Un Hobensita A Bolbe Biba!

Yairo tambe tabata presente ora Hesus a kura e señora ku tabatin sangramentu. Yairo lo a pensa ku Hesus lo por a yuda su yu muhé tambe, aunke el a asumí ku pa e ora ei su yu lo ‘mester tabata morto kaba.’ (Mateo 9:18) Pero por a hasi algu ainda pa yuda e yu akí?

Wèl, miéntras ku Hesus tabata papiando ku e señora ku el a kura, algun hòmber di e kas di Yairo a bin bisa Yairo: “Bo yu muhé a muri. Pakiko sigui molestiá e Maestro?”—Marko 5:35.

Esei sí tabata un notisia tristu. Yairo, kende tabata un hòmber masha respetá den komunidat, a keda kompletamente kibrá, sin por a hasi nada pa su úniko yu muhé. Ma Hesus, kende a tende loke e hòmbernan a bisa, a konsolá Yairo i a bis’é: “No preokupá; djis mustra fe.”—Marko 5:36.

Anto el a kompañá Yairo bai su kas. Ora nan a yega na e kas, tabatin un gran konmoshon: E hendenan tabata yora i bati nan pechu di tristesa. Hesus a drenta e kas i a bisa algu ku a sorprendé e hendenan. El a bisa: “E mucha no a muri; ta na soño e ta.” (Marko 5:39) Ora nan a tende esei, nan a hari, pasobra nan tabatin sigur ku e mucha a muri. No opstante, Hesus, usando e poder ku Dios a dun’é, tabata bai mustra nan ku ta posibel lanta hende for di morto manera ta lanta hende for di un soño profundo.

Hesus a pidi tur hende pa sali pafó ku eksepshon di Pedro, Santiago, Huan i e mayornan di e mucha ku a muri. I huntu ku e sinku personanan akí, Hesus a bai kaminda e mucha tabata drumí. Hesus a kue man di e mucha tene i a bisa: “‘Talita kumi,’ ku tradusí ta nifiká: ‘Hobensita, mi ta bisa bo: “Lanta ariba!”’” (Marko 5:41) Mesora e hobensita a lanta i a kuminsá kana. Bo por imaginá bo kon kontentu Yairo i su kasá a bira ora nan a mira esaki? Hesus a bisa nan pa duna e mucha algu di kome; esei tabata pa konvensé e hendenan mas ainda ku e mucha tabata na bida atrobe.

Despues, Hesus a bisa e mayornan di e mucha pa no konta nada di loke a pasa, meskos ku el a bisa e hendenan ku el a kura anteriormente. Tòg, e notisia a plama “den henter e region.” (Mateo 9:26) Ta di komprondé ku un hende lo bira masha emoshoná ora e mira un persona lanta for di morto. Esaki ta e di dos resurekshon registrá den Beibel ku Hesus a efektuá.