan importante aki.

Hopi ruman cu ta sufri di malesa crónico, masha poco biaha ta perde nan reunion. Ora nan no por bai Salon di Reino, nan ta scucha e reunion na cas via un coneccion telefónico of grabá riba caset. Nos mester encomendá e aprecio cu nan ta mustra p’e percuracionnan spiritual cu Jehova ta haci mediante su “esclabo fiel i discreto”! (Mateo 24:45) Cristiannan cu tin cu cuida nan mayornan di edad avansá ta apreciá mashá ora un ruman homber of ruman muher ofrecé pa keda cerca e mayor pa asina e ruman cu ta duna cuido por asistí na un reunion di congregacion.

Planea Adelantá!

Mayornan cu ta conciente di nan mes necesidad spiritual ta yuda nan yunan reconocé e balor di reunionnan cristian. Generalmente, nan ta verwagt cu nan yunan ta haci nan huiswerk ora nan hañ’é, en bes di laga nan acumulá. Riba dianan di reunion, muchanan ta haci nan huiswerk asina cu nan yega cas for di scol. No ta permití hobi of otro actividadnan interferí cu reunionnan di congregacion.

Como esposo i tata, bo ta duna prioridad na asistencia na reunion? Como esposa i mama, bo ta haci esfuerso pa planea bo responsabilidadnan di tal forma cu bo ta laga lugá p’e reunionnan? Como tiener, bo ta programá bo huiswerk rondó di bo reunionnan of bo ta programá bo reunionnan rondó di bo huiswerk?

Reunion di congregacion ta un percuracion amoroso di parti di Jehova. Nos mester haci tur esfuerso pa participá den e areglo ei. Jehova lo bendicioná bo ricamente si bo pone e cosnan importante na promé lugá!